သမိုင်းတကွေ့မှ သခင်တင်မြ – အပိုင်း (၁)

အသက်(၆)နှစ်သားတွင် ဆရာဦးချစ်ဖူး၏ မူလတန်းကျောင်းတွင် ၄ တန်းအထိ ပညာသင်ကြားခဲ့သည်။ အသက် ၁ဝ နှစ်သားတွင် ဓနုဖြူမြို့ ခင်မကန်တိုက် ဘကြီးတော်သူ ဆရာတော် ဦးသုတထံတွင် ရှင်သာမဏေ ဝတ်၍ အတွင်းအောင်ခြင်း၊အပြင်အောင်ခြင်းနှင့်သင်္ဂြိုဟ်၊သဒ္ဒါကျမ်းများကိုဆည်းပူးခဲ့သည်။ ဘုန်းတော်ကြီး ကျောင်းတွင် လောကုတ္တရာ စာပေကျမ်းဂန်များ သင်ကြားနေစဉ်အတွင်းလောကီစာပေဝတ္ထုများ စိတ်ဝင်တစား လေ့လာဖတ်ရူခဲ့သည်။

၁၃ဝဝ ပြည့်အရေးတော်ပုံကြီး ဖြစ်ပွားသောအခါ သာမဏေမှ လူထွက်၍၊ ကျောင်းသားသပိတ်တွင် ကျောင်းသားဟောင်းအနေဖြင့် ပါဝင်လှုပ်ရှားခဲ့သည်။ ထိုစဉ်က အသက် ၁၂ နှစ်သာ ရှိသေးသည်။ ၁၉၃၉ ခုနှစ် မေလတွင် သပိတ်များ ပြီးစီးသောအခါ ဓနုဖြူမြို့၌ သခင်ဗဟိန်း ခေါင်းဆောင်သော တို့ဗမာအစည်းအရုံးတွင် သခင်အဖြစ် ၁၃ နှစ်သားအရွယ်တွင် အသင်းဝင်ခဲ့သည်။ သခင်အဖွဲ့ဝင်အဖြစ် အချိန်ပြည့်ပါဝင် ဆောင်ရွက်ခဲ့သည်။ ၁၉၃၉ ဇွန်လတွင် မြို့နယ်သခင် ခေါင်းဆောင်များနှင့်အတူ ကျေးရွာများသို့ ကွင်းဆင်း၍ ၊ လယ်ခွန်နှစ်ဆ သီးစားခပေးရေးတိုက်ပွဲအတွက် စည်းရုံးဆောင်ရွက်ခဲ့သည်။ထိုနှစ် စက်တင်ဘာလလောက် တွင် သာယာဝတီ လွှတ်တော်အမတ် သခင်မြအဖွဲ့ဝင် အဖြစ်ပါဝင်သော လယ်ယာမြေစုံစမ်းရေးကော်မရှင် ဓနုဖြူမြို့သို့ ရောက်ရှိလာစဉ် မြို့နယ်အတွင်းရှိ ကျေးရွာလယ်သမား ခေါင်းဆောင်များကို ဖိတ်ခေါ်၍ ကော်မရှင်ထံ သီးစားခ လျှော့ပေါ့ရေးအတွက် အစစ်ဆေးခံရန် စုရုံးပေးရာတွင် ပါဝင်ခဲ့သည်။

၁၉၄ဝ ပြည့်နှစ် နှစ်ဦးလောက်တွင် ဓနုဖြူမြို့နယ် တို့ဗမာအစည်းအရုံးက ဦးဆောင်၍ ဗမာ့လက်ရုံးတပ် ဖွဲ့စည်းရာတွင် တပ်မှူးအဖြစ် ပါဝင်ခဲ့သည်။ ၁၉၄ဝ ပြည့်နှစ် မေလ ၁၁ မှ ၁၃ ရက်နေ့အထိ သာယာဝတီမြို့တွင် ကျင်းပသော တို့ဗမာအစည်းအရုံး သခင်ညီလာခံတွင် ၊ သခင်ဘသိန်းက ဗမာနိုင်ငံလုံးဆိုင်ရာ သခင်ညီလာခံ ကိုယ်စားလှယ်အဖြစ်လည်းကောင်း၊ သခင်တင်မြက ဗမာ့လက်ရုံးတပ်ဖွဲ့မြို့နယ် တပ်မှူးအဖြစ်လည်းကောင်း တက်ရောက်ခဲ့သည်။

ညီလာခံရက်အတွင်း သုံးဆယ်မြို့ ရုပ်ရှင်ရုံ၌ ညဘက်တွင် ဝါဒဖြန့်ချိရေး တရားများ ဟောရသည်။ ယင်းတရားဟောမှုဖြင့် ကာကွယ်ရေးပုဒ်မ ၃၈ အရ ဇူလိုင်လ၌ ဓနုဖြူမြို့တွင် အဖမ်းခံရကာ ထောင်ဒဏ် အပြစ်ပေးခံရသည်။  ထို့နောက် သာယာဝတီ ထောင်ထဲသို့ ရောက်ခဲ့သည်။ သာယာဝတီထောင်မှတဆင့် ရန်ကုန်မြို့ အင်းစိန်ဗဟိုအကျဉ်းထောင်သို့ ထောင်ပြောင်းရွှေ့ခံရသည်။ အင်းစိန်ထောင်တွင် သခင်စိုး၊ သခင်သန်းထွန်းတို့ထံတွင်နေ့ဘက်၌ နိုင်ငံရေးသင်တန်းတက်ခဲ့ပြီး၊ ညဖက်တွင်သခင်နု၊သခင်သန်းထွန်းတို့ ထံ တွင် အင်္ဂလိပ်စာ သင်ကြားခဲ့သည်။

၁၉၄၁ ခုနှစ် ဧပြီလတွင် ထောင်မှ လွတ်ခဲ့သည်။ ထောင်မှမလွတ်မီ သခင်စိုးထံ ကွန်မြူနစ်ပါတီသို့ ဝင်ရောက်လိုကြောင်း ပြောကြားရာ၊ သခင်စိုးက အသိအမှတ်ပြုပြီး ထောင်ပြင်ရှိ ကိုဗဟိန်းထံသို့ စေလွှတ်လိုက်သည်။ ထိုနေ့မှစ၍ ကိုဗဟိန်းထံတွင် မြေအောက်စည်းရုံးရေး တာဝန်ကို ယူခဲ့ရသည်။

မြေအောက်စည်းရုံးရေးအဖွဲ့        (Underground Unit)သည် နောင်တွင်ပြည်သူ့အရေးတော်ပုံအဖွဲ့ ဖြစ်လာသောအခါ နဂါးနီဦးထွန်းရွှေ၊ သခင်ချစ်၊ သခင်မြ၊ ကိုကျော်ငြိမ်း၊ ကိုဗဆွေ၊ ကိုလှမောင် (မိတ္ထီလာ) တို့နှင့်အတူ ဆက်သွယ်ဆောင်ရွက်ရသည်။

ပဲခူးနယ်နှင့်အထက်ဗမာပြည် မိတ္ထီလာ၊ မြင်းခြံ၊ ပခုက္ကူ၊ မန္တလေးသို့လည်း စည်းရုံးရေး ဆင်းခဲ့ရသည်။ မြေအောက်ကွန်မြူနစ်ပါတီအမည်ဖြင့်ထုတ်ဝေသော ဗမာ့တော်လှန်မှုအမှတ်(၁)၊အမှတ်(၂)တို့ ထုတ်ဝေရာတွင် လည်း ပါဝင်ဆောင်ရွက်ခဲ့သည်။

ဆရာတင်မြသည် ၁၉၄၁ ဒီဇင်ဘာတွင် ကျောင်းသားခေါင်းဆောင် ကိုသိန်းအောင်နှင့်အတူ ရခိုင်တိုင်း(ယခုပြည်နယ်)သို့ စည်းရုံးရေး ဆင်းရာတွင်လည်း ပါဝင်ခဲ့သည်။

၁၉၄၂ ခုနှစ် ဖေဖေါ်ဝါရီလတွင် ရန်ကုန်မြို့သို့ ပြန်ရောက်ခဲ့ပြီးနောက် သခင်ချစ် (နောင်ဗကပ အတွင်းရေးမှူး – ကျဆုံး) စီစဉ်ပေးသဖြင့် ပြည်တွင်းသူပုန် ခေါင်းဆောင်ရန် ပြည်လည်ရောက်ရှိလာသော သခင်ရူမောင်ခေါ် ဗိုလ်နေဝင်းနှင့် တွေ့ဆုံရသည်။ သူ၏ တာဝန်ပေးချက်အရ အထက်ဗမာပြည် ထောင်အသီးသီးတွင် ထောင်ကျနေသော သခင်ခေါင်းဆောင်များ လွတ်မြောက်ရေးအတွက် သခင်ဗတင် (လက်သီးပုန်း) နှင့်အတူ ကြိုးပမ်းဆောင်ရွက်ခဲ့ရသည်။ ထို့နောက် သခင်တင်မြသည် ဓနုဖြူသို့ ရောက်နေစဉ် ဗိုလ်ရန်နိုင်နှင့် တွေ့ဆုံဆွေးနွေး၍ ဘီအိုင်အေခေါ် ဗမာ့လွတ်လပ်ရေး တပ်မတော်တွင် တာဝန်ပေးခြင်း ခံခဲ့ရသည်။ ရန်ကုန်မှ သခင်ဗိုလ်က ခေါ်သဖြင့် ရန်ကုန်ပြန်ရောက်သွားရာမှ ဗိုလ်ကျော်ဇောတို့ တွေ့ဆုံကာ ဗိုလ်သင်တန်းတက်ရန် တာဝန်ပေးခံရသည်။

သခင်မြသည် ၁၉၄၂ ခုနှစ် မေလ ၄ ရက်နေ့တွင် မသန်းမြင့်ခေါ် မဖြူနှင့် လက်ထပ်သည်။ မေလ ၉ ရက်နေ့တွင် ရန်ကုန်သို့ သွားရောက်၍ သခင်နု၊ သခင်သန်းထွန်း၊ ဗိုလ်ချုပ်အောင်ဆန်းတို့နှင့် တွေ့ဆုံခဲ့ရသည်။ ယင်းနောက် ရဲဘော်သုံးကျိပ်ဝင် ဗိုလ်လင်းယုန်တပ်တွင် တာဝန်ပေးခြင်းခံရသည်။ ၁၉၄၂ ဇွန်လတွင် ကိုသိန်းဖေ၊ ကိုတင်ရွှေတို့ကို သခင်စိုးနှင့်အတူ အိန္ဒိယသွားရန် ရခိုင်သို့ လိုက်ပို့် ခဲ့ရသည်။ ထိုနှစ် ဇူလိုင်လတွင် ရန်ကုန်မြို့၌ သခင်စိုးသည် မြေအောက်ကွန်မြူနစ်ပါတီ ထူထောင်ရာတွင် သခင်စိုး၏ လက်ထောက်အဖြစ် တာဝန်ယူခဲ့သည်။

၁၉၄၃ ခုနှစ် စက်တင်ဘာလတွင် ကိုကျော်ရင်နှင့်အတူ တရုတ်ပြည်သို့ သွားရန် တာဝန်ပေး ခံခဲ့ရသော်လည်း၊ အောင်မြင်မှုမရ၍ ပြန်လာခဲ့ရသည်။ ထိုစဉ်အတွင်း အိန္ဒိယရှိ ကိုသိန်းဖေထံမှ ပြန်လည်ရောက်ရှိလာသော သခင်တင်ရွှေကို သခင်စိုးရှိရာ ကျိုက်လတ်မြို့ နယ် ညောင်ချောင်းရွာသို့ လိုက်လံပို့ဆောင်ပေးရသည်။

၁၉၄၄ ခုနှစ် ဇန်န၀ါရီလတွင် ကွန်မြူနစ်ပါတီ နိုင်ငံလုံးဆိုင်ရာ ပထမအကြိမ် ကွန်ကရက်ကို ဖျာပုံခရိုင်၊ ကျိုက်လတ်မြို့နယ်၊ ညောင်ချောင်းရွာတွင် လျှို့ဝှက် ကျင်းပရာ သခင်တင်မြသည် ပါတီ၏ ဗဟိုကော်မတီဝင်အဖြစ် တာဝန်ပေးအပ်ခံရသည်။ တဆက်တည်းမှာပင် ရန်ကုန်ဆက်သွယ်ရေး တာဝန်ခံအဖြစ် တာဝန်ယူ ဆောင်ရွက်ခဲ့ရပြီး သခင်သန်းထွန်း၊ ဗိုလ်ချုပ်အောင်ဆန်း၊ ဗိုလ်လက်ျာ၊ သခင်ဗဟိန်း၊ သခင်နုတို့အကြား ဆက်သွယ်လုပ်ကိုင်ခဲ့ရသည်။ ၁၉၄၄ သြဂုတ်လ ၄ ရက်မှ ၇ ရက်နေ့အထိ ပဲခူးမြို့ ဗမာ့တပ်မတော် စံပြတပ်ရင်းရှိ ဗိုလ်ကျော်ဇောအိမ်၌ ဗိုလ်ချုပ်အောင်ဆန်းနှင့် ဗမာပြည်ကွန်မြူနစ်ပါတီမှ ကိုယ်စားလှယ် သခင်စိုး၊ သခင်သန်းထွန်းတို့ လျှို့ဝှက်တွေ့ဆုံ ဆွေးနွေးနိုင်ရန် ဗိုလ်ကျော်ဇောနှင့်အတူ အစီအစဉ်များ ပြုလုပ်ပေးခဲ့သည်။ ဗိုလ်ချုပ်အောင်ဆန်း၊ သခင်စိုး၊ သခင်သန်းထွန်းတို့ တွေ့ဆုံဆွေးနွေး အပြီးတွင် ဖက်ဆစ်တိုက်ဖျက်ရေးအဖွဲ့ ဖွဲ့စည်းရန် သဘောတူ ဆုံးဖြတ်နိုင်ခဲ့သည်။

ယင်းနောက် ၁၉၄၄ စက်တင်ဘာလတွင် ပြည်သူ့အရေးတော်ပုံပါတီမှ ဗိုလ်မောင်မောင်၊ ဗိုလ်အောင်ကြီး၊ ဗိုလ်ခင်မောင်ကလေး၊ ဦးဗဆွေတို့ သခင်စိုးနှင့် တွေ့ဆုံဆွေးနွေးအပြီးတွင် “တော်လှန်ရေးတပ်ဦး” ဖွဲ့စည်းရန် အတွက် တစ်ပါတီတည်းအဖြစ် ပူးပေါင်းရေးတွင် ပါဝင်ဆောင်ရွက်ခဲ့သည်။

၁၉၄၅ မတ်လ ၁ ရက်မှ ၃ ရက်နေ့အထိ ရန်ကုန်မြို့ပတ်လမ်း (ယခု နတ်မောက်လမ်း) ဗိုလ်ချုပ်အောင်ဆန်းနေအိမ်တွင် ကျင်းပခဲ့သော ဖက်ဆစ်တိုက်ဖျက်ရေးနှင့် ပြည်သူ့အဖွဲ့ချုပ် အစည်းအဝေးတွင် ဖက်ဆစ်တိုက်ဖျက်ရေး ပြည်သူ့အဖွဲ့ချုပ် (ဖတပ) ကိုဖက်ဆစ်တိုက်ဖျက်ရေး ပြည်သူ့လွတ်လပ်ရေး အဖွဲ့ချုပ် (ဖတပလ) ဟု ပြင်ဆင်ပြီး ဖတပလ ဦးစီးအဖွဲ့ကို တပ်မတော်ကိုယ်စားလှယ်၊ ပြည်သူ့အရေးတော်ပုံပါတီနှင့် ကွန်မြူနစ်ပါတီတို့မှ ကိုယ်စားလှယ်သုံးဦးစီဖြင့် ဖွဲ့စည်းရာတွင် သခင်တင်မြသည် သခင်စိုး၊ သခင်သန်းထွန်း တို့နှင့်အတူ ကွန်မြူနစ်ပါတီ ကိုယ်စားလှယ်အဖြစ် တက်ရောက်၍ ဖတပလ ဗဟိုဦးစီး အဖွဲ့ဝင်အဖြစ် ပါဝင်ခဲ့သည်။

အဆိုပါ အစည်းအဝေးမှပင် ဖက်ဆစ်တော်လှန်ရေး ဆင်နွှဲရန် စစ်တိုင်းကြီးများ ဖွဲ့စည်းခဲ့ရာ တိုင်း (၆) ၌၊ သခင်တင်မြ နိုင်ငံရေးမှူးအဖြစ် ဆောင်ရွက်ရန် တာဝန်ပေးခြင်း ခံခဲ့ရသည်။ စစ်ရေးခေါင်းဆောင်မှာ ဗိုလ်မှူးအောင် (ရဲဘော်သုံးကျိပ်) ဖြစ်သည်။ ဖက်ဆစ်တော်လှန်ရေး ၁၉၄၅ မတ်လ ၂၇ ရက်နေ့တွင် စစ်ဖြစ်ပွားခဲ့ရာ သခင်တင်မြသည် ခြေထောက်၌ သေနတ်ထိမှန်ခဲ့သည်။

၁၉၄၅ ဇူလိုင်လ ၂ဝ မှ ၂၇ ရက်နေ့အထိ ဗမာပြည်ကွန်မြူနစ်ပါတီ၏ ဒုတိယအကြိမ်မြောက် ပါတီကွန်ဂရက် ညီလာခံကို ပြန်လည်ဖွဲ့စည်းရာ ကွန်ဂရက်မှ သခင်စိုးကို အိမ်ထောင်ရေး ပြဿနာကြောင့် အထွေထွေ အတွင်းရေးမှူးရာထူးမှ ချထားပြီး ပါတီဝင်အဖြစ်မှ ၂ နှစ်ကြာ ရပ်စဲထားရန် ဆုံးဖြတ်ပြီး အထွေထွေ အတွင်းရေးမှူးအဖြစ် အိန္ဒိယသို့ ရောက်ရှိနေသော သခင်သိန်းဖေ (စာရေးဆရာ သိန်းဖေမြင့်) အား ရွေးကောက် တင်မြှောက်ကြသည်။ သခင်သိန်းဖေ အိန္ဒိယမှ ပြန်မလာမီ သခင်မြသွင် (ဒေးဒရဲ) အား ခေတ္တ အထွေထွေအတွင်းရေးမှူးအဖြစ် ဆောင်ရွက်ရန် တာဝန်ပေးခဲ့သည်။ ထိုစဉ်က သခင်သန်းထွန်းမှ ဖတပလတွင် အထွေထွေအတွင်းရေးမှူး တာဝန်ယူ ဆောင်ရွက်နေချိန် ဖြစ်သည်။ ကွန်မြူနစ်ပါတီ၏ နိုင်ငံရေး ဦးဆောင် အဖွဲ့ဝင်များမှာ သခင်သိန်းဖေ၊ သခင်သန်းထွန်း၊ သခင်မြသွင်၊ သခင်ဗဟိန်းနှင့် သခင်ဗသိန်းတင်တို့ ဖြစ်သည်။ သခင်သိန်းဖေမှာ ၁၉၄၅ အောက်တိုဘာလ ၁၅ ရက်နေ့အထိ အိန္ဒိယပြည် ကာလကတ္တားမြို့တွင် ရှိနေဆဲ ဖြစ်သည်။

၁၉၄၅ စက်တင်ဘာလ ၁၆ ရက်နေ့တွင် သခင်စိုးသည် ရန်ကုန်မြို့ရှိ ဗြိတိသျှကွန်မြူနစ်ပါတီ ပါတီဝင်တစ်ဦးဖြစ်သူ လေတပ်အရာရှိ တစ်ဦး၏ အကူအညီဖြင့် အိန္ဒိယသို့ တိတ်တဆိတ် ထွက်ခွာသွားသည်။ အထွေထွေအတွင်းရေးမှူး သခင်သိန်းဖေသည် ကာလကတ္တားမြို့မှ မြန်မာနိုင်ငံသို့ အောက်တိုဘာ ၁၇ ရက်နေ့တွင်ပြန်လည်ရောက်ရှိလာသည်။သူနှင့်အတူ မန်းဝင်းမောင်၊ ကိုချစ်ကောင်း (နောင်ဗိုလ်မှူးချစ်ကောင်း)၊ ကက်ဦးသန်းခေါ် မောင်သန်း၊ သခင် တင်ရွှေနှင့် ဇနီးဒေါ်မြရီနှင့် ကလေးများပါ လာကြသည်။

၁၉၄၅ ဒီဇင်ဘာတွင် သခင်စိုး ရန်ကုန်သို့ တိတ်တဆိတ် ရခိုင်ပြည်နယ်မှတဆင့် ပြန်ရောက်လာသည်။ သခင်စိုး အိန္ဒိယသို့ တရားမဝင် သွားရောက်ခဲ့သဖြင့် ဒေါ်မန်စမစ်၏ ဘုရင်ခံအစိုးရ စုံထောက်များက ဖမ်းဆီးရန် လိုက်လံစုံစမ်းနေသည်။ ၁၉၄၅ ဒီဇင်ဘာ ၇ ရက်နေ့မှ ၁၃ ရက်နေ့အထိ ဗမာပြည်ကွန်မြူနစ်ပါတီ ဗဟိုကော်မတီ အစည်းအဝေးကျင်းပကာ ဗမာပြည်ကွန်မြူနစ်ပါတီက ဦးဆောင်ဖွဲ့စည်းထားသော ဗမာနိုင်ငံလုံးဆိုင်ရာ အလုပ်သမားများ သမဂ္ဂ (A.B.T.W.E) အဖွဲ့ချုပ်ရုံးကို ဗားဂရာလမ်းမှ စမ်းချောင်းမြို့နယ် မြေနီကုန်းမြေနုလမ်း အမှတ်၁၄ ရှိ သခင်ဗဟိန်း အိမ်အောက်ထပ်သို့ ပြောင်းရွှေ့ဖွင့်ပွဲ ကျင်းပသည်။ ယင်းဖွင့်ပွဲသို့ ဘုရင်ခံ ဒေါ်မန်စမစ်အား ဖိတ်ကြားရာ ၊ ဘုရင်ခံတက်ရောက်၍ ဖွင့်လှစ်ပေးခဲ့သည်။ ဘုရင်ခံနှင့် အဖွဲ့ချုပ်၏ ဥက္ကဌသစ် သခင်စိုးကို မိတ်ဆက်ပေးခဲ့ရာ ဘုရင်ခံက အသိအမှတ်ပြု လက်ဆွဲနုတ်ဆက်ခဲ့သော သခင်စိုးကို စုံထောက်များ အဖမ်းခံ ခက်သွားခဲ့သည်။

ဖတပလကို ၁၉၄၅ ဒီဇင်ဘာလ ၁၃ ရက်နေ့တွင် ဖဆပလ ဟု အမည်ပြောင်းလဲပြီးနောက် ၁၉၄၆ ဇန်နဝါရီလ ၁၇ ရက်မှ ၂၃ ရက်နေ့အထိ ဖဆပလ အဖွဲ့ချုပ်၏ ညီလာခံကို ရွှေတိဂုံဘုရား အလယ်ပစ္စယံတွင် စတင်ကျင်းပခဲ့သည်။ယင်းညီလာခံအတွက် မြို့နယ်အသီးသီးမှ ညီလာခံကိုယ်စားလှယ်များကို ရွေးချယ်စိစစ်ရန် အဖွဲ့ငယ်တစ်ဖွဲ့ကိုဥက္ကဌဗိုလ်ချုပ်အောင်ဆန်းကဖွဲ့စည်းပေးခဲ့ရာညီလာခံကိုယ်စားလှယ်များကို ဆိုရှယ်လစ်ပါတီမှ ဦးကျော်ငြိမ်း၊ ကိုတင်ညွှန့် (နောင်ဖဆပလ အလုပ်သမားဝန်ကြီး) ကွန်မြူနစ်ပါတီမှ သခင်ဗဟိန်းနှင့် သခင်တင်မြတို့က ရွေးချယ်ပေးခဲ့ကြသည်။ အမှန်စင်စစ် သခင်ဗဟိန်းမှာ ဖျားနေသဖြင့် အစည်းအဝေးသို့ တစ်ခါမှ မတက်နိုင်သဖြင့် သခင်တင်မြ တစ်ယောက်တည်းသာ ကွန်မြူနစ်ပါတီ ကိုယ်စားလှယ်များအတွက် တာဝန်ယူဖြေရှင်းပေးခဲ့ရသည်။

၁၉၄၆ ဖေဖော်ဝါရီလ ၂ဝ တွင် သခင်စိုး၏ တောင်းဆိုချက်အရ ကွန်မြူနစ်ပါတီ ဗဟိုကော်မတီ အစည်းအဝေးကို ခေါ်ယူခဲ့သည်။ ဖဆပလ ညီလာခံသို့ မြို့နယ်၊ ခရိုင်အသီးသီးမှ တက်ရောက်လာကြသော ကွန်မြူနစ်ပါတီကိုယ်စားလှယ်များကို ညပိုင်းတွင် သခင်စိုးသည် စမ်းချောင်း ဗားဂရာလမ်းရှိ အမှတ် ၁၈ဝ ကွန်မြူနစ်ပါတီဌာနချုပ်သို့ ခေါ်၍ဆွေးနွေးလေ့ ရှိသည်။  ဆွေးနွေးသည့် အကြောင်းအရာများမှာ ကွန်မြူနစ်ပါတီထဲတွင် လွှမ်းမိုးနေသော “ဘရောက်ဒါဝါဒ” (စစ်ပြီးခေတ်တွင် နယ်ချဲ့သမားများသည် အင်အားနည်းပါးသွားပြီ ဖြစ်၍လည်းကောင်း၊ ဆိုရှယ်လစ်ဂိုဏ်းနှင့် လွတ်လပ်ရေးတိုက်ပွဲဝင်နေသော ကိုလိုနီနိုင်ငံများနှင့် ပြည်သူလူထုများ နိုးကြားစည်းလုံးလာသဖြင့် လည်းကောင်း၊ ငြိမ်းချမ်းစွာ လွတ်လပ်ရေး ရရှိနိုင်သည်ဟူသော နိုင်ငံရေးအယူအဆ) မှားယွင်းကြောင်း၊ ဘရောက်ဒါဝါဒ ကို တိုက်ဖျက်၍ လွတ်လပ်ရေးကို လက်နက်ကိုင် တော်လှန်မှသာ ရရှိနိုင်မည်ဖြစ်ကြောင်း ဆွေးနွေးခြင်း ဖြစ်သည်။ ၎င်းကိုယ်စားလှယ်များက သခင်စိုး၏ နိုင်ငံရေး သဘောထားကို လက်ခံခဲ့ကြသည်။

ဖဆပလ ညီလာခံအပြီးတွင် ကွန်မြူနစ်ပါတီဝင် နယ်ကိုယ်စားလှယ်များသည် ၁၉၄၆ ဖေဖော်ဝါရီလ ၂၂ ရက်နေ့တွင်ကျင်းပသောကွန်မြူနစ်ပါတီ ဗဟိုကော်မတီအစည်းအဝေးသို့ ဆက်တက်ခဲ့ကြသည်။ ဗဟိုကော်မတီ အစည်းအဝေးတွင် ပုဂ္ဂိုလ်ရေး အာဃာတ တရားများကြောင့် ကွန်မြူနစ်ပါတီ နှစ်ခြမ်းကွဲသွားရာ သခင်တင်မြသည် သခင်စိုး ခေါင်းဆောင်သော အလံနီ ကွန်မြူနစ်ပါတီခေါ် ကွန်မြူနစ်ပါတီ (ဗမာပြည်) တွင် ပါဝင်သွားခဲ့လေသည်။

(ဆက်လက်ဖော်ပြပါမည်)

---

သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ