ရန်လိုကျွဲ – ရန်ကုန်မြို့ တော်လှန်ရေး စတင်လေပြီ
(Yangon Globe) အောက်တိုဘာ ၁၇၊ ၂၀၁၄
ယခုအချိန်သည် ရန်ကုန်မြို့တခွင် ရပ်ကွက်အုပ်ချုပ်ရေးမှူးရုံးများ အလုပ်ပိုရှုပ်ချိန်ဖြစ်သည်။
အဘယ့်ကြောင့်ဆိုသော်… ရွေးကောက်ပွဲကြောင့်ဖြစ်၏။ ရွေးကောက်ပွဲအတွက် အထူးတလည် ပြင်ဆင်နေကြ၏။
ရွေးကောက်ပွဲ ဖြစ်လာမည်ဟု မည်သူ ထင်သနည်း၊
ငြိမ်းချမ်းရေးဖော်ဆောင်မှုအဆင်မပြေလျှင် ၂ဝ၁၅ ရွေးကောက်ပွဲ ကျင်းပရန် မသေချာသည့်သဘော လေသံပစ်သူက ပစ်နေသည်မဟုတ်လော ဟု မေးသူက မေးနိုင်သည်။
ဟုတ်သည်။ ၂ဝ၁၅ ရွေးကောက်ပွဲက ဂဏန်းမငြိမ်။
ယခု ရန်ကုန်တွင် ပြင်ဆင်နေကြသည့်အရာကား ၂ဝ၁၅ အတွက် မဟုတ်။
ရန်ကုန်မြို့တော်စည်ပင်သာယာရေးကော်မတီ အဖွဲ့ဝင်များကို ၂ဝ၁၄ မကုန်ခင် ရွေးကောက်တင်မြှောက်ရေး မဲပေးကြရန် ပြင်ဆင်နေခြင်း ဟူသတည်း။
ရန်ကုန်၏ ၂ဝ၁၄ ရွေးကောက်ပွဲ။
ဟုတ်သည်။ မြို့တော်စည်ပင် အဖွဲ့ဝင်တို့ကို မြို့တော်သူ မြို့တော်သားတို့ ကိုယ်တိုင်ကိုယ်ကျ ရွေးချယ်ကြတော့မည်။
ထို့ကြောင့် …. မဲဆန္ဒရှင်စာရင်းကို ကောက်ခံနေလေပြီ။
ကြေညာလှုံ့ဆော်ချက်စာရွက် ရုံးရှေ့ကပ်ပြီး ကြော်ငြာ၏။
ဆိုင်းဘုတ်ကြီးကြီးသုံးပြီး ကြော်ငြာ၏။
ရပ်ကွက်လူကြီးတို့က အသံချဲ့စက်ဖွင့် သို့မဟုတ် အော်လံကိုင်ပြီး တစ်လမ်းဝင် တစ်လမ်းထွက် ကြော်ငြာ၏။
ဤမြင်ကွင်းတို့မှာ ဒီမိုကရေစီ၏ အသီးအပွင့်များပင်တည်းဟု ဆိုရလျှင် လွန်အံ့မထင်။
မြို့တော်စည်ပင်သာယာရေးကော်မတီသည် တော်လှန်ရေးကြီးတစ်ရပ်ကို ဆင်နွှဲလိုက်ခြင်းဖြစ်သည်ဟုပင် သမိုင်းဆရာတို့က မှတ်တမ်းတင်ကြဖွယ် ရှိသည်။
မြန်မာတို့၏ တော်လှန်ရေးသည် နိုင်ငံတကာကို ပုံတူကူးမချ၊ မြန်မာ့နည်း မြန်မာ့ဟန် စစ်စစ် ဖြစ်တော့သည်ဟုလည်း သမိုင်းဆရာတို့က မှတ်တမ်းတင်လာကြဖွယ် ရှိနေသည်။
နိုင်ငံတကာတွင် မြို့ကြီးသူမြို့ကြီးသားတို့က ၎င်းတို့၏ မြို့တော်ဝန်ကို ရွေးကောက်ကြ၏။
ရန်ကုန်တွင်မူ ထိုသို့ မဟုတ်။
မဟုတ်ရေးချ မဟုတ်။
မြို့တော်ဝန်သည် မိုးကျရွှေကိုယ် ဖြစ်လေ၏။
အထက်မှ လာ၏။
မြို့တော်ဝန်ကို ပြည်သူတို့ကမရွေး၊ ရွေးစရာမလို။
မြို့တော်ဝန်ကို ဗိုလ်ချုပ်ကြီးတို့က ရွေးချယ်သည်။
သို့သော်… ဒီမိုကရေစီမဆန်လိုက်လေ ဟု ကဲ့ရဲ့သံများ မကြားရချေ။
ဗိုလ်ချုပ်ကြီးတို့ထံမှ ဒီမိုကရေစီထွက်မလာနိုင်မှန်း သဘောပေါက်ထားပြီးဖြစ်လေသောကြောင့် တိတ်ဆိတ်နေကြခြင်းလည်း ဖြစ်နိုင်သည်။
မည်သို့ပင်ဆိုစေ … မြို့တော်ဝန်မှအပ တခြားသော ရန်ကုန်မြို့တော်စည်ပင်သာယာရေးကော်မတီ အဖွဲ့ဝင်များကို မကြာမီ ရွေးကြပေတော့မည်။
ဤသည်ကား ကြီးမားလှစွာသော မဟာ့မဟာ အပြောင်းအလဲကြီး ဖြစ်တော့သည်။
ရန်ကုန်သည် အရေးကြီးသည်။
အလောင်းမင်းတရားကြီးက ရန်ကုန် ဟု ကင်ပွန်းတပ်ခဲ့သောမြို့။
ဗိုလ်ချုပ်ကြီးတို့ သေနတ်စွမ်း ဗုံးစွမ်းပြခဲ့သောမြို့။
နိုင်ငံတကာ သံတမန်များ ရုံးစိုက်ရာမြို့။
စီးပွားရေးမြို့။
အနုပညာတပ်ပေါင်းစုမြို့။
စာနယ်ဇင်းခံတပ်မြို့။
ထို့ကြောင့် အရေးကြီးသည်။ အင်မတန် အရေးကြီးသည်။
ဤသို့သော အနေအထားရှိသည့် ရန်ကုန်သည် အပြောင်းလဲကြီး ပြောင်းလဲတော့မည်။
ဆိုခဲ့သလိုပင်… မြို့တော်စည်ပင်က တော်လှန်ရေး ဆင်နွှဲလေပြီ။
မြို့တော်ကြီးအတွင်း အဆင်ပြေစေရေးအတွက် စွမ်းဆောင်နေသော ဤကော်မတီ၏ တော်လှန်ရေးကို ရန်ကုန် မြို့တော်သူ မြို့တော်သားတို့ ပူးပေါင်းဆင်နွှဲကြပါ၏လော။
ကြည့်ကြပါစို့။
အိမ်တစ်အိမ်တွင် အသက် ၁၈ နှစ် ပြည့်ပြီးသူ အများအပြား ရှိနေတတ်သည်။ ဒီအရွယ်ကျော်လွန်ပါက မဲပေးနိုင်ကြပြီ။
သို့သော်… ရန်ကုန်၏တော်လှန်ရေးက တစ်မျိုးတစ်ဖုံ ဆန်းကြယ်၏။ ကိုယ်ပိုင်ဟန် ရှိ၏။
၁၈ နှစ် ပြည့်ပြီးသူ ရန်ကုန်သူရန်ကုန်သားတိုင်း ၂ဝ၁၄ နှစ်ကုန်ပိုင်း ရွေးကောက်ပွဲတွင် မဲပေးခွင့် ရကြမည်မဟုတ်သေး။
အဘယ့်ကြောင့်ဆိုသော် …
(ဤ အဘယ့်ကြောင့်ဆိုသော်ကို ဖြူဖြူကျော်သိန်းလေသံဖြင့်လည်း ဖတ်နိုင်၏)
အဘယ့်ကြောင့်ဆိုသော်… အိမ်ထောင်စု တစ်စုလျှင် တစ်မဲသာ ပေးနိုင်ခြင်းကြောင့်ပင်။
ရွေးကောက်ပွဲသို့ မည်သူသွားပြီး မဲထည့်မည်နည်း ဟူသည်ကို မိသားစုအတွင်း ရွေးကောက်ပွဲ လုပ်ရပေဦးမည်။
အရွေးခံရသူက မဲရုံသို့ ချီတက်။
လုပ်နည်းလုပ်ဟန်မှာ ရန်ကုန်သူ ရန်ကုန်သားတို့ ရွေးကောက်ပွဲနှင့် ပိုမိုရင်းနှီးကျွမ်းဝင်လာစေရေး ရည်ရွယ်ဟန်ရှိ၏ဟု ဆိုရချေတော့မည်။
ကောင်း၏။ အလွန့်အလွန် ကောင်း၏။
ရန်ကုန်၏ ဒီမိုကရေစီအစ မြို့တော်စည်ပင်က ဟု သမိုင်းဆရာတို့ ကောက်ချက်ချကြပေတော့မည်။
အပြောင်းအလဲဖြစ်အောင် ပြုလုပ်ခြင်းသည် တော်လှန်ရေးမည်။
ရန်ကုန်မြို့၏ တော်လှန်ရေး စတင်လေပြီ။ ။
ရွေးကောက်ပွဲအတွက် ဆော်သြနေသည့် ရန်ကုန်မြို့လယ်မှ အုပ်ချုပ်ရေးမှူးရုံးတစ်ရုံး (ဓာတ်ပုံ – ထက်အောင် / The Yangon Globe)
(The Yangon Globe မှာ တင်သမျှ ပုံမှန် ဖတ်ရှုနိုင်ဖို့https://www.facebook.com/TheYangonGlobe ကို Like လုပ်ထားပါ)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
ပြည်သူဆန္ဒမပါဘဲ ၂၀၀၈အခြေခံဥပဒေကို အတင်းအကြပ် အတည်ပြုခဲ့သူများက ရန်ကုန်မြို့တော်စည်ပင်သာယာရေးကော်မတီအဆင့်ဆင့်ကို ပြည်သူများက ရွေးချယ်ပေးသယောင် လုပ်ကြလေဦးမည်။ ပညာရှင်များအသံ သတင်းစာများအသံ အားပါးတရ ကြားချင်ပါသည်။ အ်ိမ်ထောင်စုလူဦးရေ ဘယ်လိုများ အတည်ပြုကြမည်နည်း။ ယာယီသန်းခေါင်စာရင်းများကိုပါ ယူကြမည်လား။ အသက်တစ်ဆယ့်ရှစ်နှစ်ပြည့်သူတိုင်း ဆန္ဒမဲပေးပိုင်ခွင့်ရှိသည့် ၂၀၀၈အခြေခံဥပဒေနှင့်ရော ဆန့်ကျင်မနေဘူးလား။ အဓိကကျသည့် မြို့တော်ဝန်ကိုတော့ ဘာကြောင့် ပြိုင်ဆိုင်အရွေးခံခွင့်မပေးတာပါလဲ။ စွမ်းဆောင်ရည်ရှိသူများကို ဤနေရာမှတဆင့် တက်လာမည်ကို မလိုလား၍လားဟုပင် ထင်မြင်ပါသည်။