>
မိတ်ဆွေကြီးကိုဒေါင်း … ကျန်းခံ့သာလို့မာပါစ ….
အရင်တပတ်က ကျနော်ငယ်စဉ် စစ်တပ်ထဲမှာကြီးပြင်းလာရတဲ့အတွေ့အကြုံတချို့ပြောခဲ့တာမို့၊ ဒီတခါ ကျနော် ငယ်စဉ်ကျောင်းသားဘ၀အတွေ့အကြုံတချို့ကို ဆက်ပြီးပြောပြချင်တယ်ဗျာ။
ကျနော်တို့ ကျောင်းတက်၊ ပညာသင်၊ လူ့လောကခွင်ကျယ်ကြီးကို စူးစမ်းတဲ့ခေတ်ကာလက မဆလစစ်အစိုးရ အုပ်စိုးတဲ့ခေတ်ကာလလို့ ပြောရမှာမဟုတ်လားဗျာ။ ဒီတော့ ကျနော်တို့ဟာ မဆလပညာရေးစနစ်ကိုဖြတ် သန်းကျော် လွှားခဲ့ရတဲ့သူတွေပဲပေါ့ ကိုဒေါင်းရယ်။
မဆလပညာရေးစနစ်လို့ ပြောလိုက်ရင်၊ အရင်ဆုံး တော်လှန်ရေးကောင်စီတက်တက်ချင်း၊ ၁၉၆၂ ဆဲဗင်းဇူလိုင်၊ ရန်ကုန်တက္ကသိုလ် ကျောင်းသား သမဂ္ဂအဆောက်အအုံကိုမိုင်းခွဲဖျက်ဆီးခဲ့တာနဲ့စရမှာပဲ။ လွတ်လပ်ရေးတိုက်ပွဲဝင်၊ သမိုင်းဝင် အစဉ်အလာကြီးမားတဲ့ အဆောက်အအုံကို ဗုံးခွဲရုံသာမက၊ ကျောင်းသားသမဂ္ဂအဖွဲ့  အစည်းတွေကိုပါ မတရားပိတ်ပင်တားဆီးခဲ့တာပါ။
၁၉၆၂ ကနေစပြီး တကသ၊ ဗကသ ကျောင်းသားသမဂ္ဂကျောင်းသားခေါင်းဆောင်တွေ၊ တောထဲရောက်ကုန် ကြပါတယ်။ ကျောင်းသားလှုပ်ရှားမှုလည်း မြေအောက်ရောက်သွားခဲ့ရပါတယ်။ ၁၉၆၄ ဇူလိုင်လ မှာ မြန်မာ့ ဆိုရှယ်လစ်လမ်းစဉ်ပါတီဆိုတာပေါ်ပေါက်လာပါတယ်။
မြန်မာ့ဆိုရှယ်လစ်လမ်းစဉ်ပါတီနဲ့ အတူ၊ ကျနော်တို့ ကျောင်းတွေကျောင်းတွေမှာ၊ အရင့်အရင်က အစဉ်အလာ ရှိခဲ့တဲ့ကျောင်းသားသမဂ္ဂတွေနေရာမှာ၊ ပထမဦးဆုံး လူငယ့်ရေးရာဆိုတဲ့ အဖွဲ့ အသင်း လှုပ်ရှားမှုတွေ အစား ထိုးလာခဲ့ပါတယ်။
အဲဒီအချိန်ကတည်းကစပြီး၊ ကျောင်းသားအရေး၊ ကျောင်းသားကိစ္စတွေကို ကာကွယ်စောင့်ရှောက်ပေး၊ တောင်း ဆိုပေးတဲ့ အဖွဲ့အစည်းဆိုတာ မရှိတော့ပါဘူး။ လူမှုရေးလုပ်ငန်းမျိုး ပရဟိတအလုပ်မျိုးကို စိတ်အား ထက်သန်ကြတဲ့၊ အများအကျိုးဆောင်ရွက်ချင်ကြတဲ့ ကျောင်းသားတွေခမျာလည်း၊ မြန်မာ့ဆိုရှယ်လစ်လမ်းစဉ် ပါတီကကြိုးကိုင်ထားတဲ့ လူငယ့်ရေးရာလုပ်ငန်းဘောင်ထဲမှာပဲ စည်းရုံးသိမ်း သွင်းခံခဲ့ကြရတာပါ။
နောက်တော့ ကျောင်းတွေကျောင်းတွေမှာ ကျောင်းကောင်စီဆိုတာပေါ်လာတယ်။ လူငယ့်ရေးရာအဖွဲ့ ဆို တာ ပျောက်သွားပြီး၊ အဲဒီနေရာကို လမ်းစဉ်လူငယ်ဆိုတာ အစားထိုးဝင်လာပါတယ်။ လမ်းစဉ်လူငယ်နဲ့ အတူ၊ ရှေ့ ဆောင်လူငယ်၊ တေဇလူငယ်ဆိုတာတွေလည်း တပါတည်းပေးထွက်လာခဲ့တာပါ။
ကျနော်တို့ ကျောင်းသားတွေလည်း၊ အသက်အရွယ်အရ သတ်မှတ်ထားတဲ့လူငယ်အဖွဲ့ တွေ၊ မဖြစ်မနေ၀င်ကြရ ပါတော့တယ်။ ကျနော်တို့ အတန်းကြီးကျောင်းသားတွေကတော့ လမ်းစဉ်လူငယ်တွေဖြစ်လာကြတာပေါ့။ အဲဒီအ ချိန်တုန်းက ကျောင်းသားလှုပ်ရှားမှုမှန်သမျှဟာ၊ လမ်းစဉ်လူငယ်ကပဲကြီးစိုးထားခဲ့တာပါ။ ကျနော်တို့ တက္ကသိုလ်ရောက်လာတော့လည်း ဒီအတိုင်းပဲဆက်ပြီးဖြစ်နေတာပါ။
မဆလ ပညာရေးစနစ်ထဲမှာပဲ လူရည်ချွန်ဆုဆိုတဲ့စီမံကိန်းတမျိုးပေါ်လာပြီး၊ ကျောင်းသားလောကထဲမှာ လူရည် ချွန် ဆိုတဲ့ကျောင်းသားအလွှာတမျိုးပေါ်ထွက်လာခဲ့ပါတယ်။ တပြည်လုံးက လူရည်ချွန်ကျောင်းသားတွေ စုဝေးလေ့ရှိတဲ့၊ နွေရာသီ အင်းလေးခေါင်တိုင်အပန်း ဖြေစခန်းတို့ ငပလီရွှေဝါချိုင်စခန်းတို့ ပြင်ဦး လွင်ပွေးကောက်ရေ တံခွန်စခန်းတို့ဟာ၊ အဲဒီခေတ်က ထင်ရှားတဲ့လူရည်ချွန်စခန်းတွေပေါ့ ။
အဲဒီလို မဆလ ပညာရေးစနစ်ထဲမှာ၊ မြန်မာ့ဆိုရှယ်လစ်လမ်းစဉ်ပါတီကို အထောက်အကူပြုဖို့ လမ်းစဉ်လူငယ်တို့ လူရည်ချွန်တို့ဆိုတာကို၊ မဆလ စစ်အစိုးရက လက်သပ်မွေးပြုစုပျိုးထောင်ခဲ့တာပါပဲ။
ဒါတွေကြောင့် ကျောင်းသားလောကမှာ လမ်းစဉ်လူငယ်တို့၊ လူရည်ချွန်တို့ဖြစ်လာကြပြီဆိုရင်၊ ကျောင်းသား အများစုနဲ့ အလိုလိုကင်းကွာ သလိုဖြစ်ကြရပါတယ်။ ကျောင်းသားတိုက်ပွဲ သမိုင်းအစဉ်အလာကို ဆက်ခံ တဲ့ ကျောင်းသားထုကြီးနဲ့ဆိုရင်၊ လမ်းစဉ်လူငယ်ကျောင်းသား၊ လူရည်ချွန်ကျောင်းသားတွေဟာ သိပ်ပြီးအစေး မကပ်ခဲ့တာ အမှန်ပဲကိုဒေါင်း။
ဒါထားလိုက်တော့။ တခါတုန်းကပေါ့ဗျာ။ ကျနော်တို့ ပုသိမ်မြို့၊ အထက (၃) က၊ ကျောင်းနေဖက်တွေပြန်ဆုံကြ တဲ့ မိတ်ဆုံစားပွဲတခုမှာ၊ သူငယ်ချင်းတယောက်က “ငါတို့ ကျောင်းက အဆိုတော်လည်းထွက်တယ်၊ သူပုန် လည်းထွက်တယ်” လို့ ပြောလိုက်ပါတယ်။ အဆိုတော်ဆိုတာက ကံ့ကော်တောမျိုးအောင်နဲ့ ထူးအိမ်သင်တို့ ကိုပြောတာပါ။ သူပုန်လို့ပြောတာကတော့၊ ဆေးတက္ကသိုလ်ရောက်ပြီး၊ ၁၉၇၅ ဇွန်လ (၆) ရက်၊ ရွှေတိဂုံ အထွေထွေသပိတ်မှာထောင်ကျသွားတဲ့တယောက်နဲ့၊ ၁၉၇၆ မှာ၊ မှိုင်းရာပြည့်နဲ့ထောင်ထဲရောက်သွားတဲ့ ကျနော့်ကိုပြောတာပါ။
အခု ကျနော်ပြောချင်တာက၊ လမ်းစဉ်လူငယ်တို့၊ လူရည်ချွန်တို့ ဆိုတဲ့ကျောင်းသားတွေလည်းပဲ သမိုင်းတကွေ့ မှာ လူထုအရေးတော်ပုံတွေ၊ ကျောင်းသားတိုက်ပွဲတွေနဲ့ ကိုယ်တွေ့ ကြုံရတဲ့အခါမှာ၊ လူထုဘက်၊ ကျောင်းသား ထုဘက်ကိုရောက်ရှိလာခဲ့တယ်ဆိုတဲ့အချက်ပါ။
ကျနော်တို့ကျောင်းကသူပုန်ထွက်တယ်ဆိုတဲ့ ဆေးတက္ကသိုလ်ကနေထောင်ထဲရောက်သွားတဲ့သူဟာ၊ ကျောင်းတုန်းက ထပ်ကွမ်း လူရည်ချွန်တယောက်ပေါ့ဗျာ။ ကျနော်တို့ပုသိမ်ကောလိပ်၊ မှိုင်းရာပြည့်နဲ့ ထောင်ကျတဲ့အမှုတွဲထဲမှာ လည်း၊ ရူပဗေဒဌာနက၊ ထပ်ကွမ်းလူရည်ချွန်တယောက်ပါလာတာပေါ့ဗျာ။
အဲဒီလို၊မြန်မာ့ဆိုရှယ်လစ်လမ်းစဉ်ပါတီအလိုကျ၊ မဆလစစ်အစိုးရကြိုးဆွဲရာ မကချင်ကြတော့တဲ့ လမ်းစဉ် လူငယ်နဲ့ လူရည်ချွန်ကျောင်းသား တွေလည်း အမြောက်အများပဲ လူထုအရေးတော်ပုံ၊ ကျောင်းသား အရေးတော်ပုံတွေထဲကို ခြေစုံပစ်ဝင်ရောက်လာခဲ့ကြတာ သမိုင်းမှာ လက်တွေ့ ပါပဲ။
မဆလ စစ်အစိုးရ၊မဆလ ပညာရေးရေးစနစ်က မွေးထုတ်ပေးခဲ့တဲ့လမ်းစဉ်လူငယ်တွေ၊ လူရည်ချွန်တွေဟာ၊ အဲဒီ မဆလစစ်အစိုးရကို မြေမြှုပ် သင်္ဂြိုဟ်ပစ်တဲ့ကျောင်းသားအင်အားစုထဲမှာ၊ အထင်ကရပါဝင်ခဲ့တာကို၊ ကျနော်တို့သမိုင်းသင်ခန်းစာယူရမယ်မဟုတ်လား ကိုဒေါင်းရေ။
အားလုံးကို သတိရလျက် …
မူရင်း – လွတ်လပ်သည့် အာရှအသံ www.rfa.org/burmese
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
