>
ဝန်ကြီးချုပ်
(ဇဝန)
(ဇဝန)
ဒီဇင်ဘာ ၂၅၊ ၂၀၁၀
”ဘာလဲကွ ရွေးကောက်ပွဲ၊ ရွေးကောက်ပွဲနဲ့ လူတွေပြောပြောနေတာ” ဟု မောင်မောင်က သာဒွန်းဦးဖက်သို့ လှည့်၍မေးလိုက်လေ၏။
ရဲဘော်အားလုံးထဲတွင် သာဒွန်းဦးတစ်ယောက်သာလျှင် အသိအကြားများသူဖြစ်၍ သူ့အားမေးလိုက်ခြင်းဖြစ်ပေ၏။ သို့သော် သာဒွန်းဦးကား ထိုကိစ္စ္စကို စိတ်ဝင်စားခြင်းမရှိ။ ထိုကိစ္စမှာ ရွာထဲ၌ သာမှု နာမှုများတွင် ဘုရားစကား၊ တရားစကား မပြောတတ်သူတို့ ပါးစပ်အငြိမ်မနေနိုင်၍ ပြောနေကြသည့် အကြောင်းအရာတစ်ရပ်ဟူ၍ ယူဆခဲ့၏။ သို့ဖြစ်လင့်ကစား ထိုအကြောင်းအရာကိုသာလျှင် လူတကာ အပြောများနေကြသည်ကို တွေ့ရသဖြင့် အဓိပ္ပါယ်ကိုသိအောင် စုံစမ်းထားမိလေသည်။
သာဒွန်းဦးက ”ရွေးကောက်ပွဲဆိုတာ တိုင်းပြည်ကို အုပ်ချုပ်ဖို့ လူရွေးတာကို ခေါ်တာ” ဟု ရှင်းလင်းပြလေ၏။
ဆိုးပေသည် သူတို့၏စကားကို နားထောင်နေရာက ”တိုင်းပြည်ကို သမ္မတအုပ်ချုပ်ရတာပဲ မဟုတ်လားလို့၊ သူ့ကိုဘယ်သူက လာရွေးပေးရလို့လဲ” ဟု ဝင်၍ပြောလေ၏။
”သမ္မတအုပ်ချုပ်ရတာလည်း ဟုတ်တာပဲ၊ မအုပ်ချုပ်ရတာလည်း ဟုတ်တာပဲ”
”မင်းစကားကဘာလဲကွ။ အုပ်ချုပ်ရတယ်ဆိုတဲ့နောက် မအုပ်ချုပ်ရဘူးဆိုလို့ ဖြစ်နိုင်ပါ့မလား။ စဉ်းစားကြည့်စမ်းပါဦး” ဟု ဆိုးပေက မကျေနပ်သည့်အမူအယာဖြင့် ပြောလေ၏။
”တိုင်းပြည်ကို ရှင်ဘုရင်အုပ်ချုပ်တဲ့နိုင်ငံလည်းရှိတယ်။ သမ္ဓတအုပ်ချုပ်တဲ့နိုင်ငံလည်း ရှိတယ်။ ဒါပေမဲ့ အဲဒီ ရှင်ဘုရင်တို့ သမ္မတတို့အောက်မှာ လူတစ်ယောက်ရှိသေးတယ်။ သူ့ကို ရှင်ဘုရင်အုပ်ချုပ်တဲ့နိုင်ငံမှာ နန်းရင်းဝန်၊ သမ္မတအုပ်ချုပ်တဲ့နိုင်ငံမှာ ဝန်ကြီးချုပ်လို့ခေါ်တယ်။ သူက အုပ်ချုပ်တဲ့နေရာမှာ အကူအညီပေးရမယ်”
”အာနာရှင်ဆိုတဲ့ ဟာမျိုးလား” ဟု မောင်မောင်က မေး၏။
”အာနာရှင်ဆိုတာက မိန့်ခွန်းစကားတွေ ပြောရလွန်းလို့ အာတွေနာနေတာ။ ဝန်ကြီးချုပ်နဲ့မဆိုင်ဘူး” ဟု အဝိန်က ဝင်၍ရှင်းလေ၏။
”ငါသာ တိုင်းပြည်ကို အုပ်စိုးရရင် ငါ့ကိုငါ အာနာရှင်လည်းမခေါ်ဘူး။ ဝံဂျီးဂျုပ်လည်း မခေါ်ဘူး။အာဏာရှင်ဆိုတာ အာနာခွာနာရောဂါရတဲ့လေသံပါပြီး ဝံဂျီးဆိုတာလည်း မကောင်းဘူး။ ကေသရာဇာလို့ ငါ့ကိုငါ ခေါ်မယ်။ ဒီနာမည်မျိုးမှ ရှင်ဘုရင်သံလည်းပါတယ်။ ခံ့လည်းခံ့ညားတယ်” ဟု ဆိုးပေက ပြောလေသည်။
”မင်းဥစ္စာမင်း လျှောက်ပြောမနေပါနဲ့ဦး။ ငါပြောတာလည်း နားထောင်စမ်းပါဦး။ ရွေးကောက်ပွဲဆိုတာ မြို့တိုင်း ရွာတိုင်းမှာ လုပ်ပြီး တစ်နေရာက တစ်ယောက်စီရွေးပြီးတင်ရတယ်”
”ဒီလိုဆိုရင် ဝန်ကြီးချုပ်တွေ ပြည့်နေမှာပေါ့” ဟုမောင်မောင်က စောဒကဝင်လေ၏။
”လူတွေ အများကြီး ရွေးတင်လိုက်ပေမယ့် ဝန်ကြီးချုပ်ဆိုတာ တစ်ယောက်ထဲပဲရှိတယ်’
”အရွေးခံရတာချင်းအတူတူ ကျန်တဲ့လူတွေတော့ ဝန်ကြီးချုပ်မလုပ်ရဘူးဆိုရင် သူတို့က နွားတွေမို့လို့လား”
”မင်းတို့ နားလည်အောင် ငါပြောပြမယ်။ တိုင်းပြည် ကို အုပ်ချုပ်ချင်တဲ့ လူလေးမျိုးရှိတယ်။ ဒီလေးမျိုးစလုံးဟာ တိုင်းပြည်မှာ အားလုံးကောင်းအောင် လုပ်ချင်ကြတယ်။ ဒါပေမဲ့ တစ်ယောက်လုပ်တာနဲ့ တစ်ယောက်လုပ်တာ မတူဘူး။ ပထမဦးဆုံး တစ်သီးပုဂ္ဂလဆိုတာရှိတယ်။ သူတို့ဟာ လူတွေကို ဒီအတိုင်းပဲထားရင် တိုင်းပြည်ကြီး ပိုပြီးကောင်းလာမှာပဲဆိုပြီး ဒီအတိုင်းပဲ ကြည့်နေကြတယ်။ ဒုတိယကတော့ ဒီမိုကရက်တစ် လို့ခေါ်တယ်။ သူတို့က တစ်သီးပုဂ္ဂလထက် ပိုပြီးကောင်းအောင်လုပ်တယ်လို့ ဆိုတယ်။ ဒါပေမဲ့ ဘာလုပ်တယ်ဆိုတာ ဘယ်သူမှ သေသေချာချာမတွေ့ရဘူး။ နောက်တစ်မျိုးကတော့ ဆိုရှယ်လစ်လို. ခေါ်တယ်။ သူတို့က လူတွေကောင်းစားအောင်လို့ လူတွေရဲ့ အိတ်ထဲက ပိုက်ဆံ အပိုင်ယူကြတယ်။ စတုတ္ထကတော့ ကွန်မြူနစ်လို့ခေါ်တယ်။ သူတို့က တိုင်းပြည်ကောင်းစားအောင် သူတို့ကလွဲပြီး ကျန်တဲ့လူတွေကို အကုန်သတ်ပစ်ကြတယ်”
”မင်း ဘယ်သူ ပြောသလဲ” ဟု မောင်မောင်က မေးလိုက်၏။
”မင်းမသိတာကို ငါပြောနေရင် နားထောင်ရုံပဲ ရှိတယ်” ဟု သာဒွန်းဦးက ဟန့်တားလိုက်ဲပြီးလျှင်
”အဲဒီ လူလေးမျိုးဟာ သူတို့ကို တိုင်းပြည်အုပ်ချုပ်ဖို့ မဲပေးမယ့်လူတွေကို လိုက်ပြီးရှာလို့ မဲအများဆုံးရတဲ့ လူစုထဲက ဂေါင်သူကြီးလုပ်တဲ့လူကို ဝန်ကြီးချုပ်လို့ ခေါ်ရတယ်။ သူက သူ့အထက်က ရှင်ဘုရင်တို့၊ သမ္မတတို့ကို ဘာလုပ် ညာလုပ်နဲ့ သြဇာပေးတဲ့အလုပ်ကို လုပ်ရတယ်”
”အောင်မာ ငါသာ ရှင်ဘုရင်ဖြစ်ဖြစ်၊ သမ္မတဖြစ်ဖြစ် ဖြစ်ကြည်ံ့စမ်းပါလား။ ဒီလို လာပြီးတော့များ သြဇာပေးရင် နရင်းပရင်းတီးလိုက်လို့ သွားချီးယိုးဒယား က သွားမယ် ဟင်း” ဟု ဆိုးပေက ဆိုလေ၏။
”ဟေ့ အခု တို့လေးယောက်ပဲ ရှိတယ်။ အီစွတ်တစ်ယောက်တော့ သူ့ဦးလေးဆီ အလည်သွားနေတာ တော်တော်နဲ့ ပြန်လာမှာမဟုတ်သေးဘူး။ အဲဒီတော့ တို့လေးယောက်ဟာ တစ်ယောက်ကို တစ်ပါတီလုပ်ပြီး အရွေးခံရင် မကောင်းဘူးလား” ဟု မောင်မောင်ကအကြံပေး၏။
”ကောင်းသားပဲကွ။ ရွေးကောက်ပွဲ ဘယ်လိုလုပ်ရသလဲ” ဟု အဝိန်က မေးလေ၏။
————————————
”ကောင်းသားပဲကွ။ ရွေးကောက်ပွဲ ဘယ်လိုလုပ်ရသလဲ” ဟု အဝိန်က မေးလေ၏။
”လူတွေကို ခေါ်ပြီးတော့ တရားဟောရတယ်။ နောက်ပြီးတော့ သူတို့ကို မဲထဲ့ဖို့ စာရွက်ကလေးတွေ ပေးရတယ်။ မဲအများဆုံးရတဲ့လူ နိုင်တာပဲ” ဟု သာဒွန်းဦးက ရှင်းပြလေ၏။
”ဒါဖြစ်ရင် ဘယ်သူက ဘာလုပ်မလဲ၊ ငါတော့ လူတွေ သတ်ရတဲ့ ပါတီကို ကြိုက်တယ်” ဟု အဝိန်က ပြောပြလေ၏။
”ဒီလိုဆိုရင် မင်းက ကွန်မြူနစ်လုပ်။ ငါက ဒီမိုကရက်တစ်လုပ်မယ်” ဟု သာဒွန်းဦးက ပြောလေ၏။
ဆိုးပေကား မည်သည့်ပါတီအဖြစ်ဖြင့် အရွေးခံရမည်ကို မဆုံးဖြတ်တတ်သဖြင့် မောင်မောင်အား ”မင်းကကော” ဟု မေးလိုက်၏။
”ငါက သူများ အိတ်ထဲကပိုက်ဆံကို မောင်ပိုင်စီးရတယ်ဆိုတဲ့ ပါတီကို သဘောကျတယ်”
”ဒါဆိုရင် မင်းက ဆိုရှယ်လစ်ဖြစ်နေပြီ” ဟု သာဒွန်းဦးက ပြောပြလေ၏။
”အေး ကောင်းတယ်။ ကျန်တဲ့ တစ်သီးပုဂ္ဂလကို ငါလုပ်မယ်။ ဒါမှ ငါလည်းကြိုက်တာ၊ တစ်သီးပုဂ္ဂလဆိုတာ သူများထက်ထူးတာကို ခေါ်တာ၊ ကိုယ်လုပ်ချင်ရာ လုပ်နိုင်တယ်”
”ကောင်းပြီ၊ မနက်ဖြန်ကျရင် ကျောင်းသားတွေကို ကြော်ငြာပြီးတော့ ကျောင်းဆင်းတဲ့အချိန် ဂိုဒေါင်ထဲမှာ အစည်းအဝေးလုပ်ပြီး တရားဟောကြမယ်။ မနက်ဖြန် တို့များ ပြောဖို့စကားတွေကို အခုစဉ်းစားထားကြ”
ဟု သာဒွန်းဦးက အကြံပေးသည်ကို အားလုံးသဘောတူလိုက်ကြလေ၏။
နောက်နေ့ညနေတွင် ဂိုဒေါင်၌ကျင်းပသည့် အစည်းအဝေးမှာ မျှော်လင့်သည်ထက်ပို၍ စည်ကားလှပေ၏။ ထိုသို့ စည်ကားရခြင်းမှာ ဆိုးပေတို့နှင့် ရွယ်တူကျောင်းသားကလေးများသည် နိုင်ငံရေး၌ စိတ်ဝင်စားကြခြင်းကြောင့် မဟုတ်ဘဲ ဤသို့စုစုဝေးဝေးလုပ်တိုင်း ပျော်စရာ ဖြစ်ကြရသဖြင့် အလွတ်မခံချင်ကြ၍ဖြစ်ပေ၏။
ဆိုးပေနှင့် ရဲဘော်များသည် မှောက်ထားသော ထင်းရှူးသေတ္တာများပေါ်၌ ထိုင်လျက် ပရိတ်သတ်တို့ကား မြေပေါ်တွင် ထိုင်၍ အာရုံစိုက်နေကြလေ၏။
ဆိုးပေကား ယှဉ်ပြိုင်အရွေးခံသူချင်းအတူတူဖြစ်သော်လည်း မိမိကိုယ်မိမိ သဘာပတိတင်မြှောက်ကာ အစည်းအဝေး ဖွင့်ရန်ထလိုက်လေ၏။
”မြို့မိ မြို့ဖ အပေါင်းတို့ခင်ဗျား၊ မင်းတို့ကို အစည်းအဝေးခေါ်တာ ငါတို့ကို မဲပေးရလိမ့်မယ်။ ပထမဦးဆုံး ငါတို့ တစ်ယောက်စီ စကားပြောမယ်။ သာဒွန်းဦးက ဒီမိုကရေစီပါတီ၊ မောင်မောင်က ဆိုရှယ်လစ်၊ အဝိန်က ကွန်မြူနစ်၊ ငါက တစ်သီးပုဂ္ဂလ။ ငါတို့ ပြောပြီးတဲ့အခါ မင်းတို့က မေးခွန်းထုတ်နိုင်တယ်။လေးယောက်စလုံး ပြောပြပြီးတဲ့နောက် ကြိုက်တဲ့လူကို မင်းတို့ကမဲပေးပါ”
ဟု ဆိုးပေက ရှင်းပြပြီးလျှင် မိမိအနေဖြင့် နောက်ဆုံးမှ စကားပြောရန် ဆုံးဖြတ်ကာ
”မြို့မိမြို့ဖများ ခင်ဗျား၊ ယခု တရားပွဲစပါတော့မယ်။ ဒါကြောင့် ငြိမ်ငြိမ်မနေတဲ့အကောင်ကို ငါဆွဲထိုးရပါလိမ့်မယ်။ ကဲ အခု သာဒွန်းဦးက ဒီမိုကရေစီအကြာင်း ဟောပါလိမ့်မယ်”
ဟု ကြေငြာလိုက်ပြီးနောက် သာဒွန်းဦးကိုထရန် အင်္ကျီဂုတ်ကိုဆွဲ၍ မလိုက်လေ၏။
ပရိတ်သတ်၏ စိတ်မပါ့တပါတီးလိုက်သော လက်ခုတ်သံများ ကြားရပြီးနောက် သာဒွန်းဦးသည် စကားပြောရန် ဟန်ပြင်လိုက်လေ၏။
”မြို့မိ မြို့ဖများခင်ဗျား၊ အခု ငါဟောမှာ ဒီမိုကရေစီအကြောင်း ဖြစ်ပါတယ်။ ငါဟောတဲ့အတိုင်း မင်းတို့ငါလို ဒီမိုကရေစီ ဖြစ်ကြပါ။ ငါ့ကိုမဲပေးကြပါ။ ငါ့ကို မဲမပေးရင် မင်းတို့နဲ့ ငါနဲ့ မခေါ်ဘူး။ တပို့တွဲလပြည့်နေ့ကျရင် တို့အိမ်မှာ ထမနဲထိုးတဲ့အခါ ငါ့ကိုမဲမပေးတဲ့လူတွေ ခေါ်ပြီးမကျွေးဘူး။ ငါ့ကိုမဲပေးတဲ့အကောင်တွေ စားရမယ်။ ပြီးတော့ တို့အိမ်မှာ ကြက်တူရွေးလေးတစ်ကောင်နဲ့ ယုန်ကလေးတစ်ကောင်ရှိတယ်။ အဲဒါတွေလည်း ကြည့်ရမယ်။ အဲဒါကြောင့် ဒီမိုကရေစီကို မဲပေးကြပါ”
သာဒွန်းဦးသည် ပရိတ်သတ်အား ကိုယ်ကိုကိုင်းညွတ်၍ အရိုအသေပေးပြီး ထိုင်လိုက်လေ၏။
ဆိုးပေက ”ကဲ မင်းတို့ မေးချင်တာ မေးနိုင်တယ်” ဟု ဆိုလေ၏။
ရှေ့တန်းရှိ ကလေးတစ်ယောက်က ”မင်းတို့ အိမ်က ကြက်တူရွေးဟာ နှုတ်သီးအနီလား၊ အမဲလား” ဟု မေးခွန်းထုတ်လေ၏။
သာဒွန်းဦးမှာ စင်စစ် သူ့အိမ်၌ ကြက်တူရွေးမရှိ။ သူရှိစေချင်သောအရာကို စိတ်မှန်းနှင့်ပြောလိုက်ခြင်းဖြစ်ရာ ထိုမေးခွန်းကို အဖြေပေးရန် စဉ်းစားနေပြီးနောက်
”နှုတ်သီးအပေါ်ကနီပြီး အောက်ကမဲတယ်” ဟု မလွတ်အောင်ဖြေလိုက်လေ၏။
”ဒီလိုဆိုရင် မင့်ကြက်တူရွေးဟာ စကားမပြောတတ်ဘူး”
”ပြောတတ်တယ်။ ဘာကြေးလောင်းမလဲ။ မေရှင်ဆိုတဲ့ သီချင်းတောင် ဆိုတတ်သေးတယ်”
”မင်းလိမ်နေတာ မယုံဘူး။ ဒီမိုကရေစီကို မဲပေးရင် တို့ပါ လူလိမ်ဖြစ်သွားမယ်”
”ငါမလိမ်ဘူး”
”လိမ်တယ်”
”မလိမ်ဘူး”
”လိမ်တယ်”
ဤတွင် သဘာပတိဆိုးပေက ”ကဲ မင်းတို့ မေးခွန်း မေးဖို့အချိန်ကုန်ပြီ။ နောက်တစ်ယောက် ပြောလိမ့်ဦးမယ်။ အခု ပြောမှာက ဆိုရှယ်လစ်ဟာ ဘာလဲဆိုတာ မောင်မောင်က ပြောလိမ့်မယ်” ဟု ကြေငြာပြန်လေ၏။
မောင်မောင်သည် ရှေ့သို့ ထွက်လာလေ၏။
”မြို့မိမြို့ဖ အပေါင်းတို့ခင်ဗျား၊ အခု မင်းတို့ကို ဆိုရှယ်လစ်အကြောင်း ငါပြောချင်တာဟာ ဆိုရှယ်လစ်ကို မဲပေးကြဖို့ဖြစ်တယ်။ ဆိုရှယ်လစ်ဆိုတာ သူများပိုက်ဆံကို ယူရတယ်။ ဒီလိုယူရင် ပိုက်ဆံတွေ အများကြီးရပြီး လူတိုင်းလူတိုင်း တစ်နေ့ကို ရေခဲချောင်း ငါးမူးဖိုး၊ ပီကေတစ်မူးဖိုး အနည်းဆုံး စားနိုင်မယ်”
”ဟေ့ လူများပိုက်ဆံကိုယူရင် အဲဒါ အဒါနဒါနိန်ဖြစ်ပြီး ငရဲကြီးတတ်တယ်” ဟု မင်္ဂလသုတ်သင်တန်းတက်နေသော ကျောင်းသားတစ်ဦးက ထ၍ပြောလေ၏။
”သူများ ပိုက်ဆံကို အတင်းလုတာသာ ခိုးတာ။ ဥပဒေနဲ့ယူရင် ခိုးတာမဟုတ်ဘူး။ ငါက ဥပဒေနဲ့ ယူမှာ”
အခြားတစ်ယောက်က ဖြတ်၍ ”ဘယ်သူ့ပိုက်ဆံကို ယူမှာလဲ” ဟု မေးလေ၏။
”ဆိုရှယ်လစ်မဟုတ်တဲ့လူတိုင်းဆီက ယူမှာပေါ့”
”လူတိုင်း လူတိုင်းဟာ ဆိုရှယ်လစ်ဖြစ်နေကြရင် ဘယ်သူ့ဆီက ယူလို့ရဦးမှာလဲ”
”လူတိုင်း လူတိုင်း ဆိုရှယ်လစ်ကြီးပဲ မဟုတ်ဘူး။ လူတိုင်း ဆိုရှယ်လစ်ဖြစ်နေရင် နိုင်ငံရေးလေးမျိုး ရှိပါတော့မလား။ စဥိးစားကြည့်စမ်းပါဦး။ မင်းဥာဏ်ရှိရင် သိမှာပေါ့”
အောင်မာ မင်းထက်ငါက ဥာဏ်ရှိတယ်”
”ဘာ မင်းက ငါ့ထက် ဥာဏ်ရှိသလား”
“မင်းထက် ဆယ်ဆမကဘူး ရှိတယ်”
”လာလေ၊ ဘယ်သူက ဥာဏ်ရှိတယ်ဆိုတာ အကြောင်းသိရအောင် သတ္တိရှိရင် ထွက်ခဲ့”
သဘာပတိ ဆိုးပေမှာ ဝင်၍ ဖြန်ဖြေရလေတော့၏။
”ဟေ့ တရားပွဲ ဆိုတာ စကားသာ ပြောရတယ်။ တစ်ယောက်နဲ့ တစ်ယောက်နဲ့ မချရဘူး” ဟု ဆိုးပေက ပြောကာ လက်သီး လက်မောင်းတန်းနေသော မောင်မောင်ကို ဆွဲ၍ ထိုင်ခိုင်းရလေ၏။
ထိူ့နောက်မှ ”မင်းတို့ အခုဒီမိုကရေစီနဲ့ ဆိုရှယ်လစ်တရားကို ကြားပြီးပြီ။ အခု အဝိန်က ကွန်မြူနစ်အကြောင်းကို ပြောလိမ့်မယ်” ဟု ကြေငြာလေ၏။
”မြို့မိမြို့ဖ ရဲဘော်အပေါင်းတို့ခင်ဗျား၊ ကွန်မြူနစ်ဆိုတာ ကွန်မြူနစ်မဟုတ်တဲ့လူတွေကို စစ်တိုက်ပြီးတော့ အနိုင်ရပြီး အားလုံးသတ်ပစ်တာမို့ လူများအပေါ်မှာ ဗိုလ်ကျရတာ အကောင်းဆုံးပါပဲ”
”လူကိုသတ်တာ အပြစ်ကြီးတယ်။ ကြိုးပေးခံရမယ်။ ပါတာနိပါနာကံ ထိုက်တယ်” ဟု မင်္ဂလသုတ် စာမေးပွဲအတွက် အားခဲနေသော ကျောင်းသားက ကြားဖြတ်၍ ပြောပြန်လေ၏။
”စစ်တိုက်ပြီး လူကို သတ်တာ အပြစ်မရှိဘူး။ ရာဇဝင်ထဲမှာ စစ်တိုက်ပြီး လူတွေအများကြီးသတ်နေကြတာပဲမဟုတ်လား”
”မင်း စစ်တိုက်လို့ မနိုင်ဘဲရှုံးတော့ကော” ဟု အခြား တစ်ယောက်က မေးလေ၏။
”ဘာပြောတယ်”
”မင်း စစ်တိုက်လို့ မနိုင်ရင် ဘယ့်နှယ်လဲ”
”မင်း စစ်တိုက်လို့ မနိုင်ရင် ဘယ့်နှယ်လဲ”
”ဘာလို့ မနိုင်ရမှာလဲ နိုင်မှာပေါ့”
”အောင်မယ်၊ ဦးဘိုးဝခြံထဲ ဝင်တုန်းက အဘိုးကြီး ထွက်လိုက်တော့ ဖင်နသီတန်းနေအောင် ထွက်ပြေးတဲ့ဂန်ကြောက်က စစ်တိုက်ရဲမတဲ့လား ဟား ဟား”
”ငါ တစ်ယောက်ထဲပြေးတာလား။ မင်းလဲပါတာပဲ”
”ဒါပေမဲ့ ငါက ကမ္ဘာကို စစ်တိုက်ပြီး အနိုင်ယူမယ် ပြောလို့လား”
”ငါက ဦးဘိုးဝကို ကြောက်လို့ ပြေးတယ်မှတ်လို့လား”
”ကြောက်လို့ပေါ့၊ မင်းပြေးတာ”
”မင်းက ငါ့သတ္တိ သိချင်လား။ လာလေ ဟင်း ကွန်မြူနစ်ထိရင် မီးပွင့်သွားမယ်”
”ဟေ့ တော်ကြတော့” ဟု ဆိုးပေက ဟန့်တားလိုက်ရပြန်ကာ ”အခု နောက်ဆုံး ငါ့အလှည့်မှာ တစ်သီးပုဂ္ဂလ အကြောင်းကို ငါ ဟောတော့မယ်” ဟု ကြေငြာလိုက်ရာ ပရိတ်သတ်အားလုံး ငြိမ်သက်စွာ နားထောင်နေကြလေ၏။
ဆိုးပေသည် အခြားနိုင်ငံရေးသမားသုံးဦးထက် ပို၍ မိမိကိုယ်ကိုထင်ရှားစေရန် ထင်းရှူးသေတ္တာပေါ် သို့ တက်၍ ရပ်လိုက်ရာ ဆွေးနေသည့်အတွက် သေတ္တာကျွံ၍ကျသွားလေ၏။ ပရိတ်သတ်ကြီးသည် လက်ခုပ်လက်ဝါးတီးကာ ရယ်ကြ လေတော့၏။ ဆိုးပေသည် ရှုံ့မဲ့ခြင်းမပြုပဲ ထလိုက်ပြီးလျှင် သေတ္တာထဲမှထွက်၍ ရှေ့၌ရပ်ကာ ”မြို့မိမြို့ဖများခင်ဗျာ” ဟု စကားစလိုက်မှ ပရိတ်သတ် ငြိမ်သွားလေ၏။
”ရှေးတုန်းက ပုဂံပြည်မှာ ပျူစောထီးဆိုတဲ့ လူတစ်ယောက်ရှိတယ်။ သူဟာ လောက်လေးပစ် အင်မတန် လက်တည့်တယ်။ အားလည်း ရှိတယ်။ သတ္တိလည်း သိပ်ကောင်းတယ်။ အဲဒီအချိန်တုန်းက ဧရာမ ငှက်ကြီးတစ်ကောင် ပုဂံပြည်ရောက်လာပြီး တစ်နေ့ကို မိန်းမ ခုနစ်ယောက် စားစားပစ်တဲ့အတွက် လူတွေ အကုန်လုံးက ကြောက်နေရတဲ့ အခါမှာ ပျူစောထီးက အဲဒီငှက်ကြီးကို လောက်လေးနဲ့ ပစ်သတ်လိုက်တော့မှ လူတွေဟာ ချမ်းသာရာ ရသွားတယ်။ နောက်ပြီးတော့ တစ်ခါ ကျားကြီးတစ်ကောင် မြို့ထဲဝင်ပြီး လူတွေ စားပြန်တဲ့အတွက် ပျူစောထီးက တာဇံလို ပါးစပ်ကအော်ပြီး ကျားကြီးနဲ့ နဘန်းချတာ ကျားကြီးစန့်ပါလေရော။ ဒီနောက် ရှုးပျံကြီးတွေ၊ ဝက်ကြီးတွေ သောင်းကျန်းတာ သူတစ်ယောက်တည်းနဲ့ နိုင်အောင်သတ်ပစ်လိုက်တယ်။ အဲဒါကြောင့် ပုဂံပြည်မှာ သူရှင်ဘုရင် လုပ်ရတယ်။ နောက်ပြီးတော့ တောင်ငူမှာ တပင်ရွှေထီးဆိုတာ ရှိတယ်။ သူဟာ ရန်သူတွေ ကြားထဲမှာ တစ်ယောက်ထဲ မြင်းစီးပြီး ဝင်ပြတယ်။ အခု ငါပြောတဲ့ လူတွေဟာ အားလုံး တစ်သီးပုဂ္ဂလချည်းပဲ။ ဘယ်သူမှ အားမကိုးဘဲ ကိုယ်တစ်ယောက်တည်းနဲ့ သူများအကျိုးကို ဆောင်ရွက်တယ်။ သူများပိုက်ဆံလည်း မလုဘူး။ လူလည်း မသတ်ဘူး။ ဘာကြောင့်လည်းဆိုတော့ သူတို့ဟာ တစ်သီးပုဂ္ဂလ ဖြစ်လို့”
ဆိုးပေ၏ တရားကို ပရိသတ်က အာရုံစိုက်၍ နေကြရာက စကားအဆုံးတွင် ပင့်ထားသည့် သက်ပြင်းကို ချလိုက်ကြလေ၏။ ဆိုးပေသည် မေးခွန်းထုတ်ဖို့ အခွင့်မပေးရစေရန် ”ကဲ မဲခွဲမယ်။ မင်းတို့ကြိုက်ရာလူကို မဲပေးရမယ်” ဟု ကြေညာလေ၏။
”ဒီမိုကရေစီကြိုက်ရင် လက်ထောင်”
အားလုံး ငြိမ်သက်နေကြလေ၏။
”ဆိုရှယ်လစ် ကြိုက်ရင် လက်ထောင်”
မည်သူတစ်ယောက်မျှ မလှုပ်ရှား။
”ကွန်မြူနစ်ကြိုက်ရင် လက်ထောင်”
တစ်ယောက်မျှ လက်ထောင်သည်ကို မတွေ့ရ။
”တစ်သီးပုဂ္ဂလ ကြိုက်ရင် လက်ထောင်”
ပရိသတ် တစ်ဦးမကျန် လက်ထောင်လိုက်ကြလေ၏။
”အဲဒါ ငါ့ကို ရွေးကောက်ကြတာပဲ။ ဒီအချိန်က စပြီး ငါဝန်ကြီးချုပ် ဖြစ်ပြီ။ တိုင်းပြည်ကို ငါအုပ်စိုးမယ်။”
”ဒီလိုဆိုရင် တို့အတွက် ပထမဦးဆုံး မင်းဘာလုပ်ပေးမလဲ” ဟု သျှောင်ထုံးနှင့် သူငယ်လေးတစ်ယောက်က မေးလေ၏။
”ဘာလုပ်ပေးရမှာလဲ။ ငါ တိုင်းပြည်ကို အုပ်ချုပ်ဖို့ အလုပ်ပဲ ရှိတာ။”
”တိုင်းပြည်ကို အုပ်ချုပ်တယ်ဆိုတာ တို့အတွက် အလုပ်လုပ်ပေးရတာလို့ တို့အဖေက ပြောတယ်။ မင်းကို မဲပေးတာ ငါလိုချင်တာ လုပ်ပေးဖို့”
”မင်းက ဘာလိုချင်လို့လဲ”
”ရွာလယ်က ရေကန်ကို တို့ကျောင်းသားပိုင် ဖြစ်အောင် လုပ်ပေးဖို့ မင်းကို မဲပေးတာ”
ရွာလယ်ရှိ ရေကန်ကလေးမှာ ဒေါ်အေးမြ၏ အိမ်ရှေ့တွင် ရှိ၍ လမ်းနှင့်ကပ်နေသဖြင့် ယခင်က ကလေးများ ခရုဖမ်းစရာ၊ ငါးမျှားစရာ ဖြစ်ခဲ့သော်လည်း မကြာမီကပင် ဒေါ်အေးမြက ထိုရေကန်မှာ သူ၏ မြေကွက်ထဲတွင် ပါဝင်သည်ဆိုကာ ခြံခတ်၍ ထားလိုက်သည့်အတွက် ကလေးများ အသုံးမချရဘဲ ရှိခဲ့လေသည်။ သို့အတွက် ထိုရေကန်ကို ကျောင်းသားပိုင် ပြုလုပ်ရေးကို အားလုံးက သဘောကျကြ လေ၏။
”မင်းတို့ ခိုင်းတာ ငါက လုပ်ရမှာလား။ ငါ ဝန်ကြီးချုပ်ပဲ။ ငါက မင်းတို့ကို ခိုင်းရမယ်။ အစိုးရကို အပူမကပ်နဲ့။ မင်းတို့ဟာ မင်းတို့ လုပ်ရမယ်ဆိုတာ မကြားဘူးလား”
”အဲဒါ တစ်သီးပုဂ္ဂလ အစိုးရ မဟုတ်လို့ပေါ့။ တစ်သီးပုဂ္ဂလဆိုတာ လူအများအတွက် လုပ်ပေးရမယ်လို့ မင်းပြောတာပဲမဟုတ်လား”
”ဒါပေမဲ့ လုပ်ချင်တာမှ လုပ်မှာပေါ့”
”ဘာမဆို လုပ်ပေးရမှာပဲ။ မင်းမလုပ်ချင်တာ ဒေါ်အေးမြကို မင်းကြောက်လို့”
”ငါလား ကြောက်မှာ”
”မကြောက်ရင် လုပ်ပြပါလား”
”ငါမလုပ်ဘူး”
“ရအောင် မလုပ်နိုင်လို့ မင်းမလုပ်တာပေါ့”
”လုပ်နိုင်တယ်”
”မင်းမလုပ်နိုင်ပါဘူး”
”လုပ်နိုင်တယ်”
”ဒါဖြင့် လုပ်ပါလား”
”ကြည့်နေ လုပ်ပြမယ်”
ဤသို့ လွှတ်ခနဲ ပြောလိုက်သည့် စကားသည် ပရိတ်သတ်အားလုံးကို ကျေနပ်သွားစေလေရာ သြဘာသံများ ဆူညံသွားလေ၏။
”ဘယ်လောက် အကြာမှာ ရအောင်လုပ်ပေးမှာလဲ” ဟု တစ်ယောက်က ထ၍မေးပြန်လေ၏။
”စနေနေ့မတိုင်ခင် ရစေ့မယ်”
သြဘာသံများဖြင့် အစည်းအဝေး ရုတ်သိမ်းလိုက်ကြလေ၏။
——————————
ဆိုးပေသည် လွှတ်ခနဲ အလွယ်တကူ ပြောလိုက်နိုင်သလောက် အလုပ်မှာ မလွယ်ကူလှသည်ကို တွေ့လေ၏။ အဝိန်၊ မောင်မောင်၊ သာဒွန်းဦးတို့က သူတို့ပါ ကူညီပါမည်ဟု ဆိုကြသော်လည်း ဆိုးပေက လက်မခံချေ။
မင်းတို့က ငါနဲ့ တစ်ဖက်စီဖြစ်နေတယ်။ ဂိုဏ်းချင်းမတူဘူး။ ဒါကြောင့် ငါနဲ့ အတူတူလုပ်လို့မဖြစ်ဘူး”
”ဒါပေမဲ့ ရေကန်ပြန်ရဖို့ဟာ ရည်ရွယ်ချက်ချင်း အတူတူပဲ။ တို့လဲပါမှာပေါ့”
”မင်းတို့က ဂိုဏ်းမတူတဲ့ အကောင်တွေ။ ငါလုပ်တာ မအောင်မြင်အောင် နှောင့်ယှက်ရမယ်။ မင်းတို့ အလုပ်ဟာ ငါဘာဘဲလုပ်လုပ် အတိုက်အခံ လုပ်ရမယ်။ အဲဒီအတိုင်း ဥပဒေရှိတယ်”
”မင်း လုပ်မရအောင် တို့က ဖျက်ဆီးနေရင် ရေကန်ပြန်မရဘဲရှိမှာပေါ့”
”မင်းတို့ နှောင့်ယှက်ပေမယ့် ငါက ရအောင်လုပ်မယ်။ ငါလုပ်မရရင် ငါ့ကိုဖြုတ်ချပြီး မင်းတို့က တက်လုပ်ရမယ်။ အခုနေတော့ ငါနဲ့ တစ်ဖက်တစ်လမ်းချည်းပဲ မင်းတို့ လုပ်ရမယ်”
”ဒါဖြင့် မင်း ဘယ်လို လုပ်မလဲ”
”ဒေါ်အေးမြဆီ ငါတစ်ယောက်တည်းသွားပြီး တောင်းကြည့်ဦးမှာပဲ။ ဒါ ပထမအလုပ်”
”အင်း ဒုက္ခတစ်ခုခုတွေ့ရင် တို့အကူအညီ မပေးရဘူးလား”
”ဒုက္ခတွေ့နေရင်တော့ ညွန့်ပေါင်းအစိုးရဖွဲ့ရမှာပေါ့” ဟု သာဒွန်းဦးက ဆိုလေ၏။
”ဒီလိုဆိုရင် မင်းတို့ အကူအညီလိုတဲ့အခါ ငါလေချွန်လိုက်မယ်။ လေချွန်ရင် ညွန့်ပေါင်းအစိုးရဖွဲ့ဖို့ အထိမ်းအမှတ်ပဲ”
ဆိုးပေသည် သူများအား မခိုင်းရဘဲ သူများ ခိုင်းသမျှ လုပ်ရသည့် ဝန်ကြီးချုပ်ဘဝကို အထင်မကြီးတော့သော်လည်း မိမိထားသည့် ကတိကို ဘယ်အခါမျှ ဖျက်ချင်သူ မဟုတ်သည့်အလျောက် ဒေါ်အေးမြအိမ်သို့ အရဲစွန့်၍ သွားရောက်လေ၏။
ဒေါ်အေးမြကား အသက် ငါးဆယ်ခန့်ရှိ အပျိုကြီးဖြစ်ကာ ကျက်သရေရှိသောမျက်နှာနှင့် ပြည့်စုံသူတစ်ဦးဖြစ်ပေ၏။
”ဘာကိစ္စလဲသူငယ်၊ ဘာပြောစရာရှိလို့လဲ”
ဆိုးပေသည် ဝန်ကြီးချုပ်တို့၏ ဣနြေ္ဒဖြင့် ”ကျွန်တော်တို့ ရေကန်ကိစ္စပါပဲ” ဟု ဆိုလေ၏။
”ဘာကွဲ့၊ မင်းတို့ရဲ့ ရေကန် ဟုတ်လား”
”ဟုတ်ကဲ့၊ ဒီရေကန်ဟာ အရင်က ကျွန်တော်တို့ ကစားတဲ့ ရေကန်ပါ။ အခု ခြံခတ်ထားတာကို ဖျက်ပြီး ကျွန်တော်တို့ကို ပြန်ပေးပါ”
”ဟဲ့ ကလေးရဲ့၊ ဒီရေကန်ဟာ အဒေါ့် မြေကွက်ထဲရောက်အောင် ခိုးပြီး ခြံခတ်ထားတာမှမဟုတ်ဘဲ။ အစကတည်းက ဒီမြေကွက်ထဲမှာပါနေတာ။ တို့အဖေများ လက်ထက်တုန်းက ခြံမခတ်ထားပေမဲ့ အခု အမွေခွဲလိုက်ကြလို့ မြေတိုင်းရုံးက မြေပုံ ကြည့်လိုက်တော့ တို့မြေကွက်ထဲပါနေတာသိရလို့ ခြံခတ်ထားရတာ”
”ဒေါ်ဒေါ်တို့အဖေလက်ထက်တုန်းက ခြံမခတ်ထားတာ အစိုးရ လက်ထဲရောက်နေလို့ပေါ့”
”အစိုးရလက်ထဲရောက်နေရင် မြေပုံထဲမှာ ပါနိုင်ပါ့မလား လူကလေးရဲ့”
”မြေပုံ မှားနေရင် မှားနေမှာပေါ့။ ကျွန်တော် မြေပုံ အမှန်ကိုပြနိုင်ရင် ကျွန်တော်တို့ကို ပြန်ပြီးပေးမလား”
ဒေါ်အေးမြက ပြုံးလျက် ”အဲဒီ မြေပုံအမှန်ကို ရှာခဲ့ပါကွယ်။ ဟုတ်ရင် ပြန်ပေးရတာပေါ့။ ကဲ ကဲ မင်းပြန်ပေတော့၊ အဒေါ့်မှာ အလုပ်လုပ်စရာတွေ ရှိသေးတယ်” ဟု ပြောလေ၏။
”ဟုတ်ကဲ့” ဟု ဆို၍ ဆိုးပေလည်း ပြန်ခဲ့လေ၏။
ဆိုးပေသည် ဒေါ်အေးမြ၏ မြေကွက်ပုံစံကို တစ်ညလုံးရေးဆွဲလေ၏။ ထိုပုံစံထဲတွင် ရေကန်ကို ခြံစည်းရိုးအပြင်တွင် ထုတ်ထားကာ ကြက်ခြေ အမှတ်အသားပြ၍ မြေပုံအောက်နားတွင် ကြက်ခြေတစ်ခုနှင့်အတူ ‘အီရေဂန်မှာ ချံစီးယိုး အပြင်ဘက်မှာရှိသီ’ ဟု ဖေါ်ပြထားလေ၏။ ထို့နောက် ဒေါ်အေးမြ၏ ဖခင်အား အစိုးရကပေးသည့် အနေဖြင့် စာတစ်စောင်ဖြစ်အောင် အတော်ကြိုးစားရေးသားရလေ၏။
ဒေါ်အေးမြ၏ ဖခင်သိစေရမြီမှာ ခင်ဗျား၏ အိမ်အပြင်ဖက်ကရေဂန်ကို ရောင်းချသိအတွက် ကြေးဇူးတင်ပါသီ။ အီရေဂန်ကို ခလေးမြားအတွက် အစိုးရက အသုံးချလိမ့်မြီ။ မည်သူမဆို ရေဂန်ကို လွတ်လပ်စွာ သုံးနိုင်သီ။ ရေဂန်ကို ချံစီးယိုး အပြင်ဘက်ထုတ်ပေးသဖြင့် ကြေးဇူးတင်ပါသီ။ ဒေါ်အေးမြလည်း ကျန်းမာစေရန် ဆုတောင်းပါသည်။
သစ်စာရှိလှစွာသော
(ပုံ) အစိုးရ
(ပုံ) အစိုးရ
ဆိုးပေ၏ မြေပုံနှင့်စာမှာ ထိုနာမည်နှစ်လုံးဖြင့် သုံးစွဲခေါ်ဝေါ်ခြင်းငှာ မထိုက်တန်လှသော်လည်း ဆိုးပေမူကား မိမိ၏လက်ရာကို များစွာကျေနပ်ပေ၏။ ထိုသို့ကျေနပ်နေရုံနှင့် မပြီးသေးချေ။ ထိုစာကို ဒေါ်အေးမြလက်သို့ရောက်အောင်လုပ်ရန် ရှိနေပေသေးသည်။ ထိုစာမှာ ဒေါ်အေးမြ၏ ဖခင်ထံသို့ အစိုးရက ယခင်ပေးထားသည့်စာအဖြစ်ဖြင့် ဒေါ်အေးမြသိရှိအောင် လုပ်ရမည်ဖြစ်ရာ ယခုမှမိမိက သွားရောက်ပေးပို့၍ မဖြစ်နိုင်။
ဒေါ်အေးမြအိမ်ထဲတွင် တစ်နေရာရာ၌ ချထားရမည်မှာလည်း တိတ်တိတ်ဝင်ရောက်နိုင်ရန် ခဲယဉ်းလှပေသည်။ သို့ဖြစ်၍ အမျိုးမျိုးစိတ်ကူးထုတ်ရာ ရေကန်ကို တွေးမိလေ၏။ ဒေါ်အေးမြသည် ထိုရေကန်ကို အုတ်ရေကန်ကလေးလုပ်ရန် ပန်းရန်သမားများနှင့် စီစဉ်လျှက်ရှိရာ ထိုစာကို ရေကန်စပ်တွင် ပစ်ချထားလျှင် အလုပ်သမားများ တူးရင်းဆွရင်းတွေ့ရှိပြီး ဒေါ်အေးမြ လက်ထဲသို့ရောက်မည်ကို စဉ်းစားမိလေ၏။
နောက်တစ်နေ့ ညဖက်တွင် ဆိုးပေသည် ပန်းရန်သမားများ အလုပ်ပြန်ချိန်တွင် ရေကန်ဆီသို့ ရောက်လာလေ၏။ သူရေးထားသည့် မြေပုံနှင့်စာကို ပုလင်းအလွတ်တစ်လုံးထဲတွင် ထည့်၍ ဘူးဆို့ပိတ်ထားကာ ခါးကြားတွင်ထိုး၍ ယူလာခဲ့၏။ ထိုပုလင်းကို ဒေါ်အေးမြ၏အိမ်ဖက်ရှိ ရေကန်စပ်တွင် ပစ်ချထားရန်ဖြစ်လေရာ၊ ခြံထဲသို့ဝင်ရောက်၍ ပစ်ချထားရန်သော်လည်းကောင်း၊ လမ်းပေါ်မှ လှမ်း၍ပစ်ရန်သော်လည်းကောင်း မဖြစ်နိုင်ချေ။ ထိုသို့ပြုလုပ်လျှင် မိမိကို လူမြင်သွားမည်ဖြစ်ရာ မိမိ၏လုပ်ငန်းကြီးပါ ပျက်ပြားသွားမည်ကို စိုးရိမ်ရပေ၏။ဆိုးပေသည် မှောင်ရိပ်ခို၍လျှောက်လာရင်း ရေကန်နှင့်ကပ်နေသည့် လမ်းဘေးရှိ စိန်ပန်းပင်အကိုင်းကြီးတစ်ကိုင်းသည် ရေကန်ပေါ်၌ မိုး၍နေသည်ကို တွေ့ရလေရာ ထိုစိန်ပန်းပင်တက်၍ ထိုအကိုင်းပေါ်မှနေပြီး ရေကန်ထဲ စာပစ်ချရန် အကြံပေါ်၍လာလေ၏။
ကံအားလျော်စွာ လမ်းပေါ်တွင် လူရှင်းလျက်ရှိသဖြင့် ဆိုးပေသည် ရဲရဲတင်းတင်း သစ်ပင်ပေါ် သို့ တက်ပြီး ရေကန်ဖက်သို့ထွက်နေသည့် သစ်ကိုင်းဖျားသို့ရောက်အောင် တဖြည်းဖြည်းတွား၍ လာခဲ့လေ၏။ ဆိုးပေသည် ရေကန်အလယ်တည့်တည့်သို့ရောက်သည်တွင် ခါးကြားမှ ပုလင်းကိုဆွဲထုတ်ကာ ရေကန်စပ်သို့ရောက်အောင်ပစ်ချရန် လက်လွှဲလိုက်လေ၏။ ထိုတစ်ခဏအတွင်းမှာပင် ဆိုးပေသည် မိမိကိုယ်ကို ဘာဖြစ်၍ဖြစ်သွားမှန်း မသိလေသောကြောင့်လော၊ သစ်ကိုင်းလှုပ်၍လော၊ ရေညှိကြောင့်လော၊ သစ်ပင်တက်စဉ်က ရှိမခိုးခဲ့မိ၍လော၊ အားလွန်၍လောမသိ။ ရေကန်အလယ်တည့်တည့်သို့ လိမ့်၍ကျလေတော့၏။
ရေကန်မှာ စိမ်းဝါဝါအဆီဝေ့ပြီး ညစ်ပတ်လျက်ရှိလေရာ ဆိုးပေ၏ တစ်ကိုယ်လုံး သရဲရုပ်ပေါက်သွားလေ၏။ သို့သော် ဆိုးပေသည် မိမိကိုယ်ကို ပြန်၍ကြည့်မနေအားပေ။ ရေကန်ထဲသို့ကျသည့်အသံမှာ အတော်ပင်ကျယ်လောင်လေရာ လူထွက်မကြည့်မီ ပြေးမှပဲဟု သတိရကာ ပုလင်းကို ရေကန်စပ်သို့ လွှင့်ပစ်ထားခဲ့ပြီး လမ်းပေါ် သို့ လျင်မြန်စွာတက်ရောက်ထွက်ပြေးလေတော့၏။
————————————
နောက်တစ်နေ့တွင် ဆိုးပေသည် ရေကန်ဆီသို့ မယောင်မလည်လျှောက်၍လာပြီး ရေကန်ကိုကြည့်လိုက်ရာ မိမိမြင်ရသည်ကိုပင် မယုံနိုင်အောင် ဖြစ်နေပေ၏။ ရေကန်မှာ ယခင်ကအတိုင်း လမ်းဘေးတွင်ပင် ရှိသော်လည်း ခြံစည်းရိုးများခတ်၍မထားသည့်အပြင် ဒေါ်အေးမြ၏ ခြံစည်းရိုးအပြင်ဖက်သို့ ထုတ်၍ထားသည်ကို တွေ့နေရပေ၏။ ဆိုးပေသည် မျက်စိကိုမှိတ်ပြီး ပြန်၍ဖွင့်ကြည့်လေ၏။ မိမိမြင်နေရသည်မှာ အမှန်အတိုင်းပင်ဖြစ်နေသည်ကို တွေ့ရလေ၏။ ဤတွင် ဆိုးပေသည် ဝမ်းသာအားရနှင့် ဂိုဒေါင်ဆီသို့ လျင်မြန်စွာပြေးသွားပြီးလျှင် မိမိ၏ မဲဆန္ဒရှင်များအား
”ဟေ့ ငါလုပ်လို့ ရပြီကွ။ အောင်ပြီ။ ရေကန်ကို ခြံအပြင် ထုတ်ပေးလိုက်ပြီး တို့ကျောင်းသားပိုင်ဖြစ်ပြီ” ဟု ကြေငြာလိုက်လေ၏။
မဲဆန္ဒရှင်များကား ဆိုးပေ၏ စကားကို မယုံ့တယုံနှင့် ဆိုးပေကို စိုက်၍ကြည့်နေကြလေ၏။
”အလကားပါ။ မင်း လုပ်လို့မရပါဘူး”
”ရတယ် လာခဲ့။ မယုံရင် မင်းတို့ပါ လိုက်ကြည့်လှည့်”
ဆိုးပေ၏ မဲဆန္ဒရှင်များသည် ဆိုးပေ၏နောက်က လိုက်ပါလာကြကာ ရေကန်ဆီသို့ ရောက်လာကြရာတွင် ဆိုးပေပြောသည့်အတိုင်း မှန်၍နေသည်ကို အံ့သြောစွာတွေ့နေကြရလေ၏။
ဒေါ်အေးမြ၏ အိမ်တွင်း၌ကား ဘုန်းကြီးငါးပါး ပင့်၍ ပရိတ်ရွတ်လျက်ရှိလေ၏။ အပြီးတွင် ဘုန်းကြီးတစ်ပါးက ”ဒကာမကြီး ဖြစ်ရပုံကို ပြောပြပါဦး” ဟု မေးလေ၏။
”အိမ်ရှေ့က ရေကန်ဟာ တပည့်တော်မတို့ အဘိုးလက်ထက်က ခြံအပြင်ကို ထုတ်ထားတယ် ဘုရား။ ဒီလိုထုတ်ရခြင်းဟာ ဒီရေကန်ထဲ လူဆင်းပြီးသေတဲ့အတွက် ခဏခဏ သရဲခြောက်လို့တဲ့ ဘုရား”
”အေး ဘုန်းကြီးများလည်း ဒီအကြောင်းကို နည်းနည်းပါးပါး ကြားဖူးတယ်”
”တပည့်တော်မလည်း အဲဒီအကြောင်းကိုမေ့နေပြီး ရေကန်လုပ်မယ်လို့ စိတ်ကူးနေတာ မနေ့ညက ဘုရားရှိခိုးနေတုန်း ရေကန်ဆီက ဗြုံးဆိုတဲ့ အသံကြီးကြားရလို့ ထွက်ကြည့်လိုက်တဲ့အခါ ရေကန်အလယ်ကောင်က မည်းမည်း မည်းမည်းနဲ့ ကုန်းထလာတဲ့သဏ္ဌာန်တစ်ခုတွေ့ရတယ် ဘုရား။ လူလည်းမဟုတ်၊ တိရစ္ဆာန်လည်းမဟုတ်ဘူး ဘုရား။ တစ်ကိုယ်လုံး အဆီတွေလည်း ရွှဲလို့။ တပည့်တော်မလည်း ဆက်ပြီးမကြည့်ရဲတာနဲ့ တံခါးပိတ်ထားလိုက်ရတယ်။ မကြာခင်ကလည်း လူယောင်ဖန်ဆင်းပြီး တပည့်တော်မထံ ဒီရေကန်ကိုလာပြီး တောင်းဖူးသေးလေတော့ တပည့်တော်မလည်း ဒီရေကန်ကို ဒီမနက်ချက်ချင်း ခြံအပြင်ပြန်ပြီးထုတ်လိုက်တော့တာပါပဲ။ ခြံထဲမှာ အဲဒီတစ္ဆေရှိနေဦးမှာစိုးလို့ အရှင်ဘုရားတို့ကိုပင့်ပြီး ပရိတ်နာရတာပါဘုရား”
”အခု ကျုပ်တို့ ပရိတ်ရွတ်လိုက်လို့ ဒကာမကြီးစိတ်ထဲမှာ ရှင်းသွားပြီမဟုတ်လား။ ကဲ ကဲ ဘုန်းကြီးများလည်း ပြန်လိုက်ဦးမယ်” ဟု ဆိုကာ လှူဖွယ်ဝတ္ထုများကို ဘုန်းကြီးကျောင်းသားကလေးများအား အသယ်ခိုင်းပြီး ပြန်၍ကြွကြလေ၏။
———————————————
”ဟေ့ ဆိုးပေ မင်းသိပ်ဟုတ်ပါလား။ ဘယ်လိုရအောင် လုပ်တာလဲ”
ဆိုးပေသည် မိမိအား အံ့သြောချီးကျူးနေကြသူတို့၏ အလယ်တွင် ခါးထောက်၍ ”ငါ ဒီမိန်းမကြီးဆီသွားပြီး ငါ ဝန်ကြီးချုပ်ဖြစ်တာကို ပြောပြပြီးတော့ ရေကန်ကို ပြန်ပေးဖို့တောင်းတာပေါ့။ မပေးရင် ဥပဒေအရ သူနေတဲ့အိမ်ပါ ပြည်သူပိုင်လုပ်မယ် ပြောလိုက်တာနဲ့ အပြင်ဘက် ထုတ်ပေးတာပေါ့” ဟု ပြောလိုက်လေ၏။
”ဒါမှ တို့ဝန်ကြီးချုပ် ဆိုးပေကွ။ အခု ရေကန်ကို ပြန်ရပြီ။ နောက်ထပ် တို့လိုချင်တာက”
”ဟေ့ကွာ တော်ပြီ။ ငါဘာမှ မလုပ်ချင်တော့ဘူး။ ဝန်ကြီးချုပ်လည်း မလုပ်ချင်တော့ဘူး။ မင်းတို့ ဝန်ကြီးချုပ်လုပ်ချင်တဲ့လူ လုပ်ကြတော့။ ငါလွှဲပေးလိုက်ပြီ။ ငါတော့ တောပုန်းလုပ်တမ်းပဲ ကစားတော့မယ်” ဟု ဆိုကာ မောင်မောင်၊ အဝိန်တို့ ရှိရာသို့ ထွက်၍သွားလေတော့သတည်း။
ပြီးပါပြီ
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
