ရှစ်လေးလုံးမှာကတည်းက ဘာမှမဖြစ်ချင်ခဲ့တဲ့ ကိုမင်းကိုနိုင်
Myanmar NOW – အင်တာဗျူး။ (မိုးမခ) သြဂုတ် ၈၊ ၂၀၁၈
၁၉၆၂ မတ်လ တွင် ဗုိုလ်ချုပ်ကြီးနေ၀င်းဦးဆောင်သော စစ်တပ်က ပါလီမန်ဒီမိုကရေစီအစိုးရကို ဖြုတ်ချပြီး နိုင်ငံတော်အာဏာကိုသိမ်းကာ စစ်အုပ်ချုပ်ရေးစနစ်ကို မြန်မာပြည်တွင် စတင် အကောင်အထည်ဖော်ခဲ့သည်။ စစ်တပ်အာဏာသိမ်းသည့် ထိုခုနှစ်တွင် ကိုပေါ်ဦးထွန်း (ခေါ်) ကိုမင်းကိုနိုင်အား မွေးဖွားခဲ့သည်။ ကိုမင်းကိုနိုင်သည် အသက် ၂၄ နှစ်အရွယ်တွင် ဦးနေ၀င်းဦးဆောင်သော မြန်မာ့ဆိုရှယ်လစ်လမ်းစဉ်ပါတီကို ဆန့်ကျင်သည့် ၁၉၈၈ ဒီမိုကရေစီအရေးတော်ပုံတွင် ထင်ရှားသည့် လူထုခေါင်းဆောင်တစ်ဦးအဖြစ် ပေါ်ထွက်လာခဲ့သူဖြစ်သည်။ ၁၉၈၈ စစ်တပ်ပြန်လည်အာဏာသိမ်းပြီးနောက်ပိုင်း နှစ်ပေါင်းမြောက်မြားစွာ နိုင်ငံရေးအကျဉ်းသားအဖြစ် ဖြတ်သန်းခဲ့ရသော ကိုမင်းကိုနိုင်သည် ယခုအခါတွင် အသက် ၅၆ နှစ်ရှိပြီဖြစ်ကာ၊ မြန်မာပြည်သူများကြားတွင် သူသည် သြဇာအရှိန်အ၀ါကြီးမားနေဆဲဖြစ်သော နိုင်ငံရေးခေါင်းဆောင်တစ်ဦးဖြစ်သည်။ ရှစ်လေးလုံးအရေးတော်ပုံကြီးတွင်လည်းကောင်း၊ နောက်ပိုင်းနိုင်ငံရေးလှုပ်ရှားမှုများတွင်လည်း သူ့တွင်မည်သည့် ပုဂ္ဂလိကရည်မှန်းချက်များမရှိကြောင်း၊ တိုင်းပြည်ကောင်းစားရေးကိုသာမျှော်လင့်ခဲ့သူဖြစ်ကြောင်း သူကဆိုသည်။
အနှစ် ၃၀ တိုင်ခဲ့ပြီဖြစ်သော ရှစ်လေးလုံးအရေးတော်ပုံကြီး ကျရောက်သည့် ယခုနှစ်တွင် ကိုမင်းကိုနိုင်အား သူ၏ နိုင်ငံရေးအတွေးအမြင်များကို သိရှိနိုင်ရန် Myanmar Now သတင်းအဖွဲ.က သူ့အား သွားရောက်တွေ.ဆုံ မေးမြန်းထားပါသည်။
မေး။ ။ အသက်အရွယ်ငယ်ငယ်နဲ့ ၈၈ အရေးတော်ပုံမှာ ဘယ်လိုရည်မှန်းချက်တွေနဲ့ ပါဝင်လှုပ်ရှားခဲ့တာလဲ။ ဒီရည်မှန်းချက်တွေဟာ ဘယ်လောက် အတိုင်းအတာပြည့်မီသွားပြီလဲ၊ အခုအချိန်မှာဘယ်ရောက်သွားပြီလဲပေါ့။
ဖြေ။ ။ ကျွန်တော်ကျကျနနစဉ်းစားဖူးပါတယ်။ ဒီအလုပ်ကို ကျွန်တော်လုပ်ပြီးတော့ လုပ်လိုက်တဲ့အချိန်ကနည်းနည်း၊ ထောင်ထဲမှာ တစ်ယောက်တည်းငုပ်တုတ်ကြီးနေရတာက များများဖြစ်သွားတာကို။ သေချာတာက ကျွန်တော်ရှင်းအောင်ပြောနိုင်တယ်။ ကျွန်တော် ဟိုတုန်းကတည်းက ဘာမှမဖြစ်ချင်ဘူး။ ဒါဆိုရင် ဘာလို့ဒီအလုပ်လုပ်တာလဲ၊ ဘာဖြစ်ချင်တာလဲဆိုတော့ တိုင်းပြည်ကိုပဲဖြစ်စေချင်တာဗျ။ အဲဒါတော့ ကွာလိမ့်မယ်။ အဲဒါကြောင့်မို့လည်း ကျွန်တော်ဒီနေ့အထိဘာမှမဖြစ်သေးတာကို ဘာမှ ၀မ်းလည်းမနည်းဘူး၊ ဘာမှမခံစားရဘူး။ ပုဂ္ဂလိက ရည်မှန်းချက်တွေမပါဘူးဗျ။ တစ်ခုပဲရှိတယ်၊ ဘာလည်းဆိုတော့ ‘ ကျွန် ’ ဘ၀က လွတ်ချင်တာဗျ။ စစ်ကျွန် ဘ၀က လွတ်ချင်တာ။ ကျွန်တော်ပြောဖူးတယ်၊ တိုင်းတပါးကျွန်၊ စစ်တပ်ကျွန်၊ ဘယ် ကျွန်ကိုမှ မခံဘူးလို့လည်းပြောဖူးတယ်။ စစ်ကျွန် ဘ၀က လွတ်ချင်တယ်ဆိုရင် မင်းတို့က တိုင်းတပါး ကျွန်ခံချင်တာလားလို့လည်း ပြောစရာရှိတာပေါ့ဗျာ။ ဘယ်ကျွန် ကိုမှ မခံချင်ဘူး။ ဆိုတော့ အဲဒါပဲ ပါလိမ့်မယ်။ တိုင်းပြည်ကိုကတော့ ဖြစ်စေချင်တာပေါ့ဗျာ။ ဓန အင်အားအရ၊ နည်းပညာအရ၊ စစ်အင်အားအရ ထိပ်ဆုံးမှ ချက်ခြင်းရောက်ဖို့မလွယ်ဘူးဆိုတာ ကျွန်တော်သိပါတယ်။ ဒါပေမဲ့ဗျာ ဂုဏ်သိက္ခာအရပေါ့လေ၊ ဒီတိုင်းပြည်ရဲ့ နိုင်ငံသားတွေ ဂုဏ်သိက္ခာမြင့်ဖို့၊ လူ့အခွင့်အရေးနဲ့ လူ့ဂုဏ်သိက္ခာပြည့်ဝဖို့ပေါ့၊ အဲဒါမျိုးကျွန်တော်လိုချင်တယ် ဒါကြောင့်လည်း ကျွန်တော်လုပ်တာပေါ့။ အဲဒီတော့ အချည်းနှီး ဖြစ်ခဲ့တယ်လို့ ကိုယ့်ဘ၀ကိုယ် အနုတ်လက္ခဏာဖြစ်ခဲ့တယ်လို့ တခါမှ ကျွန်တော်မခံစားရဘူး။
မေး။ ။ တိုင်းပြည်ရဲ့အခြေအနေကရော လမ်းစပေါ်ရောက်နေပြီလား။
ဖြေ။ ။ ကျွန်တော်ကတော့ ဟိုတုန်းကထက်စာရင်တော့ သာလာတယ်လို့ပဲပြောချင်တယ်။ တစ်ခုရှိတယ် အဲဒီအခွင့်အရေးကို တလွဲသုံးတဲ့သူတွေတောင် တော်တော်ပေါ်နေတယ်ပေါ့။ နောက်တစ်ခုကတော့ ကျွန်တော်တို့ အဖွဲ့အစည်းတွေဖွဲ့လို့စည်းလို့ရလာကြတယ်။ နောက်ပြီးတော့ အဲဒီအတွက်လှုပ်ရှားမှုတွေလုပ်လို့ရလာကြတယ်။ ကိုယ်ယုံကြည်တဲ့ အကြောင်းအရာတွေကို ပိုင်ပိုင်နိုင်နိုင်ဆွေးနွေးလို့ရတယ်။ ငြင်းကြ၊ ခုံကြလို့ရလာတယ်။ နောက်ပြီးတော့ လွှတ်တော်ထဲကိုလည်း ကျွန်တော်တို့ကိုယ်တိုင်ရွေးလိုက်တဲ့ သူတွေ ၇၅ ရာခိုင်နှုန်းလောက်ရောက်တယ်။ ဒါက ဥပဒေပြုအာဏာ။ အုပ်ချုပ်ရေးအာဏာမှာလည်း အချို့သော ၀န်ကြီးဌာနတွေ ကျွန်တော်တို့ရတယ်။ သမ္မတက ကျွန်တော်တို့ရွေးထားတာဖြစ်တယ်။ အဲဒီပုဂ္ဂိုလ်တွေမှာ လုပ်ပိုင်ခွင့်အပြည့်ရတာမရတာကို ဆက်ပြောပါ ရပါတယ်။ ကျွန်တော်ပြောချင်တာကတော့ ဘာပဲဖြစ်ဖြစ်ပေါ့ အရပ်သားသမ္မတကို ဦးစီးချုပ်ကအစ အလေးပြုရတဲ့ ခေတ်မျိုးရောက်လာတာပဲ။
ဒါပေမဲ့ အနှစ်သာရကို ငြင်းခုံလို့ရပါတယ်။ ခုနကပြောတဲ့ အရပ်သားအစိုးရ၊ အရပ်သားလွှတ်တော်က ဘယ်လောက်လုပ်နိုင်ကိုင်နိုင်ခွင့်ရလည်းဆိုတာတွေကိုလည်း မေးစရာရှိပါတယ်။ အရင်ကထက်စာရင်တော့ ရာခိုင်နှုန်းတွေများစွာရလာတယ်လို့ ကျွန်တော်က နားလည်ထားတယ်လေ။ ဆက်သွားမယ့် ကိစ္စကလည်း ဒါကို ပြည့်ဝသွားအောင်သွားရမှာပဲ။ တစ်ခုတော့ ရှိတယ် ပြောရင်းဆိုရင်းနဲ့ အရင်က မစဉ်းစားမိတဲ့အကြောင်းအရာတွေလည်း ကျွန်တော်တို့ဆီမှာပါလာတာပဲ။ အဲဒါဘာလည်း ဆိုတော့ ဒီမိုကရေစီအရေးကိုပြောလို့ရနေပြီးတော့ အမျိုးသားရေးဝါဒီ နေရှင်နယ်လစ်ဇင်လို့ခေါ်တဲ့ လူတွေလည်း သိပ်ပြီးတော့ အသံတွေထွက်လာတယ်။ အဲဒီလိုပဲ လူမျိုးစုတိုင်းရင်သားတွေဆီကလည်း အသံတွေပိုပြီးတော့ ကျယ်လာတယ်။ အဲဒီကနေပြီးတော့ ဖက်ဒရယ်ပြည်ထောင်စုတောင်းဆိုမှုတွေဖြစ်လာတယ်။ ပြောရရင်တော့ ကျွန်တော်တို့ ပိုကျယ်ပြန့်တဲ့ တာဝန်တွေ၊ ပိုကျယ်ပြန့်တဲ့ မြင်ကွင်းတွေအတွက် ရင်မောရတာတွေရှိမယ်။ ဒါပေမယ့် ဒါတွေအားလုံးက သဘာဝကျကျဖြစ်လာတာ။ အချိန်တန်တဲ့အခါကျတော့ သီးလာပွင့်လာတာတွေဖြစ်မယ်။ ကျွန်တော်ကတော့ အဲဒီလိုပဲ နှလုံးသွင်းတယ်။
မေး။ ။ လက်ရှိတိုင်းပြည်မှာ မတရားမှုတွေဖြစ်ပေါ်လာတဲ့အခါမှာ ပြည်သူတွေကို ဦးဆောင်ပြီး အရေးဆိုပေးမယ့် ‘နိုင်ငံရေးခေါင်းဆောင်မှုမဲ့သွားပြီ’ ဆိုတဲ့ သူတွေကို ဘာပြောချင်လဲ။
ဖြေ။ ။ တစ်ယောက်နဲ့ တစ်ယောက်အဓိပ္ပါယ်ဖွင့်တာတွေ မတူကြတာဗျ။ အဲဒီခေါင်းဆောင်မှု ဆိုတဲ့နေရာမှာပေါ့ ခင်ဗျားနားလည်ထားတဲ့ အဓိပ္ပါယ်တွေနဲ့ ကျွန်တော်လက်ခံထားတာတွေနဲ့ တူတာရှိတယ်၊ မတူတာတွေရှိတယ်။ ခေါင်းဆိုမှုဆိုတဲ့နေရာမှာ ကျွန်တော်က ခေါင်းဆောင်နဲ့ မတူဘူးလေ။ ခေါင်းဆောင် Leader နဲ့ ခေါင်းဆောင်မှု Leadership ဆိုတာကွာချင်တိုင်းကွာတာကိုး။ ကျွန်တော်ကတော့ စုပေါင်းခေါင်းဆောင်မှုကို ပိုလိုချင်တဲ့သူ။ သတိထားကြည့်ပါ။ ရှစ်လေးလုံး ဆင်နွှဲခဲ့တဲ့ သူတွေကစုပေါင်းခေါင်းဆောင်မှုနဲ့ သွားခဲ့တာဗျ။ အဲဒီအထဲကမှ ကိုယ်စီကိုယ်စီ အပြောအဆိုပေါ်မှာမူတည်ပြီးောတ့၊ မိန့်ခွန်းပေါ်မှာမူတည်ပြီးတော့ လုပ်ရပ်တစ်ခုခြင်းဆီပေါ်မှာမူတည်ပြီးတော့ ကိုယ့်ဟာကို သတ်မှတ်ပေးထားတဲ့ အနေအထားတွေရှိလိမ့်မယ်ပေါ့ဗျာ။ ကျွန်တော်ဖြစ်စေချင်တာ၊ နားလည်တာ၊ ယုံကြည်တာက စုပေါင်းတာဝန်ခံပြီး စုပေါင်းခေါင်းဆောင်တဲ့စနစ်ကိုသွားချင်တာဗျ။
မေး။ ။ ထစ်ခနဲတစ်ခုခုဖြစ်ပြီဆိုတာနဲ့ မင်းကိုနိုင်တို့ဘာမှမလုပ်ကြဘူးလား။ မင်းကိုနိုင်ဘယ်ရောက်နေလဲလို့ မေးခွန်းထုတ်တဲ့သူတွေကို ဘယ်လိုပြောချင်လဲ။
ဖြေ။ ။ ဒီလောကကြီးတည်နေသ၍ မတရားမှုတွေက ပုံသဏ္ဍန်မျိုးစုံနဲ့ရှိနေမှာပဲလေ။ လူ့ရဲ့စိတ်ဆိုးစိတ်ညစ်တွေကို ဦးစားပေးလိုက်တဲ့အခါမှာ ရှိလာတာပဲ။ အဲဒါကို ပုံသဏ္ဍန်မျိုးစုံနဲ့ဖြေရှင်းကြရတာပဲ။ အဲဒီတော့ လူတွေက ဘာကိုလိုချင်တာလဲ။ တိမ်ကြားထဲကနေပြီးတော့ မြင်းပျံကြီးစီးလာတဲ့ လူစွမ်းကောင်းလိုမျိုးတော့ အဲဒါက ဘယ်ခေတ်မှာမှရမှာမဟုတ်ဘူး။ ကိုယ်ကိုယ်တိုင်ရုန်းကန်ကြရမယ်၊ ကိုယ့်ပြဿနာကိုယ်ရှင်းကြရမယ်။ အဲဒီတော့ ကာလတစ်ခုအတွင်းမှာတော့ အဲဒီစနစ်အကူးအပြောင်းကို တာဝန်ခံခဲ့တဲ့သူတွေဟာ သူတို့ကိုယ်တိုင်လုပ်ပြလိမ့်မယ်။ လုပ်ပြပြီးသွားတဲ့အခါမှာ အဲဒါကို အတုယူပြီးတော့ နောက်က မတရားသဖြင့်ရင်ဆိုင်ရတဲ့သူတွေက သူတို့ကိုယ်တိုင်လုပ်ယူကြရပါတယ်။ အဲဒီတော့ ပထမဆုံးက နမူနာလုပ်ပြတဲ့ခေတ်ရှိမယ်။ အလယ်မှာက တွဲပြီးတော့ သင်ကြရတဲ့ခေတ်ရှိမယ်။
အဲဒီတော့ သင်တယ်ဆိုတဲ့စကားလုံးကို သုံးရမှာ ကျွန်တော်က အင်မတန်ဝန်လေးတယ်။ သင်တယ်ဆိုတာ သင်ပေးတဲ့ သူက သိလို့တတ်လို့ဆိုတဲ့ အဓိပ္ပါယ်တောင်ရောက်သေးတယ်။ အတန်အသင့်လေ့လာထားတဲ့အတိုင်း ဌာနဆိုင်ရာတွေနဲ့ ဆက်ဆံရတဲ့ကိစ္စတွေရှိတယ်။ မတရားမှုပေါ့ဗျာ။ ခင်ဗျားမတရားမှုမှန်းသိတယ်။ ခံလည်း မခံချင်ဘူး။ အသားတဆတ်ဆတ်တုန်နေတယ်။ ပြန်ပြောတဲ့အခါကြရင် ခင်ဗျားအမှားကြီးပဲဖြစ်သွားတယ်။ ဘာဖြစ်လို့လဲ။ ဖြစ်မှာပေါ့ဗျ၊ တဖက်က ဥပဒေအရေ ကျိုသောက်ထားတဲ့သူတွေ။ သူတို့တစ်သက်လုံး ဒါနဲ့လုပ်စားလာတဲ့သူတွေ၊ ဌာနဆိုင်ရာတွေက သူတို့မှာအမြဲတမ်းနိုင်ကွက်ရှိတယ်။ ၀တ္တရားနှောက်ယှက်မှုဆိုတဲ့ ထောင်ချောက်ထဲကိုဝင်သွားရင် ကျွန်တော်တို့ပြည်သူတွေကားခနဲကျတာပဲ။
အဲဒီတော့ အဲဒီဟာတွေအတွက် ဘယ်လိုရင်ဆိုင်ရတယ်။ တရားရုံးမှာ မျက်နှာဘယ်လိုမူရမယ်။ ရဲနဲ့တွေ့ရင် စည်းမကျော်ဘဲ ဘယ်လိုပြောနိုင်ရမယ်ဆိုတာမျိုးပေါ့။ အဲဒါတွေကို နှစ်တော်တော်ကြာကြာ ၀ိုင်းပြီးတော့ ကျွန်တော်တို့လေ့ကျင့်ပေးခဲ့ပြီးပြီ။ နောက်ဆုံးကြတော့ တချို့သောပုဂ္ဂိုလ်တွေက အဲဒီအတိုင်းဆက်ပြီးတော့ ခုခံပြီးတော့ လိုအပ်ရင်တိုက်ပွဲဝင်သွားကြရင်းနဲ့ အကြောင်းအရာတစ်ခုမှာ တာဝန်ခံနိုင်တဲ့သူတွေဖြစ်ကုန်ကြတယ်။ အဲဒီလိုလူတွေက တစ်ချိန်က ရင်ဆိုင်ခဲ့တဲ့သူတွေကို ဆဲဆိုကြိမ်းမောင်းမနေဘူးဗျ။ သူတာဝန်ယူတတ်သွားပြီပေါ့နော်။ သူကတစ်ခါထပ်ပြီးတော့ နောက်ထပ်ကိုယ်ပွားတွေမွေးထုတ်သွားနိုင်ပြီ။ လိုချင်တာက အဲဒါမျိုးကိုလိုချင်တာ။ အဲဒီလိုမျိုးမဖြစ်နိုင်ဘဲနဲ့ အကြောင်းအရာတိုင်း ကိစ္စပေါ်တိုင်း မိုးပေါ်ကနေပြီးတော့ ကြွလာရမယ်ဆိုတဲ့ မျှော်မှန်းမှုမျိုးကြတော့ လူသားတစ်ယောက်အနေနဲ့ ဘယ်လိုမှလည်း ဖြည့်ဆည်းပေးနိုင်မှာမဟုတ်ဘူး။ စနစ်အပြောင်းအလဲကို ကျွန်တော်က သွားတာကို။ ကိစ္စရှိလို့ ဟီးရိုးဝင်လုပ်ချင်တာတော့မရှိဘူး။
မေး။ ။ ၈၈ မျိုးဆက်အင်အားစုဆိုတဲ့ အခြေအနေ၊ ခေါင်းဆောင်မှု ဘယ်ရောက်သွားပြီလဲဆိုတာကို ပြောပေးပါ။
ဖြေ။ ။ ဘယ်အဖွဲ့အစည်းမဆို၊ ဘယ်ပုဂ္ဂိုလ်မဆို မမြဲတဲ့တရားအောက်မှာပဲရှိတယ်။ တချိန်တုန်းက အင်မတန်းကြွေးကြော်ခဲ့တဲ့ ဖဆပလ လိုအဖွဲ့အစည်းကြီးတောင်မှ ဘယ်လောက်ကြာခဲ့လို့လဲဗျာ။ တို့ဗမာအစည်းအရုံး ဒီကနေ့ရောရှိသေးလို့လား။ ဘာကမြဲသလဲ။ အဲဒီလိုပြောလို့ ကျွန်တော်တရားတွေသိပ်ရနေပြီလို့ပြောချင်တာမဟုတ်ဘူး။ အဲဒီအဖွဲ့အစည်းဘယ်ရောက်သွားလဲဆိုတာ ပြဿနာမရှိဘူး။ တိုင်းပြည်ဘာဖြစ်လာသလဲဆိုတာပဲ ကျွန်တော်က အာရုံစိုက်တယ်။ တိုင်းပြည် အရင်ကထက်မြင့်လာသသလား။ လူတွေရဲ့ ဂုဏ်သိက္ခာအရ ကမ္ဘာကြီးက တန်ဖိုးထားတဲ့ တိုင်းပြည်ပိုပြီးဖြစ်လာသလား၊ မဖြစ်လာဘူးလား။ အဲဒီနိ်ုင်ငံသားတွေရဲ့ ကိုယ်ကျင့်တရားတွေ၊ ကိုယ့်ကိုယ်ကို ယုံကြည်မှုတွေ၊ ကမ္ဘာကြီးနဲ့ဘယ်လောက်ဝင်ဆန့်လာသလဲ။ ပြောချင်တာကတော့ အဲဒီနိုင်ငံရဲ့ ပုံရိပ်ဟာ ကမ္ဘာကြီးမှာတက်လာသလား၊ ကြလာသလား ဒါပဲစိတ်ဝင်စားတယ်။
ကျွန်တော်တို့အဖွဲ့အစည်းတွေအပါအ၀င် ကျန်တဲ့ဘယ်အဖွဲ့အစည်းတွေ ခေါင်းစဉ်တွေ ပျောက်သွားတာတို့၊မှိန်သွားတာတို့၊ ဆေးအသစ်ပြန်သုတ်တာတို့ အဲဒါကို ကျွန်တော်က လုံးဝစိတ်မ၀င်စားဘူးဗျ။ ဒါကြောင့်လည်း ကျွန်တော်တို့က တိုင်းပြည်ကိုပဲဖြစ်စေချင်တာ၊ နိုင်ငံသားတွေနဲ့ ဟောဒီကမ္ဘာကြီးကိုပဲ ဖြစ်စေချင်တာ။ ကိုယ်ဆိုတဲ့ ဒီရုပ်ခန္ဓာနဲ့ ဆိုင်းဘုတ်တွေဆိုတာဟာ ပြောင်းနေကြမှာ။ ရေကူးပြီးရင် ဖောင်ကိုထားခဲ့ရတာပဲ။ ကုန်းပေါ်မှာအဲဒါကြီးထမ်းပြီး ဘယ်သူမှဆက်မသွားဘူး။ အဲဒီလိုပဲပေါ့ အဖွဲ့အစည်းဆိုတဲ့ ဆိုင်းဘုတ်တွေနာမည်တွေဆိုတာက မမြဲဘူး။ တိုင်းပြည်အခြေအနေကိုပဲကြည့်၊ လူတွေက နိုင်တာကိုပဲ နိုင်သလိုထမ်းခဲ့ကြတယ်။
မေး။ ။ ၈၈၈၈ အရေးတော်ပုံကြီးနောက်ပိုင်းမှာ တိုင်းပြည်ကိုတံခါးဖွင့်လိုက်တော့ စစ်အာဏာရှင်ဒဏ်ကော၊ ယခင်တံခါးပိတ်ခေတ်က ပေါပေါများများရခဲ့တဲ့ အစားအသောက်တွေ၊ ရေတွေ၊ မြေတွေ သယံဇာတာတွေကို လက်ဝါးကြီးအုပ်ခံရတဲ့ဒဏ်ကော လူတွေပိုခံလာရတယ်ဆိုပြီး ပြန်သုံးသပ်တာတွေရှိတယ်။ လူ့အဖွဲ.အစည်းတန်ဖိုးတွေ အဲ့ဒီဖက်ခေတ်က ပိုသာတယ်ဆိုပြီးတော့ပေ့ါ။ ဆိုတော့ ရှစ်လေးလုံးအရေးတော်ပုံကြီးဟာ မှားတယ်ဆိုပြီး ဒွိဟဖြစ်တဲ့သူတွေလည်းရှိတယ်။ ဒါကိုဘယ်လိုမြင်လဲ။
ဖြေ။ ။ ကျွန်တော်တို့လုပ်ခဲ့တဲ့အပေါ်မှာ မှားတယ်လို့ပဲပြောပလေ့စေ ဘာမှမဖြစ်ဘူး။ ဒါကို စိတ်ဆိုးမှာမဟုတ်ဘူး။ တကယ်ရိုးရိုးသားသားယုံကြည်တဲ့သူတွေလည်း ရှိတာကိုဗျ။ ဒါပေမယ့် နံပါတ်တစ်ပြန်မေးချင်တာက အဲဒီတုန်းက မြန်မာပြည်ဟာ ဆိုရှယ်လစ်အစစ်ဟုတ်ရဲ့လားဆိုတာကို ပြန်မေးချင်တယ်။ အရှေ့ဥရောပမှာရှိတဲ့ ဆိုရှယ်လစ်နိုင်ငံတွေဟာ သူ့နည်းသူ့ဟန်နဲ့တော့ ခေတ်တစ်ခုကိုလှမ်းနိုင်ကြတယ်ဗျ။ ကျွန်တော်တို့နိုင်ငံမှာပဲ ဆိတ်ခေါင်းချိတ်ပြီး ခွေးသားရောင်းတယ်ဆိုတဲ့အတုမျိုးကိုပဲ ကျွန်တော်တို့ဆန့်ကျင်ခဲ့တာဖြစ်တယ်။ ကျွန်တော်တို့မှားတယ်၊ မှန်တယ်ဆိုတာကို ပညာရှင်တွေသုံးသပ်ပါ။ ကျွန်တော်ကျေကျေနပ်နပ်ကြီးကိုလက်ခံပါတယ်။
အခွင့်ထူးခံမှုနဲ့ ဖိနှိပ်ချုပ်ခြယ်မှု နှစ်မျိုးကိုတွန်းလှန်တယ်လို့ ကျွန်တော်ကပြောခဲ့တယ်ပေါ့နော်။ အဲဒီခေတ်မှာ အခွင့်ထူးခံမှုမရှိဘူးလားဆိုတော့ ရှိတာပေါ့။ သာမန်ကျွန်တော်တို့ပြည်သူတွေ နံရိုးကျပ်အောင် ငစိန်ဆန်တစ်ပြည်ရအောင်တိုးနေရတဲ့အချိန်မှာ မေတ္တာမွန်တို့၊ ပဒုမ္မာတို့ကနေ လူသုံးကုန်တွေ အလကားနီးပါးနဲ့ကို အလျှံအပါယ်ရနေတဲ့သူတွေရှိတယ်။ အဲဒီခေတ်က ဓါတ်ဗူးတစ်လုံးရတယ်ဆိုတာ ထီပေါက်တာထက်ပျော်တယ်လေ။ ဖလံထည်အနွေးထည်တစ်ထည်လောက် ပိတ်စတစ်စလောက်ရတယ်ဆိုရင် သူတို့က တစ်ရက်လုံးမှာ ကံအကောင်းဆုံးလေ။ အဲဒီအချိန်မှာ မေတ္တာမွန်၊ ပဒုမ္မမာတို့မှာ နိုင်ငံခြားဖြစ်ပစ္စည်းတွေ၊ မှောင်ခိုက ဖမ်းထားတယ်ဆိုတဲ့ ဟာတွေကို သူတို့အလကားနီးပါးရတယ်။ ဒါအခွင့်ထူးခံမဟုတ်လို့ဘာလဲ။ ဒါ နမူနာပဲ ပြောသေးတာ ဒီထက်ပိုတဲ့ အခွင့်ထူးခံမှုတွေရှိသေးတယ်။
နောက်တခါ ဖိနှိပ်ချုပ်ခြယ်မှု၊ အဲဒီခေတ်က အကြောက်တရားကြီးပုံများတော့ နိုင်ငံရေးလို့ပြောဖို့ကိုတောင် ၀န်လေးတယ်။ ဆိုတော့ ကျွန်တော်တို့ပြောင်းလဲလာတာက အခွင့်ထူးခံမှုနဲ့ ဖိနှိပ်ချုပ်ခြယ်မှုနှစ်ခုကို တွန်းလှန်ကြရတာကို။ အဲဒီတော့ ဆိုရှယ်လစ်ကို ကျွန်တော်တို့က တိုက်တာလည်းမဟုတ်ဘူးဗျ။ ဆိုရှယ်လစ်အစစ်လုပ်ခဲ့ရင် ဘယ်ပုံဘယ်နည်းဖြစ်မယ်ဆိုတာကတော့ ပြောရခက်သွားလိမ့်မယ်။ အဓိကကတော့ အခွင့်ထူးခံမှုနဲ့ ဖိနှိပ်ချုပ်ခြယ်မှုတို့ကို တွန်းလှန်တာဖြစ်လို့ ဆိုင်းဘုတ်တွေဘာတွေကိုတော့ ငြင်းခုံစရာမရှိတော့ဘူးပေါ့။ အဲဒီကနေပြီးတော့ ဖြစ်လာတဲ့ခေတ်ကြီးမှာ လူတွေ မလုံခြုံမှုတွေဖြစ်လာတာရှိတယ်။ တစ်ယောက်နဲ့ တစ်ယောက်စိတ်ဝမ်းကွဲလာတာရှိတယ်။ အရပ်ထဲမှာ ဘယ်သူဘယ်ဝါမှန်းမသိရဘဲနဲ့ အပြန်အလှန်စောင့်ရှောက်မှုတွေကင်းမဲ့သွားတာရှိတယ်။ လွမ်းမောစရာကောင်းတဲ့ လူနေမှုစနစ်တွေပျက်စီးသွားတာပေါ့။
အဲဒါကတော့ ကျွန်တော်တို့လုပ်ခဲ့တာမှားလို့တော့မဟုတ်ဘူးခဗျ။ ဘာဖြစ်လို့လည်းဆိုတော့ အင်္ဂလိပ်ခေတ်က သူ့ထက်ပိုပြီးတည်ငြိမ်ခဲ့တယ်။ ပိုပြီးတော့ ဘုရားသွားကျောင်းတက်တွေရှိခဲ့တယ်။ ဆွမ်းအုပ်နီနီအမေရွက်ပြီးတော့ သွားကြတာပဲ။ ဂျပန်ခေတ်က မုဒုံမြို့မှာ ဖမ်းမိတဲ့ ဓားပြတွေကို အားလုံးရှေ့မှာ ဖမ်းပြီးတော့ ကွက်မျက်ပြလိုက်တာ ညဘက်ဆိုရင် တံခါးဖွင့်ပြီးအိပ်လို့ရတဲ့ ခေတ်ကြီးတစ်ခေတ်လုံးဖြစ်သွားတယ်။ ဒါပေမယ့် ကျွန်တော်တို့ ဂျပန်ခေတ်ကို လက်ခံနေတာလားဆိုတော့ မဟုတ်ဘူး။ အင်္ဂလိပ်ခေတ်ကလည်း ကျွန်တော်တို့ နယ်ချဲ့စနစ်ကို တွန်းလှန်ခဲ့ကြတာပဲ။ နယ်ချဲ့ကို တွန်းလှန်လိုက်လို့ ဖက်စစ်ကို တော်လှန်လိုက်လို့ ပြည်တွင်းသူပုန်ကြီးရှိပါတယ်ကွာ မင်းတို့မှားပါပြီဆိုရင် ဒီတိုင်းပြည်ကြီးက ချာလပတ်လည်နေမှာပဲဗျ။
အဲဒီတော့ လူမှုဘ၀တွေက ခေတ်အဆက်လိုက်တန်ဖိုးတွေပြောင်းသွားတာတော့ အမှန်ပဲ။ ဒါက မဆလ ဆိုတဲ့ တစ်ပါတီအာဏာရှင်စနစ်ကိုတော်လှန်ခဲ့လို့ ဖြစ်တဲ့အကျိုးဆက်တော့မဟုတ်ဘူးဗျ။ ဖူးပွင့်ဝေဆာနေတဲ့ မတူကွဲပြားမှုတွေရဲ့ အရသာကို ကြာလာတဲ့ အခါမှာတော့ ကျွန်တော်တို့ကျင့်သားရလာမယ်လို့ယုံကြည်တယ်။ မတူညီတဲ့ ယဉ်ကျေးမှုတွေ မတူညီတဲ့ အယူအဆတွေနဲ့ ကိုယ့်အယူအဆနဲ့ ကိုယ်ဝတ်ဆင်၊ စားသောက်ပြီးတော့နေကြရတာပဲ။ အဲဒီတော့ သေတော့ သေချာတယ် ဟိုတုန်းကလို အားလုံးဆင်တူအနေနဲ့တော့ ဖြစ်မှာမဟုတ်ဘူး။ နောက်ပြီးတော့ အပြန်အလှန်စောင့်ရှောက်နိုင်တဲ့ ခေတ်ကြီးပျောက်သွားတယ်ဆိုတာ ကျွန်တော်လည်းစိတ်မကောင်းဘူး။
ဒါပေမဲ့ အဲဒါသည် ရှစ်လေးလုံးအရေးတော်ပုံကြောင့်တော့မဟုတ်ဘူးဗျ။ ကမ္ဘာကြီးတစ်ခုလုံးကိုက ပြောင်းလာတဲ့ နည်းပညာတွေအရ ရုပ်ဝတ္တုပိုင်းတွေတိုးတက်လာတဲ့နောက်မှာ မိသားစုအချင်းချင်း ချစ်ချစ်ခင်ခင်နေကြတာတွေမရှိတော့ဘူး။ ဧည့်ခန်းထဲမှာတစ်ယောက်တစ်ထောင့်စီထိုင်ပြီးတော့ ဖေ့စ်ဘွတ်ထဲမှာ တစ်ယောက်တစ်ကမ္ဘာစီဖြစ်နေကြတာ။ တစ်ယောက်နဲ့ တစ်ယောက်နေကောင်းလား၊ ထမင်းစားကောင်းလားလည်း မပြောနိုင်ကြတော့ဘူး။ ဒါက နည်းပညာနဲ့ ခေတ်ရဲ့တိုးတက်မှုကနေပြီးတော့ လူ့ဘ၀ကြီးကိုအတင်းအကျပ်ပြောင်းလည်းတာဗျ။ အဲဒါကို ကျွန်တော်တို့က ခုခံတဲ့နေရာမှာ ဆိုရှယ်လစ်နဲ့မှလည်းမဟုတ်ဘူး ကွန်မြူနစ်နဲ့မှလည်းမဟုတ်ဘူး။ လူတွေရဲ့ စိတ်နေသဘာဝနဲ့ပဲ ဒါတွေကို ခုခံသင့်ခုခံရမယ်။ အလိုက်သင့်နေသင့်ရင်နေရမယ်။ တက်စီးသင့်ရင်စီးရမယ်။ ကျွန်တော်အဲဒီလိုနားလည်တယ်။
မေး။ ။ နောက်လာမယ့်နှစ်တွေမှာ ကိုယ့်ကိုကိုယ်ဘယ်လိုမြင်ချင်လဲ၊ တိုင်းပြည်ကို ဘယ်လိုမြင်ချင်လဲ။
ဖြေ။ ။ အဆိပ်အတောက်ကင်းတဲ့သူတော့ဖြစ်ချင်တာပေါ့ဗျာ။ ဒီထက်ပိုပြီး လင်းနိုင်တဲ့သူဖြစ်ရင်လည်း ကောင်းတာပေါ့။ ကိုယ့်နိုင်ငံအတွက်တင်စဉ်းစားတာမဟုတ်တော့ဘူးဗျ။ ကျွန်တော် ကမ္ဘာကြီးနဲ့လည်း ဆက်စပ်ပြီးစဉ်းစားတယ်။ အဲဒီတုန်းကတော့ ကမ္ဘာလို့လည်း မသုံးဘူး၊ နိုင်ငံလို့လည်း မသုံးဘူး လောကလို့ကျွန်တော်တို့သုံးခဲ့တာ။ ဘာလို့လည်း ဆိုတော့ အနုပညာသမားဟာ မြင့်မြင့်တက်ပြီးကြည့်ရင် သူမိုးကုတ်စက်ဝိုင်းကျော်အောင်ကြည့်တော့တယ်လေ။ အဲဒါက နယ်နမိတ်အပိုင်းအခြားတွေကို သူတတ်နိုင်သမျှကျော်တာပေါ့။ ကျွန်တော်ကတော့ လောကသဘောကိုပဲစဉ်းစားတယ်။ ကိုယ်လုပ်နိုင်တာတချို့က ဧရိယာနယ်နမိတ်အကန့်အသတ်ရှိတယ် ၊ တချို့ဟာတွေကမရှိဘူး။ ပန်းချီကားတစ်ချပ်က လူမျိုးမရွေး၊ ဘာသာမရွေးခံစားလို့ရတယ်။ အဲဒီတော့ နိုင်ငံ့ခေါင်းဆောင်တစ်ယောက်က သူ့နိုင်ငံသူ့တိုင်းပြည်ကောင်းအောင်လုပ်လိမ့်မယ်။ ဒါလည်းကျွန်တော်တို့လေးစားရမှာပဲ။ ဒီထက်ပိုပြီးအားကောင်းလာရင် ကမ္ဘာကြီးကလေးစားရတဲ့ခေါင်းဆောင်သူဖြစ်လာရမှာပဲဗျ။ သူတွေးတာကြံတာတွေကလည်း ကမ္ဘာကြီးကိုသက်ရောက်တာ။ ကမ္ဘာနားမှာဂြိုလ်ရှိလို့ သူတို့ဒီဘာသာစကားကို နားလည်ရင် သူတိုိ့ကိုလည်း သက်ရောက်ဦးမှာပဲ။ လူဟာ လုပ်နိုင်တဲ့စွမ်းရည် အားကောင်းလာတာနဲ့အမျှ သူ့ရဲ့သက်ရောက်မှုနယ်နမိတ်ကလည်းကျယ်ပြန့်လာတာပဲ။ အဲဒါကြောင့်မို့ဘောင်တွေကို ကျော်ပြီးတော့ တွေးချင်တာ။ ။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
