သတင်းဆောင်းပါး

မောင်မောင်စိုး – တရုတ်ပေါ်လစီ အရွေ့နှင့် မြန်မာ့ပြည်တွင်းရေး (၁

Daw Aung San Suu Kyi, the leader of the Myanmar opposition, being greeted by President Xi Jinping of China in the Great Hall of the People in Beijing on Thursday : Photo Credit /Getty Images
မောင်မောင်စိုး – တရုတ်ပေါ်လစီ အရွေ့နှင့် မြန်မာ့ပြည်တွင်းရေး (၁)
(မိုးမခ) ဇွန် ၁၇၊ ၂၀၁၅

• နိဒါန်း
တရုတ်ပြည်အနေနှင့် မြန်မာပြည်က အလားလာရှိသောခေါင်းဆောင်များကို တပြေးညီဆက်ဆံပါသည်ဟုဆိုနေသော် လည်း ဒေါ်အောင်ဆန်းစုကြည်အား တရုတ်က ကောဇောနီခင်း၍ ကြိုလိုက်ခြင်းသည် သာမန်မဟုတ်ဆိုသည်ကို နိုင်ငံရေး အကဲခတ်တိုင်း သိကြသည်။

ဤအချင်းအရာသည် သာမန်မျှမဟုတ်ချေ။ တရုတ်နိုင်ငံခြားရေးပေါ်လစီ အပြောင်းအလဲအတွက် အားလုံးမြင်သာသည့် ခြေလှမ်းတရပ်လည်းဖြစ်သည်။ သတိပေးခေါင်းလောင်းထိုးလိုက်ခြင်းလည်းဖြစ်သည်။ ဒေါ်အောင်ဆန်းစုကြည်အား တရုတ် တို့ မျက်နှာမူလိုက်ခြင်းသည် လာမည့်ရွေးကောက်ပွဲတွင် အလားအလာရှိသူတစ်ဦးကို ဆက်ဆံခြင်းမျိုးမဟုတ်ပေ။ မြန်မာ ပြည်နှင့်ပတ်သက်သော တရုတ်တို့၏ပေါ်လစီတခုလုံး၏ အလှည့်အပြောင်းတရပ် အရွေ့တရပ် ဖြစ်ပေသည်။

• (က) တရုတ်ပြည်ဆိုသည်မှာ
၁။ တရုတ်နီ

ယခင်က တရုတ်ပြည်မကြီးကို တရုတ်နီဟုခေါ်၍ တိုင်ဝမ်ကို တရုတ်ဖြူဟုခေါ်ကြသည်။ မော်စီတုန်းနှင့် တရုတ်ကွန်မြူနစ်များ တရုတ်ပြည်မကြီးကိုသိမ်းပိုက်သည့် ၁၉၄၉ မှစ၍ ၁၉၆၆ တရုတ် တို့၏ ယဉ်ကျေးမှုတော်လှန်ရေးကာလထိ လက်ဝဲ အယူဝါ
ပြင်းထန်သော တရုတ်တို့အား တရုတ်နီဟုခေါ်ခဲ့ကြသည်။ ၁၉၈၀ တိန့်ရှောင်ဖိန်ကာလ စီးပွားရေးတံခါးဖွင့်ပြီးနောက် တရုတ်ပြည်တွင် ဈေးကွက်စီးပွားစနစ် ပြောင်းလဲကျင့်သုံးလာသည်။ အရင်းရှင်ဆိုသည့် ဖွံ့ဖြိုးပြီးနိုင်ငံကြီးများနှင့် စီးပွားပူး ပေါင်းလုပ်ဆောင်လာသည်။ သို့အတွက် တရုတ်တို့အား အများက သိပ်မနီတော့ဟု ယူဆလာပုံရသည်။ ယခုနောက်ပိုင်း တရုတ်နီဟုခေါ်သံ သိပ်မကြားရတော့ပေ။

ယခု တရုတ်နီဟုမခေါ်တော့ဟုဆိုသော်လည်း တရုတ်ပြည်သည် တရုတ်နီဖြစ်ကြောင်းမမေ့ဘို့လိုသည်။ ဆိုလိုသည်မှာ တရုတ်ပြည်ကွန်မြူနစ်ပါတီမှ လက်နက်ကိုင်တော်လှန်ရေးနည်းဖြင့် တရုတ်ပြည်၏ အာဏာကိုရယူချုပ်ကိုင်ထားသည်ကို သတိပြုဘို့လိုသည်။ တရုတ်ပြည်၏ အာဏာ အခရာသည် တရုတ်ကွန်မြူနစ်ပါတီ ဖြစ်သည်။ ထို့ကြောင့်လည်း တရုတ်နီဟု ခေါ်ကြခြင်းဖြစ်သည်။

၂။ တရုတ်ပြည်ကွန်မြူနစ်ပါတီ
တရုတ်ကွန်မြူနစ်ပါတီသည် တရုတ်ပြည်တွင် အမြင့်ဆုံးအာဏာပိုင်အဖွဲ့အစည်းဖြစ်သည်။ အစိုးရအထက်တွင်ရှိသည်။ ပုံမှန်ပြုလုပ်သော ပါတီညီလာခံ ပါတီဆုံးဖြတ်ချက်များသည်အစိုးရအဖွဲ့အတွက်လမ်းညွှန်ဖြစ်သလို ပါတီညီလာခံမှ ရွေး ကောက်တင်မြှောက်လိုက်သော ပါတီဗဟိုကော်မတီဝင်များပေါ်လစ်ဗျူရိုနှင့် အထွေထွေအတွင်းရေးမှူးတို့သည် အစိုးရ အဖွဲ့အား ခေါင်းဆောင်သည်။ ထို့ပြင် တရုတ်ပြည်ကွန်မြူနစ်ပါတီမှ ရွေးချယ်ဖွဲ့စည်းထားသော CPC အထွေထွေအတွင်း ရေးမှူးကိုယ်တိုင် ဥက္ကဌ လုပ်သော ဗဟိုစစ်ကော်မရှင်သည် တရုတ်စစ်တပ်အား တိုက်ရိုက်ကွပ်ကဲသည်။ သို့ဖြစ်ရာတရုတ်စစ် တပ်သည် တရုတ်အစိုးရလက်အောက်မှာထက် တရုတ်ကွန်မြူနစ်ပါတီ ဗဟိုစစ်ကော်မရှင်၏ တိုက်ရိုက်ကွပ်ကဲမှုအောက် တွင်ရှိသည်။

တရုတ် ဖွဲ့စည်းပုံအရ တရုတ်ကွန်မြူနစ်ပါတီ ပါတီကွန်ဂရက်ကျင်းပ၍ လမ်းစဉ်များချမှတ် ပါတီခေါင်းဆောင်များ ရွေးမြှောက် ပြီးမှ ပြည်သူ့ကွန်ဂရက်ကျင်းပ အစိုးရဖွဲ့စည်းကာ ပါတီလမ်းစဉ်အတိုင်း အစိုးရ မူဝါဒပေါ်လစီများကိုချမှတ် အကောင် ထည်ဖေါ်ကြသည်။ မည်သို့ဆိုစေ တရုတ်ပြည်တွင် တရုတ်ကွန်မြူနစ်ပါတီသည် အထက်ကဖြစ်သည်။

ဒေါ်အောင်ဆန်းစုကြည်အား တရုတ်ကွန်မြူနစ်ပါတီမှ ဖိတ်ကြားခဲ့ပြီး ဘေကျင်းတွင် ရှီကျင့်ပင်က ပြည်သူ့ခန်းမတွင် လက်ခံ တွေ့ဆုံသည်။ ရှီကျင့်ပင်သည် တရုတ်ကွန်မြူနစ်ပါတီ အထွေထွေအတွင်းရေးမှူးအနေနှင့် ဒေါ်စုအားတွေ့ဆုံသော်လည်း တချိန်တည်းတွင် သူသည် သမတလည်းဖြစ် ဗဟိုစစ်ကော်မရှင် အကြီးအကဲလည်းဖြစ်သည်။သို့သော် သူမှအပ အောက်ခြေ တွင်တော့ ပါတီအစိုးရ တပ်ခေါင်းဆောင်တို့ကို အဆင့်ဆင့်ခွဲထားသည်။

ဒေါ်စုအား ရှန်ဟိုင်းတွင် ရှန်ဟိုင်းပါတီအတွင်းရေးမှူးကတွေ့ဆုံသကဲ့သို့ ခွင်းမင်တွင်လည်း ယူနန်ပြည်နယ်ပါတီအတွင်းရေး
မှူးက တွေ့ဆုံပါသည်။ မြန်မာအစိုးရ ခေါင်းဆောင်များသာဆိုပါကရှန်ဟိုင်းတွင် မြို့တော်ဝန် ခွင်းမင်တွင် ယူနန်ပြည်နယ် အုပ်ချုပ်ရေးမှူး စသည့် အစိုးရပိုင်းအရာရှိများက တွေ့လေ့ရှိသည်။ ဒေါ်စုအား တွေ့ဆုံသော ပါတီခေါင်းဆောင်များဖြစ်သော ရှန်ဟိုင်းပါတီအတွင်းရေးမှူးသည် ရှန်ဟိုင်းမြို့တော်ဝန်ထက်မြင့်သည်။ယူနန်ပါတီအတွင်းရေးမှူးသည် ယူနန်အုပ်ချုပ်ရေးမှူး ထက်မြင့်သည်။ လက်ရှိ ရှန်ဟိုင်းပါတီအတွင်းရေးမှူးဆိုလျင် တရုတ်ပါတီ ပေါ်လစ်ဗျူရို အဖွဲ့ဝင် ထိပ်ပိုင်းခေါင်းဆောင်တစ်ဦး ဖြစ်သည်။ မော်စီတုန်းခေတ်မှပေါ်လာခဲ့သော လေးဦးဂိုဏ်းမှ ဝမ်ဟုန်ဝင်တို့မှသည် မကြာမီက တရုတ်သမတဖြစ်ခဲ့သော ကျန်းဇီမင်းအထိ တရုတ်ခေါင်းဆောင်တို့သည် ရှန်ဟိုင်းမှဖြစ်ကြသည်။ တရုတ်တွင် ရှန်ဟိုင်းမှတက်လာသော ခေါင်းဆောင် များသည် အစဉ်အဆက် အရေးပါကြသည်။

ဒေါ်အောင်ဆန်းစုကြည်အား တိုက်ရိုက်ဖိတ်ခေါ်သည်မှာ တရုတ်ကွန်မြူနစ်ပါတီ နိုင်ငံတကာဆက်ဆံရေးဌာနကြီးမှဖြစ်ပုံရသည်။ ရှီကျင့်ပင်နှင့် ဒေါ်စုတွေ့ရာတွင် ၎င်းနိုင်ငံတကာဆက်ဆံရေးဌာနကြီးမှူး ဝမ်ကြားရွေ့ (Wan JiaRui) ကိုပါ တွေ့ရ သည်။

၃။ ပါတီတွင်းတိုက်ပွဲ ( ဝါ) ပါတီတွင်းပဋိပက္ခများ
ထိုအာဏာရ တရုတ်ကွန်မြူနစ်ပါတီအတွင်း၌လည်း မတူသောအယူအဆများလမ်းစဉ်များ ဂိုဏ်းအုပ်စုများရှိကြသည်။ ထို အုပ်စုများအချင်းချင်း ပြင်းပြင်းထန်ထန် တိုက်ခိုက်လေ့ရှိကြပြီး ရှုံးနိမ့်သူများမှာ ပါတီသစ္စာဖေါက်များ အချောင်သမားများ အကျင့်ပျက်သူများအဖြစ် အရေးယူခံရပြီး သူတို့၏ လမ်းစဉ်မူဝါဒများလည်းချောင်ထိုးခံရတော့သည်။ တရုတ်ကွန်မြူနစ်ပါတီ သမိုင်းတလျောက်လုံးတွင်တွေ့နိုင်သည်။ အထူးသဖြင့် အခြေအနေတခု အပြောင်းအလဲဖြစ်လျှင် ပိုပြင်းထန်လေ့ရှိသည်။

ယနေ့ကာလတွင်လည်း ပြင်းပြင်းထန်ထန်ဖြစ်နေသည်။ ရှီကျင့်ပင်တက်စကာလသည် တလျောက်လုံးထိုးတက်နေသည့်တရုတ်စီးပွားရေးရပ်တန့်ပြီး ကျဆင်းနေသည့်ကာလဖြစ်သည်။ ထိုကာလကိုကျော်လွှားရန် ရှီကျင့်ပင်သည် အကျင့်ပျက် အဂ တိလိုက်စားသော တရုတ်ခေါင်းဆောင်ပိုင်းကစပြီး တရုတ်ပါတီအစိုးရ စစ်ဖက်ခေါင်းဆောင်များအား လူဦးရေ သောင်းနှင့်ချီ၍ အရေးယူခဲ့သည်။ လွယ်လွယ်ကူကူတော့မဟုတ်ခဲ့။ ရှီကျင့်ပင်အားလုပ်ကြံရန် ကြံစည်မှုများအား ကြုံတွေ့ခဲ့ရသည်ဟုဆိုသည်။တကယ်တမ်း ရှီကျင့်ပင်အရေးယူခဲ့သော ထိပ်ပိုင်းခေါင်းဆောင်များမှာ သမတကျန်းဇီမင် သမတဟူကျင့်တောင် လက်ထက်ကထဲက တာဝန်ယူခဲ့သူများဖြစ်ကြသည်။

အရေးယူသည့်အထဲတွင် မကြာမှီက ထောင်ဒဏ်တသက်တကျွန်းချမှတ်ခဲ့သော ပါတီပေါ်လစ်ဗျူရိုအဖွဲဝင်ဟောင်းနှင့်လုံခြုံ ရေးဗျူရိုအကြီးအကဲ ကြို့ရုန်ကန်း ထောင်ထဲတွင် ကင်ဆာနှင့်သေသွားသည်ဆိုသော ဗဟိုစစ်ကော်မရှင်အဖွဲ့ဝင် ဗိုလ်ချုပ် ကြီးများလည်းပါသည်။ သို့ဖြစ်ရာ ထိုအရေးယူခံရသော လူများနှင့်အတူ သူတို့ကိုင်ထားသောမူများလည်း ပြောင်းကုန်တော့ ၏။

ဤတွင် မြန်မာပြည်နှင့်ပတ်သက်သော သုံးသပ်ချက်များအမြင်များသည်လည်း ထိုလူနှင့်မူအပြောင်းတွင် ပါသည်။

၎။ တရုတ်ကွန်မြူနစ်တို့၏ အခြေခံမူဝါဒ လုပ်နည်းကိုင်နည်း
တရုတ်ကွန်မြူနစ်တို့၏ အခြေခံ မူဝါဒမှာ မတ်ဝါဒ လီနင်ဝါဒဖြစ်သည်။ တချိန်က မော်စီတုန်းအတွေးအခေါ်လည်းပါသည်။ယခုတော့ တရုတ်ကွန်မြူနစ်များလည်း ယခင်ကလောက် ဗော်ရှီဗစ်မဆန်တော။ မနီတော့ချေ။ ဒဂုန်တာရာ၏ ပန်းနုရောင်များ ဖြစ်သွားကြပုံရသည်။

လက်ရှိ တရုတ်ကွန်မြူနစ်များ၏ အယူအဆတွင် အမျိုးသားရေးထည့်ပေါင်းထားသည်။ ကွန်ဖြူးရှပ်ကို နေရာပေးထားသည်။ ချမ်းသာကြွယ်ဝမှုကို ပေါင်းထည့်ထားသည်။ အလုပ်သမားလူတန်းစားတပ်ဦးပါတီဆိုသည့် ကွန်မြူနစ်ပါတီတွင် သန်းကြွယ် သူဌေးလည်း ပါတီဝင်ဖြစ်နိုင်သွားပြီ။ ရောသမမွှေဟု ဆိုရမည်။

ကွန်မြူနစ်ပါတီတစ်ရပ်၏ လုပ်နည်းကိုင်နည်းဖြစ်သောအခြေအနေတရပ်ကိုသုံးသပ်၍ လမ်းစဉ်ချမှတ်ခြင်း ထိုလမ်းစဉ်အ ကောင်အထည်ဖေါ်ရန် အာဘော်ဖန်တီးခြင်း အခိုင်အမာခြေလှမ်းများလှမ်းခြင်း ထိုလမ်းစဉ်ကို ဆန့်ကျင်သူများအား ဖယ်ရှား ခြင်း စသည်တို့ပြင် ပုံမှန်အစိုးရလုပ်ထုံးနှင့်သွားမရပါကကွန်မြူနစ်ပါတီအနေနှင့်လုပ်ခြင်း စသည်တို့မှာတော့ မပြောင်းလဲချေ။

ထို့ပြင် လက်ရှိစီပွားအင်အား စစ်အင်အား တောင့်တင်းလာသည်ကိုအကြောင်းပြု၍ နိုင်ငံတကာပြသနာများတွင် အကန့် အသတ်ဖြင့် အင်အားအသုံးပြုခြင်းကို ဆောင်ရွက်လာနိုင်ဘွယ် ရှိပေသည်။

ဆက်လက်ဖေါ်ပြပါမည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
My Friend Tin Moe By Maung Swan Yi - Selection of MoeMaKa Articles

Similar Posts