Myanmar Now ● အကျိုးစီးပွား၊ သေနတ်သမားတချို့နှင့် ရန်ကုန်မှမြေလုပွဲများ

(မိုးမခ) အောက်တိုဘာ ၂၊ ၂ဝ၁၈

ရန်ကုန်အနောက်ပိုင်း မြေကွက်ကြီးများသည်ခြံခတ်မှုအတွက်ပင် သိန်းရာနှင့်ချီ ပေါက်ဈေးရှိနေပြီးပိုင်ဆိုင်မှု အငြင်းပွားခြင်း၊ ပစ်ခတ်ဖြေရှင်းခြင်းတို့လည်း ပါဝင်နေသည်။

ပြီးခဲ့သည့်ရက်ပိုင်းအတွင်း ပစ်ခတ်မှုတစ်ခုတွင် သေဆုံးသွားသူ ခင်မောင်လွင် (ခ) ဝကြီး၏ ဓာတ်ပုံ၊ ပန်းအိုး၊ ရေခွက်တို့ကို သူ၏ နေအိမ် စားပွဲတွင် ပြင်ဆင်ထားသည် (ဓာတ်ပုံ – Myanmar Now)

ရန်ကုန်အနောက်ပိုင်းလှိုင်သာယာမြို့နယ်တွင် မြေလုပွဲများကို သေနတ်ဖြင့် ဖြေရှင်းကြသည့် အခြေအနေအထိ ဆိုက်ရောက်လာသည်။

၅၆ နှစ် အရွယ်ခင်မောင်လွင် (ခ) ဝကြီးသည် ပြီးခဲ့သည့်ရက်ပိုင်းအတွင်း ပဒံကျေးရွာ၊ ဆန်စက်လမ်းရှိ သူ၏နေအိမ်တွင် သေနတ်သမားတချို့၏ လက်ချက်ဖြင့် သေဆုံးသွားခဲ့သည်။

သေနတ်သမားတို့က ခြံစည်းရိုးခတ်ခ လက်ကျန်ငွေ သိန်းသုံးရာကျော်လာရောက် တောင်းခံရစဉ် ဝကြီးကို အနီးကပ်ပစ်သတ်ခဲ့သည်၊ ယင်းနောက် အောင်မင်းဦး ဆိုသူကိုလက်ထိပ်ခတ်ကာ ဖမ်းခေါ်သွားသည်ဟု ရဲ နဲ့ မျက်မြင်သက်သေတစ်ဦးက ပြောသည်။

Myanmar Now က ဖတ်ရှုခွင့်ရခဲ့သည့် လုံခြုံရေးတပ်ဖွဲ့တစ်ခု၏ ကနဦး အစီရင်ခံစာတစ်စောင်တွင် ခြံစည်းရိုး
ခတ်ခအဖြစ် သိန်း ၇ဝ ပေးချေထားပြီး ကျန်ငွေ
သိန်း ၃၃ဝ နှင့် ပတ်သက်ပြီး အခြေအတင် ဖြစ်ခဲ့ကြသည်ဟု ဆိုသည်။

ယခုအခင်းဖြစ်ပွားသည့်နေရာသည် ဒေသခံ လယ်သမားတချို့၊ လွှတ်တော်အမတ်ဟောင်းတစ်ဦးနှင့် ဆောက်လုပ်ရေး ကုမ္ပဏီများ၊
ပိုင်ဆိုင်မှု အငြင်းပွားနေသည့် နေရာဖြစ်ကြောင်း ဒေသခံတို့က ဆိုသည်။

ကရင်ပြည်နယ်မှ ခြေဆန့်လာသူများ

အခင်းဖြစ်ပွားချိန်တွင်အတူရှိနေခဲ့သည့် ကိုသန်းဇော်က သေနတ်သမားများနှင့်၎င်းတို့ ဖမ်းခေါ်သွားခဲ့သူ အောင်မင်းဦး တို့ကသာ သိကျွမ်းကြခြင်းဖြစ်သည်၊ ဝကြီးနှင့်
သိကျွမ်းခဲ့ခြင်း မရှိ၊ ငွေစာရင်းရှင်းစရာလည်းမရှိသော်လည်း ဝင်ရောက်ဖြေရှင်းရာမှ ကြားညပ်ခဲ့ခြင်းဖြစ်သည်ဟု ဆိုသည်။

အောင်မင်းဦးသည်ကရင်ပြည်နယ်တွင် အခြေစိုက်သည့် နယ်ခြားစောင့်တပ်တစ်ခု၏ တပ်ဖွဲ့ဝင် တစ်ယောက်ဟု မကြာခဏ
ထုတ်ဖော်ပြောဆိုခဲ့ကြောင်း ကိုသန်းဇော်က ပြောသည်။ တစ်ခါတရံတွင် ကရင်အမျိုးသား အစည်းအရုံးတွင်
တပ်ဖွဲ့ဝင် ဖြစ်ဖူးသည်ဟုလည်း ပြောသည်ဟု ဆိုသည်။

သေနတ်သမားများသည်ကရင်အမျိုးသားအစည်းအရုံး KNU တပ်မဟာ ၇ မှ တပ်ဖွဲ့ဝင်များ ဖြစ်နိုင်သည်ဟု အောင်မင်းဦး၏
ပြောစကားများအား ကိုးကားပြီး ကိုသန်းဇော်က ပြောသည်။

သို့သော်KNU တပ်မဟာ(၇) ပြောရေးဆိုခွင့်ရှိသူကမူ ဖမ်းဆီးခံရသူများသည် ၄င်းတို့၏ တပ်သားများမဟုတ်
ဟု ဆိုသည်။

“ဒီလိုနာမည်ခံပြီး လုပ်တာတွေက များနေတော့ ရိုးတောင်နေပြီ။ တချို့က လက်နက်တွေကို နယ်စပ်က ဝယ်ပြီးတော့
KNU အမည်ခံပြီး လုပ်စားနေကြတာ စိတ်ပျက်စရာပဲ” ဟု ကရင်ပြည်နယ် ဘားအံအခြေစိုက်
KNU ဆက်ဆံရေးရုံးတာဝန်ခံ စောအယ်ထီးက ပြောသည်။

လက်နှက်ကိုင်အဖွဲ့ ပါဝင်ပတ်သက်ကြောင်း ဖော်ပြထားသည့် ကြော်ငြာဆိုင်းဘုတ် (ဓာတ်ပုံ – Myanmar Now)

ကိုသန်းဇော်သည်အခင်းမဖြစ်ပွားမီ နာရီပိုင်းအလိုကမှ ယင်းအိမ်သို့ရောက်ခဲ့ခြင်းဖြစ်ပြီး သူရောက်ချိန်တွင် အောင်မင်းဦး၊ သူ၏အစ်ကိုကဲ့သို့ ရင်းနှီးခဲ့သည့်မိတ်ဆွေ ဝကြီးတို့လည်း
ရှိနေခဲ့သည်။ သေနတ်သမားတို့သည် စာသင်ကျောင်း၊ စက်ရုံများ၊ လူနေအိမ်များကြား
တည်ရှိသည့် ပေ၂ဝဝ ပတ်လည်ခန့် ခြံထဲမှ အဆိုပါ အိမ်ဆီသို့ နံနက် ၁၁နာရီခွဲခန့်တွင် ရောက်လာခဲ့သည်ဟု
ကိုသန်းဇော်က ပြောသည်။ ၄င်းတို့သည် အိမ်ရှေ့ ကွန်ကရစ်လမ်းပေါ် ရပ်ထားသည့် တက္ကစီပေါ်မှ ဆင်းလာကြခြင်းဖြစ်ပြီး ကားပေါ်တွင် အနည်းဆုံး
၂ဦး ကျန်ခဲ့သည်၊ လူ ၇ယောက် ပါဝင်လာဖွယ် ရှိသည်ဟု အိမ်နီးနားချင်းတချို့က ခန့်မှန်းသည်။

ရဲတပ်ဖွဲ့၏ထုတ်ပြန်ချက်အရ ယာဉ်မောင်းနှင့် ယာဉ်ကို သေနတ်သမားတို့က ငါးသောင်းဖြင့် ငှားရမ်းခဲ့ခြင်းဖြစ်ကြောင်း
သိရသည်။

ကိုသန်းဇော်က လူ၂ယောက်သည် အဝင်အထွက်လမ်းများကိုစောင့်ကြည့်ခဲ့ပြီး ၃ယောက်သည် အောင်မင်းဦးကို သေနတ်ဒင်များဖြင့် ထုနှက်ကာ
ပိုက်ဆံ ချက်ခြင်းထုတ်ပေးရန် တောင်းဆိုခဲ့သည်ဟု ပြောသည်။

“(သေနတ်ဒင်နဲ့)မထုခင်မှာ အောင်မင်းဦးကို မင်း ပိုက်ဆံတွေ ဘယ်လိုလုပ်မလဲဆိုပြီးမေးတော့ ကိုဝကြီးက
ဖုန်းဆက်ပြီး တောင်းပေမယ် သူ့ကိုတော့ မလုပ်ပါနဲ့ဆိုပြီး ဝင်ပြောတယ်။ သူတို့က ဒီကောင်ရှုပ်တဲ့ အရှုပ်ဆိုပြီး တော့ အောင်မင်းဦးကို
ထိုးတယ်” ဟု ကိုသန်းဇော်က ပြောသည်။

သေနတ်သမားများနှင့်စောအောင်မင်းဦး တို့သည် ကရင်စကားဖြင့် အပြန်အလှန် ပြောဆိုခဲ့ကြပြီးနောက် ကြားဝင် ဖြေရှင်းပေးရန်
ကြိုးစားသည့် ဝကြီးကို အနီးကပ်ပစ်ခဲ့သည်ဟု ၄င်းက ဆိုသည်။

မျှော်လင့်မထားသောသေနတ်သံ ၂ချက်ကို အနီးရှိ အထည်ချုပ်စက်ရုံမှ “ဗျောက်အိုးဖောက်သံ” များ ဖြစ်သည်ဟု ဒေသခံတို့ကထင်ခဲ့ကြကြောင်း Myanmar Now သတင်းထောက်များအား လိုက်လံပို့ဆောင် ပေးသည့် အပြင်ပဒံကျေးရွာမှ
ဆိုင်ကယ်ကယ်ရီသမားက ပြောသည်။

ရဲတပ်ဖွဲ့၏အဆိုအရသေနတ်သမားများထဲတွင် တွံတေးမြို့  မင်းပိုင်းရပ်ကွက်မှ ၃၉ နှစ်အရွယ် စောလမွန်(ခ)
ကိုစော ဆိုသူ ပါဝင်သည်။

၎င်းတို့သည်ဝကြီးကို ပစ်ခတ်ခဲ့ပြီးနောက် အောင်မင်းဦးကိုဖမ်းဆီးခေါ်ဆောင်ကာ မအူပင်မြို့ဘက်သို့သွားသည့် ကားလမ်းအတိုင်း ထွက်ခွာသွားခဲ့သည်ဟု
ရဲက ဆိုသည်။

ပစ်ခတ်မှုအပြီးနာရီပိုင်းအတွင်း ရဲက အခင်းဖြစ်ပွားခဲ့သည့်နေရာသို့ ရောက်ရှိလာခဲ့ပြီးနောက် သေနတ်သမားများ
အားယာဉ်မောင်းမှတဆင့် ခြေရာခံခဲ့သည်။

အခင်းဖြစ်ပြီး၃နာရီခွဲခန့် အကြာတွင် သေနတ်သမားများ ဖမ်းဆီးသွားသည့် အောင်မင်းဦးကို ရဲက တွံတေးမြို့နယ်၊
ရေကျော်လေးကျေးရွာရှိ ငါးကန်စောင့်တဲတစ်ခုအတွင်း ဒဏ်ရာများနှင့် ရှာတွေ့ခဲ့သည်ဟု သိရသည်၊
နောက်တစ်နေ့တွင် အောင်မင်းဦး ရန်ကုန်ဆေးရုံကြီးတွင်ကွယ်လွန်သွားခဲ့သည်။

ဈေးကြီးလှသည့် ခြံစည်းရိုးခတ်ခများ

လှိုင်သာယာမြို့နယ်မှ ခြံစည်းရိုးခတ်ခများသည် သိန်းရာချီတန်ကြေးပေါက်သည်။

ဒေသခံများက “ခြံစည်းရိုးခတ်ခ” ဆိုသည်ထက် “ခြံစည်းရိုးခတ်ရန်အတွက်လုံခြုံရေးကြေး” ဟု ခေါ်ဆိုလျှင် ပိုမိုသင့်တော်မည်ဟု ပြောကြသည်။

ပိုင်ဆိုင်မှုအငြင်းပွားနေသည့် နေရာကို ခြံခတ်ပါက ဆန့်ကျင်ဘက် အုပ်စုတစ်စုက ဝင်ရောက် မနှောင့်ယှက်ရန်
အတွက် လူတချို့က လုံခြုံရေး ဝန်ဆောင်မှုပေးကြသည်မှာ မထူးဆန်းသည့်ကိစ္စ ဖြစ်နေကြောင်း လှိုင်သာယာဒေသခံများက
ဆိုသည်။

ယင်းနေရာကိုလွန်ခဲ့သည့်ရက်အနည်းငယ်က သေနတ်သမားများ ဦးဆောင်သည့် ဒါဇင်နှင့်ချီသောသူတို့က ခြံလာခတ်ကြကြောင်း
ဒေသခံများက ပြောသည်။

ခြံစည်းရိုးခတ်ကြစဉ်က“ကရင်အမျိုးသားအစည်းအရုံး – KNU” အလံနှင့် “ကရင်အမျိုးသား လွတ်မြောက်ရေး တပ်မတော်
– ငြိမ်းချမ်းရေးအဖွဲ့ – မြဝတီခရိုင်” ဟူသော ဆိုင်းဘုတ်များ ထောင်ခဲ့ကြသော်လည်း ရက်အနည်းငယ်အတွင်း
ပြန်ဖြုတ်ချခဲ့သည်။

လယ်သမားများကတောင်းဆိုသောကြောင့် သူတို့ လာရောက်အကူအညီပေးခဲ့ခြင်းဖြစ်ကြောင်းလည်း အဆိုပါ ဆိုင်းဘုတ်တွင်
ရေးသားထားသည်။

၎င်းတို့သည်ဆေးရုံတွင်သေဆုံးသွားသည့် အောင်မင်းဦး ၏အဆက်အသွယ်ဖြင့် ရန်ကုန်ကို ရောက်လာခဲ့ပြီး
ခြံခတ်ရန်အတွက် လုံခြုံရေး တာဝန် ယူသူများဖြစ်သည်ဟု ကိုသန်းဇော်က ဆိုသည်။

အဆိုပါမြေနေရာကို
ခြံခတ်ရန်အတွက် ရန်ကုန်အခြေစိုက် ဝါဝါဝင်း ကုမ္ပဏီကလည်း မကြာခဏ ကြိုးစားခဲ့သည်ဟု ဒေသခံများနှင့်
ကိုသန်းဇော်၏အဆိုအရ သိရသည်။

“ဝါဝါဝင်းကပိုက်ဆံပေးမယ် ဆိုပြီးတော့ ခြံခတ်ခိုင်းတာ။ ခြံဘယ်တုန်းက ခတ်လဲ ဆိုတာတော့ မသိလိုက်ဘူး။ ဒါက သူတို့ ဖြစ်ပြီးတော့မှ ကျွန်တော်သိရတာ။ ကျွန်တော်ကိုလည်း CID ကလည်း ခေါ်စစ်ထား တယ်။ ကျွန်တော်လည်း ဖြေပေးထားတယ်” ဟု ကိုသန်းဇော်ကပြောသည်။

သို့သော်သေနတ်သမားများ၊ သေဆုံးသူများနှင့် ဝါဝါဝင်းကုမ္ပဏီ တို့အကြား ဆက်နွယ်မှုရှိမရှိကို
Myanmar Now က သီးခြားအတည်ပြုချက် မရသေးပါ။

အငြင်းပွားဖွယ်ရာမြေနေရာအနီးရှိ ဆောက်လုပ်ရေး ဆိုင်းဘုတ် တစ်ခုတွင် အိမ်ရာ စီမံက်ိန်းတစ်ခု အတွက် ဧက
၃ဝဝ ကျော်ကို Royal Lotus ကုမ္ပဏီက ရန်ကုန်စည်ပင် ခွင့်ပြုချက်ဖြင့် ခြံခတ်နေသည်ဟု ဖော်ပြထားသည်။ ဝါဝါဝင်းနှင့် Royal Lotus တို့သည် ရန်ကုန် လသာမြို
့နယ်ရှိ အဆောက်အအုံ တစ်ခုတည်းတွင် ရုံးဖွင့်ထားသည်။

Myanmar Now က အဆိုပါရုံးများကို သွားရောက်မေးမြန်းရာ မှတ်ချက်ပေးရန် ငြင်းဆန်ကြသည်။

လှိုင်သာယာမြို့နယ်သောင်ကြီးရဲစခန်းမှုး ရဲအုပ်မြင့်ဇော်ဦးက ရဲတပ်ဖွဲ့က ဝါဝါဝင်းနှင့် Royal
Lotus ကုမ္ပဏီဘက်ကို ခေါ်ယူ မေးမြန်းကြောင်း အတည်ပြု ခဲ့သော်လည်း အသေးစိတ် ပြောကြားရန်
ငြင်းဆန်ခဲ့သည်။

ရှုပ်ထွေးလှသည့်အဆိုပါအမှုကို ရန်ကုန် အင်းစိန်မှ CID မှုခင်းရဲတပ်ဖွဲ့က ကိုင်တွယ်နေကြောင်း သိရသည်။

လာမည့်ရက်အနည်းငယ်အတွင်းစစ်ဆေးမှုများပြီးဆုံးပါက အဖြေပေါ်မည်ဟု လှိုင်သာယာမြို့ နယ် သောင်ကြီးရဲစခန်းမှုး ရဲအုပ်မြင့်ဇော်ဦးက
Myanmar Now ကို ပြီးခဲ့သည့် သောကြာနေ့က ပြောကြားခဲ့သည်။

လှိုင်သာယာမှရန်ကုန်တိုင်းဒေသကြီးလွှတ်တော် အမတ် တစ်ဦးဖြစ်သည့် ဦးမြတ်မင်းသူက ပစ်ခတ်မှု ဖြစ်ပွားခဲ့သည့်
ယင်းနေရာသည် လယ်ယာမြေအငြင်းပွားမှု မကြာခဏ ပေါ်ပေါက်လေ့ရှိသည့် နေရာဖြစ်ကြောင်း ပြောသည်။
ပစ်ခတ်မှုတွင် နောက်ကွယ်မှ ပြဿနာများ ရှိနေနိုင်ကြောင်း ၄င်းက ခန့်မှန်းထားပြီး ဖြစ်စဉ်
အစအဆုံး သိရှိရန် ရဲ၏ ထုတ်ပြန်ချက်ကို စောင့်ဆိုင်းနေသည်ဟု ပြောသည်။

“ဖြစ်စဉ်ရဲ့နောက်ကွယ်မှာတော့ရှုပ်ထွေးတဲ့ ကိစ္စတွေရှိနေနိုင်သေးတယ်။ ဒါတွေကိုရဲတပ်ဖွဲ့က ထုတ်ပြန်ရင်တော့ သိရမှာပေါ့” ဟု အမျိုးသား ဒီမိုကရေစီ အဖွဲ့ချုပ်မှ
လွှတ်တော်ကိုယ်စားလှယ်က ပြောသည်။

ပြီးခဲ့သည့်ရက်ပိုင်းအတွင်း ပစ်ခတ်မှု ဖြစ်ပွားသည့်နေအိမ် (ဓာတ်ပုံ – Myanmar Now)

သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts