ရသဆောင်းပါးစုံ

အေးငြိမ်း ● ကျွန်ုပ်အလွန်စိတ်ပျက်မိသော အရာတခု

အေးငြိမ်း ● ကျွန်ုပ်အလွန်စိတ်ပျက်မိသော အရာတခု
(မိုးမခ) ဇန်နဝါရီ ၁၈၊ ၂၀၁၉


ကျွန်တော်ငယ်စဉ် ကျောင်းသားဘဝကတည်းက အလွန်ရွံမုန်းခဲ့သော အရာတခုသည် ရှိခဲ့၏။

ကျွန်တော့်လိုပင် နိုင်ငံသားအတော်များများသည်လည်း ကြည့်လို့မရခဲ့ပါ။ ကြည့်လို့မရကြကြောင်းကို လူရွှင်တော်များ ထုတ် ခဲ့သည့် ပြက်လုံးများနှင့် အရပ်ထဲတွင် ကပြောင်ကပျက် ပြောသည့်စကားများကို ထောက်၍ သိနိုင်ပါ၏။

အခြားမဟုတ်ပါ။

နိုင်ငံတော်အရာရှိဂျီးများက မယောင်ရာဆီလူးသည့် အလုပ်များကို လုပ်ပြနေခြင်း ဖြစ်၏။ တော်ကြာ ဘာလူဂျီးက ဘယ်နေ ရာသွား စစ်ဆေးကာ လိုအပ်သည်များကို မှာစားပြန်ပြီ။ တော်ကြာ ညာလူဂျီးက ဘယ်နေရာသွား ဖဲကြိုးဖြတ်ရပြန်ပြီ။
(ကျွန်တော့်စိတ်ထင် မြန်မာပြည်၌ စီးပွားအဖြစ်ဆုံးလုပ်ငန်းများတွင် ပူစီဖောင်းနှင့် ဖဲကြိုးဆိုင်များလည်း ပါမည်ထင်၏။)

ဘာအဆောက်အဦဆောက်တော့မယ် ဆိုတော့လည်း ဘာလူကြီးကလာကာ ရွှေတူနှင့်ထုလျက် ပန္နက်ချတော်မူရသေး၏။
ဘုရားတည်တော့လည်း သူတို့ပင် ရွှေအုတ်ချလေသည်။

အနှီလူကြီးများသည် ဖွင့်ပွဲလုပ်ရမှာ အတော် ဝါသနာပါသည်ထင့်။ ယုတ်စွအဆုံး ကိုယ့်ပိုက်ဆံနှင့်ကိုယ်၊ ရပ်ကွက်ထဲမှာ ကိုယ်ပိုင်လမ်းဖောက်ထားတာကိုပင် လာပြီးဖွင့်လိုက်ရသေးသည်။

ကျွန်တော့်စိတ်ထင် သူတို့ သားသမီး၊ မြေးမြစ်၊ တီကျွတ်တွေ မင်္ဂလာဆောင်တာတောင် ဖဲကြိုးဖြတ်ကာ ဖွင့်ပွဲလုပ်လေသလား မပြောတတ်။

တံတားဆောက်တာ၊ လမ်းဖောက်တာကို သူတို့စိတ်ထဲ၌ အတော်ဟုတ်လှပြီဟု ထင်နေပုံ ရလေသည်။ (တလောကတောင် ထရန်စဖော်မာနားမှာ ငှက်ပျောပွဲတွေ အုန်းပွဲတွေနှင့် ဖွင့်လိုက်တာ တွေ့လိုက်ရသေးသည်။ ဖွင့်စရာမရှိ ထရန်စဖော်မာ သွား ဖွင့်ရလေသည်။ Only in Myanmar.)

ကြက်မများ ဥ ဥ ပြီးသည့်အခါ ဆူညံပွက်လောရိုက်နေအောင် ကတော်၏။ “အောင်ပြီ၊ အောင်ပြီ၊ ဥတလုံး ဥပြီးသွားပြီ။ (၇) ရက် သားသမီးတို့ ကြားသိစေကုန်သတည်း” ဟု အဓိပ္ပါယ်ထွက်လေမည်လား မပြောတတ်။

ယခုလည်း ဤနည်းအတိုင်း ဖြစ်၏။

ဟိတ်၊ ငါတို့အစွမ်းနဲ့ အင်မတန်မှ ကြီးကျယ်ခမ်းနားလှတဲ့ တံတားကြီးတခု ပြီးပဟေ့။ ငါတို့အစွမ်းကို မောင်မင်းတို့ သိကြပြီ လား။

တံတားဖွင့်ပွဲမှာဝတ်ဘို့ ပြီးခဲ့တဲ့ (၃) လ လောက်ကတည်းက ကြိုးကြီးချိတ်လုံချည်ကို ကြိုမှာထားရတာ ဖြစ်၏။ ပုဝါနော်၊ မမေ့စေနဲ့။ ဟဲ့၊ တံတားဖွင့်ပွဲမှာပန်ဘို့ သဇင် (၅) ခက် အသင့်ရှိနေပစေနော်။ မရရင်တော့လား။ ဟင်းဟင်းဟင်း။

အရပ်သားအစိုးရတက်လာတော့ သည်ဖွင့်ပွဲယဉ်ကျေးမှု ပျောက်သွားလိမ့်မည်ဟု ထင်ခဲ့မိ၏။ ဤသည်မှာ ကျွန်ုပ်၏ ရူးမိုက်မှု သာ ဖြစ်ကြောင်း ယခု မျက်မြင်ကိုယ်တွေ့ သိခဲ့ရပြီ။ ယခုလူများသည်လည်း လူများကို လမ်းဘေး နေပူကျဲကျဲထဲ တန်းစီရပ် ခိုင်းကာ လက်အုပ်ချီခိုင်းနေသည်ကို မြင်ရတော့ ကျွန်ုပ်မှာ အလွန်စိတ်ပျက်မိလေ၏။ ထိုသူများသည် ၎င်းတို့ရွံမုန်းခဲ့သော အလုပ်များကို ၎င်းတုိ့ကိုယ်တိုင် လုပ်နေကြလေပြီ။

ကျွန်ုပ်တို့သည် သက်ဦးဆံပိုင် ပဒေသရာဇ်စနစ်ကို အလွန်ရွံမုန်းကြ၏။ ဗျူရိုကရက်စနစ်ကို အော့နှလုံးနာကြ၏။ သို့သော် ဤသည်မှာ ပါးစပ်က ပြောနေခြင်းမျှသာဖြစ်၏။ အမှန်တကယ် ကျွန်ုပ်တို့နှလုံးသားထဲတွင် ပဒေသရာဇ်စနစ်၏ လုပ်ပုံလုပ် နည်းများကို ကျိတ်နှစ်သက်နေကြသည်သာ ဖြစ်၏။ ကောဇောနီအခင်းကြီးများခင်းလျက် အခမ်းကြီး အနားကြီးများဖြင့် ဟောသလို တံတားဖွင့်ပွဲ၊ လမ်းဖွင့်ပွဲကြီးတွေလုပ်နေတာသည် ပဒေသရာဇ်စနစ်၏ အဆောင်အယောင်၊ အခင်းအကျင်း များပင် မဟုတ်ပါလော။

ဤဖွင့်ပွဲကြီးများသည် သာမန်ပြည်သူလူထုနှင့် လားလားမှ မပတ်သက်။ မည်သည့်အကျိုးကျေးဇူးမှလည်း မရှိ။ သည်လိုမှ မဖွင့်လျှင် သည်တံတားကို သုံးလို့မရတော့ပြီလော။ သည်လိုမှ ဖဲကြိုးမဖြတ်လျှင် သည်လမ်းကို လျှောက်လို့မရတော့ပြီလော။
သည်ဖွင့်ပွဲများအတွက် ပိုက်ဆံတပြားမှ မကုန်တော့ပြီလော။

ကျွန်ုပ်အတွက်တော့ဖြင့် ဤအရာများမှာ အပိုဆာသားများသာ ဖြစ်ပါသည်။ သည်ပွဲများတွင် ကုန်ကျမည့် ငွေ၊ အချိန်၊ လူ အင်အားများကို အခြားအကျိုးရှိမည့်နေရာများတွင် သုံးစေချင်ပါသည်။ (မင်းပြောတော့ ဟုတ်တယ်ကွ။ ဒါပေမယ့် ငါတို့မလဲ ဒါမျိုးကလွဲလို့ တခြား ဘာမှမလုပ်တတ်တာ ခက်တယ်။)

တံတားဘယ်နှစ်စင်းဆောက်ပြီးပြီ။ လမ်းဘယ်လောက်ဖောက်ပြီးပြီ ဆိုသည်ကို ယခုကဲ့သို့ အခမ်းအနားကြီးများဖွင့်ကာ သက်သေ ပြနေစရာမလို။ နှစ်ချုပ်စာရင်းထဲတွင် (အမှန်အကန်) စာရင်းပြလိုက်လျှင် ပြီး၏။

ဤသည်မှာ ကျွန်ုပ်အမြင်ကိုပြောခြင်းမျှသာ ဖြစ်၍ မိတ်ဆွေများအနေနှင့် လွတ်လပ်စွာ သဘောကွဲလွဲနိုင်ပါသည်။

နောက်ဆုံးပြောလိုသည်မှာ သည်တခါ တံတားဖွင့်မည်ဆိုလျှင် ကျွန်ုပ်ကို အကြောင်းကြားပါ။ PPE ဝတ်နည်း (လက်အိတ် ဝတ်နည်း) အခမဲ့ လာပြပေးပါမည် …. လို့။

ကျေးဇူးတင်ပါသည်။

အေးငြိမ်း
၁၆ ဇန္နဝါရီ၊ ၂၀၁၉


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts