လွမ်းဒေါင်၊ ဝုမ်လျံစန်း (Myanmar Now) ● ဘန်ကောက်၊ဂျာကာတာနဲ့ စမ်းချောင်း ဘယ်မြို့က ရေအောက်အရင်ရောက်မလဲ

(မိုးမခ) စက်တင်ဘာ ၂၄၊ ၂ဝ၁၈

မြန်မြန်ဆန်ဆန်ပြုပြင်မှုများအလုပ်နိုင်ပါက
ထိုင်းနိုင်ငံဘန်ကောက်နှင့် အင်ဒိုနီးရှားနိုင်ငံဂျကာတာ တို့သည်လာမည့်နှစ်အနည်းငယ်အတွင်း
ရေအောက်ရောက်နိုင်ကြောင်း ပညာရှင်များကသတိပေးထားသလို ရန်ကုန်မြို့စမ်းချောင်းမြို့နယ်သည်လည်း
ရေအောက်ရောက်မည့်အရေးကြုံတွေ့နေရသည်။

စက်တင်ဘာလလယ်မိုးကြောင့် စမ်းချောင်း ဦးဖီးလမ်းရေကြီးနေစဉ် ( ဓာတ်ပုံ – စမ်းချောင်းမြို့ခံတစ်ဦး)

ရန်ကုန်
— လက်ရှိကြုံနေရတဲ့ ပြဿနာတွေကို မဖြေရှင်းနိုင်ရင် ဘန်ကောက်၊ ဂျာကာတာနဲ့ စမ်းချောင်းတို့ဟာ
လာမည့်နှစ်အနည်းငယ်အတွင်း လူနေအိမ်တွေထဲ ရေတွေဝင်ရောက်လာတာကို ဆိုးဆိုးရွားရွား ကြုံရနိုင်ပါတယ်။

မြေအောက်ရေအလွန်အကျွံထုတ်သုံးခြင်း၊
ပင်လယ်ရေမျက်နှာပြင်မြင့်တက်လာခြင်းနဲ့ ထုထည်ကြီးမားတဲ့ အဆောက်အအုံတွေတိုးလာခြင်းတို့ကို
အလျင်အမြန် မဖြေရှင်းနိုင်ရင် လာမယ့် ၁၅ နှစ်အတွင်း ထိုင်းနိုင်ငံ မြို့တော်ဘန်ကောက်ဟာ
ရေအောက်ရောက်သွားလိမ့်မယ်လို့ အစီရင်ခံစာတစ်ခုကိုကိုးကားပြီး ဘန်ကောက်ပို့စ်က ၂၀၁၅
ခုနှစ်အတွင်းက ရေးသားပါတယ်။

ဘန်ကောက်လိုအခြေအနေတွေကြောင့်ဘဲ
လူ ၁၀ သန်းလောက်နေထိုင်တဲ့ အင်ဒိုနီးရှားမြို့တော် ဂျာကာတာ ဟာလည်း ၂၀၅၀ မှာ ရေအောက်နစ်မြုပ်သွားနိုင်တယ်လို့
ပညာရှင်တွေကသတိပေးထားပါတယ်။

လူဦးရေ ၆၅,၀၀၀
ကျော် နေထိုင်တဲ့ ရန်ကုန်မြို့လယ်ပိုင်းက စမ်းချောင်းမြို့နယ် ဟာလည်း အခုကြုံနေရတဲ့
ပြသနာတွေကိုမဖြေရှင်းနိုင်ရင် လာမည့်နှစ်တွေမှာ ရေမြုပ်ဖို့ရှိပါတယ်။

ဒါပေမယ့်
စမ်းချောင်းဟာ ဘန်ကောက်နဲ့ ဂျာကာတာလို လူနေအိမ်တွေမြေကြီးထဲနစ်ဝင်သွားတာမဟုတ်ဘဲ လူနေအိမ်ရှေ့ကလမ်းမတွေ
ရုတ်တရတ် မြင့်တက်လာတာကြောင့် အိမ်တွေရေအောက်နစ်မြုပ်ဖို့ အကြောင်းဖန်လာတာပါ။

ထပ်ပိုးလွှာကွန်ကရစ်ကြောင့်ပလက်ဖောင်းထက်ပိုမြင့်သွားသည့်လမ်းမ ( ဓာတ်ပုံ – လွမ်းဒေါင်/Myanmar Now)

ရန်ကုန်မြို့တော်စည်ပင်သာယာရေးကော်မတီဟာ
စမ်းချောင်းမြို့နယ်ထဲက ပျက်စီးနေတဲ့ လမ်းမ အတော်များများကို ယခုနှစ်ဧပြီလကစပြီး ကွန်ကရစ်ထပ်ပိုးလွှာခင်းခဲ့ပါတယ်။

ဒါပေမယ့်
လမ်းဟောင်းကိုတူးထုတ်ဖို့ ဘတ်ဂျက်ရန်ပုံငွေမရှိဘူးဆိုတဲ့အကြောင်းပြချက်နဲ့ လမ်းမတွေပေါ်မှာပဲ
ကွန်ကရစ်ကိုထပ်ခင်းခဲ့တာကြောင့် လမ်းတွေဟာအရင်ထက်နှစ်ဆလောက်မြင့်တက်သွားသလို မြေညီထပ်
တိုက်ခန်းတွေထက်လည်း လမ်းတွေကပိုမြင့်သွားခဲ့ပါတယ်။

“နဂိုရှိတာကို တူးလိုက်ရင် အသစ်ခင်းတာထက် ကုန်ကျစရိတ်များနေတယ်။
ကျွန်တော်တို့ နိုင်ငံ အနေထားလေးနဲ့ တချို့နေရာတွေဆို လုပ်ချင်တယ်။ ဘတ်ဂျက်အနေထားနဲ့
လုပ်ဖို့မရသေးဘူး” လို့ ရန်ကုန်မြို့တော်စည်ပင်သာယာရေးကော်မတီ
အင်ဂျင်နီယာဌာန (လမ်းနှင့် တံတား) က လက်ထောက်ဌာနမှူး ဦးတင်ထွန်းဦးက The Voice သတင်းဌာနကို
ဩဂုတ်လအတွင်းကပြောကြားခဲ့ပါတယ်။

ဗဟိုလမ်းကတစ်ဖက်နိမ့်နေတဲ့အတွက်
လမ်းကိုညီအောင် ကွန်ကရစ်နဲ့ညှိလိုက်တဲ့အတွက် အချို့နေရာတွေမှာ လမ်းကအိမ်တွေထက် နှစ်ပေလောက်
မြင့်သွားတာလို့ စမ်းချောင်းမြို့နယ် မဲဆန္ဒနယ် တိုင်းလွှတ်တော်ကိုယ်စားလှယ် ဦးသော်တာအောင်ကလည်းThe
Voice သတင်းဌာနကို ဩဂုတ်လအတွင်းကပြောကြားခဲ့ပါတယ်။

ဒီပြဿနာတွေကိုဘယ်လိုဖြေရှင်းမလဲလို့
Myanmar Nowက စမ်းချောင်းမြို့နယ် နဲ့ ရန်ကုန်မြို့ စည်ပင်သာယာရေးကော်မတီတွေကို မေးမြန်းဖို့ကြိုးစားခဲ့ပေမယ့်
ပြန်လည်မဖြေကြားခဲ့ပါဘူး။

အခုဆို မိုးသဲသဲမဲမဲရွာတိုင်း
လမ်းပေါ်ကရေတွေဟာ ပိုနိမ့်တဲ့ အိမ်တွေထဲစီးဝင်နေတာကြောင့် စမ်းချောင်းမြို့နယ်ထဲက မြေညီထပ်တိုက်ခန်းတွေမှာနေထိုင်သူတွေဟာ
ရန်ကုန်မှာမိုးသဲသဲမဲမဲ ရွာတဲ့အချိန်တွေကို ကြောက်လန့်နေကြပါတယ်။

စမ်းချောင်းမြို့နယ်
ဆီဆုံလမ်း မြေညီထပ်မှာ နေထိုင်တဲ့ ဦးခင်မောင်သိန်းက မိုးသည်းလိုက်တိုင်း ရေဝင်နေတဲ့
သူ့အိမ်ကို စိတ်ညစ်နေပါတယ်လို့ Myanmar Now ကိုပြောပါတယ်။

“ရောင်းပစ်မလား ထပ်ပြီး မြင့်ပြီး ပြန်ဆောက်မလား။ ဒီတိုင်းတော့
မရဘူးဆိုတာကျွန်တော်တို့သိပြီ” လို့ ဆိုပါတယ်။

စမ်းချောင်းမြို့နယ်
ဗားကရာလမ်းပေါ် ရှိ ရှစ်ထပ်ခွဲမြင့်တဲ့ Azure Hotel နဲ့ ၁ဝ ထပ်မြင့်တဲ့ကွန်ဒိုတစ်ခုရဲ့
မြေအောက် ကားပါကင်တွေမှာ ရေတွေဝင်နေခဲ့တာကြောင့် မီးသတ်ကားတွေ၊ ရေစုပ်စက်တွေသုံးပြီး
စမ်းချောင်းမီးသတ်က ခြောက်နာရီလောက်ကြာအောင် ရေတွေစုပ်ထုတ်ပေးခဲ့ရပါတယ်။

“ရာသီဥတုက ဖောက်ပြန်တော့ မိုးများရင် မြောင်းတွေထဲကို ကျော်သွားတယ်။
ဘေးပတ်ဝန်းကျင် အိမ်တွေပါ ဝင်ကုန်တာပေါ့။ ဟိုတယ်ထဲမှာ ဝင်တဲ့ အောက်ခန်းအကုန်ပြည့်သွားပြီဆိုရင်
လူတွေ အန္တရာယ် ရှိသွားပြီ” လို့ စမ်းချောင်းမြို့နယ် ဒု-မီးသတ်ဦးစီးမှူး
ဦးသန်းဇော်ပြောပါတယ်။

နေအိမ်ရေမဝင်ရန် ကြိုတင်ကာကွယ်ထားသော မြေညီထပ်တိုက်ခန်းတစ်ခု ( ဓာတ်ပုံ – လွမ်းဒေါင်/Myanmar Now)

ရန်ကုန်တိုင်းလွှတ်တော်
စမ်းချောင်းမြို့နယ် အမတ်ဦးအောင်မျိုးကတော့ ကွန်ကရစ်လမ်းတွေကို ကောင်းအောင်ဆက်ခင်းနေသလို
မိုးရွာတဲ့အချိန်မှာ ရေတွေမြန်မြန်ကျသွားအောင် မြောင်းတွေကို စည်ပင်က အားစိုက်ပြီးလုပ်နေတယ်လို့ဆိုပါတယ်။

စမ်းချောင်းမှာ
ဆယ်စုနှစ်သုံးခုကြာ နေထိုင်တဲ့အသက် ၈ဝ အရွယ်ဦးခင်မောင်သိန်းကတော့ လမ်းတွေမြင့် လာတာ
အပြင်လူတွေဟာ ရေဆင်းတဲ့မြောင်းတွေထဲကို အမှိုက်တွေအလွန်အကျွံပစ်တာကြောင့် မြို့တွင်း
လမ်းမတွေရေလျှံတာလို့ဆိုပါတယ်။ အဲဒီ့ အမှိုက်တွေကိုလည်း စည်ပင်ကအမြဲတမ်းလာမရှင်းနိုင်ဘူးလို့
ဆိုပါတယ်။

“နောက်ဖေးလမ်းကြား ရွှံ့က တစ်ပေလောက် ရောက်နေပြီ။ မြောင်းလည်းပိတ်နေပြီ၊
အဲဒါလည်း စည်ပင်က ၂၈ နှစ် အတွင်းမှာ တစ်ခါလာဖော်တယ် ဒီလောက်ပဲ”
လို့ သူကဆိုပါတယ်။

စမ်းချောင်းမြို့နယ်
ဦးဖီးလမ်းက မြေညီထပ်တိုက်ခန်းမှာ နေထိုင်တဲ့ အသက် ၆၁ နှစ်ရှိ ဦးအေးကိုကတော့ မိုးရွာပြီးတဲ့နောက်
စမ်းချောင်းရပ်ကွက်ထဲကလမ်းမတွေပေါ် ကျန်ခဲ့တဲ့ရေတွေ အလျင်အမြန်ကျသွားဖို့ အတွက် အင်္ဂလိပ်အစိုးရလက်ထက်က
လုပ်ခဲ့တဲ့ ဗားကရာချောက်စီမံကိန်း ကိုအတုယူပြီးလုပ်သင့်တယ်လို့ အကြံပြုပါတယ်။

ဗားကရာချောက်
ဟာ စမ်းချောင်းနဲ့ ကြည့်မြင်တိုင်မြို့နယ် အစပ်မှာရှိတဲ့ မြေနိမ့်ဧရိယာ တစ်ခုဖြစ်ပြီး
မိုးရွာပြီးနောက် မြေနီကုန်းနဲ့ စမ်းချောင်းလိုအမြင့်ပိုင်းက စီးဝင်လာတဲ့ရေတွေစုပြုံရောက်ရှိလာတတ်ပါတယ်။

အင်္ဂလိပ်အစိုးရလက်ထက်က
မြို့ပြပညာရှင်တွေဟာ ဒီအချက်ကိုကောင်းကောင်းအသုံးချခဲ့ပြီး အမြင့်ပိုင်းက ရေတွေကို
ဗားကရာချောက်ထဲအလွယ်တကူစီးဝင်နိုင်အောင် မြို့တွင်းလမ်းနဲ့ မြောင်းတွေကိုစီစဉ်ထားပြီး
အဲဒီကမှတစ်ဆင့် လမ်းလျှောက်သွားရင်ငါးမိနစ်လောက်နဲ့ရောက်တဲ့ လှိုင်မြစ်ထဲကို ရေတွေစီးဝင်စေတယ်လို့
စမ်းချောင်းမြို့နယ်သား ဦးအေးကိုကပြောပါတယ်။

ဘန်ကောက်နဲ့ဂျကာတာလိုပဲ
ပြင်ဆင်မှုတွေ ချက်ခြင်းမလုပ်ရင် ရေအောက်ကိုနစ်မြုပ်ဖို့ အရေးကြုံနေရတဲ့ အရေးကြောင့်
စမ်းချောင်းမြို့ခံတွေဟာ နောက်တစ်ကြိမ်ရန်ကုန်မှာမိုးသည်းလာမှာကိုကြောက်နေကြပါတယ်။

သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts