(မိုးမခ) မေ ၂၀၊ ၂၀၁၅
ကြည်နူးဆွတ်ပျံ့ဖွယ် အလှတရားများဖြင့်ပြည့်နှက်သော မန္တလေးကို ရှေးခေတ် ကဗျာစာဆိုပညာရှိတော့အစ ယနေ့ခေတ် ခေတ်ပေါ်ကဗျာဆရာတွေထိ အသိမ်မွေ့ဆုံးအတွေး အလှဆုံးသောစိတ်ကူး ကျစ်လစ်သောစကားလုံးများဖြင့် မန္တလေးကို အမျိုးမျိုးကဗျာ မရိုးနိုင်အောင်ဖွဲ့ဆိုသွားကြသည်။ မန္တလေးကို ကဗျာဖွဲ့ဆိုကြသူထဲတွင် အချုပ်တန်းဆရာဖေက မန္တလေးဆောင်းအအေးလွန်ကဲပုံကို အခုလိုလှပစွာသရုပ်ဖော်ဖွဲ့ထားတယ်လေသည်။
“ငွေနှင်းရယ်မှုန် ၊ လေညင်းရယ်တသုန်သုန်နှင့်
ချမ်းပုံမှာကမ်းကုန်ရစ်တာမို့
မန်းတုန်အောင် လမ်းဆုံကဟစ်ချင်တော့”
ဆရာဖေသည် မန္တလေးဆောင်းရာသီကို ပီပြင်စွာခံစားသရုပ်ဖော်ပြသွားလို ဆရာမောင်နွေထက်ကလည်း “မန္တလေးတောင် နဲ့ စကားပြောခြင်း” လို့ ကဗျာခေါင်းစီးပေးပြီး မန္တလေးကို သူမြင်သည့်အတိုင်း ကဗျာရှည်တစ်ပုဒ်ကို လှပစွာရေးဖွဲ့ပြလေ သည်။ ဆရာမောင်နွေထက်၏ “မန္တလေးတောင်နဲ့ စကားပြောခြင်း” ကဗျာလေးထဲမှ ကျွန်တော်နှစ်သက်သည့်အပိုဒ်လေး အား တင်ပြလိုက်ပါတယ်။
“အရီးတောင်းတစ်ထုပ်
ထိုးမုန့်ထုပ်နဲ့လဲ
ငါ့မန္တလေးတောင်က
မျက်နှာမလုပ်တတ်ပါဘူး…
…………………………………
…………………………………
မန္တလေးရဲ့ ရွှေကဗျာခေတ်
အနာဂတ်မှာသစ်တော့မယ်
( မန္တလေးတောင်နဲ့ စကားပြောခြင်း – ကဗျာမှ)
မန္တလေးတောင်နဲ့စကား ပြောပြီး ဆရာမောင်နွေထက်က သူ၏မန္တလေးက မျက်နှာမလုပ်တတ်ကြောင်းကို လှပစွာဖွဲ့ဆိုပြသွားလေသည်။မန္တလေးကို ကဗျာများဖွဲ့ဆိုသည့်အထဲတွင် ပြည်တွင်းက ကဗျာဆရာများသာမက နိုင်ငံခြသားကဗျာဆရာ မစ္စ တာ Rudyard Kipling ရေးသားသော “The Road to Mandalay” ကဗျာတွင် မန္တလေးကို သူမြင်တွေ့ခံစားသည့်အတိုင်း ဖွဲ့ထားသည်။
“ပူလောင်ပြီး ဖုန်တထောင်းထောင်းဖြင့်
ဗရပွဖြစ်နေသော်လည်း
အပေါ်ယံရဲ့အောက် လှပ်ကြည့်လိုက်လျှင်
လှုပ်ရှားတက်ကြွနေတဲ့မြို့တော်
ထင်ရှားနက်စောက်တဲ့သမိုင်းကြောင်းတွေရှိတဲ့မြို့တော်
ခေတ်မီမြို့တော်ဖြစ်ရန်အတွက်လည်း လျှင်မြန်စွာပြောင်းလဲ …. နေတဲ့မြို့တော်”
(The Road to Mandalay – ကဗျာမှ)
စသည်ဖြင့်မန္တလေးမြို့၏ကြည် နူးဆွတ်ပျံ့ဖွယ်အလှတရားများသည် တခါတွေ့ဖူးရုံဖြင့်ပျောက်ကွယ်သွားနိုင်မှာမဟုတ်သည့်အကြောင်းကို ကဗျာဆရာ မစ္စတာ Rudyar Kipling က အမွှန်းတင်ဖွဲ့ဆိုပြသွားသည်။ကဗျာဆရာတွေတင် မန္တလေး ကို ကဗျာဖွဲ့ကြမဟုတ်။ ကျွန်တော်၏သူငယ်ချင်းဖြစ်သူ ကဗျာဆရာမ သဇင်မွန်ဟန်ကလည်း “ငါသိပ်မုန်းတယ် မန္တလေး”လို့ခေါင်းစဉ်ပေးပြီး သူမ မန္တလေးကို ဘယ်လောက်ချစ်ကြောင်းပြောပြသွာသည်။
“ငါသိပ်မုန်းတယ် မန္တလေး
အဲ့ဒါတွေကြောင့်
အဲ့ဒါတွေကြောင့်ပေါ့ငါသိပ်မုန်းတယ် မန္တလေး
မုန်းတယ် မုန်းတယ်လို့
အသက်ထွက်မတက်ပြောတာတောင်
သံယောဇဉ်တွေပိုပိုတိုး
ငါ့မှာ သေမလောက်ချစ်လာလို့
ဒီတစ်ခါနင့်ရှေ့ရောက်ရင်
မျက်စိစုံမှိတ်အံကိုကြိတ်
ငါ့ကိုယ်ငါပဲ ဗြောင်လိမ်ပစ်လိုက်မယ်
ငါသိပ်မုန်းတယ် မန္တလေး”(ငါသိပ်မုန်းတယ် မန္တလေး – ကဗျာမှ)
ကိုး (ခရေရိပ်) ကလည်း “မသေသောမြို့က မသေသောအမေ” ဟု ခေါင်းစဉ်ပေးပြီး မန္တလေးရဲ့သမိုင်း မရိုင်းဖို့ သမိုင်းပေး တာဝန်ကျေပွန်ဖို့ သူ့အမေကို ကတိပေးထားလေသည်။
“အမေက မန္တလေးကို ကာကွယ်သလို
ကျွန်တော်တို့လည်း ကာကွယ်တယ်အမေပေးတဲ့
သမိုင်းပေးတာဝန်ကျေပွန်ဖို့
ဒီမြို့နဲ့ ဒီမြို့သမိုင်း
Made In China မဖြစ်စေရဘူး….အမေ”(မသေသောမြို့က မသေသောအမေ – ကဗျာမှ)
ကဗျာတွေထဲကမန္တလေး အကြောင်းကိုရေးလျှင်ပြီးနိုင်ဖွယ်မရှိပေ။အထက်ဖော်ပြခဲ့သော ကဗျာဆရာ၊ ဆရာမတို့သည် သူ တို့ တွေ့ကြုံနေရသည် မန္တလေး၊ သူတို့မြင်နေရတဲ့မန္တလေးကို အလှဆုံးစိတ်ကူးတွေနဲ့ ရိုးသားစွာရေးဖွဲ့သွားကြလေသည်။ ကဗျာဆရာတွေကဗျာဖွဲ့လို့မကုန်တဲ့ မန္တလေးမြို့ကြီး ကျန်မာ ချမ်းသာပါစေ …။ ။
လေးစားစွာဖြင့်
နေဝန်းနီ (မန္တလေး)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
