ဇင်လင်း ● ငြိမ်းချမ်းရေးနှင့် ဘာကြောင့် နီးလျှက် ဝေးနေရသနည်း
(မိုးမခ) ဖေဖော်ဝါရီ ၁၁၊ ၂၀၁၉


မြန်မာနိုင်ငံ၏ ငြိမ်းချမ်းရေး ကြိုးပမ်းမှုဖြစ်စဉ်ကို စိတ်ဝင်စားစွာ စောင့်ကြည့် လေ့လာနေကြသော ပြည်သူတို့အနေဖြင့် ငြိမ်းချမ်းရေးအပေါ် မည်သူတို့က စေတနာမှန်၍ မည်သူတို့က စေတနာမမှန် ဆိုသည်ကို ယေဘုယျအားဖြင့်တော့ ရိပ်မိ နေကြပြီဟု ဆိုနိုင်သည်။ ငြိမ်းချမ်းရေးမရှိသရွေ့ပြည်တွင်းစစ် မရပ်နိုင်။ စစ်ပွဲများရှိနေသရွေ့ နိုင်ငံ့စီးပွားရေးဖွံ့ဖြိုးတိုးတက် လာဖို့လည်း မျှော်လင့်၍ မရနိုင်။ နှစ်စဉ်ကုန်ကျသည့် ကာကွယ်ရေးအသုံးစရိတ် ပမာဏမှာ အမေရိကန်ဒေါ်လာ ၂ ဒဿမ ၄ ဘီလီယံ ခန့် ရှိနေသဖြင့် တိုင်းပြည်အတွက် စစ်စရိတ်သည် ၀န်နှင့်အား မမျှလောက်အောင် ဖြစ်နေသည်။ ယင်း ဘဏ္ဍာငွေ ပမာဏသည် GDP ပြည်တွင်း အသားတင် ထုတ်လုပ်မှုတန်ဖိုး၏ ၄ ရာခိုင်နှုန်း ဖြစ်သည်ကို ပြည်သူ့လွှတ်တော် ကိုယ်စားလှယ်များနှင့် ကက်ဘိနက်အဖွဲ့ဝင်များ အထူးသတိပြု သင့်သည်။

နိုင်ငံတော်၏ အတိုင်ပင်ခံ ပုဂ္ဂိုလ်က ပြီးခဲ့သည့် တတိယ အကြိမ် ၂၁ ရာစု ပင်လုံ ညီလာခံတွင် ဖက်ဒရယ်ဆိုင်ရာ အခြေခံမူ များ အပြီးအပြတ် ချမှတ်နိုင်ရေးကို ရည်မှန်းကာ ကြိုးပမ်းခဲ့သော်လည်း ယခုအထိ မအောင်မြင်သေး။ အခြေခံမူများ ချမှတ်နိုင်မှသာ အသေးစိတ်မူများကို ဆက်လက် ဆွေးနွေးနိုင်မည် ဖြစ်သည်။ ဒေါ်အောင်ဆန်းစုကြည်က ညီလာခံ(၃) ကြိမ်အတွင်း အခြေခံမူများကို အကြေအလည် ဆွေးနွေးပြီးပြတ်ခဲ့ပါက ဖက်ဒရယ်မူဆိုင်ရာ ခိုင်မာသည့် အုတ်မြစ်တစ်ခု ထွက်ပေါ်လာစေရန် ကြိုးပမ်းနေသည်။  သို့သော် ဆွေးနွေးဖေါ် ဆွေးနွေးဘက်များအကြား အပြန်အလှန်ယုံကြည်မှု အားနည်းလွန်းသဖြင့် ယခုအထိ ဖက်ဒရယ်ဆိုင်ရာ အခြေခံမူများ မချမှတ်နိုင်သေးပေ။

NLD အစိုးရက ၂၀၁၇ ခုနှစ်ကို ငြိမ်းချမ်းရေးနှစ်ဟု ကြေညာလုပ်ဆောင်ခဲ့စဉ်က အားမရဖြစ်စရာ အခြေအနေများနှင့် စပ်လျဉ်းသည့် မေးမြန်းချက်ကို ဒေါ်အောင်ဆန်းစုကြည်က အောက်ပါအတိုင်း တုန့်ပြန်ပြောကြားခဲ့ဖူးသည်။

“အဲဒီတော့ အားမရတဲ့သူတွေက ဝင်ပြီးလုပ်ဖို့ လိုပါတယ်။ အားမရဘူးဆိုတဲ့သူတွေ အားလုံးကသာ ဝိုင်းဝန်းပြီးတော့ ကူညီမယ် ဆိုလို့ရင် မုချ မသွေ ကျမတို့အောင်မြင်ရမှာ ဖြစ်ပါတယ်။ အဲဒီတော့ ကျမတို့ဟာ ညီလာခံတခုထဲနဲ့ အားလုံး အောင်မြင်မှုရမယ်လို့လဲ — ဒီလိုလည်း ကျမတို့ မမျှော်မှန်းပါဘူး။ ငြိမ်းချမ်းရေးဖြစ်စဉ်ဆိုတာ တခြားနိုင်ငံတွေ ကြည့်လိုက် ပါ၊ တော်တော့ကို လုပ်ယူရတဲ့ကိစ္စပဲ။ ကျမတို့နိုင်ငံမှာ ဆိုလို့ ရှိရင် လွတ်လပ်ရေး ရပြီးကတည်းက ပြည်တွင်းငြိမ်းချမ်းရေး ဆိုတာ အပြည့်အဝ မရှိခဲ့ပါဘူး” ဟု ဒေါ်အောင်ဆန်းစုကြည်က ပြောကြားခဲ့ဖူးသည်။

ကုန်လွန်ခဲ့သည့် ၂၀၁၈ ခုနှစ် ဒီဇင်ဘာလ ၂၁ ရက်စွဲဖြင့် တပ်မတော် ကာကွယ်ရေးဦးစီး ချုပ်ရုံးမှ ‘ပစ်ခတ်တိုက်ခိုက်မှု ရပ်စဲရေးနှင့် ထာဝရငြိမ်းချမ်းရေးအတွက် ထုတ်ပြန်ချက်’ တစ်စောင်  ထုတ်ပြန်ခဲ့သည်။ ထာဝရငြိမ်းချမ်းရေးအတွက်ဟု ရည်ညွှန်းထားသဖြင့် အဆိုပါကြေညာချက်၏ နောက်ဆက်တွဲ ရလဒ်များသည် ပြည်သူတို့လိုလားသော ထာဝရ တည်ငြိမ် အေးချမ်းမှုကို ဖေါ်ဆောင်ပေးနိုင်သည်အထိ ဆောင်ရွက်နိုင်လျှင် ပြည်သူအများ စိတ်ချမ်းသာကြပေလိမ့်မည်။ ပြည်တွင်း စစ် ရပ်စဲရေးကိစ္စသည် တစ်ဦးနှင့် တစ်ဦး ယုံကြည်မှုပျက်ယွင်းနေခဲ့ခြင်းကြောင့် ရလဒ်ကောင်းထွက်သင့်ပါလျှက် မယုံ သင်္ကာစိတ်များ လွှမ်းမိုးနေသောကြောင့် လိုက်လေဝေးလေဖြစ်နေသည်။

တပ်မတော်၏ ၂၀၁၈ ဒီဇင်ဘာ ၂၁ မှ ၂၀၁၉ ဧပြီ ၃၀ ရက်အထိ စစ်ဆင်ရေးနယ်မြေ အလိုက် စစ်ရေး ဆိုင်ရာ လှုပ်ရှားမှု အားလုံး ရပ်ဆိုင်းပေးမည်ဟု ကြေညာခဲ့ခြင်းကို တိုင်းရင်းသားအဖွဲ့များက ယေဘုယျအားဖြင့် ကြိုဆိုခဲ့ကြသည်။ သို့သော် နိုင်ငံတော်သမ္မတက တပ်မတော်၏ စစ်တိုင်းအားလုံးတွင် စစ်ရေးဆိုင်ရာလှုပ်ရှားမှု အားလုံးတစ်ပြိုင်တည်း ရပ်ဆိုင်းပေး ရန် မြောက်ပိုင်းမဟာမိတ်အဖွဲ့ဝင်များဖြစ်သည့် ကချင်အဖွဲ့ (KIA)၊ တအာင်းအဖွဲ့ (TNLA)၊ ကိုးကန့်အဖွဲ့ (MNDAA)၊ ရခိုင်အဖွဲ့(AA)တို့က တောင်းဆိုကြောင်း ထုတ်ပြန်ကြေညာခဲ့သည်။ အဆိုပါမြောက်ပိုင်းလေးဖွဲ့သည် ဒီဇင်ဘာ ၂၇ ရက်က KIA ထိန်းချုပ်နယ်မြေတွင် တွေ့ဆုံဆွေးနွေးပြီး ထိုသို့ သဘောထား ထုတ်ပြန်ခြင်းဖြစ်သည်ဟု ဗိုလ်မှူးချုပ်တာ ဘုန်းကျော် (TNLA အထွေထွေ အတွင်းရေးမှူး) က ပြောကြောင်း 7Day Daily သတင်းအရ သိရသည်။

ထို့အပြင် တပ်မတော်အနေ ဖြင့် ရခိုင်ဒေသအတွင်း AA နှင့် တိုက်ပွဲဖြစ်ပွားမှု အမြန်ဆုံးရပ် တန့်ပေးရန် မြောက်ပိုင်းလေးဖွဲ့ က တောင်းဆိုသည်။ အထက်ပါ အချက်နှစ်ချက်ကို အကောင်အ ထည်ဖော် ဆောင်ရွက်ပါက မြောက်ပိုင်း မဟာမိတ်အဖွဲ့ ကစစ် ဆင်ရေးလှုပ်ရှားမှုများ ရပ်ဆိုင်းမည်ဖြစ်ကြောင်းထုတ်ပြန်ခဲ့သည်။ မြောက်ပိုင်းလေးဖွဲ့ ထုတ် ပြန်ချက်တွင် အစိုးရ၊ တပ်မတော် နှင့် တွေ့ဆုံဆွေးနွေးရာ၌ မြောက် ပိုင်းမဟာမိတ်လေးဖွဲ့အတူတကွ ဆွေးနွေးမည်ဖြစ်ကြောင်း၊ ဆွေးနွေးပွဲကို တရုတ်နိုင်ငံအတွင်း ကျင်းပမည်ဖြစ်ကြောင်း၊ ဆွေးနွေးပွဲတိုင်းတွင် ‘ဝ’ အဖွဲ့ (UWSA)၊ ရှမ်းအဖွဲ့ (SSPP)၊ မိုင်းလားအဖွဲ့ (NDAA) တို့မှ သက်သေများ ပါ ဝင်ရန် ဖိတ်ကြားမည်ဖြစ်ကြောင်း ယင်းကြေညာချက်၌ ဖော်ပြခဲ့သည်။

‘‘အဓိကကတော့ ကျွန်တော်တို့ တိုက်ပွဲတွေလည်းဖြစ်နေတယ်။ ကျွန်တော်တို့ကြားထဲမှာ ယုံကြည်မှု အားနည်းနေသေး တော့ တွေ့ဆုံဆွေးနွေးပွဲကို တရုတ်နိုင်ငံ နေရာတစ်ခု၊ တစ်ခု မှာပိုပြီး ကောင်းတယ်။ အရင် တုန်းကလည်း ကူမင်းမှာ တွေ့နေကျဆိုတော့ ဆက်လက်ပြီးတော့ ယုံကြည်မှုတည်ဆောက်ဖို့ ထပ်လိုသေးတယ်လို့ မြင်ပါတယ်။’’ ဟု ဗိုလ်မှူးချုပ် တာဘုန်းကျော်က ပြောသည်။

ကချင်လက်နက်ကိုင် အဖွဲ့ (KIO/KIA) အပါအ၀င် မြောက်ပိုင်းလက်နက်ကိုင်လေးဖွဲ့အား တစ်ပြိုင်တည်း တွေ့ဆုံဆွေးနွေး ရန် KIO ကတောင်းဆိုထားမှုကို အစိုးရဘက်ကသဘောတူထားကြောင်း ဆွေးနွေးပွဲဖြစ်မြောက်ရေး ကြားဝင်ညှိနှိုင်းပေးနေ သည့်  ‘ငြိမ်းချမ်းရေးဆွေးနွေးရေးအကျိုးဆောင်အဖွဲ့’(PCG)  မှ ဦးဆန်းအောင်က ဖေဖော်ဝါရီ ၄ ရက်တွင်ပြောကြောင်း သတင်းကောင်းတစ်ခုလည်း ထွက်ပေါ်လျှက်ရှိသည်။ ငြိမ်းချမ်းရေးကော်မရှင်နှင့် KIO တို့သည် ဇန်န၀ါရီ ၂၁ ရက် တွင် တရုတ်နိုင်ငံကူမင်းမြို့၌ အလွတ်သဘောတွေ့ဆုံခဲ့ပြီးနောက်၊ တရားဝင်ဆွေးနွေးရန်သဘောတူခဲ့သည်ဟု ဆိုသည်။

KIO/KIA၊ တအာင်းအဖွဲ့  (TNLA)၊ကိုးကန့်အဖွဲ့(MNDAA)၊   ရခိုင်အဖွဲ့ (AA) ဟူသည့်မြောက် ပိုင်းလက်နက်ကိုင်လေးဖွဲ့ သည် စစ်ရေးနှင့် နိုင်ငံရေးမဟာမိတ် ပြုလုပ်ထားသည်။ အဆိုပါ လေးဖွဲ့ကိုတစ်ပြိုင် တည်းပေါင်း၍ တွေ့ဆုံခြင်းဖြင့် NCA ဆိုင်ရာ ဆွေးနွေးမှုများ ပိုမိုမြန်ဆန်နိုင်သည်ဟု ဦးဆန်းအောင်က ဆိုသည်။

ထိုအတောအတွင်း တပ်မတော်က ၄ လ အပစ်ရပ်ထားချိန်တွင် ငြိမ်းချမ်းရေးလုပ်ငန်းစဉ်များ မြန်ဆန်မှုရှိစေရန် တိုင်းရင်း သား လက်နက်ကိုင်အဖွဲ့အစည်းအား လုံးပါဝင်သည့် ညီလာခံတစ်ရပ် ကျင်းပရန် ပအိုဝ်းအမျိုးသားလွတ် မြောက်ရေး အဖွဲ့ချုပ် (PNLO) က တိုက်တွန်းခဲ့သည်ကို တွေ့ရသည်။ ဒီဇင်ဘာ ၂၆ မှ၂၈ ရက်အထိကျင်းပခဲ့သော PNLO ၏ ဒုတိယ အကြိမ် ညီလာခံသက်တမ်း ပထမ နှစ်ပတ်လည် ဗဟိုကော်မတီ အစည်းအဝေးအပြီး၌ ငြိမ်းချမ်းရေးလုပ်ငန်းစဉ် ဖော်ဆောင် ရေး ချောမွေ့စေရန် ဖမ်းဆီးထားသည့် ABSDF တပ်ဖွဲ့မှ ဗဟို ကော်မတီဝင် သုံးဦးကို အမြန်ဆုံး ပြန်လွှတ်ပေးရန်၊ RCSSနှင့်ဖြစ်ပွားသည့်ပဋိပက္ခများကို ငြိမ်းချမ်းသည့် နည်းလမ်းဖြင့် ဖြေရှင်းရန်နှင့် တိုင်းရင်းသားလက်နက်ကိုင်အဖွဲ့ အားလုံးပါဝင်သည့်ညီလာခံ တစ်ရပ် အမြန်ဆုံးကျင်းပရန် တိုက်တွန်းကြောင်း ထုတ်ပြန်ခဲ့သည်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ရေးထိုးထားသည့် ကရင်အမျိုးသား အစည်း အရုံး (KNU)၊ ရှမ်းပြည်ပြန်လည်ထူထောင်ရေး ကောင်စီ(RCSS) နှင့် ရခိုင်ပြည်လွတ်မြောက်ရေးပါတီ (ALP) တို့ကလည်း တပ်မတော်၏ ၄ လ အပစ်ရပ် ကြေညာချက်အပေါ် ထောက်ခံကြိုဆိုခဲ့ကြသည်။ လေးလကြာစစ်ရပ်စဲခြင်း၊ လက်နက်ကိုင် အဖွဲ့အစည်းများနှင့် တစ်ဖွဲ့ချင်းတွေ့ဆုံရန် လမ်းဖွင့်ပေးခြင်း၊ ညှိနှိုင်းရေးအဖွဲ့ ဖွဲ့စည်းခြင်း၊ NCA စာချုပ်ပါ အဓိက အချက် များကို ထပ်မံအတည်ပြုခြင်းနှင့် စစ်ဘေးရှောင်များ မူလနေရပ် ပြန်နိုင်ရေး စီစဉ်ခြင်းများသည် တပ်မတော်၏ ငြိမ်းချမ်းရေး အပေါ် သဘောထားအစစ်အမှန်ဖြစ်သည်ဟု ရှမ်းပြည် ပြန်လည် ထူထောင်ရေးကောင်စီ(RCSS)က မှတ်ချက်ပြုပြောဆို ခဲ့သည်။

သို့သော် ငြိမ်းချမ်းရေးလုပ်ငန်းစဉ်အတွက် လက်နက်ကိုင် တပ်ဖွဲ့များအားလုံး ဖေဖော်ဝါရီလ ၁၂ ရက်နေ့မတိုင်မှီ နေရပ် သို့ အပြီး ပြန်လည်ဆုတ်ခွာရမည်ဟု တပ်မတော်က ၂၀၁၈ ခုနှစ် ဇန်နဝါရီလ ၂၅ ရက်နေ့တွင် ထုတ်ပြန်ကြေညာခဲ့ပြန် သည်။ ယင်းကိစ္စနှင့် ပတ်သက်၍ သျှမ်းပြည်တပ်မတော် RCSS/SSA အတွင်းရေးမှူး ၂ ဗိုလ်မှူးကြီး စိုင်းငင်း က အောက်ပါ အတိုင်း ‘သျှမ်းသံတော်ဆင့်သတင်း’ သို့ ပြောကြားခဲ့သည်။

“ငြိမ်းချမ်းရေးကို ကျနော်တို့ လက်နက်ကိုင် တော်လှန်ရေးအဖွဲ့အစည်းတွေက တခြားလူတွေထက် ပိုပြီး လိုချင်ပါတယ်။ နိုင်ငံရေးအရ မဖြေရှင်းနိုင်ခဲ့လို့ နှစ်ပေါင်း (၇၀)ခန့် ပြည်တွင်းစစ်မီး တောက်လောက်ခဲ့ တာကို အချိန်တိုတိုအတွင်း နေ့ချင်းညချင်း ကုစားနိုင်ဖို့ ဖြေရှင်းနိုင်ဖို့ ဆိုတာ မဖြစ်နိုင်ပါဘူး။ အချိန်ယူရမယ်၊ စိတ်ရှည်ရမယ်။ ယုံကြည်မှု ပိုမို တည်ဆောက်ဖို့လိုမယ်၊ ရိုးသားမှု ရှိဖို့လိုမယ်၊ အပြန်အလှန်နားလည်မှု ရှိရမယ်၊ အပြန်အလှန် အသိအမှတ်ပြုရမယ်။ ကိုယ်ချင်းစာနာ စိတ်ထားရှိရမယ်။ အာလုံးအကျိုးစီးပွားကို ဦးထိပ်ပန်ဆင် နိုင်ရမယ်။ အာလုံးအတွက် Win Win Solution ဖြစ်ဖို့ဆန္ဒပြင်းပြရမယ်။ အဲဒီလို သဘောထားကြီးကြီးနဲ့ လုပ်ဆောင်နိုင်မှသာ ငြိမ်းချမ်းရေးအသီးအပွင့်ကို ခံစားနိုင်ပြီး ကျနော်တို့ အားလုံး လိုလားတောင့်တတဲ့ ဖက်ဒရယ် ပြည်ထောင်စုကြီးကို တည်ဆောက်နိုင်မယ်လို့ ယုံကြည်ပါတယ်။ ငြိမ်းချမ်းရေးလုပ်ငန်းစဉ်ဟာ တခါတရံမှာ ထိလွယ်ရှလွယ်ဖြစ်တတ်လို့ အဲဒီအချိန်မျိုးမှာ ရာဇသံဆန်ဆန် တစ်ဖက်သတ် ထုတ်ပြန်ချက်တွေ၊ အနှစ်မဲ့ စွပ်စွဲချက်တွေပြုလုပ်ရင် ဆွေးနွေးပွဲတွေ၊ ငြိမ်းချမ်းရေး လုပ်ငန်းစဉ်တွေကို တုံ့နှေးတွန့်ဆုတ် စေတတ်ပါတယ်။ အဲဒီလို လုပ်ရပ်တွေကို ဆွေနွေးဖော် ဆွေးနွေးဖက်အကြားမှာ မပြုလုပ်မိဖို့ ဂရုပြုသင့်ပါတယ်။ အလေး ထားသင့်ပါတယ်။ သတိထားသင့်တယ်။ အဲဒီလိုမဟုတ်ရင် ငြိမ်းချမ်းရေးဟာ နီးလျက်နဲ့ဝေးနေဦးမှာဖြစ်ပြီး သဲထဲရေသွန် သလို အဖြစ်မျိုး ဖြစ်သွားမှာ စိုးရိမ်မိတယ်။” ဟု ရှမ်းပြည်တပ်မတော် RCSS/SSA အတွင်းရေးမှူး ၂ ဗိုလ်မှူးကြီး စိုင်းငင်း က ပြောကြားခဲ့သည်။

အပစ်ရပ်ကာလ ၄ လ ဆိုသည်မှာ အလွန်တိုတောင်းပါသည်။ အဘယ်ကြောင့် ၁၂ လမျှ အချိန်မပေးနိုင်သနည်းဟု မေးခွန်းထုတ်စရာရှိနေသည်။ ၄ လ အတွင်း ဆွေးနွေးမှုများ မပြီးပြတ်ပါက မည်သို့ ဆက်သွားကြမည်နည်း။ ထိုကိစ္စ နှင့်စပ်လျဉ်၍ EAOs များဘက်က စိုးရိမ်မည်ဆိုလျှင်လည်း စိုးရိမ်စရာ ဖြစ်ပါသည်။ အပစ်ရပ်ထားသည့် ၄ လတာ ကာလ အတွင်း NCA စာချုပ်၌ ဖော်ပြပါရှိသော ကတိကဝတ်များကို စောင့်ထိန်းရန် အလွန်အရေးကြီးသည်။ လာမည့် ၂၁ ရာစု ပင်လုံ ငြိမ်းချမ်းရေးလုပ်ငန်းစဉ်များကို ဆက်လက် အကောင်အထည်ဖော်ရာ၌ NCA စာချုပ်ပါ ကတိကဝတ်များကို တိတိ ကျကျ စောင့်ထိန်းလိုက်နာကြဖို့လိုသည်။ သို့မှသာ တပ်မတော်၏ “ပစ်ခတ်တိုက်ခိုက်မှုရပ်စဲရေးနှင့် ထာဝရ ငြိမ်းချမ်းရေး အတွက် ထုတ်ပြန်ချက်” သည် ငြိမ်းချမ်းရေးကြိုးပမ်းမှုအတွက် အထောက်အကူ ဖြစ်ပေလိမ့်မည်။ အထူး သဖြင့် နိုင်ငံရေး အကဲခတ်များ အကြံပြုသည့် ‘ရခိုင်ပြည်နယ်၊ မောင်တောဒေသ’ မှအပ တစ်ပြည်လုံး ယာယီအပစ်အခတ် ရပ်ထားနိုင်လျှင် မူ လာမည့် ၂၀၁၉ ခုနှစ်တွင် ငြိမ်းချမ်းရေးဆွေးနွေးပွဲများမှ ရလဒ်ကောင်းများ ပေါ်ထွန်းလာဖွယ်ရှိပါသည်။

နိုင်ငံတော်၏ အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်၏ ဦးဆောင်မှုအောက်တွင် NLD အစိုးရသည် ငြိမ်းချမ်းရေး ရရှိ ရန် စိတ်အားထက်သန်စွာ ဆောင်ရွက်နေသည်ကို မြင်နေရပါသည်။ ပြည်တွင်းစစ်ကြောင့် တိုင်းရင်းသားများ သေကျေ အနာတရဖြစ်ကာ ဆုံးရှုံးနစ်နာလျှက်ရှိသည်ကိုလည်း နိုင်ငံတော်၏ အတိုင်ပင်ခံပုဂ္ဂိုလ်က စာနာကြောင်း ပြောခဲ့ဖူးသည်။  နိုင်ငံရေးအရ တန်းတူရပိုင်ခွင့် Self-Determination တောင်းဆိုချက်များကိုလည်း မျှတစွာ ညှိနှိုင်းဖြေရှင်းပေးရန် ကတိ ပေးဖူးပါသည်။ အစိုးရက စစ်ရေးပဋိပက္ခအားလုံး ချုပ်ငြိမ်းရန် ရည်ရွယ်ဆောင်ရွက်နေသည်မှာ ထင်ရှားပါသည်။ လက်နက် ကိုင် အင်အားစုများကသာ တိုင်းရင်းသားပြည်သူများ အပေါ်စာနာလျှက် စစ်ရေးနည်းဗျူဟာဖြင့် အဖြေရှာသည့်နည်းကို စွန့်လွှတ်သင့်ပါသည်။ ယင်း လုပ်ဟန်မှာမူ လက်ရှိအစိုးရ၏ မူဝါဒနှင့်လည်း ကိုက်ညီမှု မရှိဟု ဆိုနိုင်ပါသည်။  နိုင်ငံရေး ပြဿနာကို စစ်အင်အားသုံး၍ အဖြေရှာပါက၊ အချင်းချင်းအကြား ယုံကြည်မှု ပျက်ပြားပါလိမ့်မည်။ တန်းတူရည်တူ နိုင်ငံရေးဆွေးနွေးသည့် ဗျူဟာဖြင့် ရိုးသားမှုကို ဖေါ်ပြကာ  စစ်မှန်သော နိုင်ငံရေး ဆွေးနွေးပွဲများ (Candid Political Dialogues) မှတဆင့် စစ်မှန်သော ငြိမ်းချမ်းရေး ရရှိရေးကို ကြိုးပမ်းစေလိုပါသည်။။။

 ၂၀၁၉ ခုနှစ် ဖေဖေါ်ဝါရီ ၁၁ ရက်နေ့ထုတ် ဒီလှိုင်းဂျာနယ် တွင် ဖေါ်ပြသော ဆောင်းပါး။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ