ဓာတ်ပုံသတင်း

ကရင်စာပေနှင့်ယဉ်ကျေးမှုအသင်း (ဆီယက်တဲလ်) ဦးစီးတဲ့ (၅) ကြိမ်မြောက် ကရင်ရိုးရာလက်ချည်ပွဲ

My Friend Tin Moe By Maung Swan Yi - Selection of MoeMaKa Articles

ကျော်ဟုန်း
စက်တင်ဘာ ၅၊ ၂၀၁၂

စက်တင်ဘာ ၁၊ ၂၀၁၂ ရက် (စနေနေ့) က (၅) ကြိမ်မြောက် ကရင့်ရိုးရာလက်ချည်ပွဲကို 3801 Beacou Ave- S, Seattle, WA 98108 ရှိ ခန်းမဆောင်မှာ မွန်းလွဲ (၁၂း ၃၀ ) ကနေ ညနေ (၄) နာရီထိကျင်းပခဲ့ကြောင်း သိရပါတယ်။

ယခုကျင်းပတဲ့ (၅) ကြိမ်မြောက် ကရင့်ရိုးရာလက်ချီပွဲကို ဆီယက်တဲလ်မြို့မှာအခြေစိုက်တဲ့ “ကရင်စာပေနှင့် ယဉ်ကျေးမှုအသင်း” က တာဝန်ယူကျင်းပတာဖြစ်ကြောင်း အတွင်းရေးမှူးဖြစ်သူ စောမုန်တိုင်းကပြောပါတယ်။ အားဖြည့်ကူညီသူများကတော့ Northwest Commu nities of Burma မှ ကိုစိုင်မွန်ခင်နဲ့ ကရင်မိသားစု အသိုင်းအဝိုင်းများ၊ Coalition for Refugees from Burma မှ မမိုနာဟန်နဲ့ အဖွဲ့သား အမေရိကန်များ၊ တိပိဋိကဘုန်းကြီးကျောင်း ဂေါပကများဖြစ်တဲ့ ကိုအောင်မိုး၊ မအန်းတို့က ပွဲဖြစ်မြောက်အောင်မြင်ရေးအတွက် ဝိုင်းဝန်း ကူညီခဲ့ကြပါတယ်။

အခမ်းအနားမှူးအဖြစ် နန်းမြတ်ရတနာဝင်းမှ ဆောင်ရွက်ပါတယ်။ နန်းကြည်ကြည်ဝင်းက လက်ချီပွဲကို ကြွရောက်လာတဲ့ပရိသတ်များအား ကျေးဇူးတင်စကားပြောကြားသွားပြီး နော်ကစ်ကစ်မှ ချည်ဖြူပွဲဖြစ်ပေါ်လာပုံသမိုင်းကြောင်းကို ရှင်းလင်းပြောကြားခဲ့ပါတယ်။ မဲဆောက် (ထိုင်းနိုင်ငံ) နယ်စပ်မှရောက်လာတဲ့ ဧည့်သည်တော် ဖထီး အိုင်းဇက်ကလည်း ကရင်အချင်းချင်းညီညွတ်ကြဖို့၊ စာပေယဉ်ကျေးမှုဆိုတာ လူမျိုးတမျိုးရဲ့ သမိုင်းကြောင်းဖြစ်ကြောင်း၊ ယဉ်ကျေးမှုပျောက်ရင် သမိုင်းပျောက်ပြီး လူမျိုးပါပျောက်နိုင်ကြောင်း၊ ဒါကြောင့် ကရင်များအနေ ဖြင့် မိမိတို့ယဉ်ကျေးမှုကို လက်ဆင့်ကမ်း ထိမ်းသိမ်းရန်လိုအပ်ကြောင်း ပြောကြားခဲ့ပါတယ်။ ပြည်ပရောက် ကရင်အပါအဝင် မြန်မာနိုင်ငံသား တိုင်းရင်းသားမျိုးဆက်သစ်များအနေနှင့်လည်း သက်ဆိုင်ရာ မိမိတို့ယဉ်ကျေးမှုနဲ့ မိခင်ဘာသာစကားတတ်ရန်လိုကြောင်း၊ မျိုးဆက်သစ်က လေးများအနေဖြင့် တိုင်းရင်းသားအချင်းချင်းဆက်သွယ်ရန် ဗမာစကားနဲ့ အခြေခံဗမာစာလဲ သင်ကြားတတ်မြောက်စေရန်လုပ်ဆောင်မှုကို သူအနေနဲ့သဘောတူကြောင်း၊ လုပ်ဆောင်သင့်တယ်ဟုထင်ကြောင်း တွေ့ဆုံမေးမြန်းစဉ် ဖြေကြားခဲ့ပါတယ်။

ရိုးရာချည်ဖြူရစ်ပတ် ဆုတောင်းခြင်းများကို ကရင်စာပေနှင့် ယဉ်ကျေးမှုအသင်းဥက္ကဌ ဦးလှမြင့်၊ ဒုဥက္ကဌ ဦးမောင်မောင်အဖွဲ့မှ ဦးစီးပြုလုပ် ပေးခဲ့ပါတယ်။ ထိုလက်ချည်ဆုတောင်းခြင်းကို ကရင်များသာမက အမေရိကန်လူမျိုးများနှင့် ဗမာပြည်သားများပါ စိတ်ဝင်တစား ဝင်ရောက် ဆင်နွှဲနေတာတွေ့ မြင်ခဲ့ရပါတယ်။

ဧည့်သည်များအား ကရင်ခေတ်ပေါ်သီချင်းများ၊ ရိုးရာသီးချင်းများနဲ့ တဦးချင်းအပြင် အုပ်စုလိုက်လည်း သီဆိုဖြေဖျော်ခဲ့ကြပါတယ်။ ဒီနှစ်မှာ ထူးခြားတာကတော့ ကရင်ဒုံးယိမ်းကအဖွဲ့မှာ နန်းကြင်ကြင်စိုး (ရှမ်း)၊ အဲလိဇဘက် (ကယား)၊ စုသန္တာထွန်း (ဗမာ) သမီးငယ်များပါ ကရင် ရိုးရာအကမှာ နှစ်ခြိုက်စွာ ပါဝင်ကပြခဲ့ခြင်းပဲဖြစ်ပါတယ်။ ဒုံးကကွက်များကို နော်ကေသီကဦးဆောင်သင်ကြားပေးပြီး သီးချင်းများကို ဒေါ် စိန်မြအဖွဲ့ မှ တာဝန်ယူ လေ့ကျင့်သင်ကြားပေးခဲ့ကြပါတယ်။

ဒေါ်မက်ကီ၊ နော်စေးလားဝါး၊ နော်ခေါချမ်း၊ နန်းရာကူးနဲ့ မအန်းတို့က ဧည့်သည်များအတွက် ထမင်း၊ ဟင်း၊ မုန့်ဟင်းခါး၊ အုန်းနို့ခေါက်ဆွဲ၊ ကြာ ဇံကြော်၊ သစ်သီးစုံ၊ ဖာလူဒါ၊ အချိုရည်များနဲ့  ပြည့်စုံစွာ ကျွေးမွေးဧည့်ခံခဲ့ကြပါတယ်။

ကရင်စာပေနှင့်ယဉ်ကျေးမှုအသင်းရဲ့ရံပုံငွေအဖြစ် တီရှပ်များရောင်းချခဲ့ပြီး ကိုစိုးသူရနိုင်က တာဝန်ယူရိုက်နှိပ်ပေးသည့်အပြင် ကုန်ကျမှု ငွေ တဝက်ကို အသင်းအတွက် လှူဒါန်းခဲ့ပါတယ်။

ဧည့်ပရိသတ် (၁၅၀) ခန့်  တက်ရောက်ဆင်နွဲခဲ့ကြတဲ့ ဆီယက်တဲလ်က (၅) ကြိမ်မြောက် ကရင့်ရိုးရာလက်ချီပွဲမှာ ထူးခြားချက်ကတော့ ပိုး၊ စကော ကရင်များအားလုံး စုစုစည်းစည်း ဝိုင်းဝန်းဆောင်ရွက်ခဲ့ကြခြင်းအပြင် ရှမ်း၊ ကယား၊ ဗမာနဲ့  ဒေသခံ အမေရိကန်များပါ ပျော်ရွှင်စွာ လာရောက်ဆင်နွှဲကြတဲ့မြင်ကွင်းကို တွေ့ဆုံခဲ့ရခြင်းဖြစ်ပါတယ်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
My Friend Tin Moe By Maung Swan Yi - Selection of MoeMaKa Articles

Similar Posts