သတင်းဆောင်းပါး ဇော်အောင် (မုံရွာ)

TSP Technical Service Provider လှုပ်ရှားမှုများ

TSP Technical Service Provider လှုပ်ရှားမှုများ

ဇော်အောင် (မုံရွာ)၊ ဧပြီ ၃၀၊ ၂၀၁၄

မြန်မာနိုင်ငံတွင် သယံဇာတပေါများကြွယ်ဝလှသည်ဟု ငယ်စဉ်က ကျောင်းစာများတွင် လေ့လာ၊ ကျက်မှတ်ခဲ့ပါသည်။ ဆန်စပါး၊ သီးနှံ၊ သားငါး၊ ကျောက်စိမ်း၊ ပတ္တမြား၊နီလာ၊ ပုလဲ၊ တွင်းတွက်ကျောက်မျက်ရတနာများ၊ ကြေးနီ၊နီကယ်၊ ရွှေ၊ ငွေ၊ စသည့် သတ္တုတွင်းများ .. အင်မတန်ဂုဏ်ယူဘွယ်ကောင်းလှပေသည်။ ယခု ၂၀၁၄ခုနှစ် အချိန်ကာလများသည် အထက်ပါသယံဇာတများထက် အဖိုးထိုက်တန်လွန်းလှသော လူသားအရင်းမြစ် (လူစွမ်းအား) ဖြင့်အကြိတ်အနယ်ပြိုင်ဆိုင်နေသော ခေတ်ကာလကြီးဖြစ်သည်။ ယခင်က စစ်အင်အားဖြင့် နယ်ချဲ့ခဲ့သည်။ စစ်အင်အားကောင်းသူက နိုင်ငံများကိုသိမ်းပိုက်၊ ကိုလိုနီပြုလုပ်ပြီး သယံဇာတများရယူသည်။ ယခုခေတ်တွင် နှလုံးရည်၊လက်ရုံးရည် (လူသားအရင်းမြစ်)ဖြင့် အပြိုင်အဆိုင်ကြိုးစားနေကြသည်။
စင်ကာပူ၊ ဟောင်ကောင်၊ ဂျပန်၊ တိုင်ဝမ်၊ ကိုးရီးယား စသည့်နိုင်ငံများသည် သယံဇာတမရှိပဲ၊ လူသားအရင်းမြစ်ဖြင့် တဟုန်ထိုး တိုးတက်လာသော၊ ကမ္ဘာ့ထိတ်တန်းနိုင်ငံများဖြစ်သည်။ အထူးသဖြင့် စင်္ကာပူကို ကြည့်ပါက သောက်စရာရေပင်မရှိသော နိုင်ငံလေးဖြစ်သော်လည်း ယခုအခါ ကမ္ဘာ့ထိပ်တန်းမြို့ကြီးအဖြစ် ဝင်ငွေအမြင့်ဆုံးနိုင်ငံဖြစ်လာသည်။ ဝင်ငွေမြင့်မားတိုင်း တိုးတက်သည်ဟု မသတ်မှတ်နိုင်ပါ။ စီးပွားရေးသာမက၊ လူမှုရေး၊ ပညာရေး၊ ကျန်းမာရေး၊ အနုပညာ စသည့် ဘက်စံတိုးတက်မှ ကမ္ဘာ့အဆင့်သို့ရောက်မည်ဖြစ်သည်။
ထိုသို့တိုးတက်ရန်အတွက် အဓိကအကျဆုံးမှာ လူသားအရင်းမြစ် (လူ့စွမ်းအား)ဖြစ်သည်။ လူ့စွမ်းအားကို မြှင့်တင်ရန် နိုင်ငံတော်အစိုးရတွင် တာဝန်ရှိသည်။

လူ့စွမ်းမြှင့်တင်မှုလုပ်ရပ် (ရေနံချောင်းမြို့၊ TSP )

သင်္ကြန်မတိုင်မီ ပူပြင်းလှသောမြန်မာပြည်အလယ်ပိုင်း ရေနံချောင်းမြို့ရှိ ဦးနေမျိုးမောင်၊ ဦးမျိုးအောင်၊ ဦးမိုးကြီး စသည့်မြို့လူကြီးများနှင့် လူငယ်များ TSP Workshop တစ်ပါတ်တာလုပ်ငန်းစဉ်ကို လေ့လာမိပါသည်။ TSP ရေနံချောင်းကို စတင်လုပ်ဆောင်စဉ်က ဒေသဖွံ့ဖြိုးရေးအဖြစ်သာ ဦးတည်ခဲ့သည်။ ရေနံချောင်းမြို့ရှိ ကုန်သည်ကြီးများအဆောက်ဦတွင် လူငယ်ဘွဲ့ရ၊ ကျောင်းသား ပေါင်း ၅၀ဦးခန့်ကို ရန်ကုန်မြို့ Black Pearl Engineering မှဝန်ထမ်းများ ပါဝင်ခဲ့သော အလုပ်ရုံဆွေးနွေးပွဲဖြစ်သည်။ စာအုပ်များကို ဖြန့်ဝေခဲ့သည်။ စာအုပ်ခေါင်းစဉ်မှာ Design Thinking Workshop for Wisdom Age ပညာခေတ်အတွက်အတွေးဒီဇိုင်း အလုပ်ရုံဆွေးနွေးပွဲ ဟု ခေါ်ပါသည်။ စာအုပ်မျက်နှာဖုံးတွင် ပင်လယ်ပေါ်တွင် ပေါ်နေသောရေခဲတုံးပုံကို တွေ့ရသည်။ ၈၀-၂၀ စည်းမျဉ်း 80-40 rule အတိုင်း၊ ရေခဲတုံးကြီး၏ ၂၀%သာလျှင် ရေပေါ်တွင် ပေါ်နေပြီး၊ ၈၀%မှာ ရေတွင်မြုတ်နေသည်။ ထို့ကြောင့် လူတစ်ဦး၏ အရည်အချင်းကို အပေါ်ယံကြည့်ရုံဖြင့်မရပါ။ မြုတ်နေသောရေခဲတုံးကဲ့သို့ အရည်အချင်းများစွာ မြုတ်နေသည်။ ဖေါ်ထုတ်မြှင့်တင်ပေးရမည်။ ထိုသို့ မြှင့်တင်ပေးသော အဖွဲ့အစည်းများစွာ မြန်မာပြည်တွင် ရှိသည်။ TSP သည် လူ့အရည်အသွေးမြှင့်တင်ပေးသော အဖွဲ့အစည်းတစ်ခုဖြစ်ပါသည်။

S.M.A.R.T စကားလုံးတစ်လုံးစီ၏ အဓိပ္ပါယ်
S = Specific
M = Measurable,
A = Achievable, Attainable, Assignable
R = Realistic, Reliable
T = Timed, Traceability
ပရိုဂျက်၊ လုပ်ငန်းတစ်ခု၊ စီးပွားရေး၊ စီမံကိန်းတစ်ခုခုကို အစဦးဆုံး အဓိပ္ပါယ်ဖွင့်ဆိုပါက
Specific ဟူသော တိကျသည့်စကားလုံးဖြင့်ဖွင့်ဆိုရမည်။ လိုရင်းတိုရှင်း၊ အားလုံးနားလည်လွယ်သောစကားလုံးဖြစ်ရမည်။ ဆွေးနွေးပွဲတွင် ဥပမာ ဆွေးနွေးသော ဖက်ရှင်လုပ်ငန်းတစ်ခုကို တည်ထောင်မည်ဆိုပါက၊ ဖက်ရှင်ဒီဇိုင်းလုပ်ငန်းဟု တိုရင်းလိုရှင်း ဆိုင်းဘုတ်ထောင်နိုင်သည်။ အသေးစိတ် အဓိပ္ပါယ်သတ်မှတ်လျှင့် အမျိုးသမီး၊ အကျီအဝတ်အစား၊ ဖက်ရှင်ဒီဇိုင်းလုပ်ငန်းများဟု တိကျစွာအဓိပ္ပါယ်သတ်မှတ်နိုင်ပါသည်။
Measurable တိုင်းတာပြနိုင်ရမည်။ တကယ့်ဆိုင်ဖွင့်ပြီး မြို့လယ်ခေါင်တွင်လုပ်မည်။ ဖက်ရှင်လုပ်ငန်းသည် ရေနံချောင်းမြို့အတွက်သာ
Achievable အောင်မြင်နိုင်သောလုပ်ငန်းဖြစ်သည်။ လူငယ်များကို ဦးစားပေးမည်လား၊ ကြေးရေတတ်လူကြီးများကို ဦးစားပေးမည်လား။ အလုပ်သမားများကို ဦးစားပေးမည်လား၊ ဝန်ထမ်း ၁၀ဦးခန့်ဖြင့်လုပ်ဆောင်ပြီး၊ လစာငွေ ကျပ်တစ်သိန်းခွဲခန့် ရအောင်လုပ်မည်။ ဝင်ငွေ တစ်လ သိန်း၂၀ကျော်မှ အမြတ်ထွက်မည်။
Realistic ဖြစ်နိုင်သည်။ မိတ်ဆွေများ၊ ကြော်ငြာများအပြင် တကယ်ဒီဇိုင်းကို ကြွမ်းကျင်သော ပရိုဖက်ရှင်နယ်များဖြင့် လုပ်မည်

Timed ၃လအတွင်း ဆိုင်ကိုတည်ထောင်မည်၊ ပထမသုံးလတွင် အမြတ်ထွက်နိုင်ရန် ဒီဇိုင်းသစ်လွင်လှပမှုများဖြင့် လုပ်ဆောင်မည်။ မိမိတို့လုပ်သော အဝတ်အစားဒီဇိုင်းများသည် မြို့ကြီးများနှင့်နိုင်ငံတကာအဆင့်မီ ဖြစ်လျှင့် ပထမတစ်နှစ်အတွင်း လုပ်ငန်းအောင်မြင်မည်ဖြစ်သည်။ လုပ်ငန်းဦးဆောင်သူသည် အချိန်ပြည့် အားသွန်ခွန်စိုက်လုပ်ဆောင်ရမည်… စသဖြင့် S.M.A.R.T ၏အဓိပ္ပါယ်ဖွင့်ချက်ကို ရေးထားပါသည်။

သင်ယူခြင်းဥပဒေများ
– 80/20 rule သဘာဝလောကကြီးတွင် ၂၀%သည် ၈၀%ကို ကြီးစိုးကြသည် ဟူသည့် သဘာဝစည်းမျဉ်းကို နားလည်ရသည်။ နိုင်ငံ၏ကြွယ်ဝမှု ၈၀% ကို လူ၂၀% ကပိုင်ဆိုင်သည်။ စပါးအထွက်နှုန်း၈၀%ကို လယ်ကွက်၂၀%ထံမှ ရရှိသည်။ ကုန်ထုတ်လုပ်မှု အဓိကပြသနာ၂၀%ကို ဖြေရှင်းနိုင်လျှင် ပြသာနာ၈၀% ပြေလည်သွားသည် .. စသဖြင့် လောကနည်းဥပဒေရှိသည်။ လူစွမ်းဆောင်နိုင်မှု ၈၀%သည် ပင်လယ်ပြင်မှရေခဲတုံးကဲ့သို့ မြုတ်နေသည်။ စသည်တို့ကို နားလည်ရန်ဖြစ်သည်။
– ထုတ်လုပ်မှု၊ ဝန်ဆောင်မှု၊ စီမံကိန်းလုပ်ငန်းများတွင် ၁။ အုပ်ချုပ်ဆိုင်ရာခွင့်ပြုချက် ၁။ ကျွမ်းကျင်မှုဆိုင်ရာခွင့်ပြုချက် ၃။ ငွေကြေးဆိုင်ရာခွင့်ပြုချက် စသည့် ၃ချက်လိုအပ်ကြောင်း။
– ပိုင်ခြေညှိခြင်း။ ဥပမာ ၁/၂ နှစ်ပိုင်းတစ်ပိုင်း နှင့် ၁/၃ သုံးပိုင်းတစ်ပိုင်း ပေါင်းလိုပါက ပိုင်းခြေတူအောင်ညှိရပါသည်။ ၃/၆+ ၂/၆ = ၅/၆ ပိုင်းခြေ ၆ ဂဏန်းဖြစ်အောင်လုပ်ပြီးမှ ပေါင်းလို့ရပါသည်။ ထိုနည်းတူ မြန်မာပြည်ပြုပြင်ပြောင်းလဲရာတွင် နိုင်ငံခြားသားနှင့်မြန်မာနိုင်ငံသားတို့ ပူးပေါင်းလုပ်ဆောင်ရာတွင် ကမ္ဘာ့နည်းဟန်နှင့် မြန်မာ့နည်းဟန်တို့ ပိုင်းခြေညီအောင် ဦးစွာလုပ်ဆောင်ရပါမည်။

သင်တန်းအစီအစဉ်များ
BMC the Business Model Canvas ပုံစံကို ဂျပန်၊ သြစတြေလျား၊ စင်ကာပူ စသည့်နိုင်ငံများသို့ သွားရောက်၊ အလုပ်ရုံဆွေးနွေးပွဲများစွာ အတွေ့အကြုံများဖြင့် ဖန်တီးထားပါသည်။ BMC တွင် အလုပ်ရှင်နှင့်ဆိုင်ရာအခန်းကဏ္ဍ (Key Project, Key Activities, Key Resources)၊ ပစ္စည်းဝယ်ယူသုံးစွဲသူ Customers နှင့်ဆိုင်ရာအခန်းကဏ္ဍ (Customer Relationships, Channels, Customer Segments) ၊ ငွေကြေးစိုက်ထုတ်သူနှင့်ဆိုင်ရာအခန်းကဏ္ဍ (Cost Strusture, Revenue Streams) စသည်တို့ကို ဇယားနှင့်တင်ပြထားပြီး၊ အဖွဲ့ငယ်ကလေးများဖြင့် ဆွေးနွေးကြသည်။ စီးပွားလုပ်ငန်းဆိုင်ရာ အတွေးအခေါ်များဖြင့် ဥပမာယူသဖြင့်၊ ပေါ်ပင်လုပ်ငန်းများဖြစ်သော ဟိုတယ်လုပ်ငန်း၊ လောင်စာဆီအရောင်းဆိုင်လုပ်ငန်း၊ စတိုးဆိုင်လုပ်ငန်း၊ ဖက်ရှင်ဒီဇိုင်းလုပ်ငန်း၊ လဘက်ရည်ဆိုင်၊ စားသောက်ဆိုင်လုပ်ငန်း …စသည်တို့ကို နမူနာယူပြီး ဆွေးနွေးကြပါသည်။
သင်ကြားခြင်းထိရောက်မှုကို ၃ရက်အကြာ လေ့လာဆန်းစစ်ပါက၊ အကြားအာရုံဖြင့် ၁၀%သာ မှတ်မိနိုင်သည်။ အမြင်အာရုံဖြင့်သင်ကြားပါက ၂၀% မှတ်မိသည်။ အကြားနှင့်အမြင်ပေါင်းစပ်သင်ကြားပါက ၅၀% မှတ်မိသည်။ မိမိသိထားသည်ကို သူ့တပါးအား တဖန်ပြန်လည်သင်ကြားလျှင့် ၇၀% မှတ်မိလာသည်။ လက်တွေ့အသုံးချနိုင်ပါက ၈၉% မှတ်မိနိုင်သည်ဟု ဆိုသည်။ Learning by Teaching ဟု ခေါ်သည်။

စက်မှုခေတ် (လည်လမ်းမှ) ပညာခေတ် (လွတ်လမ်း)သို့ ဖေါ်ပြချက်ကိုလည်း ဇယား၊ ပုံစံများဖြင့် ရှင်းပြ၊ အလုပ်ရုံအပြန်လှန်ဆွေးနွေးကြသည်။ အချုပ်မှာ သင်ယူပါ၊ သင်ပေးပါ၊ လုပ်ဆောင်ပါ ဟူသော (၃)ချက်ပင်ဖြစ်သည်။ မြန်မာ့လူအဖွဲ့အစည်းအတွက် ခေတ်အလိုက် နှိုင်းယှဉ်ချက်များကိုလည်း စက်မှုခေတ်နှင့် အပြောင်းအလဲခေတ် နှစ်မျိုးကို People Mindset နှင့် Business Mindset နှစ်မျိုး နှိုင်းယှဉ်ဆွေးနွေးကြသည်။ စိုက်ပျိုးရေးခေတ်တွင် ယနေ့တိုင် ရှင်သန်ဆဲ မြန်မာ့လူ့အဖွဲ့အစည်းသည် ထိတ်တန်းရောက်နိုင်ငံကြီးများထက် Value Creation ထိရောက်စွာ ပြောင်းလဲနိုင်ရန် အခြေအနေကောင်းများ ရှင်သန်နေဆဲဖြစ်သည်ဟု TSP သင်တန်းစာအုပ်မှာ ကောက်နုတ်ထားပါသည်။
နောက်ဆုံးတွင် ပိဋကတ်တော်ထဲမှာ မဟာဓနသူဌေးသားအကြောင်း ပထမအရွယ်၊ ဒုတိယအရွယ်၊ တတိယအရွယ်များတွင် စီးပွားရှာခြင်း၊ တရားအားထုတ်ခြင်း နှစ်မျိုးကို လုပ်ဆောင်ရန်အားပေးထားပါသည်။ သို့မဟုတ်ပါက အသက်ရွယ်ရချိန်တွင် ခွက်ဆွဲကတောင်းစားနေသူများအဖြစ်သို့ ရောက်သွားနိုင်ကြောင်း ၊ အရွယ်ငယလေလေ ရမဲ့အဆင့်များလေလေ ဖြစ်ကြောင်း တင်ပြထားပါသည်။ ထို့နောက် စတိဂျော့ (Apple iPhone တီထွင်သူ) မသေခင်က ပြောပြသော ပုံပြင်(၃)ပုဒ်ဖြင့် အဆုံးသပ်ထားပါသည်။ နောက်ဆုံးပုံပြင်သည် သေခြင်းတရားအကြောင်းဖြစ်သည်။ သင်တန်းဆရာနှင့်သင်တန်းသားများ အားလုံးသည် ငယ်ရွယ်သူ လူငယ်များဖြစ်ကြသော်လည်း နံနက်တိုင်း သေခြင်းတရားကို သတိရအောက်မေ့ပြီး လုပ်ငန်းစတင်သော စတိဂျော့၏ တရားဖြစ်သည်။

သင်တန်းနှင့်ပတ်သက်ပြီး သုံးသပ်ချက်
TSP အဖွဲ့၏ ရည်ရွယ်ချက်မှာ လူငယ်ဘွဲ့ရများစွာ အင်္ဂလိပ်စာနှင့်ကွန်ပြူတာပညာ တတ်မြောက်ရေးအတွက် အခြေခံသဘောထားပါသည်။ ရေနံချောင်းမြို့တွင် ပညာအခြေခံကောင်းသည်။ လူငယ်များကို အင်္ဂလိပ်စာ ရေးဖတ်တတ်ရုံသာမက၊ နားထောင်၊ ပြောဆိုတတ်အောင်လည်း လေ့ကျင့်ပေးသည်။ ကွန်ပြူတာ လက်နှိပ်စက်ရိုက်နှိပ်ခြင်းကို အင်္ဂလိပ်၊ မြန်မာ စာနှစ်မျိုးစလုံး 30 words per minute အထိ တစ်လအတွင်း ရိုက်နှိပ်တတ်အောင် လေ့ကျင့်စေပါသည်။ အထူးသဖြင့် ထိုသင်တန်းကို တက်ရောက်သူ လူငယ်များစွာတို့သည် ရေရှည်တွင် စဉ်းစားတတ်သော၊ ဆုံးဖြတ်ချက်မှန်သော၊ ပေါင်းသင်းဆက်ဆံပြီး အဖွဲ့ဖြင့် လုပ်ဆောင်တတ်သူများ ဖြစ်လာရန် ရည်မှန်းသည်။ သို့သော် လူငယ်အားလုံးနီးပါးသည် ထိုသင်တန်းတက်ရောက်ခြင်းဖြင့် မိမိတို့ အလုပ်ကိုင်ကောင်းကောင်း မြန်မာပြည်တွင်း (သို့မဟုတ်) နိုင်ငံခြားသို့ အလုပ်အကိုင်ရရှိရန်၊ ပညာဆက်လက်သင်ကြားရန် မျှော်လင့်နေကြကြောင်း လူငယ်များအား အင်တာဗျူးခြင်းဖြင့် သိခဲ့ရသည်။
မည်သို့ပင်ဖြစ်စေ TSP ရေနံချောင်းသည် အလွန်မြင့်မြတ်သော လူသားအရင်းမြစ် ပြုစုရေးဖြစ်သည်။ ပါတီစွဲ၊ အဖွဲ့အစည်းစွဲမရှိပဲ လူတန်းစားမခွဲခြား၊ သင်ကြားလေ့ကျင့်ပေးသော အဖွဲ့ငယ် တစ်ခုဖြစ်သည်။ ယခုခေတ်စားနေသော Capacity Building ဆိုသည် စကားလုံးကြီးကြီးကို တတ်နိုင်သည့် အခန်းကဏ္ဍမှ ဖေါ်ဆောင်နေခြင်းဖြစ်သည်။ အလားတူ သင်တန်းများစွာ မြန်မာပြည် ရန်ကုန်၊ နေပြည်တော်နှင့် မြို့ကြီးများစွာတို့တွင် အရှိန်ဟုတ်ကြီးစွာ ပေါ်ပေါက်လျှက်ရှိသည်။ လူသားအရင်းမြစ် ပြုစုရေးတွင် Myanmar Good Attitude စိတ်နေစိတ်ထားကောင်းသူများစွာ ပေါ်ထွက်လာရေးသည် မြန်မာနိုင်ငံ၏ အနာဂါတ်ဖြစ်သည်။ သင်တန်းဆရာများနှင့် သင်တန်းသားအားလုံး ရွှင်လန်းချမ်းမြေ့၊ တိုးကက်ကြီးပွားရန် မျှော်လင့်သည်။

ဆက်သွယ်ရန်
Black Pearl Engineering Tel/Fax: +95(0) 951-228545
Email: unaymyo.maung@gmail.com
http://blackpearlengineering.com/tsp.htm


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
Advertise on MoeMaKa

Similar Posts