ရသဆောင်းပါးစုံ အုန်းနုိုင်

အုန်းနိုင် – စစ်အုပ်ချုပ်ရေးလက်အောက်က ၁၉၉၀ ပါတီစုံဒီမိုကရေစီ ရွေးကောက်ပွဲ(၁၀)

စစ်အုပ်ချုပ်ရေးလက်အောက်က ၁၉၉၀ ပါတီစုံဒီမိုကရေစီ ရွေးကောက်ပွဲ(၁၀)
အုန်းနိုင်
ဧပြီ ၅၊ ၂၀၁၄

ကျောင်းသားလူငယ်များရဲ့ လုပ်အားပေးမှု
ကျောင်းတွေကလည်းမဖွင့်သေးတော့ အားလပ်နေတဲ့ ကျောင်းသားကျောင်းသူတွေရဲ့ တက်ကြွနေတဲ့အရှိန်ကို ကျွန်တော်တို့ရွေးကောက်ပွဲ မှာ ဝင်ရောက်လုပ်ကိုင်လာနိုင်ဖို့ စည်းရုံးရပါတယ်။ ရွေးကောက်ပွဲမှာ မဲစာရင်းရေးကူးခြင်းဆိုတာ အတော်အရေးပါတဲ့ လုပ်ငန်းတစ်ခုပါ။ ဒါကို ပါလီမန်ခေတ်ရွေးကောက်ပွဲတွေမှာ ထဲထဲဝင်ဝင် ပတ်သက်ဖူးမှ သိရတဲ့အတွေ့အကြုံပါ။ ကျွန်တော်က ၁၉၅၂ ခုနှစ်ပါလီမန် ရွေးကောက်ပွဲမှာ ကျောင်းသားလုပ်အားပေးအနေနဲ့အတိုက်အခံအဖွဲ့တစ်ခုကနေ မဲစာရင်းကူးတဲ့လုပ်ငန်းကို လုပ်အားပေးခဲ့ဖူးပါတယ်။ အဲဒီတုန်းကဖဆပလအဖွဲ့က ငွေကြေးတတ်နိုင်တော့ မဲစာရင်းတစ်မျက်နှာ (သုံးစုံ) ကူရင် ဘယ်လောက်ဆိုတဲ့နှုန်းနဲ့ ကူးခိုင်းပါတယ်။ လုပ်အားပေးနဲ့ အခစားကူးသူနဲ့ တန်ဖိုးချင်းမတူပါ။ ၁၉၅၆ ခုနှစ် ရွေးကောက်ပွဲကျတော့ တက္ကသိုလ်ကျောင်းသားဖြစ်နေပြီမို့လို့ မဲဆွယ်တရားပွဲတွေ လိုက်ဟောဖူးပါတယ်။ ၁၉၆ဝ ခုနှစ် ရွေးကောက်ပွဲကျတော့ ဝန်ထမ်းဖြစ်လို့မို့မဲရုံအရာရှိလုပ်ခဲ့ရပါတယ်။ ပါလီမန်ခေတ် ရွေးကောက်ပွဲ သုံးခုကို ထဲထဲဝင်ဝင်တွေ့ကြုံခဲ့ဖူးပါတယ်။ ဒါကြောင့် မဲစာရင်းရေးကူးတဲ့အလုပ်ကို ကျောင်းသားလူငယ်တွေအကူအညီနဲ့ လုပ်ဖို့ ဆုံးဖြတ်ပါတယ်။ ကျန်တဲ့ရွေးကောက်ပွဲဝင်ပါတီနဲ့ တသီးပုဂ္ဂလတွေက ဒီမဲစာရင်းရေးကူးခြင်းလုပ်ငန်းကို သိပ်အရေးမထားကြပါဘူး။

မြို့နယ်ကောင်စီခေတ်က ကောင်စီရုံးကိုဝင်ဖူးထွက်ဖူးပြီးရင်းနှီးတဲ့ရပ်ကွက်ကောင်စီဥက္ကဌ ဦးသိန်းလှနဲ့ဦးအောင်သိန်းကို မဲစာရင်းရေးကူးရာ မှာ ကြီးကြပ်ဖို့ တာဝန်ပေးပါတယ်။ မဲစာရင်းကူးတဲ့ လုပ်အားပေးများ ကျွေးမွေးဖို့ကိုတော့ ဦးကြီးညွန့်ကို တာဝန်ပေးပါတယ်။ ကျောင်းသား ကျောင်းသူ လူငယ်တွေလုပ်အားပေးခေါ်လိုက်တော့ ငါးဆယ်လောက်စာရင်းပေးကြပေမယ့် နေ့စဉ်ရေးကူးသူကတော့ ပျမ်းမျှသုံးဆယ် လောက်ရှိပါတယ်။

မဲစာရင်းကူးတဲ့အလုပ်က မြို့နယ်ခန်းမအတွင်းမှာ လုပ်ရပါတယ်။ စားပွဲကုလားထိုင်တွေ  အဆင်သင့်ရှိပါတယ်။ ပါတီစုံဒီမိုကရေစီရွေး ကောက်ပွဲကော်မရှင်က စာရေးကြီးဆီမှာ မဲစာရင်းများကို လက်မှတ်ထိုးထုတ်ယူပြီး ကူးရတာပါ။ စာရွက် သုံးရွက်ထပ်၊ ချုပ်စက်နဲ့တွဲ၊ အဲဒီ အထဲမှာ ကာဘွန်နှစ်ရွက်ခံပြီး ကူးတာပါ။ မိတ္တူသုံးစုံရပါတယ်။ ဒါကိုတစ်စုံစီဖြစ်အောင်တော့ အဖွဲ့ချုပ်ရုံးက ရုံးတာဝန်ခံဦးကြည်ဝင်းနဲ့အဖွဲ့က တာဝန်ခံလုပ်ပါတယ်။ ကျွန်တော်တို့အဖွဲ့က လုပ်အားပေးတွေမှာ တက္ကသိုလ်ကျောင်းသားကျောင်းသူတွေကဦးဆောင်ပြီး အထက်တန်း ကျောင်းသားကျောင်းသူတွေနဲ့ ကျေးရွာကလူငယ်တွေ ပါပါတယ်။ ဒါကြောင့် စနစ်ကျတယ်။ ကော်မရှင်ရုံးက စာရေးကြီးကလည်း တက္ကသိုလ်ကျောင်းသားတွေဆိုတော့ လေးလေးစားစား ဆက်ဆံတယ်။ သူတို့ဆီက နေ့တစ်နေ့အတွက် ကိုယ့်အင်အားအရကူးနိုင်လောက် မယ့်အရေအတွက်ရှိမယ့် ရပ်ကွက်နဲ့ကျေးရွာအုပ်စုမဲစာရင်းတွေ လက်မှတ်ထိုးပြီး ထုတ်ယူလိုက်တယ်။ စာရွက်က ရုံးကနေ အကွက်ရိုက် ပေးထားတဲ့ပုံစံစာရွက်တွေမို့ အပေါ်ရွက်၊ အောက်ရွက်အကွက်ချင်း ညီအောင်ထပ်ပြီးချုပ်၊ ကာဘွန်ထည့်ပြီးကူး၊ ကူးပြီးသွားတဲ့အုပ်စု၊ ဒါမှမဟုတ် ရပ်ကွက်ကို စာရေးကြီးဆီပြန်အပ်၊ နောက်တစ်အုပ်စုထုတ်ယူ ဆိုတာတွေကို တပျော်တပါးလုပ်ကြပါတယ်။ ကိုယ့်အိမ်က ထမင်းဘူးပါတဲ့သူ၊ အိမ်ပြန်ထမင်းစားတဲ့သူနဲ့ဆိုတော့ ထမင်းတော့မကျွေးရဘူး၊ လက်ဖက်ရည်၊ သရေစာ၊ အဖျော်စတာတွေသာ စီစဉ်ပေး ရပါတယ်။

မဲစာရင်းသုံးစုံအနက်တစ်စုံက ရပ်ကွက်/ကျေးရွာ အောင်နိုင်ရေးအဖွဲ့တွေကို ပေးရပါတယ်။ သူတို့ကရပ်ကွက်နဲ့ ကျေးရွာတွေမှာ တကယ်ရှိ တဲ့လူစာရင်းနဲ့ညှိပြီး မဲစာရင်းမပါသေးတဲ့သူတွေရှိရင် ထပ်ဖြည့်၊ ကွယ်လွန်တဲ့သူတွေကိုပယ်ဖျက် စတဲ့လုပ်ငန်းတွေကို ရပ်/ကျေးကော်မ ရှင်နဲ့ ညှိနှိုင်းပါတယ်။ ကိုယ့်အောင်နိုင်ရေးမှာ မဲစာရင်းရှိနေတော့ လူကုန်မဲပေးနိုင်အောင် လှုံ့ဆော်နိုင်သလို တခြားက မတရားတာတွေ လုပ်လာရင်လည်း ကာကွယ်နိုင်တာပေါ့။ မဲစာရင်းနောက်တစ်စုံကတော့မဲပေးတဲ့နေ့မှာ မဲရုံမှာရှိနေတဲ့ ကိုယ့်အဖွဲ့ မဲရုံကိုယ်စားလှယ်ကို ပေးထားမယ်။ သူကတကယ်မဲပေးတဲ့သူ ဟုတ် မဟုတ် စိစစ်နိုင်တယ်။ ကျန်နေတဲ့သူတွေရှိရင် အပြင်ကအောင်နိုင်ရေးတွေကို အကြောင်းကြားပြီး ဆော်သြနိုင်တယ်။ မဲစာရင်းနောက်တစ်စုံကတော့ ရုံးလက်ခံပေါ့။ ဒီရုံးလက်ခံကပဲ မဲဆွယ်လှုံ့ဆော်မဲကြို စာတမ်း ကလေးတွေ ကူးပေးပြီးဝေငှနိုင်တယ်။

လူငယ်နဲ့ ကျောင်းသားကျောင်းသူ လုပ်အားပေးများတဲ့ ကျွန်တော်တို့အဖွဲ့ဟာ ပျော်ပျော်ပါးပါး၊ စားစားသောက်သောက်နဲ့ ဒီအလုပ်ကို အရက်နှစ်ဆယ်၊ တလလောက်လုပ်ရပါတယ်။ ဒါဟာလည်း မဲဆွယ်စည်းရုံးခြင်းတမျိုးပဲ။ တစ်ဖက်က ယှဉ်ပြိုင်ဘက်အဖွဲ့ရဲ့ မဲစာရင်းရေးကူး သူများကို လူအင်အား၊ စိတ်ဓာတ်အင်အားနဲ့ပြိုင်တာ တမျိုးပါပဲ။ အခန်းမကြီးတစ်ခန်းထဲမှာ သူ့အုပ်စု၊ ကိုယ့်အုပ်စုရေးကူကြရာမှာ ကိုယ့်အုပ်စုက လူအင်အားကလည်းမြိုင်၊ စိတ်ဓာတ်အင်အားကလည်း ရှစ်လေးလုံးအရှိန်နဲ့ အပေါ်စီးရဆိုတော့ တစ်ဖက်အဖွဲ့တွေ မဲစာရင်း ပြီးအောင်မကူးတော့ပဲ ရပ်ဆိုင်းသွားပါတော့တယ်။ အပြင်ကပရိသတ်ကလည်း လက်ဖက်ရည်၊ ကြံရည်၊ ဖရဲသီး၊ အသုပ်စုံစတဲ့ အကျွေး အမွေးတွေနဲ့ဧည့်ခံရင်း လူအင်အားကိုကြည့်ပြီး အဖွဲ့ချုပ်ကို ပိုမိုယုံကြည်လာကြပါတယ်။ လူငယ်နဲ့ကျောင်းသားတွေကလည်း လုပ်ရင်း လူအားပိုများလာပြီး ပိုမိုအားတက်လာတဲ့အခါ မဲကြိုစာရွက်များမှာ ရေးကူးတဲ့အလုပ်ကိုပါ တစ်ဆက်တည်း ဆက်လုပ်လုပ်ကြပါတယ်။ ဒါတင်မကပါဘူး၊ ဒီမဲကြိုစာရွက်များကို ရပ်ကွက်/ကျေးရွာအုပ်စု အိမ်တိုင်ယာရောက် လိုက်ဝေတဲ့အလုပ်ကိုပါ သူတို့တာဝန်ယူချင်ပါတယ် ဆိုလို့ မြို့နယ်စည်းကော်မတီက ဦးမြင့်စိုး၊ ဦးသိန်းလွင်တို့ဦးဆောင်ပြီး တာဝန်ပေးလိုက်ပါတယ်။ မဲကြိုစာရွက်ဝေငှရင်း မဲဆွယ်စည်းရုံးတာပါ တပြိုင်နက်လုပ်ကြတာပေါ့။

သူတို့လူငယ်တွေမှာလည်း ကျောင်းပိတ်လို့အားနေတဲ့အချိန်မှာ သူတို့သက်တမ်းမှာ မကြုံဖူးသေးတဲ့ ဒီမိုကရေစီလှုပ်ရှားမှုတမျိုးကိုလုပ်နေရလို့ တက်ကြွနေကြပါတယ်။ သူတို့မိဘတွေကလည်း ကျောင်းတွေပိတ်ထားတုန်း အလကားလေနေမယ့်အစား ဒီအလုပ်မျိုးတွေ လုပ် နေတာကို ရှစ်လေးလုံးအရှိအရ သဘောကျကြပါတယ်။ ကျွန်တော်တို့အဖွဲ့ကလည်း စည်းရုံးရေး ပိုတက်လာတယ်။ ဒီလိုအကျိုးအမြတ်ကို ဘယ်အဖွဲ့ကမှ မရကြပါ။ ရအောင်လည်း မယူတတ်ကြပါ။ ရန်ကုန်ကလာတဲ့သူတွေကတောင် သဘောကျသွားတယ်။ ငွေကုန်ကြေးကျ လည်း မများဘူး။ တစ်ဖက်အဖွဲ့အစည်းတွေကလည်း ဒီလုပ်ငန်းရဲ့စည်းရုံးရေးရာအနှစ်သာရကို မကြုံဖူးလို့ နားမလည်ဘူး။ ပြီးတော့ သူတို့ မှာ ကိုယ့်အဖွဲ့လို တကယ်စေတနာသန့်သန့်၊ စိတ်ထက်ထက်သန်သန်နဲ့ လုပ်ပေးမယ့် လူအင်အားလည်း စည်းရုံးပြီးသားမရှိဘူး။

အင်အယ်ဒီက မဲစာရင်းကူးတယ်ဆိုတော့ သူတို့လည်းကူးမယ်လို့ ကော်မရှင်ကိုလျှောက်တယ်။ မဲစာရင်းငှားခ (မဲစာရင်းကူးခ) ငွေ ၁ဝဝိ/-ဘဏ်ကိုသွင်းရတယ်။ ငွေကများတာမှမဟုတ်ပဲ။ သူတို့လည်း လွယ်လွယ်ငွေသွင်းကြတာပေါ့။ တကယ်ကူးမယ်ဆိုတော့ ကော်မရှင်ရုံး အမှုထမ်းတွေက ရပ်ကွက်ကျေးရွာမဲစာရင်းများကို တစ်ဖွဲ့ဘယ်နှရပ်ကွက်၊ ကျေးရွာအုပ်စုဘယ်လောက် စာရင်းနဲ့ထုတ်ပေးတယ်။ အမျိုးသားဒီမိုကရေစီအဖွဲ့ချုပ်က မဲစာရင်းကူးတဲ့သူတွေမှာက စည်စည်ကားကား၊ သွက်သွက်လက်လက် လုပ်ကြကိုင်ကြ၊ စားကြ သောက်ကြ၊ ကော်မရှင်ရုံးက သူတွေကိုလည်း ကျွေးကြ မွေးကြပြီး ဒီပြင်အဖွဲ့ကသူတွေကိုလည်း လာပြီးစားကြပါ၊ သောက်ကြပါ ဖိတ်ကြ တော့ ဒီ့ပြင်အဖွဲ့နှစ်ဖွဲ့က မဲစာရင်းကူးတဲ့သူများဟာ နှစ်ရက်သုံးရက်ထက်ပိုပြီး ဒီဒဏ်ကိုမခံနိုင်တော့ဘူး။ မဲစာရင်း ဆက်မကူးတော့ဘူး။ ဒါဟာ ဒီမိုကရေစီရွေးကောက်ပွဲတွေမှာ စည်းရုံးရေးအရ အသာစီးရလိုက်တာပဲ။ ကိုယ့်ဘက်က ကျောင်းသားလူငယ်တွေလည်း ပိုပြီးအား တက်လာတယ်။ ဒီရက်တွေမှာတော့ ရန်ကုန်ဌာနချုပ်ကိုလည်း သိပ်ပြီးခြေဦးမလှည့်နိုင်ဘူး။ လိုအပ်တဲ့ ကိုယ်စားလှယ်လောင်းများ ကိုယ် ရေးရာဇဝင်၊ မဲဆွယ်ကပ်ပြားများ ရိုက်နှိပ်ဖို့လောက်ပဲ ရောက်တယ်။

မြို့နယ်မှာနေတဲ့ရက်များမှာတော့ ရက်ဆက်ပဲ တရွာပြီးတရွာ လှည့်ရတော့တာပဲ။ ကိုယ့်မြို့ကလူတွေကလည်း တက်ကြွပါတယ်။ ပင်ပန်း တယ်ရယ်လို့ မရှိဘူး။ ကျေးရွာဆင်းတဲ့လူအင်အားလည်း လျော့မသွားဘူး။ မဲစာရင်းကူးပြီးတဲ့ကျောင်းသားလူငယ်တွေက မဲကြိုကပ်ပြား တွေကို သူတို့ပဲကူးပြီး သူတို့ပဲကျေးရွာတွေအရောက်လိုက်ဝေလို့ အဖွဲ့ချုပ်စည်းကော်မတီဝင်တွေသာမက အဖွဲ့ချုပ်လူငယ်က ကိုဌေးဝင်း ဇော်တို့ ကိုမြင့်ဇော်ဦးတို့ပါ လိုက်နေကြရပါတယ်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa English Site

Similar Posts