ခင်နှင်းဝေ (Myanmar Now) ● မန္တလေးရှိဘုရားများအား ဓာတ်ပုံရိုက်ခွင့် ကမ္ဘာလှည့်များထံမှ ငွေကောက်သင့်သလား
(မိုးမခ) ဖေဖော်ဝါရီ ၂၄၊ ၂၀၁၉


မန္တလေး – ဗဒုံမင်းဟုလည်း လူသိများပြီး ကုန်းဘောင်မင်းဆက်ထဲတွင် ဩဇာကြီးသည့် ဘုရင်တစ်ပါးဖြစ်သည့် ဘိုးတော်ဘုရား၏ တပ်ဖွဲ့များသည် လွန်ခဲ့သည့် နှစ်ပေါင်း ၂၀၀ ကျော် ခရစ်နှစ် ၁၇၈၄ တွင် ရခိုင်ကို စစ်ချီခဲ့ကြပြီး ရခိုင်မင်းအဆက်ဆက် ကိုးကွယ်ခဲ့သည့် မဟာမုနိရုပ်ပွားတော်ကို မန္တလေးသို့ ပ့င်ဆောင်လာခဲ့သည်။

ဘုရားကြီးနှင့်အတူ ယနေ့အချိန်တွင် ကမ္ဘောဒီးယားဟုခေါ်သည့် ခမာတို့ သွန်းလုပ်ခဲ့သည့် ကြေးရုပ်ကြီးများ ပုံဆွဲပုရပိုက်ပန်းချီများလည်း သယ်ဆောင်လာခဲ့သည်။

မဟာမုနိ ဘုရားကြီးကို ဖုန်းကင်မရာဖြင့် မှတ်တမ်းတင်နေသည့် ကမ္ဘာလှည့်ခရီးသွားများ (ခင်နှင်းဝေ/Myanmar Now)

အရှေ့တောင်အာရှ မင်းဆက်များ၏ ရှည်လျားလှသော သမိုင်းကြောင်း၏ တစ်စိတ်တစ်ဒေသကို တနေရာတည်းတွင် လေ့လာနိုင်သည့် မဟာမုနိဘုရားသို့ သွားရောက်လည်ပတ်လိုသည့် နိုင်ငံခြားသား ခရီးသည်အချို့ကို ၎င်း၏ယာဉ်ပေါ်တင်ဆောင်ရင်း ကိုစိုးပိုင် တစ်ယောက် မဟာမုနိဘုရားကြီးရှိရာ မန္တလေးမြို့ ချမ်းမြသာစည်မြို့နယ်သို့ မောင်းနှင်လာခဲ့သည်။

မဟာမုနိ ရုပ်ပွားတော်အား နေ့စဉ်နေ့တိုင်း အရုဏ်တက်ချိန် နံနက် ၄ နာရီခွဲခန့်တွင် မျက်နှာတော်သစ်ပြီး ပူဇော်လေ့ရှိပြီး ထိုအချိန်အမီလာရောက်ခဲ့ခြင်းဖြစ်သည်။

ဘုရားကြီးမျက်နှာတော်သစ်ချိန် အာရုံပြုနေချိန်တွင် “Hello money ….hello money…take photo… one thousand kyat” ဆိုသည့်အသံကြောင့်  ကိုစိုးပိုင်ပိုင်က သူ၏ မျက်လုံးကို ဖွင့်ကြည့်လိုက်သည်။

အဆိုပါ အသံသည် ရုပ်ပွားတော်မြတ်ကို ဓာတ်ပုံရိုက်နေသည့် နိုင်ငံခြားသားများအား ဘုရားဝန်ထမ်းများက ရှင်းပြနေခြင်း ဖြစ်သည်။ တစ်ဝက်တစ်ပျက် အင်္ဂလိပ်စကားကြောင့် နိုင်ငံခြားသားများက ဘုရားဝန်ထမ်းများ ဘာကိုဆိုလိုသည်ကို အစပိုင်းတွင် နားမလည်ကြဟု ကိုစိုးပိုင်ပိုင်က ဆိုသည်။

“ကမ္ဘာလှည့်ခရီးသွားက နားမလည်ဘူး။ အကြိမ်ကြိမ်ရှင်းပြပြီး ကျပ် ၁၀၀၀ ထောင်ပြမှ ‘ဪ…. ဘုရားကို ဓာတ်ပုံရိုက်ရင် ငွေ ၁၀၀၀ ပေးရတာလား။ ဒါဆိုမရိုက်တော့ပါဘူး’ လို့ ပြောပြီး ကင်မရာသိမ်းတယ်။ ဒါကို နိုင်ငံခြားသားတိုင်းပေးရတာပဲ မပေးချင် လာမလည်နဲ့လို့ ဘုရားကြီးဝန်ထမ်းက ပြန်ပြောလိုက်တယ်” ဟု ကိုစိုးပိုင်က ပြန်ပြောင်းပြောပြသည်။

ဧည့်လမ်းညွှန်နှင့် ကမ္ဘာလှည့်ခရီးသွားများသွားလာသည့် မော်တော်ယာဉ် ယာဉ်မောင်းဖြစ်သည့် ကိုစိုးပိုင်ပိုင်က ရက်အနည်း ငယ်အတွင်း အဆိုပါအဖြစ်အပျက်ကို သူ၏ Facebook စာမျက်နှာတွင် တင်လိုက်သည့်အခါ ဗုဒ္ဓရုပ်ပွားတော်များအား ဓာတ်ပုံရိုက်သည်ကို ပိုက်ဆံတောင်းသင့်၊ မတောင်းသင့် အငြင်းအခုံ ဖြစ်လာခဲ့သည်။

မဟာမုနိဘုရားကြီး ဂေါပကကတော့ နိုင်ငံခြားသားများအနေဖြင့် ဖုန်းကင်မရာဖြင့်ဖြစ်စေ၊ လုပ်ငန်းခွင်သုံးကင်မရာဖြင့်ဖြစ် စေ မည်သည့်ကင်မရာနှင့်မဆို ဘုရားကြီးအား ဓာတ်ပုံရိုက်ပါက ရိုက်ကူးခ ကျပ် ၁၀၀၀ ပေးဆောင်ရမည်ဟု သတ်မှတ် ထားသည်။

 

မဟာမုနိသို့ လာရောက်လည်ပတ်သည့် နိုင်ငံခြားသားများ ကင်မရာအခွန် ၁၀၀၀ကျပ် ပေးဆောင်ရသည်။ (ဓာတ်ပုံ – ခင်နှင်းဝေ / Myanmar Now)

“နိုင်ငံခြားအတွက် ငွေ ၁၀၀၀ ဆိုတာ လမ်းဘေးအလှူထည့်သလောက်ပါ။ ကိုယ့်ဘုရားလာပြီး ကိုယ့်တိုင်းပြည်မှာ လေ့လာစရာတွေ အနုပညာလက်ရာတွေ ရှိတယ်။ ရှေးဟောင်းတွေ ရှိတယ်။ ဒီလိုဟာမျိုးကို အလကားလာကြည့်တာ ကြည့်ခံရင်တော့ ကိုယ်မိုက်လို့ပေါ့” ဟု မဟာမုနိဂေါပကအဖွဲ့ ဥက္ကဋ္ဌ ဦးစိုးလင်းက ပြောသည်။

ဘုရားကြီးထံ လာရောက်ဖူးမြော်သည့် နိုင်ငံခြားသားဦးရေသည် တစ်ရက်လျှင် ၈၀ မှ ၁၀၀ အတွင်းရှိပြီး စည်ကားသည့် ရက်များဆိုပါက နှစ်ဆကျော် ဝင်ထွက်လေ့ရှိကြောင်း ဘုရားကြီး ဝန်ထမ်းများက ဆိုသည်။

အခြားတစ်ဖက်တွင်လည်း ယင်းကဲ့သို့ ငွေကြေးကောက်ခံမှုကြောင့် ကမ္ဘာလှည့်ခရီးသွားများ စိတ်အနှောင့်အယှက်ဖြစ်မည်ကို စိုးရိမ်မှုများလည်း ရှိနေသည်။

ကမ္ဘာလှည့်ခရီးသွားများသည် မန္တလေးသို့လာရောက်ချိန်တွင် သာသနာရေးနှင့်ယဉ်ကျေးမှုဝန်ကြီးဌာနက သတ်မှတ်ထား သည့် ရှေးဟောင်းနယ်မြေ ဝင်ထွက်ခွင့်အတွက် ၅ ရက်ကြာ သက်တမ်းရှိသည့် လည်ပတ်ခွင့် လက်မှတ်ကို ကျပ် ၁၀,၀၀၀ ဖြင့် ဝယ်ယူကြရသည်။

ယင်းလက်မှတ် ဝယ်ယူပြီးသော်လည်း အထင်ကရ နေရာတစ်ခုသွားတိုင်း နောက်ထပ်တစ်ကြိမ် ထပ်မံပေးဆောင်နေရ သည့်အတွက် နိုင်ငံခြားသားဧည့်သည်များက မကြာခဏ စောဒကတက်မှုများ ရှိကြောင်း တရုတ်ခရီးသွား ဧည့်လမ်းညွှန် ကိုအောင်ဆန်းဦးက ဆိုသည်။

“ဇုန်ဝင်ကြေး ပေးပြီးပေမယ့် ဘုရားတစ်ခါသွား တစ်ခါတောင်းတာကျ ‘မင်းတို့ဘုရားက ဓာတ်ပုံရိုက်ရင် ပိုက်ဆံပေးရတာလား’ ဆိုတာမျိုး မှတ်ချက်ပေးတာတွေ မကြာခဏရတယ်။ လက်မှတ်လည်းဖြတ်ထားတယ် ထပ်လည်းပေးနေရ တယ်ဆိုတော့ ဒါက မကြာခဏ ကျွန်တော်တို့ ဖြေရှင်းနေရတယ်။ ခရီးသွားလုပ်ငန်းကို ပုံရိပ်ကျစေတယ်” ဟု ၎င်းက ပြောသည်။

Myanmar Now က တွေ့ဆုံခွင့်ရခဲ့သည့် ပြင်သစ်ခရီးသွား Jean-Jacques ဆိုသည့် အမျိုးသားကလည်း ငွေ ၁၀၀၀ သည် သူ့အတွက် ပြဿနာ မရှိသော်လည်း တစ်နေရာသွားတိုင်း တစ်ကြိမ်ပေးဆောင်နေရသည်က စိတ်အနှောင့်အယှက် ဖြစ်ရသည်ဟု ဆိုသည်။

“ကျွန်တော် မန္တလေးလည်ရင် ၁၀,၀၀၀ ပေးရတယ်။ ပုဂံဆို ၂၅,၀၀၀။ မင်းကွန်းဆို ၅,၀၀၀။ ဒါက ဒီနိုင်ငံကသတ်မှတ်တဲ့ စည်းကမ်း။ မဟာမုနိမှာ ၁၀၀၀ ထပ်ပေးရမယ်ဆိုရင် မန္တလေးစဝင်ကတည်းက ၁၁,၀၀၀ ကောက်လိုက်ပေါ့။ တစ်နေရာ လာတိုင်း တစ်ခါပေးရသလို ဇာတ်လမ်းလည်း မရှုပ်တော့ဘူး။ ပိုအဆင်ပြေတယ်” ဟု စကားပြန်မှတစ်ဆင့် ၎င်းက ပြောသည်။

မန္တလေးရောက် နိုင်ငံခြားသားများအား သတ်မှတ်ထားသည့်ပမာဏ ကျပ် ၁၀၀၀၀ သာ ကောက်ခံနေပြီး၊ မဟာမုနိ ဘုရားအတွင်း ငွေကြေးကောက်ခံနေခြင်းက ဘုရားဂေါပက၏ သဘောထား ဖြစ်ပြီး သီးခြားမှတ်ချက် မပေးလိုဟု မန္တလေး တိုင်းဒေသကြီး ဟိုတယ်နှင့်ခရီးသွားလာရေးဝန်ကြီးဌာန ညွှန်ကြားရေးမှူး ဦးခင်မောင်ဆွေက ပြောသည်။

“အရင်တုန်းက မကောက်ဘူးပြောတာ။ အခုကောက်တယ်။ ဂေါပကနဲ့ပဲဆိုင်တယ်” ဟု ၎င်းက ပြောသည်။

ယင်းကဲ့သို့ ငွေကြေးကောက်ခံမှုကြောင့် ခရီးသွားလုပ်ငန်းထိခိုက်မည်ဟု မထင်ကြောင်းလည်း ၎င်းကဆိုသည်။

 

မန္တလေး မဟာမုနိကို ဓာတ်ပုံရိုက်သည့် နိုင်ငံခြားသားများ ငွေ ၁၀၀၀ ပေးဆောင်ရန် သတိပေးထားသည် (ခင်နှင်းဝေ/Myanmar Now)

ဘုရားကြီးထံ လာရောက်ဖူးမြှော်သည့် နိုင်ငံခြားသားများအား ဝင်ကြေးကောက်ရန် စီစဉ်ခဲ့သော်လည်း ဟိုတယ်/ခရီး ဘက်က လက်မခံသဖြင့် ကင်မရာခွန်သာ ကောက်ခံခြင်း ဖြစ်ကြောင်း  မဟာမုနိ ဂေါပကအဖွဲ့ ဥက္ကဌ ဦးစိုးလင်း ကဆိုသည်။

“ဘယ်နိုင်ငံခြားသားမဆို ဓာတ်ပုံမရိုက်တဲ့ နိုင်ငံခြားသားမရှိဘူး။ ဘာနဲ့ရိုက်ရိုက် ပေးရမယ်။ အမှန်က ဝင်ကြေးကောက် ရမှာလေ။ ကင်မရာခွန်ကောက်ရတာ အဓိပ္ပာယ်မရှိဘူး။ ဝင်ကြေးကောက်တဲ့ကိစ္စက ဟိုတယ်နဲ့ခရီးသွား လာရေးနဲ့ စကား အချီအချဖြစ်နေလို့” ဟု ၎င်းက ဆိုသည်။

ငွေကြေးကောက်ခံမှုများအတွက် သဘောထားကွဲလွဲမှု အချို့ရှိနေသော်လည်း မြန်မာဘုရင်နောက်ဆုံးမင်းဆက် နန်းစိုက်ခဲ့ သည့် မန္တလေးသည် ကမ္ဘာလှည့် ခရီးသွားများကို ဆွဲဆောင်နိုင်နေဆဲဖြစ်သည်။

ဟိုတယ်/ခရီး ၏စာရင်းများအရ ၂၀၁၆ တွင် နိုင်ငံခြားသား ၃၈၅,၀၀၀ ကျော် ဝင်ရောက်ခဲ့ပြီး နောင် နှစ်နှစ်အကြာ ၂၀၁၈ တွင် ၂၇ ရာခိုင်နှုန်းအထိ တိုးလာခဲ့ပြီး ငါးသိန်းနီးပါး ဝင်ရောက်ခဲ့သည်။ အများစုမှာ တရုတ်ခရီးသွားများ ဖြစ်ကြပြီး ဥရောပ ဘက်မှ ပြင်သစ်၊ ဂျာမနီ နှင့် အီတလီ ဧည့်သည်များလည်း ဝင်ရောက်လည်ပတ်ခဲ့ကြသည်။

မဟာမုနိဘုရား၌ တွေ့ရသည့် ဂျာမန်ခရီးသွား ဇနီးမောင်နှံ နှစ်ဦးကလည်း သူတို့ပေးလိုက်ရသည့် ကင်မရာခွန် ကျပ် ၁၀၀၀ စီ အတွက် ယခုလို မှတ်ချက်ပေးသည်။

“ကင်မရာကြေးလို့ ပြောပြီးကောက်တဲ့ ဒီအခွန်ငွေတွေကို တကယ်လိုအပ်တဲ့နေရာတွေမှာ တကယ်အသုံးပြုတယ်ဆိုရင်တော့ ကျွန်တော်တို့ အများကြီးဝမ်းသာပါတယ်။ ဘုရားဝေယျာဝစ္စအတွက် တကယ်လိုအပ်တဲ့နေရာမှာ တဖက်တစ်လမ်းကနေ ကူညီမှုရမယ်ဆိုရင် ကျွန်တော်တို့ပေးရတာ တန်ပါတယ်” ဟု စကားပြန်မှ တဆင့် ဂျာမန်အမျိုးသားက ပြောသည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
My Friend Tin Moe By Maung Swan Yi - Selection of MoeMaKa Articles