ရသဆောင်းပါးစုံ မောင်မိုးသူ

မောင်မိုးသူ – သူဌေးဝါဒနှင့် ဘကြီးမိုး

မောင်မိုးသူ – သူဌေးဝါဒနှင့် ဘကြီးမိုး
(မိုးမခ) သြဂတ်စ် ၂၆၊ ၂၀၁၅
ဩဂုတ် ၂၅၊ ၂၀၁၅ ရက်ထုတ် ကုမုဒြာသတင်းဂျာနယ်တွင် ဖော်ပြခဲ့သည့် ဆောင်းပါး ဖြစ်ပါသည်။

ဘကြီးမိုးတစ်ယောက် သည်ရက်တွေထဲမှာ ဆရာနန်းတော်ရှေ့ကြီးကို သိပ်သိပ်သတိရနေမိပါတယ်။ ဘာဖြစ်လို့လဲဆိုတော့ ဆရာတင်ရဲ့ “နန်းတော်ရှေ့ကို မေးလာကြရင် သူဌေးဝါဒကို ကျနော်ပြောပြပါ့မယ်၊ စိန်လိုချင်ရင် စိန်ဖြစ်ရမယ်၊ အိမ်လိုချင်ရင် အိမ်ဖြစ်ရမယ်” ဆိုတဲ့သီချင်းလေ။

သည်နေ့ မြန်မာတစ်နိုင်ငံလုံး ရေကြီး ရေလျှံဖြစ်တော့ လမ်းပန်းဆက်သွယ်ရေးတွေ ပြတ်တောက်ကုန်တာပေါ့။

ဘကြီးမိုးရဲ့ ယနေ့ပစ္စုပန်အခြေအနေက ဂျာနယ်၊ မဂ္ဂဇင်းတွေမှာ ဆောင်းပါးလေးတွေရေး၊ ဆောင်းပါးရေးခဆိုတာ ၁၅၀၀၀၊ ၂၀၀၀၀ ရတာကိုး။ အဲ ၅၀၀၀ ပဲပေးနိုင်ပါတယ်ဆိုတဲ့သူတွေဆီကိုလည်း ရေးရသလို စာမူခကို မပေးနိုင်ဘူးခင်ဗျ။ ဘကြီးမိုး က ကျုပ်တို့မဂ္ဂဇင်းရဲ့ နာယကပဲဆိုတော့လည်း ဟဲ ဟဲ မရဘူးပေါ့ခင်ဗျ။ သည်ခေတ်ကြီးမှာ  ၁၅၀၀၀၊ ၂၀၀၀၀ ဆိုတာ ဘာရှိ တာမှတ်လို့၊ လက်ဖက်ရည်ဆိုင်တောင် သွားမထိုင်လောက်ဘူး။ ဘကြီးမိုး မောနင်းစတားကို မနက်တိုင်း သွားထိုင် သွား သောက်နေတာဆိုတာက လာခေါ်တာလည်းရှိ၊ ဘကြီးမိုး စားသောက်တာမှန်သမျှ မိတ်ဆွေအပေါင်းအသင်းတွေက အလု အယက်ရှင်းနေကြလို့ ဟန်မပျက် မာန်မပျက် မောနင်းစတားဝိုင်းမှာ ထိုင်နေတာ။ အဲ ဆောင်းပါးစာကသာ ၁၅၀၀၀၊ ၂၀၀၀၀ ရတာ၊ လုံးချင်းစာအုပ်ထုတ်မယ်ဆိုရင်တော့ သုံးလေးသိန်း ဘိုးခနဲ ဘတ်ခနဲ ရပေါ့ခင်ဗျ။ ဘကြီးမိုးကို ညီငယ်လိုဖြစ်တဲ့ စာရေးဆရာတစ်ယောက်က ပြောဖူးတယ်ခင်ဗျ။ ဘကြီးမိုးက အကောင်းစား မဟုတ်ဘူး၊ အဟောင်းစားတဲ့။ သူပြောမယ် ဆိုလည်း ပြောစရာပေါ့လေ။ ဘကြီးမိုး အများဆုံးရေးခဲ့ ထုတ်ဝေခဲ့တာက ဘာသာပြန်ဝတ္ထုကြီးတွေလေ။ ဘကြီးမိုး ၂၀၀၀ ပြည့်နှစ် ထောင်ကထွက်လာပြီးကတည်းက ဘကြီးမိုးရဲ့ ကလောင်နာမည်ဖြစ်တဲ့ မောင်မိုးသူဆိုတဲ့ နာမည်နဲ့ စာပြန်ရေးခွင့်ရ လေတော့ ဘကြီးမိုးရဲ့ ဘာသာပြန်ဝတ္ထုအဟောင်းတွေကို ပြန်ထုတ်၊ ပြန်ရိုက်ပြီး ဟန်မပျက် စားသောက်ရတာလေ။ အဲ သည်လို ဘာသာပြန်စာအုပ်အဟောင်းတွေ ဒုတိယအကြိမ်၊ တတိယအကြိမ်၊ စတုတ္ထအကြိမ် ထုတ်ဝေစားသောက်နေရာက ကုသိုလ်ကံများဆိုးချင်တော့ စာအုပ်အဟောင်းဆိုင်တွေပြုတ်ကုန်တယ်။ ဖြုတ်ကုန်ကြသတဲ့။ စာအုပ်အဟောင်းဆိုင်တွေ ပြုတ်ကုန် ဖြုတ်ကုန်ကြတော့ စာအုပ်အငှားဆိုင်တွေ တင်လေ့တင်ထရှိတဲ့ ရုပ်ပြကာတွန်းတို့၊ မဂ္ဂဇင်းတို့၊ အချစ်ဝတ္ထုတွေ အားလုံး အရောင်းအဝယ်ထိုင်း ရပ်ဆိုင်းကုန်ကြတာပေါ့။ မဂ္ဂဇင်းတို့၊ အချစ်ဝတ္ထုတို့၊ ရုပ်ပြကာတွန်းတို့ရဲ့ ဈေးကွက်ဆိုတာ စာအုပ်အငှားဆိုင်ပေါ်မှာ တည်မှီနေလေတော့ အဲသည်ရုပ်ပြတို့၊ အချစ်ဝတ္ထုတို့၊ မဂ္ဂဇင်းတို့ ရပ်တည်ဖို့ ခက်သွားတော့တာ ပေါ့။ အဲ အဲသည်အထဲမှာ ဘာသာပြန်ဝတ္ထုတွေလည်း ပါတယ်ခင်ဗျ။ စာအုပ်အငှားဆိုင်မှာ မောင်ပေါ်ထွန်းတို့။မောင်မိုးသူတို့ဆိုတာ စီးရီးလိုက်၊ အတန်းလိုက်ရှိတာ။ စာအုပ်တွေက ဈေးကြီးတော့ ငှားဖတ်တဲ့ပရိတ်သတ်ပဲ အားကိုးရတာ။ ဘာ သာပြန်စာအုပ်ပဲ ငှားဖတ်တယ်ဆိုတဲ့ ပရိသတ်လည်း ရှိသကိုး။ အဲသည်လို ခိုကိုးရာ စာအုပ်အငှားဆိုင်တွေ ပျောက်ဆုံး ကုန်ကြတော့ ဘကြီးမိုးတို့ရဲ့ ဘာသာပြန်စာအုပ်တွေကို ဘယ်ထုတ်ရဲကြတော့မလဲ။ သည်ကြားထဲမှာ ဘကြီးမိုးရဲ့ နာမည် ကြီး စာအုပ် “အိတ်ဇိုးဒပ်” နိုင်ငံတကာဝတ္ထုကို  ငါတို့စာပေတိုက်က ထုတ်ဝေပါတယ်။ စတုတ္ထအကြိမ်ပါ။ သည်ခေတ်စက္ကူဈေး ဘာဈေးနဲ့ စာအုပ်ရောင်းဈေးက ၅၀၀၀ တဲ့လေ။ သည်ကြားထဲ တစ်ပြည်လုံး ရေကြီးရေလျှံဖြစ်လေတော့ လမ်းပန်း ဆက် သွယ်ရေးတွေပြတ်လို့ ထုတ်ဝေသူက မဖြန့်ရဲသေးဘူးလို့ ဆိုလာပါတယ်။ အဲသည်မှာတင် ဘကြီးမိုးက ရယ်စရာပြောရ တာပေါ့။ တစ်ပြည်လုံး ရေကြီးရေလျှံဖြစ်တာ ငါတို့ ၃၁ လမ်း အထက်လမ်းလည်း ပါသကွဲ့လို့၊ ဘကြီးမိုးလည်း ရေဘေးဒုက္ခ သည်ပဲလို့။

သည်လို တစ်ပြည်လုံး ရေကြီးရေလျှံဖြစ်ပြီး ရေဘေးဒုက္ခသည်တွေကို ပြည်သူအများ အုတ်အော်သောင်းတင်း လှူကြတန်းကြ လုပ်ကြပါတယ်။ ရေကြီးရေလျှံဖြစ်လို့ လမ်းပန်းဆက်သွယ်ရေးတွေ ပြတ်တောက်ပြီး ကုန်ဈေးနှုန်းတွေလည်း ထိုးတက်သွားပါ တယ်။ ချဉ်ပေါင်ရွက်၊ ကန်စွန်းရွက် ကအစ တက်တာ၊ဆီတို့၊ဆန်တို့ဆိုတာ မကြားဖူး မကြုံဖူးလောက်အောင် တက်တာပါ။

သည်ကြားထဲ တိုင်းပြည်အုပ်ချုပ်မင်းလုပ်နေတဲ့ ကြံ့ခိုင်ရေးပါတီ ထိပ်ပိုင်းခေါင်းဆောင်အပြောင်းအလဲကို ညကြီးသန်းခေါင်မှာ အပြောင်းအလဲလုပ်သတဲ့။ အဲသည်လိုပြောင်းလဲလို့ ထ်ိတ်လန့်တကြားနဲ့ ဒေါ်လာဈေးက ၁၃၀၀ အထိဖြစ်သွား။ ဒေါ်လာနဲ့ ဝယ်ရတဲ့ ကုန်ပစ္စည်းဈေးတေါကလည်း တက်ပေါ့ခင်ဗျ။သတင်းတွေထဲမှာ ကလေးမှာ ရေတွေကြီး၊လမ်းတံတားတွေပျက်တော့ ဆန်ဈေးတွေက မကြုံစဖူး တက်တယ်ခင်ဗျ။ ဟုတ်ကဲ့၊ ကလေးမှာ ဆန်ဈေးတက်သလို ရန်ကုန်မှာလည်း တက်တာပဲခင်ဗျ။

သည်ကြားထဲ ဆီစက်၊ ဆီကုန်သည်များအသင်းက တာဝန်ရှိသူက သူတို့ဆီဈေးတက်ရခြင်းဟာ ကုန်ကြမ်းဖြစ်တဲ့ မြေပဲနဲ့ နှမ်းတွေ ဈေးတက်လို့ ဆီဈေးဟာ မကြုံစဖူး တက်ရတာပါ။ မြေပဲနဲ့ နှမ်းတွေ အထွက်တိုးအောင်လုပ်နိုင်ရင် ဆီဈေးကျအောင် လုပ်နိုင်တယ်လို့ဆိုပါတယ်။ပြည်တွင်းထွက် ပဲဆီ၊ နှမ်းဆီ သာပြည့်ပြည့်ဝဝထုတ်နိုင်ရင်  နိုင်ငံခြားငွေနဲ့ ဝယ်ရတဲ့ စားအုန်းဆီ အစားထိုးစရာမလိုဘူးလို့ ဆိုပါတယ်။

နောက်ဆုံးထုတ် သတင်းကြေညာချက်တခုမှာ ပြည်တွင်းက ထုတ်လုပ်တဲ့ ဆီဘယ်နှစ်မျိုးဆိုလား စားသုံးရန် မသင့်လို့ သူတို့ထုတ်လုပ်ဖြန့်ဖြူးထားတဲ့ ဆီတွေကို ပြန်လည်သိမ်းဆည်းဖို့နဲ့ ဆက်လက်ထုတ်ဝေနေပါက အရေးယူရမယ်လို့ ဆိုပါ တယ်။ အရေးထဲ တမှောင့်နော်။

အာဏာရပါတီ ထိပ်ပိုင်းခေါင်းဆောင် အပြောင်းအလဲကြောင့် ဘဏ်လုပ်ငန်းတွေမှာလည်း လှုပ်ခတ်မှုတွေဖြစ်နေလို့ ဗဟို ဘဏ်က မစိုးရိမ်ကြဖို့ သတိပေးနေရပါတယ်။

ဟဲ ဟဲ ဘကြီးမိုးကတော့ ဘယ်ဘဏ်မှာမှ ပိုက်ဆံအပ်မထားလေတော့ မပူပေါင်။
အခုလည်း မန္တလေးသားမို့ ဆရာကြီး နန်းတော်ရှေ့ဆရာတင်ရေးတဲ့ သူဌေးဝါဒကို အော်အော်ဆိုနေမိပါတယ်။
စိန်လိုရင် စိန်ဖြစ်ရမယ်။ငွေလိုရင် ငွေဖြစ်ရမယ်၊သူဌေးဝါဒကို မေးလာကြရင် ကျနော် ပြောပြပါ့မယ်ဆိုတာကို
ရေလိုရင် ရေရမယ်x
ငွေလိုရင် ငွေရမယ်x
ဆန်လိုရင် ဆန်ရမယ်x ဆိုပြီး

သူဌေးဝါဒသီချင်းကိုပဲ ဘကြီးမိုးတစ်ယောက် အော်အော်ဆိုနေမိကြောင်းပါ။

သူဌေးဝါဒနှင့် ဘကြီးမိုးပါ။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts