မောင်အောင်မွန်- ခေတ်စုံ လူစုံနှင့် တွဲတတ်သော မင်းကျော်မင်း- ကျွန်တော်တွေးမိသလို ရေးပါမည် (၂၉၇)

ကျွန်တော်တွေးမိသလို ရေးပါမည် (၂၉၇)
မောင်အောင်မွန်
ခေတ်စုံ လူစုံနှင့် တွဲတတ်သော မင်းကျော်မင်း

(မိုးမခ) ဒီဇင်ဘာ ၂၊ ၂၀၁၇

(၁)

စာရေးဆရာ မင်းရှင် မိတ်ဆက်ပေး၍ ခင်မင်သော ဗိုလ်မှူးဘသော် (မောင်သော်က) အယ်ဒီတာချုပ် လုပ်သော ရှေ့သို့ထုတ်ရာ ရုံးသို့ရောက်သွား၏။ Forward အယ်ဒီစားပွဲ၌ ထိုင်နေသော ဦးကျော်မင်းနှင့် ဆရာမောင်သော်က မိတ်ဆက်ပေး၍ သူနှင့်စတွေ့စ သိ၏။

၁၉၅၉ ခု၊ အောက်တိုဘာလ ကျွန်တော် မြန်မာ့အသံတွင် စက်မှုလက်ထောက် အလုပ်ရချိန်တွင် သူလည်း အင်္ဂလိပ်ပိုင်းအစီအစဉ်၌ ရှိနေသေးဟုထင်၏။ သူတို့က ၀င်ဒါမီယာကရက်ဆင့်မှာ–ကျွန်တော် တာဝန်ကျ သည်ကား ရေကူးအသံလွှင့် စက်ရုံမှာမို့ ရေဒီယိုကကြားဖူးနေသူ ဦးကျော်မင်းနှင့် မဆုံလိုက်ရပါ။
၁၉၆၀ ခု၊ ပြည်လမ်း မြန်မာ့အသံ ဖွင့်ချိန်တွင် ဦးကျော်မင်း အလုပ်ထွက်ကာ VOA (Burmese) , Washington DC သွားရောက် အသံလွှင့်နေပြီ။

(၂)

အင်္ဂလိပ်စာတော်၊ အင်္ဂလိပ်လိုအပြောကောင်းသော ဦးကျော်မင်းသည် အင်္ဂလိပ် စကားပြော အမေရိကန်၌ နေထိုင်စဉ်ကာနှစ်များအတွင်း Media မည်မျှကြွယ်လာမည်ကို အလွယ်တကူခန့်မှန်းနိုင်ပါ၏။ ဦးခင်ဇော်(ဆရာK) တည်ထောင်သော ဗမာ့အသံ အင်္ဂလိပ်ပိုင်းအစီအစဉ်တွင် ဦးကြီးတင်၊ ဦးလှဘူးတို့နှင့် နှစ်အတန်ကြာတွဲလုပ်ခဲ့သူမို့ သူ့စကားအတိုင်း ဆိုရသော် အင်္ဂလိပ်စာညံ့ချင်ရင်တောင် အင်မတန်ပင်ပန်းကြီးစွာကြိုးစားရပေလိမ့်မည်။

ဝါရှင်တန်ရှိ မြန်မာစစ်သံမှူးရုံးမှ ဗိုလ်မှူးကြီးaအာင်ဌေး(aနာက်ပိုင်း စစ်ထောက် လှမ်းရေး/ ပြန်ကြားရေး<န်ကြီး)၏အားထားရာjဖစ်လိုက်၏။

(၃)

မြန်မာပြည်သို့ ပြန်ရောက်လာပြီးနောက် ပြန်ကြားရေးဌာနက အင်္ဂလိပ်ဘာသာနှင့် ထုတ်ဝေသော Forward ဂျာနယ်၌ အယ်ဒီတာလုပ်၏။ ထို့နောက် Guardian သတင်းစာအယ်ဒီတာချုပ်အဖြစ်ပြောင်းသွားဟု သိလိုက် ရသည်။ ထိုအခါ မင်းကျော်မင်းနာမည်နှင့် ရေးသားသောသူ့လက်ရာများ ကျွန်တော်တို့ ဖတ်ကြရ၏။

မင်းကျော်မင်းမှာလည်း မောင်သော်ကကဲ့သို့ပင် ဟာသ(Humour) ရှိသည်။
မောင်သော်က မြန်မာလိုရေးသောသရော်စာများလိုပင် မင်းကျော်မင်း၏ ကိုယ်တွေ့ဆောင်းပါးတိုများ ဖတ် ကောင်းလှပါ၏။ အင်္ဂလိပ်လိုရေးသားရာ၌ လွယ်ကူရှင်းလင်း၍ ကျောင်းသားများကြိုက်နှစ်သက်ကြ၏။
ထို့နောက် တရားဝင်နာမည်ဦးကျော်မင်း ပျောက်သလောက်ဖြစ်ကာ မင်းကျော်မင်းဟုသာတွင်သည်။

(၄)

မင်းကျော်မင်းနှင့်စတင်ရင်းနှီးသည်က ၁၉၈၁ ခု၊ နှစ်မှာပါ။
သူက မြန်မာ့ သတင်းစဉ် (ပြည်ပ) အယ်ဒီတာချုပ်ဖြစ်နေပြီ။ နိုင်ငံခြားတွင်အလုပ်သွားလုပ်လိုလျှင် ထွက်ရမည်ဟုသတ်မှတ်၍ ကျွန်တော်မြန်မာ့အသံက ထွက်လိုက်သည်။ VOA (Burmese) , Washington DC အတွက် စာမေးပွဲအောင်၏။ အရွေးခံရ၏။ သို့သော် မသွားရ၊ အညစ်ခံ ထားရ၏။

KUNA (Kuwait News Agency) ၏ မြန်မာပြည်ဆိုင်ရာ နိုင်ငံခြားသတင်း ထောက်အလုပ်ရ၏။
သို့သော် အသိအမှတ်ပြုလွှာမရ၊ အညစ်ခံနေ ရပြန်ပြီ။

ပြန်ကြားရေးဌာန ဒု ၀န်ကြီးက အစွမ်းထက်သော ထောက်လှမ်းရေးဗိုလ်မှူးကြီး အောင်ဌေးပါ။ ကျွန်တော့်အဖြစ်စုံကိုသိခွင့်ရလိုက်သော မင်းကျော်မင်း စတင်ခင်မင်လာ၏။ စာရေးဆရာချင်းမို့ စာနာခြင်းဖြစ်ပေလိမ့် မည်။

VOA (Burmese) , Washington DC သို့ ကျွန်တော်ဆက်သွယ်သောစာများကို သူပြင်ပေးသည်။ သူကိုယ်တိုင်လုပ်ခဲ့သောဌာနမို့ အထိရောက်ဆုံးဖြစ်အောင် နိုင်နင်းလွယ်ကူစွာရေးပေး၏။ မင်းကျော်မင်းသည် ခေါင်းထဲက တွေးလို့မဆုံးသေး လက်အင်္ဂလိပ်လိုလက်နှိပ်စက်နှင့်ရိုက်ပြီးနေပြီဟုဆိုရလောက်အောင်ပင် မြန်ဆန်သွက်လက်လှပါဘိ။

နောက်တော့ ကျွန်တော့်အပေါ် ညစ်ထားသောအချက်များဟုတ်မဟုတ် ထောက်လှမ်း ရေးကစုံစမ်းပြီး ကင်းရှင်းကြောင်း အစီရင်ခံစာတက်လာတော့မှ ကျွန်တော်လည်း KUNA (Kuwait News Agency) ၏ နိုင်ငံခြားသတင်း ထောက် ဖြစ်လာတော့သည်။

အယ်ဒီတာချုပ်ဦးကျော်မင်းလို ကျွန်တော်လည်း ခေါင်းပေါင်းနှင့် ပြည်သူ့လွှတ်တော် ထဲ သတင်းသွားယူရသည်။ သူလည်းဝမ်းသာနေ၏။ ပိုပြီးတော့လည်း ရင်းနှီးလာကြရာ ကျွန်တော်က ညစာဖိတ်ကျွေးသည်ကို သူလက်ခံ ကာ မိသားစုနှင့်အတူ ဘိုကလေးကျောင်းလမ်းရှိ ကျွန်တော်ငှားနေသောအိမ်သို့ရောက်လာ၏။

အေးအေးဆေးဆေးစားကြ စကားပြောကြနှင့် မိသားစုချင်းလည်း ရင်းနှီးသွားကြ ၏။
သိပ်မကြာမီမှာပင် စိတ်မကောင်းစရာဖြစ်လာရပြီ။ ကျုံတနိတွင် ရေနံပြင်ကြီးတွေ့၍ တနေ့ ပီပါ သန်းပေါင်းဘယ်လောက်ထွက် မည် စသဖြင့် သတင်းစာရှင်းလင်းပွဲကို မဆလပါတီဥက္ကဋ္ဌကြီး ဦးနေဝင်း ဦးဆောင်ကာပြုလုပ်၏။ အသေးစိတ် ဗိုလ်မှူးကြီးမောင်ချိုက ကိန်းဂဏန်းများနှင့်တင်ပြ၏။ ဒေါက်ညီညီကလည်း မြန်မာပြည် နေ့ချင်းည ချင်း ချမ်းသာတော့မည်ဟုဆို၏။
ကျွန်တော်တို့ နိုင်ငံခြားသတင်းထောက်များလည်း သတင်းပို့ကြသည်။
ကူဝိတ်က ရေနံထွက်သော နိုင်ငံခြားသို့တင်ပို့ရောင်းချသော နိုင်ငံမို့ အထူးစိတ်ဝင်စားသွား၏။ မေးခွန်းတွေ တသီကြီးမေးလာစဉ် ရေနံပြင်ကြီးမဟုတ် အက်ကြောင်းက မဆိုစလောက်လေးသာထွက်ဟု ဖြစ်သွား သည်။ ကျွန်တော်ဖြေရှင်လို့မရနှင့် အလုပ်ပြုတ်သွားတော့၏။
သက်သက်မဲ့ သားကောင်းဖြစ်သွားရသော ကျွန်တော့်အတွက် မင်းကျော်မင်းက စိတ်မကောင်းဖြစ်ရသည်မှာ ကွယ်လွန်ချိန် ထိဖြစ်ပေလိမ့်မည်။

(၅)

မြန်မာ့သတင်းစဉ်(ပြည်ပ) အယ်ဒီတာချုပ်ဦးကျော်မင်းသည် နိုင်ငံပိုင်သတင်းစာ အယ်ဒီတာချုပ်များနှင့် နေ့စဉ်စည်းဝေးထိုင်ကာ ထည့်သွင်းဖော်ပြရမည့် နိုင်ငံခြားသတင်းများရွေးပေး၏။ TV မှဂြိုတုသတင်းများကို မြန်မာ့အသံသို့ သွားရောက်စည်းဝေးကာ ရွေးပေးရ၏။ အပြန်တွင် ကျွန်တော်တို့အိမ်သို့ဝင်လာပြီး မြို့ထဲသူ့ကားနှင့် ခေါ်သွားသည်။
သူအလုပ်အားချိန်ဆို ကျွန်တော်သွားလိုရာမဂ္ဂဇင်းတိုက်များသို့ ကားနှင့်လိုက်ပို့ပေး၏။ နှုတ်သွက်သူမင်းကျော်မင်း သည်လိုနှင့်ကလျာမဂ္ဂဇင်းတွင် မြန်မာလိုရေးသော ပင်တိုင်ဆောင်းပါးရှင် ဖြစ်လာ၏။ ဂီတပဒေသာမဂ္ဂဇင်း တာဝန်ယူထုတ်နေသော ဦးဘိုးဟံနှင့်ခင်မင်စွာစကားပြေကြရင်း အင်္ဂလိပ်စာသင်ခန်းစာ လစဉ်ရေးပေးဖို့ သဘောတူ လိုက်ကြ၏။

ဦးဘိုးဟံဆေးရုံတက်နေသော ရန်ကုန်အရှေ့ပိုင်းဆေးရုံသို့ ကျွန်တော့်ကိုပါခေါ်ကာ သွားကြည့်သည်။
ကျွန်တော့်ဇနီးကအလုပ်မလုပ်၊ ကလေးနှစ်ယောက်က အတန်းကြီးလာပြီလို့ ကျူရှင်ဖိုးကမြင့်မို့ သူအထူး စာနာ ကူညီ၏။ သူ့ကားနှင့် ဟိုဟိုဒီဒီလိုက်ပို့ပေးခြင်းကပင် ကျေးဇူးကြီးမားလှပါဘိ။ စကားပြောတိုင်း ပွင့်ပွင့်လင်းလင်းဘွင်းဘွင်းကြီး ပြောတတ် သူမို့ မကြိုက်သူများလည်း ရှိချင်ရှိမည်။
 

ဦးကျော်မင်း၏ ပုဂ္ဂလိကဘဝ (Private Life) ကိုကျွန်တော်မရေးလိုပါ။
သူစာရေးလျှင် အများဆုံးရေးသော သူ့သမီးကြီး မိဂျမ်းအကြောင်း သူပြောပြခဲ့သည့်များစွားတို့ထဲ ကောက်နှုတ်ရေးပါရစေ။ မိဂျမ်း ဆယ်တန်းရောက်ချိန်တွင် သမီးလေးအငယ်ထွေးက သူငယ်တန်း၊ ပညာရေးတက္ကသိုလ်လေ့ကျင့်ရေးကျောင်း၌ နေကြ၏။

ဆယ်တန်းစာမေးပွဲ နောက်ဆုံးနေ့ဖြေအပြီး မိဂျမ်းစားဖို့ မင်းကျော်မင်း ခေါက်ဆွဲ ကြော်ဝယ်သွားသည်။
မြင်သွားသိသွားသော အငယ်ထွေးက ဆယ်တန်းလည်း မေးခွန်းနဲ့ဖြေရပြီး အောင်စာရင်းထွက်တယ်၊ သူငယ်တန်းလည်း မေးခွန်းနဲ့ဖြေရပြီး အောင်စာရင်းထွက်တယ်၊ ဘယ်ရမလဲဆိုပြီး အကုန်စားပစ်လိုက်တယ်၊ သူကိုယ်တိုင်က မတရား လုပ်မလို့ နှုတ်ပိတ်ရေငုံနေလိုက်ရပုံ ကျွန်တော့ကိုပြောပြ Guardian သတင်းစာ၌ ဆောင်းပါးရေး၏။

နောက်တပုဒ်က မိဂျမ်းအိမ်ထောင်ရေးအကြောင်း။

စစ်ဗိုလ်တွေ ကောင်းစားနေသောခေတ်မို့ သမီးလေးဗိုလ်ကတော်ဖြစ်ဖို့ မျှော်တွေးကြိုးစားသော်လည်း အထမမြောက်ပါ။ ကိစ္စမရှိ မိဂျမ်းက သင်္ဘောသားလေးနှင့် မေတ္တာမျှနေ၍ ပိုအဆင်ပြေလေရဲ့၊ ပူဆာလာ၍ ခပ်မြန်မြန်လက်ထပ်ပေးလိုက်သည်။
သင်္ဘေားသားက ရေထဲမဆင်းတော့…ကုန်းပေါ်သာမက အိမ်ပေါ်သို့ပါတက်လာပြီမို့ သမက်ကိုပါ ကျွေးထားရပုံ–၊ အင်မတန်ဖတ်လို့ကောင်း။

(၆)

၁၉၈၈ ခု၊ အရေးအခင်းက တပြည်လုံးကို ကမောက်ကမ ဖြစ်စေ၏။
သူနှင့်မဆုံဖြစ်တော့ချေ။ ကျွန်တော်တို့မိသားစုလည်း ဘဝပျက်၊ တကွဲတပြားစီဖြစ်နှင့် နောက်ဆုံး ဘန် ကောက်သို့ စွန့်စားထွက်ခဲ့၏။ အင်္ဂလိပ်စာ နိုင်နင်းကျွမ်းကျင်သူခပ်ရှားရှားမို့ ဦးကျော်မင်းအလုပ်ဖြစ်နေဟု သတင်းကြားရ၍ ဝမ်းသာပါ၏။

၁၉၉၅ ခု၊ နှစ် အောက်တိုဘာလတွင် သူလုပ်သွားသော VOA (Burmese) , Washington DC သို့ ကျွန်တော် ရောက်လာ၏။ သူဘယ်လောက် ဝမ်းသာနေမည်ကို တိုင်းတာ၍မရနိုင်ပါ။ သူ့သတင်းများ မပြတ်ကြား နေရသည်။ ကျန်းမာရေးမကောင်းတော့ဟုလည်း သိရ၏။ ယုံကြည်စိတ်ချရသော လူကြုံက သူကိုယ်တိုင်သွားပေးမည်ဆို၍ အသုံးဝင် အီလက်ထရွန်းနစ်ပစ္စည်းလေးထည့်ပေးလိုက်၏။

အတော်လေးကြာတော့မှ ထိုင်းတံဆိပ်ခေါင်းကပ် စာတစောင် ဘန်ကောက်ကရောက် လာသည်။
ကျွန်တော်တို့အိမ်တွင် အလုပ်ရ၍ စားခဲ့သည့်ထမင်းအလုပ်ပြုတ်သွား၍ အစာမကြေဖြစ်နေရာ ခုတော့ အစာကြေ သွားပြီဟု အစချီကာ ၃ မျက်နှာစာရှည်ကြီးရေး၏။ Parkinson ရောဂါဖြစ်နေပုံလည်းပါ၏။ သမီးလေးတွေက အဖေလိုအင်္ဂလိပ်စာ တော်ကြ၍ ကျူရှင်ပြကြနှင့် အဆင်ပြေပုံ …အဖေ့အကျင့်တွေမရကြလို့ တော်သေးရဲ့ဟုတွေးမိပြီး စိတ်သက်သာရာရပုံကိုပင် ထည့်ရေးလိုက်သေးသည်။

မြန်မာပြည်တွင်း မသွင်းရဟု ပိတ်ထားချိန်၌မှာပင် Centrum အားဆေး သူ့ထံ ပို့နိုင်ခဲ့၏။ Phone 552-791 သို့ဆက်မေးတော့ ရကြောင်းသိရ၏။ နောက်ပိုင်း မင်းကျော်မင်း စကားသိပ်မပြောနိုင်တော့၊ နောက်ဆုံး တယ်လီဖုန်းပင် မကိုင်နိုင်တော့ဆိုမှ ကျွန်တော်လက်လျှော့ကာ မဆက်တော့ချေ။

(၇)

မင်းကျော်မင်း ဆုံးသွားပြီ။
သူနှင့်ခေတ်ပြိုင် လုပ်ဖော်ကိုင်ဖက် အတော်များ များလည်း ကွယ်လွန်ကုန်ကြပါပြီ။ သူလည်းလေ လူသားပေမို့ မကြိုက်ချင်စရာတွေလည်း ရှိမည်မုချ။ ကျွန်တော့်အဖို့မူ မခင်မင်ကတည်းက ထားရှိသော သူ့စာနာမှု ….နောက်ပိုင်း အပြတ်ကူညီမှု၊ ကျွန်တော်တို့မိသားစု အဆင်ပြေသွားချိန် သူ့ရင်တွင်းကပီတိ… စသည်တို့ ကား ရေးသား၍မကုန်နိုင်ပါ။
အင်္ဂလိပ်ခေတ်၊ ဂျပန်ခေတ်၊ ဖဆပလ ခေတ်၊ အိမ်စောင့်အစိုးရခေတ်၊ ပထစခေတ်၊ တော်လှန်ရေးကောင်စီခေတ်၊ မဆလခေတ်၊ န၀တခေတ် စသဖြင့် ခေတ်အစုံစုံတွင် လူစုံနှင့် တွဲလုပ်နိုင်စွမ်းသော မင်းကျော်မင်း၏ အရည်အသွေးကို တွေးနေမိကြောင်း ပါ။

၂၀၁၇ ခု၊ ဒီဇင်ဘာလ(၂)ရက်နေ့။