Uncategorized

Maung Luu Pay – Articles

အမုန်းဆိုတဲ့စကား မကြားလိုတော့ပါ
မောင်လူပေ
အောက်တုိုဘာ ၆၊ ၂၀၁၃


ကွယ်လွန်သွားရှာပြီဖြစ်တဲ့ ဆရာကြီး ဒဂုန်တာရာရဲ့ လက်သုံးစကားလေးတခု ရှိပါတယ်။
“ရန်သူမရှိ၊မိတ်ဆွေသာရှိ၏ “ တဲ့။ ဒီစကားလေးအတိုင်းသာ လူတိုင်းလိုက်နာ၊ကျင့်သုံးနိုင်ကြမယ်ဆိုရင် မောင်လူပေတို့ ရဲ့ ရွှေနိုင်ငံတော်ကြီးဟာလည်း အလွန်အေးချမ်းသာယာတဲ့ နိုင်ငံကြီးတခု ဖြစ်နေမှာ အမှန်ပါ။ ခုတော့ ဒီအမုန်းတရားတွေ ရှေ့တန်းတင်ရင်း လူလူချင်း အနိုင်ကျင့် တိုက်ခိုက် သတ်ဖြတ်နေကြတာတွေ မကြာခဏ ဆိုသလို တွေ့ မြင်ကြားသိနေရတာမို့ အေးချမ်းစွာ အတူရှင်တွဲနေထိုင်လူသူ ပြည်သူအများအတွက် စိတ်မချမ်းသာစရာတွေဖြစ်ရသလို ဒီမိုကရေစီလမ်းကြောင်းလျှောက်လမ်းဖို့ ကြိုးစားနေကာစ နိုင်ငံတခု အနေနဲ့ လည်း ကမ္ဘာ့ အလယ်မှာ သိက္ခာကျစရာတွေ ဖြစ်တည်နေရပါတယ်။
ဆယ်စုနှစ်ပေါင်းများစွာ သွေးခွဲအုပ်ချုပ် ဖိနှိပ်ခဲ့မှုဆိုတဲ့ အကြောင်းတရားတွေကြောင့် လူမျိုးစုအချင်းချင်းကြားမှာ၊ ယုံကြည်ကိုးကွယ်ရာ ဘာသာမတူသူများကြားမှာ အမုန်းတရားတွေ မယုံကြည်မှုတွေဆိုတဲ့ အကျိုးတရားတွေ ဖြစ်တည်လာခဲ့ရပါတယ်။ ဒါတွေကို အခွင့်ကောင်းယူပြီး အမျိုးသားရေးဝါဒီဆိုသူ မျက်ကန်းမျိုးချစ်တစုက ဆန့် ကျင်ရေးတရားတွေ ဖြန့် ဝေပါတော့တယ်။ တိုင်းပြည်ကို ချောက်ထဲတွန်းချမဲ့ ဒီလူစုကို အစိုးရမင်းများကိုယ်တိုင် ယနေ့ အထိ ထိရောက်စွာ အရေးမယူနိုင်ခဲ့တာကလည်း မေးခွန်းထုတ်စရာတခု ဖြစ်လာပြန်ပါတယ်။ တွေ့ ဆုံဆွေးနွေးမှုလို့ ခေါ်တဲ့ ဒိုင်ယာလော့ ယဉ်ကျေးမှု ဖြစ်တည်ချင်း နည်းပါးတဲ့ နိုင်ငံမို့ လည်း အမှားအမှန် နောက်ထားပြီး တခုခုဆိုရင် ဝိုင်းသမပေးကြမဲ့ ပရိတ်သတ်ကလည်း ဒုနဲ့ ဒေးပါ။ အားလုံးကောင်းပါသည်ခင်ဗျားဆိုပြီး သတင်းအမှောင်ချထားခဲ့ကြတာလည်း ကြာခဲ့ပြီဆိုတော့ ပွင်းလင်းပြီဆိုတဲ့ဒီနေ့ ခေတ်မှာတောင် သတင်းသမားတွေကိုယ်တိုင် မီဒီယာကျင့်ဝတ်တွေ သင်ယူလေ့လာနေရဆဲမို့  ရောသမမွှေ သတင်းပေါင်းစုံထဲက သတင်းသန့် သန့် လေးတွေကို ပြည်သူတွေ ရှာဖွေဖတ်ရှုနေကြရတာပါ။ 
ဒီလို ပဋိပက္ခတွေဖြစ်တိုင်း ဖြစ်ရပ်ရဲ့ အဓိကအကြောင်းအရာကို မဖြေရှင်းပေးဘဲ ရေတိုဖြေရှင်းနည်းဖြစ်တဲ့ အင်အာားသုံးအာဏာပြနည်း လမ်းတွေနဲ့ သာ ကြုံတွေ့ ခဲ့ရတာကြောင့်လည်း အစိုးရမင်းများကို အယုံအကြည်ကင်းမဲ့ကာ လက်နက်စွဲကိုင်တိုက်ခိုက်မှုတွေပိုလို့ ဖြစ်ပေါ်လာခဲ့ရပါတယ်။ အစိုးရအဖွဲ့ ရဲ့  အကြီးအကဲဖြစ်တဲ့ သမ္မတကိုယ်တိုင် ရောက်ရှိနေတဲ့ အချိန်မှာတောင် ဒီလို အဖြစ်အပျက်တွေ ဖြစ်ပျက်ခဲ့တာကိုကြည့်ရင် သိနိုင်ပါတယ်။
ဒီလိုနှစ်ပေါင်းများစွာ ဖြစ်တည်နေတဲ့ အမုန်းတရားတွေ မယုံကြည်မှုတွေကို နေ့ ချင်းညချင်း ပျောက်သွားအောင် လုပ်ဖို့ ဆိုတာကတော့ မဖြစ်နိုင်ပါဘူး။ ဒါပေမဲ့ ဒီအရာတွေ ရော့နဲ ကျဆင်းလာအောင် လုပ်ယူလို့ တော့ရနိုင်ပါတယ်။ အကြမ်းဖက်သမား လူရမ်းကားများနဲ့  ထိုသူများကို သွေးထိုးလှုံ့ ဆော် နေသူလူတစုကို ထိရောက်စွာဖမ်းဆီးနှိမ်နှင်းကာ အရေးယူအပြစ်ပေးရေးက ပထမခြေလှမ်းဖြစ်ပြီး ပြည်သူအများလေးစားကြည်ညိုကြတဲ့ ရဟန်းရှင်လူတို့ မှ ပြည်သူအများကို ပညာပေးရေးက ဒုတိယခြေလှမ်းဖြစ်ပါတယ်။    
ပထမခြေလှမ်းဖြစ်တဲ့ ဥပဒေအရ အရေးယူရေး အပိုင်းကို ထိရောက်စွာ အကောင်အထည်ဖေါ်ဆောင်ဖို့ ကလည်း သိပ်ခက်ခဲလှတာတော့ မဟုတ်ပါဘူး။ ပွင့်လင်းလာတဲ့ အိုင်တီ ခေတ်မို့  ပဋိပက္ခဖြစ်ပြီဆိုရင်ပဲ အချိန်နဲ့  တပြေးညီ သတင်းတွေက အင်တာနက်မှာ ဓါတ်ပုံများနဲ့ အတူ ဝေဆာစွာ တွေ့ နေရတာပါ။ ပြည်သူအများကလည်း ထိရောက်စွာ အရေးယူမှုတွေကို မြင်တွေ့ လိုလှပါပြီ။ လှုံ့ ဆော်ပေးနေတဲ့ အဖွဲ့ ပေါင်းစုံနဲ့  ပါဝင်ပတ်သက်ခဲ့သူအများစုကတော့ ယနေ့ တိုင် ပန်းပန်နေဆဲတွေ့ နေရပါတယ်။
ဒုတိယခြေလှမ်းဖြစ်တဲ့ ပညာပေးရေး အစီအစဉ်ကိုလည်း နိုင်ငံတော် အဆင့် လုပ်ဆောင်နေတာကိုလည်း မကြားမိသေးပါ။ ယနေ့ ကမ္ဘာပေါ်မှာ မတူညီသူချင်း ငြိမ်းချမ်းစွာ အတူယှဉ်တွဲနေထိုင်ခြင်းကိုသာ ယဉ်ကျေးတဲ့လူ့ အဖွဲ့ အစည်းက လက်ခံတယ်ဆိုတာ ကျောင်းနေစအရွယ်ခလေးငယ်များရဲ့  သင်ရိုးညွှန်းတန်းများအထိ ထည့်သွင်းပေးခြင်း၊ပြည်သူအများကြားမှာ ပညာပေးလက်ကမ်းစာ စောင်များ ဖြန့် ဝေပေးခြင်း၊ ရေဒီယို၊တီဗွီ၊သတင်းစာ စတဲ့ အစိုးရပိုင် မီဒီယာများမှလည်း မတူညီသူများနဲ့  ငြိမ်းချမ်းစွာ အတူနေထိုင်ရေးကို အထောက်အကူပြုမဲ့ အစီအစဉ်များ ဖန်တည်း တင်ဆက်ပေးရေးတို့ ဟာ ပြည်သူအများအား ပညာပေးရေးအတွက် အလွန်အရေးကြီးတဲ့နေရာမှာ ရှိနေတာပါ။ အများပြည်သူများ၏ ရိုသေလေးစားမှုကို ရရှိသူများရဲ့ငြိမ်းချမ်းစွာ အတူယှဉ်တွဲနေထိုင်ရေးအပေါ်မှာရှုမြင်ကြတဲ့ အတွေးအမြင်များကိုပါ တွဲဖက်တင်ဆက်နိင်ဖို့ ကလည်း အရေးကြီးလှပါတယ်။ အခုလို အရေးကြီးလှတဲ့ အချိန်မျိုးမှာ သီတဂူဆရာတော် ဦးဆောင်တဲ့ နိုင်ငံပေါင်းစုံမှ ဘာသာရေးခေါင်းဆောင်ပေါင်းစုံက ပဋိပက္ခဖြစ်ပွားခဲ့တဲ့ နေရာစုံကိုသွားရောက်ပြီး ငြိမ်းချမ်းစွာအတူနေထိုင်ရေးအတွက် သွားရောက်ဟောပြောပေးကြမယ်ဆိုတဲ့ အစီအစဉ်မျိုးပေါ့။ ဒီလို အစီအစဉ်မျိုးကို နိုင်ငံတော်မှဦးဆောငိပြီး တိုင်းပြည်တဝှမ်း ချိမ့်ချိမ့်သဲကျင်းပပေးသင့်ပါတယ်။
ဒီလိုထိရောက်တဲ့ အရေးယူမှုများ၊ပညာပေးလုပ်ငန်းများကို အချိန်မှီ မဆောင်ရွက်နိုင်ခဲ့ရင်တော့  နိင်ငံတော်ရဲ့ ပုံရိပ်ဟာ ကမ္ဘာ့အလယ်မှာ ကျဆင်းမှုနဲ့ သာ ရင်ဆိုင်ရပြီး တိုင်းပြည်ပြန်လည်ထူထောင်ရေးလုပ်ငန်းများကိုအကြီးအကျယ်ထိခိုက်နိုင်ပါတယ်။ နိုင်ငံတော်ကို ဒီမိုကရေစီလမ်းကြောင်းပေါ်လျှောက်လှမ်းဖို့  အရှိန်ယူနေတဲ့ ခုလို အချိန်မျိုးမှာ ပြည်သူအများရဲ့  လိုလားချက်ဖြစ်တဲ့ အေးချမ်းသာယာတဲ့ နိုင်ငံတော်ကြီးကို အမုန်းတရားကင်းတဲ့ အပြုံးများဖြင့်သာ တည်ဆောက်နိုင်ကြပါစေလို့  ဆန္ဒပြုရင်း ကျော်ဟိန်းရဲ့   ကမ္ဘာသစ် သီချင်းထဲက စာသားလေးနဲ့  ဒီစာစုလေးကို နိဂုံးချုပ်ခွင့်ပြုပါ။

“ ရန်ပွဲတွေရပ်ပစ်၊ အမုန်းများရပ်ပစ်၊ရန်ပွဲတွေရပ်ပစ်။ “

သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts