>
ပြည်တွင်းဂျာနယ် အယ်ဒီတာတဦး
နိုဝင်ဘာ ၄၊ ၂၀၁၀
“—ဒုက္ခပင်လယ်ဝေနေတဲ့ ရခိုင်ပြည်သူတွေ အတွက် ကူညီရမယ့်ဒေသ၊ ရခိုင်ဒေသ အခြေစိုက် ပါတီတွေကို ကော်မရှင်ဥပဒေနဲ့ ပြုလုပ်ခွင့် မရအောင် ချုပ်ထားပြီး ကြံ့ခိုင်ရေးပါတီ တခုထဲကပဲ ပွဲလန့်တုန်း ဖျာခင်း—”ရွေးကောက်ပွဲ ကျင်းပဖို့ကတော့ ရက်ပိုင်းပဲ လိုပါတော့တယ်။ ဒီတော့လည်း ပါတီတွေ အပြိုင်အဆိုင် ကြိုးပမ်းနေကြတာ တွေ့နေရပါတယ်။ ဒါကလည်း န.အ.ဖ လက်ကိုင်တုတ် ရွေးကောက်ပွဲ ကော်မရှင်က ပေးတဲ့ မစို့မပို့ အခွင့်အရေးလေး အတွင်းကပဲ ဆိုတာ အားလုံး သိပြီးသားပါ။ ပြိုင်ပြီ ဆိုမှဖြင့် နိုင်ချင်ကြတာ ဓမ္မတာပါပဲ။ နိုင်ချင်တာကို နိုင်အောင်လည်း လုပ်ကြရပေမပေါ့။ ဘယ်လို လုပ်ကြမလဲ။
ဒီမိုကရက်တစ် အင်အားစုတွေ ဆိုကြတဲ့ လက်တဆုပ်စာ ပါတီလေးတွေ အတွက်ကတော့ ခက်ခက်ခဲခဲပါပဲ။ ရွေးကောက်ပွဲ ကော်မရှင်ရဲ့ ဓားမိုးမှုအောက်က ရုန်းကန်ရင်း ဒီမိုကရေစီအသံ၊ လူ့အခွင့်အရေးအသံ နှစ် ၆၀ ခန့် နောက်ကျနေတဲ့ တိုင်းပြည်ရဲ့ ရုပ်ပိုင်း တိုးတက်မှုတွေကို ပြန်လည် တည်ဆောက် ဦးစားပေးမယ်ပေါ့။ ကုန်ဈေးနှုန်းတွေ ချရမယ်၊ မီးတွေ လာရမယ်၊ ရေတွေ လာရမယ်၊ လမ်းခင်းပေးမယ်၊ ၀န်ထမ်းတွေဘ၀ ဖူလုံရမယ်လို့ မပေးရဲ ပေးရဲ ကတိ လေသံဖျော့ဖျော့လေးနဲ့ တိုးတိုး တိတ်တိတ်မျှပါပဲ။
အဲဒီလို အခြေအနေမျိုးမှာ လွန်ခဲ့တဲ့ရက်ပိုင်းက အားလုံး သိကြတဲ့အတိုင်း မိုးကြီးလို့ မုန်တိုင်းတွေကလည်း မြန်မာနိုင်ငံကို အလုံးအရင်းနဲ့ ဝင်လာခဲ့ပါတယ်။ အဓိက ဦးတည် တိုက်ခတ်ခံရတာကတော့ ရခိုင်ပြည်နယ်ပါပဲ။ အဲဒီအခြေအနေမှာ ရခိုင် အခြေစိုက်ပါတီတွေက ကိုယ်ပြိုင်တဲ့ဒေသမှာ ဖြစ်နေတဲ့ အခြေအနေပေါ်မှာ တကယ်ပဲ လိုအပ်မှုကို ဖြည့်ဆီးဖို့ ကယ်ဆယ်ရေး လုပ်ငန်းတွေ လုပ်ကြရမယ်၊ ကိုယ့်ဒေသပြည်သူတွေ အကျိုးကို လက်တွေ့ကျကျ လိုလားကြောင်း ပြသမယ်ဆိုတဲ့ စိတ်ကူးတွေနဲ့ ပြင်ဆင် ကြိုးပမ်းကြတာ အမှန်တကယ်ပါပဲ။
အဲဒီလိုမျိုး လူမှု ဒုက္ခတွေ ဝေနေတဲ့ အချိန်မှာ န.အ.ဖ လက်ကိုင်တုတ် ရွေးကောက်ပွဲ ကော်မရှင်ဟာ န.အ.ဖ တဖြစ်လဲ ကြံ့ခိုင်ရေးပါတီရဲ့ ရှေ့ကနေ မားမားမတ်မတ် ရပ်ပြီး သူတို့တွေရဲ့ အတွင်းသရုပ်ကို ထုတ်ပြလိုက်ပါပြီဗျာ။
လေဘေး၊ ရေဘေး ခံကြရတဲ့ ပြည်သူတွေကို ကူညီကယ်ဆယ်ရေး လုပ်မယ်ဆိုတဲ့ ရခိုင်ပါတီတွေနဲ့ အခြားဒေသ အခြေစိုက် ပါတီတွေ ကူညီကယ်ဆယ်ရေး လုပ်ငန်းလုပ်မယ် ဆိုရင် ကော်မရှင်ကို အရင် အကြောင်းကြားစာ တင်ရမယ်၊ ခွင့်ပြုမှ ကူညီ ကယ်ဆယ်ခွင့်ရမယ် ပေါ့ဗျာ။
ကဲ- ဘယ်လောက် လူသား မဆန်လိုက်တဲ့ ညွှန်ကြားချက်လဲ။ ဘယ်လောက် လူစိတ်ကင်းမဲ့တဲ့ စိတ်ကူးဆန်လဲ။ ဘယ်လောက် မမျှတတဲ့ ဥပဒေတွေကို ထုတ်ပြန်တဲ့ ကော်မရှင်လဲ။
ဒုက္ခပင်လယ်ဝေပြီး ရေပေးပါ၊ အစာပေးပါ၊ နေစရာပေးပါ ဆိုပြီး တစာစာနဲ့ အကူအညီ အော်ဟစ် တောင်းနေချိန်မှာ မြန်နိုင်သမျှမြန်ဖို့ မလိုပေဘူးလား။ ရှိသမျှ အင်အားနဲ့ ပုံအော မကူညီထိုက်ပေဘူးလား။ ရိုးသားစွာ၊ လူပီသစွာ စဉ်းစားသူတွေကတော့ လိုအပ်တာပေါ့လို့ ဖြေပါလိမ့်မယ်။
ဒုက္ခပင်လယ်ဝေနေတဲ့ ရခိုင်ပြည်သူတွေ အတွက် ကူညီရမယ့်ဒေသ၊ ရခိုင်ဒေသ အခြေစိုက် ပါတီတွေကို ကော်မရှင်ဥပဒေနဲ့ ပြုလုပ်ခွင့် မရအောင် ချုပ်ထားပြီး ကြံ့ခိုင်ရေးပါတီ တခုထဲကပဲ ပွဲလန့်တုန်း ဖျာခင်းလိုက်ပါတယ်။ သူတို့ပါတီ တခုထဲပဲ ရေဘေး၊ လေဘေး ဒုက္ခရောက်သူတွေကို ကူညီခွင့် ရကြတယ်။ ကူညီနေကြတယ်။
အင်္ကျီ ပေးမယ်၊ ဆန်ပေးမယ်၊ နေစရာ ပေးမယ်။ ဒီအတွက် သူတို့ကို မဲပြန်ပေးရမယ်ပေါ့ဗျာ။ ဒီပုံစံမျိုး လွန်ခဲ့တဲ့ ၂၀၀၈၊ ကမ္ဘာကျော် နာဂစ်မုန်တိုင်းကြီးမှာလည်း ကယ်ရာမဲ့နေသူတွေကို ကူညီဖို့ လာနေသူတွေကို ရိက္ခာအပြည့် တင်လာတဲ့ အမေရိကန် စစ်သင်္ဘောကြီး ၃ စင်းကို ခဏ ဘေးဖယ်ထားပါအုံး၊ ကွမ်းခြံကုန်းမြို့နယ် အ၀င်ကနေ မောင်းထုတ်ပြီး သူတို့ကိုယ်တိုင်ပဲ ဒုက္ခရောက်သူတွေကို ဆန်တဗူး၊ ကြက်သွန် ၂ ဥလောက်ကို မစို့မပို့ ပေးပြီး သူရဲကောင်း လုပ်ပြခဲ့ဖူးပါတယ်။
အခု ကျနော်တင်ပြတာတွေကို ပြန်ပြီး ချုပ်ကြည့်ကြရအောင်။
(၁) ပြည်သူတွေ ဒုက္ခရောက်တိုင်း မျက်ကွယ်ပြုနေတာက န.အ.ဖ။
(၂) တိုင်းပြည်အရေးနဲ့ ပတ်သက်လာရင် အများဆန္ဒအရ ဆိုတဲ့ ဒီမိုကရေစီအခြေခံစံတွေကို လုံးဝ မလေးစား မလိုက်နာတာဟာ န.အ.ဖ။
(၃) ကြံ့ခိုင်ရေးအသင်းက တဖြစ်လဲ ကြံ့ဖွံ့ပါတီ ဆိုတဲ့ သမိုင်းအစဉ်အလာဆိုးနဲ့ လူထုကို အနိုင်ကျင့်ပြီး တိုင်းပြည်တ၀ှမ်းမှာ တန်ခိုး၊ သြဇာ၊ အရှိန်အ၀ါတွေနဲ့ ချယ်လှယ် ဗိုလ်ကျတတ်သူတွေကို တနည်းအားဖြင့် အာဏာရှင်ပေါက်စလေးတွေ မွေးထုတ်နေတာဟာ န.အ.ဖ။
(၄) ၂၀၀၈ စစ်တပ်ကြီးစိုးတဲ့ အခြေခံဥပဒေကို အဓမ္မ အတည်ပြုနိုင်အောင် ကြိုးပမ်းခဲ့ပြီး ၎င်းဥပဒေရဲ့အကျိုးဆက် ၂၀၁၀ ရွေးကောက်ပွဲကို ကျင်းပဖို့ ပြင်ဆင်ဆောင်ရွက်နေတာလည်း န.အ.ဖ။
(၅) ၂၀၁၀ ရွေးကောက်ပွဲကို ကြီးကြပ်ဖို့ ရွေးကောက်ပွဲ ကော်မရှင်ကို ဖွဲ့ပေးခဲ့တာလည်း န.အ.ဖ။ အဲဒီ ကော်မရှင်ဆိုတဲ့ ပုဂ္ဂိုလ်တွေကလည်း န.အ.ဖဗိုလ်ချုပ်ဟောင်းတွေနဲ့ န.အ.ဖ သြဇာခံများပေပေါ့။
(၆) အဲဒီ ၂၀၁၀ ရွေးကောက်ပွဲကို ဝင်ပြိုင်ဆင်နွဲ အနိုင်ယူဖို့အတွက် ကြံ့ခိုင်ရေးပါတီကို တရားသဖြင့် မဟုတ်သော နည်းလမ်းပေါင်းစုံဖြင့် စိတ်တိုင်းကျ လုပ်ပိုင်ခွင့်၊ မဲဆွယ်ခွင့်ပေးထားသူကလည်း န.အ.ဖ။ ဒါကြောင့်မို့ ဒီ န.အ.ဖ ကလုပ်မယ့် မသန့်ရှင်းတဲ့၊ မလွတ်လပ်တဲ့ ၂၀၁၀ ရွေးကောက်ပွဲကို ကျနော်တို့ပြည်သူတွေက ဘာမျှော်လင့်ချက်နဲ့ မဲသွားပေးမှာလဲ။
ပြည်သူအပေါင်းတို့ ခင်ဗျား – ကိုယ့်အိမ်မှာသာ ဇိမ်ခံပြီး ၇ ရက်၊ ၁၁ လ၊ ၂၀၁၀ နေ့ကို ကျော်ဖြတ်ကြပါစို့လို့ ဆော်သြလိုက်ချင်ပါတယ်။
photo: http://girirelief.blogspot.com/search/label/Photo%20News
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
