ရီပတ်ဘလစ်ကန်လွှတ်တော်ကြောင့် အမေရိကန်အစိုးရယန္တယား ရပ်ဆိုင်းရတော့မည်
မိုးမခသတင်းကောက်နုတ်ချက်၊ အောက်တိုဘာ ၁၊ ၂၀၁၃
စက်တင်ဘာ ၃၀၊ ၀ါရှင်တန်ဒီစီ၊ ညနေခင်းသတင်းများအရ ရီပတ်ဘလစ်ကန်အမတ်အများစု ကြီးစိုးတဲ့ အောက်လွှတ်တော်က အိုဘားမားအစိုးရနှင့် ဒီမိုကရက်တို့၏အထက်လွှတ်တော်ကို ဘတ်ဂျက်အရေး အလျော့မပေးတန်း တင်းမာနေမှုများကြောင့် သဘောတူချက်ချက်မရနိုင်ဖြစ်နေပါတယ်။ အောက်တိုဘာ ၁ သို့ မကူးမီ ညှိနှိုင်းအဖြေမရှာနိုင်ပါက ဘတ်ဂျက်မရှိတဲ့ အမေရိကန်အစိုးရရဲ့ ယန္တရားမှာ (government shutdown) လို့ခေါ်တဲ့ ရပ်ဆိုင်းမှုနဲ့ ရင်ဆိုင်ရမှာ ဖြစ်ပါတယ်။ အစိုးရရပ်ဆိုင်းတယ်ဆိုတာ ပထမအဆင့် အရေးပေါ်အစိုးရလုပ်ငန်းများနဲ့ ၀န်ထမ်းများကလွဲရင် ကျန်အစိုးရ ၀န်ထမ်းများ လစာထုတ်ပေးနိုင်မှာ မဟုတ်ပါဘူး။ အစိုးရ၀န်ထမ်း ၈ သိန်းလောက် လစာမဲ့ အလုပ်လုပ်ရမှာ ဖြစ်ပါတယ်။
ရီပတ်ဘလစ်ကန်လွှတ်တော်အမတ်များက အိုဘားမားအစိုးရရဲ့ ကျန်းမာရေးစောင့်ရှောက်မှု အာမခံချက်ဥပဒေ ကို ရုတ်သိမ်းရန်၊ တနှစ်ဆိုင်းငံ့ရန်၊ သဘောမတူပါက အစိုးရဘတ်ဂျက်ကို သဘောတူခြင်းမပြုလို့ တောင်းဆိုနေတာ ဖြစ်ပါတယ်။ စီးပွားရေနလံထူခါကာစ အမေရိကန်မှာ အဲသည်ကျန်းမာရေးဥပဒေသစ်ကြောင့် စီးပွားရေးလုပ်ငန်းများ၊ အလုပ်ရှင်များ၊ အလုပ်သမားများ ပိုမိုနစ်နာနိုင်မှာကို ကာကွယ်ဖို့ ရီပတ်ဘလစ်ကန်တွေက ဘတ်ဂျက်ကို အကြပ်ကိုင်နေတာဖြစ်ပါတယ်။ သူတို့အကြပ်ကိုင်တာကြောင့် နဂိုကတည်းက အလုပ်ရှိပြီးသား အလုပ်သမားတွေ၊ ၀န်ထမ်းတွေ အလုပ်တွေ ထိခိုက်ရမယ့်ကိန်း ဆိုက်နေပါတယ်။
ကျန်းမာရေးဥပဒေသစ်ရဲ့ ရသုံးစာရိတ်က အခုသူတို့အကြပ်ကိုင်နေတဲ့ ဘတ်ဂျတ်နဲ့ တိုက်ရိုက် မသက်ဆိုင်ပါဘူး။ အစိုးရက သီးခြား အခွန်များ၊ ရသုံးငွေများ၊ အခြားစီမံကိန်းများနဲ့ ဆောင်ရွက်ဖို့ အချိန်စာရင်း၊ လုပ်ငန်းအဆင့်တွေ ချမှတ် ဆောင်ရွက်နေပြီးဖြစ်ပါတယ်။ အောက်တိုဘာ ၁ ကနေ ၂၀၁၄ နှစ်ဆန်းအထိ အစိုးရရဲ့ ၀န်ဆောင်မှုနဲ့ ကျန်းမာရေးအာမခံချက်မရှိသူများ စောင့်ရှောက်မှုခံယူနိုင်ဖို့ လျောက်ထားတာတွေ၊ ကျန်းမာရေးအာမခံ ၀ယ်ယူတာတွေ၊ အစိုးရဆီက စာရိတ်မျှပေးမှု ရယူတာတွေ လုပ်ကြတော့မှာ ဖြစ်ပါတယ်။
ဒါကို တလျောက်လုံး ကန့်ကွက်ခဲ့တဲ့ အောက်လွှတ်တော်အမတ်တွေက ဘတ်ဂျက်ချပေးတဲ့ လုပ်ပိုင်ခွင့်ကို အခွင့်ကောင်းယူပြီးတော့ ကျန်းမာရေးဥပဒေသစ်ကို အကောင်အထည်မဖော်နဲ့၊ ဖော်ရင် ဘတ်ဂျက်ချမပေးဘူးလို့ တောင်းဆိုတာ ဖြစ်ပါတယ်။ ပထမ အဲလိုတောင်းဆိုတာကို အထက်လွှတ်တော်က သဘောမတူလို့ ဒုတိယအကြိမ် ဆုံးဖြတ်ရာမှာ ဒါဆိုရင် အိုဘားမားကျန်းမာရေးဥပဒေသစ်ကို တနှစ်ဆိုင်းရမယ်လို့ ပြင်ဆင်တောင်းဆိုပြန်ပါတယ်။ ယမန်နေ့ (စက်တင်ဘာ ၃၀) အထက်လွှတ်တော်က ထပ်မံပယ်ချလိုက်ပြန်တာကြောင့် အောက်လွှတ်တာ်၊ အထက်လွှတ်တော်နဲ့ အစိုးရတို့ကြား ဘတ်ဂျက်ကိစ္စ သဘောတူညီချက် မရပြန်တာဖြစ်ပါတယ်။ ဒါဆိုရင် အောက်တိုဘာ ၁ မှာ အစိုးရယန္တယားတွေ လည်ပတ်မှု အဆင့်ဆင့် ရပ်ဆိုင်းကုန်မှာ ဖြစ်ပါတယ်။
အောက်လွှတ်တော်က လူများစု ရီပတ်ဘလစ်ကန်အမတ်တွေက အိုဘားမားကျန်းမာရေးဥပဒေသစ်ကို သူတို့လွှတ်တော်မှာ အကြိမ် ၄၀ ထက်မနည်း ပယ်ဖျက်ဖို့ အဆိုသွင်းခဲ့ဖူးပါတယ်။ အထက်လွှတ်တော်က တောက်လျောက် ပယ်ချခဲ့ပြီး ဖြစ်ပါတယ်။ ဒါ့အပြင် ပြည်ထောင်စုတရားရုံးချုပ်မှာ ရီပတ်ဘလစ်ကန်ပြည်နယ် ၀န်ကြီးချုပ်တွေကနေတဆင့် ဗဟိုအစိုးရကို အခြေခံဥပဒေနဲ့ မညီဘူးလို့ တရားစွဲပြီး စိန်ခေါ်ခဲ့ပါသေးတယ်။ အဲသည်မှာလည်း ပြည်ထောင်စုတရားရုံးချုပ်က ပယ်ချခဲ့ပြီး ဖြစ်ပါတယ်။ သူတို့ကြီးစိုးတဲ့ ပြည်နယ်တွေက အစိုးရအဆင့်ဆင့်မှာ အိုဘာမားကျန်းမာရေးဥပဒေသစ် ပြည်နယ်အဆင့် အသက်သွင်းခွင့် မရှိအောင်လည်း နည်းမျိုးစုံနဲ့ ဟန့်တား အချိန်ဆွဲဖို့ ဆက်ကြိုးစားနေကြပါတယ်။
အခုလို အောက်လွှတ်တော်က ရီပတ်ဘလစ်ကန်အမတ်တွေ အများစု (တီးပါတီအုပ်စုလို့ လူသိများ)ရဲ့ နိုင်ငံရေး ပိတ်ဆို့အကြပ်ကိုင်မှုဟာ ဒီ ၂၀၁၃ ဘတ်ဂျက်အရေးမှာ အကြီးကျယ်ဆုံး ဖြစ်တယ်လို့ ဆိုကြပါတယ်။ သမ္မတ အိုဘားမားကတော့ အောက်လွှတ်တော်က အဆိုပါအမတ်တွေကို ပြစ်တင်လိုက်ပါတယ်။ ဒီဘတ်ဂျက်ကိစ္စအပြင် အောက်တိုဘာလယ်မှာ ဆုံးဖြတ်သဘောတူပေးရမယ့် Debt Ceiling လို့ခေါ်တဲ့ အစိုးရအကြွေးယူခွင့် တိုးမြှင့်ဖို့အရေးကိုလည်း သူတို့က အကြပ်ကိုင်ဦးမယ်လို့ ပြောနေကြပါတယ်။ အိုဘားမားနဲ့ ဒီမိုကရက်အမတ်တွေကတော့ ရှေးက ဥပဒေနဲ့အညီ ဆုံးဖြတ်ထားပြီးသာ သဘောတူချက်တွေ၊ မူဝါဒတွေကို ဆက်လက်အကောင်အထည်ဖော်တဲ့နေရာမှာ မိမိတဦးချင်း အုပ်စုတစုချင်းရဲ့ သဘောထားတွေ ရှေ့တန်းတင်ပြီး နိုင်ငံရေးမကစားသင့်ဘူးလို့ တုန့်ပြန်ကြပါတယ်။
၁၉၉၅ တုန်းကလည်း ဒီမိုကရက် ကလင်တန်အစိုးရနဲ့ ရီပတ်ဘလစ်ကန် အောက်လွှတ်တော်တို့ ဘတ်ဂျက်ကိစ္စ အငြင်းပွားခဲ့ရာမှာ အစိုးရယန္တယားကို ၉၅ နှစ်ကုန်မှာ တကြိမ်၊ ၉၅-၉၆ နှစ်ကူးမှာ တကြိမ် ရပ်ဆိုင်းခဲ့ရပါတယ်။ အဲသည်နောက် ရီပတ်ဘလစ်ကန်အမတ်တွေ နောက်ရွေးကောက်ပွဲတွေ အရေးနိမ့်ပြီး မဲဆန္ဒရှင်ပြည်သူတွေရဲ့ ငြိုငြင်မှုဒဏ်ကို ခံခဲ့ရပါတယ်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ