ငြိမ်းချမ်းအေး – အမည်မည်း စာရင်းထဲ ထည့်လိုက်ပါ

ငြိမ်းချမ်းအေး – အမည်မည်း စာရင်းထဲ ထည့်လိုက်ပါ

(မိုးမခ) နိုဝင်ဘာ ၀၇၊ ၂၀၁၄

သြော်.. ဒုက္ခ ဒုက္ခ “အမည်မည်း စာရင်း” ဆိုပါ့လား။ စာဖြူ ကို သေစာ ရှင်စာ တတ်ရမယ့် အမေရိကား အသံ က အစ အမည်မည်း စာရင်း လို့ ခေါင်းစဉ်တပ်တယ်။

အိုဘားမား အစိုးရက သူတို့ ပြည်တွင်း နိုင်ငံရေး လိုအပ်ချက် နိုင်ငံခြားရေး မူဝါဒ ကစားမှု မှာ စားကောင်း၊ သောက်ကောင်း၊ လူကြားကောင်း၊ ကြိမ်းဝါးကောင်းအောင် အာရှ-ပစိဖိတ် ခရီးစဉ် မစခင် ဗိုလ်အောင်သောင်း ကို နာမည်ပျက်စာရင်းထဲ ထည့်ပြတယ်။ ဒီလို ဟန်ပြ လုပ်ပြတာကိုများ ဗမာ့ စာနယ်ဇင်းက ကြားက ဝင် နာနေသေးသလားမသိ။ နာမည်ပျက် စာရင်းလို့ မသုံးဝံ့၊ အမည်မည်း စာရင်း ပါတဲ့။

“Blacklist” အင်္ဂလိပ် နာမ် စကားလုံးက တွဲလျက် ရေးရတယ်။ လုံးကောက် ဘာသာပြန်ယူလို့ မရဘဲ တကယ့် ဆိုလိုတဲ့ အဓိပ္ပာယ် အကျယ် က လက်သင့်ခံဖွယ် မရှိသူ၊ ရှောင်ကြဉ်အပ်သူ၊ ယုံကြည်ကိုးစားမှု မထိုက်သူ၊ အယုံကြည်မဲ့ကြောင်း စာရင်းသွင်းခံရတဲ့ မယုံကြည်ထိုက်သူ လို့ ရတယ်။ ဆိုတော့ ရှင်းအောင်ဆိုရရင် ဗိုလ်အောင်သောင်း ဟာ ဖယ်ကြဉ် ရှောင်ခွာ ပစ်ပယ် လူ့အဝန်းအဝိုင်း ကနေ ထုတ်၊ ထိတွေ့ ဆက်ဆံ လူမှု စီးပွား မလုပ်အပ်သူလို့ အမေရိကန် အစိုးရ က သတ်မှတ်လိုက်တာပါ။

သူတို့ ထုတ်ပြန်ချက် မှာ အတိအလင်းလည်း ရှင်းထားတယ်။ ဗမာပြည်ရဲ့ နိုင်ငံရေး၊ စီးပွားရေး ပြုပြင်ပြောင်းလဲမှု ဖြစ်စဉ်တွေကို နှေးကွေးအောင် လုပ်နေသူ၊ အကြမ်းဖက် ရမ်းကားမှုများ၊ ဖိနှိပ်မှုများ၊ အကျင့်ပျက် ခြစား မှု များရဲ့ လက်သည် တရားခံ၊ တယောက် ဖြစ်နေလို့ ဒီလို ဒီမိုကရေစီ ရဲ့ ရန်သူအဖြစ် နာမည်ပျက် စာရင်းသွင်းရခြင်းပါ တဲ့။

ဒါကို ကြားက ငထွား ခါးနာ ဝင် ဖော့ “အမည်မည်းစာရင်းဝင်” လို့ သတင်းခေါင်းစဉ် မတပ်ချင်ကြပါနဲ့ ခင်ဗျာ။ မြန်မာစာ၊ အင်္ဂလိပ်စာ ဘာသာပြန် မကျေ ကြောင်းက ဒီလောက် ရှက်စရာ မဟုတ်၊ စစ်အာဏာရှင် ကို ဖာသည် လုပ်ခြင်းက ပိုလို့ ရှက်စရာ၊ အော့နှလုံးနာစရာ ကောင်းပါတယ်။

ပြည်တွင်း မီဒီယာ တချို့ကလည်း သိလျက်နဲ့လား၊ မသိလို့လား၊ အဆန်းထွင် တာ လား မသိ တခြား သတင်းတွေမှာပါ ဒီ ဘာသာပြန်ကြောင် အသုံး ကို ဆက်သုံးကြတာ လတ်တလော ဆက်ဖတ်လိုက်ရသေးတယ်။

ATM ကို အလိုအလျောက် စကားပြောစက် လုပ်ခဲ့ဖူးတဲ့ ဂျာနယ် ဆရာများ နောင် ဆို “black market” ကို “ဈေးမည်း”၊ “blackmail” ကို “စာမည်း”၊ “black look” ကို “အကြည့်မည်း” “black mood” ကို “စိတ်မည်း”၊ “black economy” “စီးပွားရေး မည်း” လို့များ ဘာသာပြန် ကြဦးမလား မသိ။

တက်တိုး (ဦးအုန်းဖေ) အဆင့် မဟုတ်ပေမဲ့လည်း ဆရာကြီး စကား ငှား ဆိုလိုက်ပါဦးမယ်။ သောက်ရမ်း ဘာသာမပြန်ကြပါနဲ့။ စာ အလုပ် လုပ်ကြရင် စာအုပ်ကလေးလည်း ဖတ်ကြပါ။ အနည်းဆုံး နည်းပညာ ခေတ်ကြီးမှာ အရာရာ “ဖိုးသိ” “ကိုတတ်ပါ့” ဖြစ်တဲ့ “Dr. Know” “Mr. Google” လေးတော့ အရင် ခေါက်သင့်ပါတယ်။

အခုလို စာနယ်ဇင်း အလွဲများ ကို ဒိုးခနဲ ဒက်ခနဲ မြင်ရင် မြင်သလို မနေနိုင် မထိုင်နိုင် ထောက်ပြ မတီးဘဲ မြည်တတ်တဲ့ ကျနော့် ကိုလည်း ဗမာ့စာနယ်ဇင်းရဲ့ ရန်သူအဖြစ် နာမည်ပျက်စာရင်း သွင်းချင်ကြမယ် ထင်တယ်။ ဗမာပြည် ရဲ့ နံပါတ် မှာ တစ် ဆိုပြီး ကိုယ့်ဘာသာ ကင်ပွန်းတပ် ထားတဲ့ မီဒီယာကြီး တခုကတော့ ကျနော့် ကို အမည်မည်း စာရင်း သွင်းထားတာ ကြာခဲ့ပါပြီ။ ကျန် နားခါးကြသူများလည်း ကျနော့်ကို “အမည်မည်း စာရင်းထဲ ထည့်လိုက်ကြပါ” ခင်ဗျာ။

ငြိမ်းချမ်းအေး

နိုဝင်ဘာ ၀၇၊ ၂၀၁၄

(ဆောင်းပါး ပါ အာဘော် နှင့် အချက်အလက် ကို ဝေဖန် ထောက်ပြ ပြစ်တင်ရန် nyeinchanaye81@gmail.com သို့ စာရေး နိုင်သည်။)

စာရေးသူ ၏ ဆက်စပ် ဆောင်းပါးဟောင်းများ ဖတ်ရန် —

၁) အိုဘားမားခရီးစဉ်မှ ဆင်ခြင်စရာများ

http://moemaka.com/archives/29392

http://moemaka.blogspot.com.au/2012/11/nyein-chan-aye-articles_22.html

၂) စာနယ်ဇင်းသမား အမှား တစ်ထောင်

http://moemaka.com/archives/36459

http://moemaka.blogspot.com.au/2014/03/nyein-chan-aye.html

၃) မထူးဆန်းတဲ့ အမှားများ

http://moemaka.com/archives/34949