သတင်းဆောင်းပါး

ဇာနီကြီး – POLICE ဆိုသည့် ရဲတပ်ဖွဲ့နှင့် မြန်မာကြေးစားလူမုိုက်ဂုိုဏ်းများ အလားအလာ

ဇာနီကြီး – POLICE ဆိုသည့် ရဲတပ်ဖွဲ့နှင့် မြန်မာကြေးစားလူမုိုက်ဂုိုဏ်းများ အလားအလာ

(မိုးမခ) ဇန်န၀ါရီ ၁၉ ၊ ၂၀၁၅


မကောင်းမှုလုပ်သူများကို ဘယ်သူတွေကထိမ်းချုပ်သလဲ..မေးခွန်းကို၊ ပူးလစ် ..POLICE ဆိုသည့်ရဲတပ်ဖွဲ့နှင့်  ရာဇဝတ်မှုဥပဒေက ထိန်းချုပ်သည်ဟု ယေဘူယ ပြောနိုင်ပါသည်။ အထက်ပါဓါတ်ပုံသည် ရန်ကုန်ပူးလစ်စ် မှုခင်းသတင်းစာစောင်မှ ဖြစ်သည်။  ရန်ကုန်ရဲတပ်ဖွဲ့မှာ စက်ဘီးဖြင့်သွားလာရသည်။ ရဲတပ်ဖွဲ့သည် အစွမ်းထက်နေဖို့လိုအပ်ပါသည်။ ဥပဒေ မစိုးမိုးသောနိုင်ငံများတွင် မကောင်းမှုလုပ်ငန်းလုပ်ကိုင်သူများ ကြောက်ရသော အဖွဲ့အစည်းတစ်ခု တိုးလာသည်။ ထောင်ထွက်လာသူများက ရပ်ကွက်ထဲရှိ၊ အလုပ်ကိုင်မရှိ၊ လုပ်ရဲကိုင်ရဲသူများကို ကျွေးမွေးကာ အုပ်စုဖွဲ့လုပ်ကိုင်သည်ဟု ဆိုသည်။ ကြေးစားလူမိုက်အုပ်စုများ ဖြစ်သည်။ လူမိုက်များကို ငွေပေးခိုင်းမှ ငွေတိုးချေးစားသူများ အကြွေးပြန်ရသည်။ အကြွေးသိန်း၅၀ လစဉ်အတိုး၆% (အတိုးလစဉ်၃သိန်း)  မပေးတော့ပဲ၊ ခပ်တည်တည်နေသူကို ရဲတိုင်သော်လည်း ပြန်မရ၊ လူမိုက်နှင့်သရဲခြောက် တောင်းခိုင်းမှ ပြန်ရပြီး၊ လူမိုက်အဖွဲ့ကို တဝတ်ပေးလိုက်ရသည့် ဖြစ်ရပ်များ၊ ရန်ကုန်မြို့နယ်များတွင် စတင်အမြစ်တွယ်မှု ရှိနေလေပြီ။ သာယာအေးချမ်းနေသော၊ နယ်မြို့ရွာများသို့ ကူးစက်မသွားမီ ကာကွယ်ကုသခြင်း၊ သုတ်သင်မှုလုပ်ရန်လိုပါသည်။

အဆိုပါလူဆိုး၊ လူမိုက်များမှာ ၄င်းတို့အပိုင်စားသတ်မှတ်နယ်မြေများတွင် လောင်းကစားလုပ်သူများ၊ ငွေတိုးချေးစားသူများ၊ လိုင်စင်မဲ့အရက်ဆိုင်၊ မူးယစ်ဆေးရောင်းဝယ်ဆိုင်၊ စသည့်စီးပွားရေးလုပ်ငန်းများရှင်များကို ဆက်ကြေးတောင်းခံကာ ရပ်တည်လျှက်ရှိကြောင်း၊ ထောင်ထွက်လူမိုက်ကြီးများကို ခေါင်းဆောင်တင်ပြီး၊ လူမိုက်ဂိုဏ်များအား ရဲတပ်ဖွဲ့မှလိုက်လံ နိုမ်နင်းနေရကြောင်း၊ ရဲတပ်ဖွဲ့သည်လည်း ဥပဒေအတိုင်း လူကောင်းများကို ကာကွယ်စောင့်ရှောက်ပြီး၊ မကောင်းသောအလုပ်အကိုင်များကို အပြတ်ရှင်းရန်လိုပါသည်။ မြန်မာနိုင်ငံပြုပြင်ပြောင်းလဲမှုတွင် တပ်မတော်စစ်တပ်မှာ အုပ်ချုပ်မှုကို ရဲတပ်ဖွဲ့များဖြင့် အစားထိုးရာတွင် လူငယ်များစွာ ရဲတပ်ဖွဲ့တပ်သားသစ်စုဆောင်းခဲ့သည်။ လစာ၊စရိတ်များ လောက်ငှအောင် စီရင်ပေးပြီး မြန်မာ့ရဲတပ်ဖွဲ့ သွေးသစ်လောင်းခဲ့သည်။

တချိန် ဒုတိယကမ္ဘာစစ်ကြီးပြီးဆုံးကာစ  ဗြိတိသျှအင်ပါယာ ကျဆုံးပြီး၊ အမေရိကန်အင်အားကြီးလာချိန် အမေရိကန်ကိုလိုနီဖြစ်သော ဖိလစ်ပိုင်နိုင်ငံသည် အာရှတိုက်တွင် ဂျပန်ပြီးလျှင် ဒုတိယအကြွယ်ဝ၊ချမ်းသာဆုံး နိုင်ငံဖြစ်ခဲ့ရသည်။ နောက်ပိုင်း ဖိလစ်ပိုင်သမ္မတ မားကို့စ်လက်ထက်မှ စတင်ပြီး၊ မကောင်းမှုလုပ်သူများကို အရေးမယူနိုင်ဖြစ်လာခဲ့သည်။ အထူးသဖြင့် ဖိလစ်ပိုင်ထိပ်ပိုင်းခေါင်းဆောင်၊ အစိုးရဥပဒေက လူချမ်းသာ၊ ကုမ္ပဏီကြီးများကို အခွန်မကောက်နိုင်ခြင်း (မြန်မာစကား-လိုင်စင်ပါမစ်)၊ နိုင်ငံတော်ဝင်ငွေကို ဘတ်ဂျတ်အသုံးစရိတ်များခြစားမှု (မြန်မာစကား-ဇီးသီးဗန်းမှောက်ခြင်း) ၂ခုကြောင့်၊ ဖိလစ်ပိုင်နိုင်ငံသည် ယခုအခါ ဗီယက်နမ်နိုင်ငံထက်ပင် ဆင်းရဲလာပြီဖြစ်သည်။

 

ဖိလစ်ပိုင်နိုင်ငံတောရွာများကို သွားကြည့်ပါက၊ မြန်မာကျေးလက်ဒေသများကဲ့သို့ ဆင်းရဲမွဲတေသူများပြားပြီး ချမ်းသာသူများက အလွန်ချမ်းသာနေသည်။ လူလတ်တန်းစား ဆိုသူများမှာ နိုင်ငံခြားသွားပြီးအလုပ်လုပ်သူ ၁၀သန်းကျော်တို့ဖြစ်သည်။ ကမ္ဘာ့အိမ်ဖေါ်ဈေးကွက်၊ သင်္ဘောသားဈေးကွက်၊ အလုပ်သမားဖြစ်ရေးမှာ ဖိလစ်ပိုင်ပညာတတ်သူများ၏ ရည်မှန်းချက်ဖြစ်သည်။ ပြည်တွင်းက ဆင်းရဲမွဲတေနေသူ အများစုဘဝမှာ၊ ဖိလစ်ပိုင်ရဲတပ်ဖွဲ့နှင့် ဒေသခံကြေးစားလူမိုက်များ နှစ်ဘက်ကြားတွင်ရပ်တည်ရသည်။ မကောင်းမှုလုပ်ငန်းရှင်များ လောင်းကစားလုပ်သူများ၊ ငွေတိုးချေးစားသူများ၊ လိုင်စင်မဲ့အရက်ဆိုင်၊ မူးယစ်ဆေးရောင်းဝယ်ဆိုင်များကို ဆက်ကြေးတောင်းသည့်အပြင် နိုင်ငံခြားအလုပ်ကိုင်လုပ်သူများမှာ လူလတ်တန်းစားဖြစ်သောကြောင့် လိုင်စင်သေနပ်ကိုင်ပြီး၊ ကာကွယ်ရသည်။

ဖိလစ်ပိုင်တွင် မိမိကိုယ်ကာကွယ်ရန် သေနပ်လိုင်စင် ထုတ်ပေးထားသဖြင့်၊ အိမ်ရှေ့လာပြီး တံခါးခေါက်သူကို ပစ်သတ်လျှင် အမှုလွတ်သွားလေ့ရှိသည်။ ဥပဒေလည်း မစိုးမိုးတော့ပဲ၊ ငွေ၊အာဏာရှင်များက ကြီးစိုးသကဲ့သို့ ဖြစ်နေရှာသည်။ ပြည်ပရောက် ဖိလစ်ပိုင်လူမျိုးများ ပြည်တွင်းမှာ ဘာမှလုပ်ကိုင်စားဖို့ အခွင့်မရှိပါ။ ထိုင်း၊ ဗီယက်နမ်နိုင်ငံများတွင် ပြည်တွင်းလုပ်ငန်းရှင်များနှင့် အလုပ်သမားများကို အစိုးရဥပဒေ မျှတစေသည်။ အသေးစားနှင့်အလတ်တန်းစား လုပ်ငန်းရှင်များကို အစိုးရကပံ့ပိုးသည်။ ကုမ္ပဏီထောင်လျှင်၊ လိုင်စင်ပါမစ်လျှောက်လျှင် လွယ်ကူမြန်ဆန်သည်။ ရေရှည်တွင် ထိုင်းနိုင်ငံမှ ကုမ္ပဏီကောင်းများဖြင့် မြန်မာ့နိုင်ငံအလုပ်အကိုင် ဖန်တီးရပါမည်။ သို့မဟုတ်ပါက လူတိုင်းသေနပ်ကိုင်ပြီး ထိတ်လန့်နေရသည့် ကမ္ဘာတခွင်သွားလာနေသော၊ ဖိလစ်ပိုင်နိုင်ငံ၊ ကြေးစားလူမိုက်အဖွဲ့များသာမက ကမ္ဘာ့အကြမ်းဖက်အဖွဲ့အစည်းများစွာ မြန်မာပြည်သို့ရောက်ရှိလာနိုင်ပါသည်။

ဒီသာပါမောက္ခကြီးထံ ပညာသင်ပြီးဆုံးသော၊ တိုင်းပြည်အသီးသီးက ကျောင်းသားများကို ဆရာကြီးက နောက်ဆုံးပညာသင်အဖြစ် လက်တွေ့နယ်ပယ်မသွားခင်၊ လမ်းလျှောက်ခရီးတခု ပါပစ္စည်းမှမပါပဲ၊ အတူသွားကြသည်။ စစ်သင်တန်းများတွင် သင်တန်းမဆင်းမှီ ခရီးရှည်ချီတက်ခြင်းကဲ့သို့ ဖြစ်သည်။ လမ်းမှာခဏရပ်နားပြီး ပေါင်းမြတ် အပင်ပေါက်လေးများကို တပည့်တိုင်းအား နှုတ်ခိုင်းသည်။ အလွယ်တကူနှုတ်နိုင်ကြသည်။ ဆရာကြီးဘာမှမပြောပဲ ဆက်လျှောက်ကြသည်။ ထပ်မံရပ်နားပြီး တစ်ပေခန့်အပင်များကို လိုက်ရှာ၊ နှုတ်ခိုင်းပြန်သည်။ နောက် ဆက်လျှောက်ပြန်သည်။ တပည့်များ နားမလည်နိုင်ပဲ ဆရာကြီးဘာတွေ လျှောက်ခိုင်းနေတာလဲ မသိဘူးဟု တီးတိုးပြောကြသည်။ တဖန်ရပ်နားကြပြီး ငါးပေခန့်မြင့်သော အပင်ကိုနှုတ်ခိုင်းသည်။ တပင်ကိုတပည့်၃ဦး တော်တော်လေးကြိုးစားပြီး နှုတ်ရသည်။ ဆက်လျှောက်သွားကြပြီး..နောက်ဆုံး မိမိနေရာသို့ပြန်ရောက်ခါနီး ရပ်နားကာ၊ လူနှစ်ယောက်ဖက်နိုင်သည့် အပင်ကြီးတစ်ခုကို တနာရီအတွင်းနှုတ်ရန် တပည့်အားလုံးစုပေါင်းပြီး ခိုင်းပါတော့သည်။ မဖြစ်နိုင်မှန်းသိသော်လည်း တပည့်များက နည်းမျိုးစုံဖြင့် တူးဆွနှုတ်ကြသည်။ တနာရီမောပမ်းချွေးထွက်ပြီးမှ ဆရာကြီးက ရပ်ခိုင်းလိုက်သည်။ ထိုအခါကျမှ ဒီသာပါမောက္ခကြီးက ရှင်းပြပါတော့သည်။

 

 “..တပည့်တို့ တိုင်းပြည်လုပ်ငန်းတာဝန်တွေ လုပ်ကိုင်ရတော့မယ်။ မကောင်းတဲ့အကျင့်ဆိုတာ သစ်ပင်နှုတ်သလိုပဲ၊ အပင်ပေါက်နှုတ်သလို၊ စတင်ခါစမှနှုတ်ပစ်၊ ရပ်ပစ်ဖို့လွယ်ပါတယ်။ အဲ.. အကျင့်ဆိုးတွေ အပင်ကြီးလိုအမြစ်တွယ်သွားရင်တော့ အပင်ကြီးကိုနှုတ်ရသလို မလွယ်တော့ဘူး ဆိုတဲ့သခဏ်းစာဖြစ်ပါတယ်။ တပည့်တို့ ပညာတတ်ဖြစ်ပြီး၊ တိုင်းပြည်အုပ်ချုပ်သူများ ဖြစ်လာကြမယ်။ အကျင့်ကောင်းသူများဖြစ်ဖို့ အလွန်အရေးကြီးပါတယ်။ အကျင့်ဆိုးတွေကို ငယ်စဉ်ကတည်းက မလုပ်မိအောင် ဘုရား၊တရား၊ဆရာကောင်း၊ မိဘကောင်းများကို ပြောဆိုဆုံးမစကားများကို မမေ့၊ နားထောင်လိုက်လျှောက်သွားကြဖို့..”  ..နောက်ဆုံးအမှာစကားဖြစ်သည်။

လေးစား အတုယူစရာ ပုံပမာတစ်ခု ဖြစ်ပါသည်။

မြန်မာနိုင်ငံအစိုးရမင်းများ၊ ရဲတပ်ဖွဲ့များ ပြုပြင်ပြောင်းလဲမှုမှာ ဥပဒေစိုးမိုးမှု၊ ဆုပေး၊ဒဏ်ပေးစနစ်နဲ့ အစိုးရဝန်ထမ်းများကို တင်းတိမ်ရောင့်ရဲ၊ စာရိတ္တကောင်းဖို့ဆိုသည်မှာ  အခြေခံ၊ စားဝတ်နေရေး၊ ပညာရေး၊ကျန်းမာရေး ပံ့ပိုးပေးဖို့ အစိုးရမှာ တာဝန်ရှိပါသည်။  အစိုးရဝန်ထမ်းများ လောဘတက်လာအောင် နောက်ကွယ်မှ ငွေ၊အာဏာရှင်များလုပ်နေမှု၊ တနည်းအားဖြင့် အဂတိလိုက်စားမှုများကို နည်းပါးစေရပါမယ်။ သို့မှသာ ချမှတ်ထားတဲ့ဥပဒေများ စိုးမိုးနိုင်ပြီး၊ ရန်ကုန်မြို့မှာ အမြစ်တွယ်စတင်လာတဲ့ လူမိုက်အုပ်စုများ၊ ရာဇဝတ်မှုများကို ကာကွယ်တားဆီးနိုင်မည် ဖြစ်ပါသည်။

 

အစိုးရအဖွဲ့ စာရိတ္တကောင်းလာဖို့ ကျနော်တို့ တစ်ဦးချင်း လုံးဝ မတတ်နိုင်ပါ။ အစိုးရခေါင်းဆောင်ကြီးများ တာဝန်ဖြစ်သည်။  ကျနော်၏ စာရိတ္တ မှန်ကန်ဖို့၊ ပြုပြင်ပြောင်းလဲဖို့က ပိုပြီးအရေးကြီးသလို၊  လုပ်ရန်လဲ ပိုတတ်နိုင်ပါသည်။ မိမိတတ်နိုင်သော မိမိကိုယ်ကို ပြုပြင်ပြောင်းလဲခြင်းဖြင့်သာ အစိုးရပြုပြင်ပြောင်းလဲခြင်းကို ကူညီနိုင်ပါသည်။ 

 

မိမိ မိသားစုနှင့် ကြေးစားလူမိုက်များ ဝေးဝေးရှိနေရန် မိမိကိုယ်တိုင်က မကောင်းသောစရိုက်များ တနည်းအားဖြင့်၊ ဘယ်ဘုရားမှ မကြိုက်သော စရိုက်ဆိုးများ၊ ကြမ်းကြုတ်သော၊ မောက်မာသော အကျင့်များ၊ ပြောစကား၊ အမူရာများ၊ အဂတိလိုက်စားမှုများကို ပြုပြင်နိုင်ဖို့သာ ပိုပြီးအရေးကြီးလှပါသည်။ 


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa English Site

Similar Posts