ကဗျာ ခိုင်မာကျော်ဇော

ခိုင်မာကျော်ဇော – အငတ် ကဗျာ

Artspace.com

 အငတ် ကဗျာ
ခိုင်မာကျော်ဇော

(မိုးမခ) ဒီဇင်ဘာ ၁၃၊ ၂၀၁၈

တိုင်းပြည်ငတ်လို့
တိုင်းပြည်ကို ပြန်လာတယ်
တိုင်းပြည်ကလည်း ငတ်နေတယ်။
တိုင်းပြည်ဟာ
ဒီမိုကရေစီ အစိုးရ
ဒီမိုကရေစီ အစိုးရလို့ပြောတယ်
တိုင်းပြည်ဟာ ဒီမိုကရေစီ ငတ်တယ်။

တိုင်းပြည်က
တိုင်းရင်းသားပေါင်းစုံ ညီညွတ်ရေး
တိုင်းရင်းသားပေါင်းစုံ ညီညွတ်ရေးလို့ပြောတယ်
တိုင်းရင်းသားတွေ ညီညွတ်ရေး ငတ်တယ်။

တိုင်းပြည်ဟာ
သတင်းလွတ်လပ်ခွင့် ငတ်တယ်
လူ့ အခွင့်အရေး ငတ်တယ်
တရားဥပဒေ စိုးမိုးရေး ငတ်တယ်
ခေါင်းဆောင်းကောင်း ငတ်တယ်
ငြိ်မ်းချမ်းရေးလည်း ငတ်နေတယ်။

တိုင်းပြည်ဟာ
သစ်တော ငတ်တယ်
သစ်တောတွေ သစ်ပင်ငတ်တယ်။

မြစ်တွေက မြစ်ရေငတ်တယ်
မြစ်ရေကလည်း ရေသန့်ငတ်နေတယ်။
လယ်တွေက လယ်သမားငတ်တယ်
လယ်သမားက လယ်လုပ်ရင် ထမင်းငတ်တယ်။

တော်လှန်ရေးအဖွဲ့အစည်းတွေ တော်လှန်ရေးသမားကောင်းတွေ ငတ်တယ်
ပါတီတွေကလည်း ပါတီဝင်ကောင်းတွေ ငတ်တယ်
ရုံးတွေကလည်း ဝန်ထမ်းကောင်းငတ်တယ်
ကောင်းတဲ့လူတွေကလည်း ကောင်းကောင်းငတ်နေတယ်။

ကျောင်းတွေက ဆရာကောင်းငတ်တယ်
ဆရာကောင်းတွေ တပည့်ကောင်းငတ်တယ်
တပည့်တွေ စည်းကမ်းငတ်တယ်
စည်းကမ်းကလည်း စည်းကမ်းငတ်နေတယ်။

ကားတွေ လမ်းငတ်တယ်
လမ်းတွေက ကတ္တရာ ကွန်ဂရစ်ငတ်တယ်။

မီးတိုင်တွေ မီးငတ်တယ်
မီးကလည်း မီးရောင်ငတ်နေတယ်။

သတင်းသမားက သတင်းလွတ်လပ်ခွင့် ငတ်တယ်။

သတင်းစာတွေ သတင်းကောင်း ငတ်တယ်။
ဘုန်းကြီးကျောင်းတွေ ရဟန်းငတ်တယ်
ရဟန်းတွေ ၀တ်နည်းတော်ငယ်တယ်။

ဆေးရုံတွေ ဆရာဝန်ငတ်တယ်
ဆရာဝန်တွေက ဆေးငတ်တယ်။

ဈေးသည်က ဈေးဝယ်ငတ်တယ်
ဈေးဝယ်ကလည်း ပိုက်ဆံငတ်နေတယ်။

ထန်းတောတွေ ထန်းတက်သမား ငတ်တယ်
ထန်းတက်သမားက အိမ်ဝိုင်းငတ်တယ်
အိမ်ဝိုင်းတွေကလည်း အိမ်ရှင်ငတ်နေတယ်။

ရွာတွေက ရွာသူရွာသားတွေ ငတ်တယ်
ရွာသူရွာသားတွေက ရွာဟင်းရွာထမင်း ငတ်တယ်။

မိဘတွေက သားသမီးငတ်တယ်
သားသမီးတွေကလည်း မိဘငတ်တယ်။

ကလေးလေးတွေ မေတ္တာငတ်တယ်
မေတ္တာကလည်း မေတ္တာငတ်နေတယ်။

ကရင်ရွာတွေ
ကရင်စာ ငတ်တယ်
ကရင်စကား ငတ်တယ်
ကရင်နှစ်သစ်ကူး ငတ်တယ်
ဖားစည် ငတ်တယ်
ဒုံးယိမ်း ငတ်တယ်
သင်တိုင်း ငတ်တယ်
ခြံဥယျာဉ် ငတ်တယ်
တောင်ယာ ငတ်တယ်
တောင်ယာငတ်တော့ ထမင်းလည်း ငတ်တယ်။

ငတ်တယ် …
ငတ်တယ် ….
ငတ်တယ် …
ငတ်တယ်…
ငတ်တယ်..
ရင်တွေပူတယ် ရေတွေငတ်တယ်
ရင်တွေပူတယ် ရေတွေငတ်တယ်
ရင်တွေပူတယ် ရေတွေငတ်တယ်
သောက်ရေအိုးလေးကလည်း သောက်ရေငတ်နေတယ်။

ခိုင်မာကျော်ဇော
(ဒီဇင်ဘာ ၁၂၊ ၂၀၁၈)


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts