ရသဆောင်းပါးစုံ အရှင်ဉာဏိက

အသက်နဲ့ ထပ်တူ

အရှင်ဉာဏိကာဘိဝံသ (ကာလီဖုိုးနီးယား တက္ကသုိုလ်)

ဖေဖော်ဝါရီ ၂၇၊ ၂၀၁၃

 

သဗ္ဗဒါနံ ဓမ္မဒါနံ ဇိနာတိ = တရားအလှူသည် အလှူအားလုံးကုို အောင်နုိုင်၏။ (ဗုဒ္ဓ)

 

မနေ့ကပဲ မြန်မာ့ရုိုးရာထမနဲပွဲနဲ့ ကုိုယ့်ရဲ့မွေးနေ့ပွဲကုို ပေါင်းပြီးပြုလုပ်ခဲ့တယ်။ ရင်းနှီးကြည်ရွှင် ချစ်ခင်သူများ စုပေါင်းပြုလုပ်တဲ့ပွဲမုို့ ပရိတ် သတ်များ စည်စည်ကားကားပါပဲ။ စုပေါင်းကာ ကုသုိုလ်ပါဝင်သူတွေကလည်း စေတနာသဒ္ဓါထက်သန်စွာ။ ထမနဲပွဲအလှူမှာ အနီးနေ အဝေးနေသူတွေ၊ လုပ်အားဒါနပြုကြတဲ့ လူငယ်လူရွယ်တွေ စားသောက်ဖွယ်အမျိုးမျိုးကုို မပန်းနုိုင်စွာ ကုိုယ်တုိုင်ချက်ပြုတ်ကာ လှူဒါန်း ကြသူတွေ၊ ပြန်ကြည့်စရာ မလုိုလောက်အောင်ကုိုပဲ သန့်ရှင်းရေးကစလုို့ ပစ္စည်းပစ္စယအသုံးဆောင်များ နေရာတကျဖြစ်အောင် သိမ်း ဆည်းကြသူတွေ၊ ရပ်နီးရပ်ဝေးကနေလာရောက်ကြသူတွေ၊ အားလုံးရဲ့ ပေါင်းစုအားနဲ့ ပွဲတစ်ပွဲအောင်မြင်စွာ ကျင်းပပြီစီးသွားခဲ့ပါတယ်။ ဒီအတွက် ဝမ်းမြောကဝ် မ်းသာဖြစ်ရသလုို အားလုံးကုို ကျေးဇူးတင်ရပါတယ်။

 

ပွဲနေ့အခမ်းအနားမှာ ဓမ္မာနန္ဒဆရာတော် ဦးဇောတာလင်္ကာရကုို မွေးနေ့ရှင်နှင့်တကွ ရောက်လာကြတဲ့ပရိတ်သတ်များပါ ကုသိုလ်တ ရားတုိုးပွားစေရန် သြဝါဒတရားတော်မိန့်ကြားပေးဖုို့ လျှောက်ထားခဲ့တယ်။ သြဝါဒတရားစကား မိန့်ကြားပေးဖုို့ ကြိုတင်မလျှောက်ထားခဲ့ပါဘူး။ ဆရာတော့်စိတ်ထဲ ရုတ်တရက်ပေါ် လာတဲ့ သြဝါဒတရားဖြစ်ပေမယ့် မြန်မာ့ရုိုးရာထမနဲပွဲ အကြောင်းရော မွေးနေ့ဆုိုင်ရာအတွက်ပါ ပြည့် ပြည့်စုံစုံ ဟောပြောချီးမြှင့်ပါတယ်။

 

ထမနဲပွဲရဲ့ အနှစ်သာရ၊ ထမနဲထုိုးရာမှာ ပါဝင်တဲ့ ကောက်ညှင်းဆန်၊ မြေပဲ၊ အုန်းသီး၊ နှမ်း၊ ဆီ စတဲ့ အချိုးအစားကုို ဖွဲ့သီထားတဲ့ မာန်လည်ဆရာတော်ကြီးလင်္ကာကုိုပါ ရွတ်ဆိုရှင်းပြပါတယ်။ မွေးနေ့နဲ့ စပ်ပြီးတော့လည်း မဟာဂန္ဓာရုံဆရာတော်ကြီးရဲ့ ကုသုိုလ် ပညာ ခန့်ကျန်းသာ၍ ဥစ္စာတန်ခုိုးတမျိုးမျိုးမှ အကျိုးမထွက် ထုိုနေ့တွက် သက်သက်ဝမ်းနည်းဖွယ်ဆုိုတဲ့ လင်္ကာလာ မိန့်ကြားချက်နဲ့အညီ နှစ် တစ် နှစ် အတွင်း ကုသုိုလ်ရေး ပညာရေး ကျန်းမာရေး စိတ်စွမ်းအားတန်ခုိုးတွေ တုိုးတက်အောင်ပြုလုပ်ဖုို့ ချီးမြှင့်ပြောကြားပါတယ်။ ဗဟုသုတတုိုးပွားဖွယ်၊ မှတ်သားလုိုက်နာဖွယ် တရားစကားတော်ပါပဲ။

 

ဆရာတော်မိန့်ကြားအပြီးမှာ (၁၅) မိနစ်လောက် အချိန်ရှိနေသေးတာနဲ့ ထမနဲပွဲနဲ့ မွေးနေ့ပွဲကုို လာရောက်ကြသူတွေကုို အိမ်ပြန် လက် ဆောင်အဖြစ် တစ်ယောက်ကုိုထမနဲတစ်ထုပ်စီ လက်ဆောင်ပေး ပါမယ်။ ဒီထက်ပုိုမုိုကောင်းမွန်တဲ့ လက်ဆောင်ပြန်ကုိုလည်းပေးပါဦးမယ်လုို့ နိဒါန်းချီပြီး တရားလက် ဆောင် အနည်းငယ်ကုို မွေးနေ့ပြန်လက်ဆောင်အနေ ပြောပေးဖြစ်ခဲ့ပါတယ်။

 

အကြောင်းကြောင်းကြောင့် ထမနဲပွဲနဲ့မွေးနေ့ပွဲကုို ကုိုယ်တုိုင်မလာရောက်နုိုင်ကြပေမယ့် အချို့က ထမနဲပွဲအတွက်၊ အချို့ကတော့ မွေးနေ့ ရှင်အတွက်ပါဆုိုပြီး စာတုိုက်ကနေ တကူးတက မှတ်မှတ်ရရကုိုပဲ လှန်းလှူကြသူတွေလည်း တော်တော်များပါတယ်။ သူတုို့တွေအတွက် ထမနဲလက်ဆောင် မပေးနုိုင်ပေမယ့် တရားလက်ဆောင်ကုိုတော့ ပြန်လည်ပေးဦးမှပဲလုို့ အတွေးပေါ်လာမိတာကြောင့် မနေ့က မွေးနေ့ ပွဲမှာပြောဖြစ်ခဲ့တဲ့ လက်ဆောင်ပြန်စကားကုို မှတ်မိသလောက် စာနဲ့ရေးကာ ပေးလုိုက်ပါတယ်။

 

ထမနဲပွဲနဲ့ မွေးနေ့ပွဲကုို လာရောက်ကြတဲ့အတွက် ဝမ်းမြောက်မိပါတယ်။ တကယ်တမ်း လုပ်ချင်တာက ရုိုးရာထမနဲပွဲသက်သက်ပါ။ သုို့ပေမယ့် ကုိုယ့်မွေးခဲ့တဲ့ မွေးလနဲ့လည်း တုိုက်ဆုိုင် နေတာနဲ့ ဖိတ်စာမှာ မွေးနေ့ပွဲကုိုပါ နာမည်တပ်လုိုက်တာပါ။ မွေးနေ့နဲ့စပ်ပြီး ကုသိုလ်တစ်ခုခု ကုိုလုပ်ဖြစ်အောင်ရယ်၊ ကုိုယ့် ကုိုယ်လူ့လောကထဲရောက်အောင် မွေးကျွေးစောင့်ရှောက်ကြ၊ လောကအလယ် မျက်နှာမငယ်ရလေ အောင် သွန်သင်ပြသကြလေတဲ့ ဆရာသမားများနဲ့ အခြားအခြားကျေးဇူးရှိသူများရဲ့ ဂုဏ်ကုိုအမှတ်တရ ဖြစ်နေစေဖုို့၊ အသက်ကြီးရင့်မှုနောက်မှာ ဂုဏ်ကြီးရင့်မှုပါ အတူတွဲပါလာစေရန်လုိုတယ်ဆုိုတာ မမေ့ စေဖုို့ ရည်ရွယမ်ှုလည်းပါပါတယ်။

 

ထမနဲပွဲအကြောင်းနဲ့ မွေးနေ့ပွဲအကြောင်းကုို ဓမ္မာနန္ဒဆရာတော်က ပြည့်ုပြည့်စုံစုံမိန့်ကြားသွားလုို့ ဗဟု သုတတုိုးပွားရသလုို ပရိတ်သတ်ရော၊ မွေးနေ့ရှင်ကုိုပါ ကုသို်လ်တရားလည်း တုိုးပွားစေပါတယ်။

 

ဆရာတော်ဟောကြားသွားသလုိုပါပဲ။ ထမနဲဆုိုတာ ပါဝင်သင့်တဲ့အရာတွေ သူ့အချိုးကျပါဝင်ပါမှ အရသာရှိပြီးကောင်းမွန်မှာဖြစ်ပါ တယ်။ ဒါတင်မက ထမနဲကောင်းကောင်းတစ်ခုဖြစ်လာစေဖုို့ လုံ့လဝီရိယကုိုလည်း စုိုက်ထုတ်ကြရပါတယ်။ ထမနဲပွဲဆုိုတာက ညီညွတ် ခြင်းအင်အားနဲ့ မိသားစုစိတ်ဓာတ်၊ အမျိုးသားရေးစိတ်ဓာတ်ကုို ထင်ဟပ်ပြသတဲ့ ရုိုးရာအစားစာတစ်ခုလည်းပဲ ဖြစ်ပါတယ်။

ဦးဇင်းတုို့သာသနာမှာလည်း ထမနဲနဲ့အလားတူပါပဲ။ ဆရာတွေက ဆရာ့တာဝန်၊ ဒကာတွေက ဒကာ့တာဝန်၊ ပါဝင်ရမည့်တာဝန်တွေ အချိုးတကျပါဝင်ပါမှ ဒီသာသနာက ဆက်လက်ရှည် ကြာ တည်တံ့နုိုင်မှာ။ သာသနာနဲ့စပ်တဲ့ ဓမ္မရသလည်းပေါ်လွင်နုိုင်မှာပါ။ အချိုးတကျ သာမန်ပါဝင်စေရုံမျှမက သာသနာနဲ့စပ်တဲ့အလုပ်တွေလုပ်ကြရမှာ ညီညီညာညာနဲ့ ဇွဲလုံ့လကုိုလည်း အားကုန်စုိုက်ထုတ်ပြီးလုပ်ကြပါမှ တကယ့်စစ်မှန်ကောင်းမွန်တဲ့ သာသနာ့ရသ ဓမ္မရသက ထွက်လာမှာပါ။

 

ဘာသာသာသနာနဲ့ ဆက်စပ်လာလျင် သာသနာတွင်းမှာနေထုိုင်ကြတဲ့ ဆရာတွေချည်း သီးသန့်လုပ် လုို့ မရနုိုင်သလုို ဒကာဒကာမတွေချည်းသက်သက်ဆုိုလျင်လည်း သာသနာရဲ့အသက် ဘယ်လုိုမှရှည် အောင် ဆက်နုိုင်မယ် မဟုတ်ပါဘူးး။ ဆရာကော ဒကာပါ စုပေါင်းညီညာစွာ လုပ်ဆောင်ကြပါမှ ဖြစ်နုိုင်မှာပါ။ အချိုးတကျ ဇွဲလုံ့နဲ့ညီညီညာညာထုိုးတော့ ကောင်းမွန်အရသာရှိတဲ့ ထမနဲစားရသလုို ညီညီညာညာ သာသနာနဲ့ဆုိုင်ရာ အလုပ်တွေကုိုလုပ်ဆောင်ကြပါမှ မှန်ကန်ကောင်းမွန်တဲ့ တရားအရ သာ စစ်စစ်ကုိုလည်း စားသုံးခွင့်ရကြမှာပါ။ ခုလုိုထမနဲပွဲနဲ့ မွေးနေ့ပွဲလေးဖြစ်လာဖုို့ကုိုပင်လျင် ဒကာ

 

ဒကာမတွေရဲ့ ခွန်အားတွေ အများကြီးပါဝင်နေပါတယ်။ ရုပ်ပုိုင်းဆုိုင်ရာခွန်အားတွေရော၊ နာမ်ပုိုင်း ဆုိုင်ရာခွန်အားတွေရောပေါ့။ ဒီတော့ လက်ဆောင်ပြန် ထမနဲထဲမှာ ဆန် ဆီ ဆား အုန်းသီးနဲ့ နှမ်း မြေပဲ စတာတွေတင်မက ဆရာဒကာညီညွတ်မှု အဆာပလာတွေပါ ညီညွတ်မျှတစွာ ရောနှောပြီးပါဝင်နေ တယ်လုို့ မှတ်လုိုက်ပေါ့။

 

မွေးနေ့နဲ့စပ်ပြီး ပြောရမယ်ဆုိုင်လျင်တော့ စောစောကဆရာတော်မိန့်ကြားသွားတဲ့ ဂန္ဓာရုံဆရာတော် ကြီးရဲ့ စကားလေးလည်း အလွန်မှတ်သားဖွယ်ကောင်းပါတယ်။ ဒီနဲ့အလားတူပါပဲ။ တိပိဋကဓရ ယော ဆရာတော်ရဲ့ စကားလေးလည်း မှတ်သားဖုို့ကောင်းပါတယ်။

 

ယောဆရာတော်က-တစ်နှစ်တစ်ခါ မွေးနေ့ပါ လူမှာခေါ်ရုိုးရှိ၊ အသက်သိက္ခာ ကြီးစရာ လူမှာ နှစ်မျိုးရှိ၊ အသက်ကြီးရုံ အားမစုံ အကုန်ကြောက်ရ၏၊ အသိမကြွယ် အကျင့်ကွယ် အုိုပယ်ဖြစ်သွား၏၊ အကျင့် သိက္ခာ ကြီးမှသာ မှန်စွာစိတ်အေး၏၊ ကြီးလေလှလေ အေးမြပေ လူတွေချစ်ကြ၏၊ မွေးနေ့မင်္ဂလာ ရတနာ ကောင်းစွာရအောင်ဖြည-့် တဲ့။

 

လူမှာ ကြီးစရာက နှစ်မျိုးရှိတယ်။ အသက်ကြီးခြင်းနဲ့ ဂုဏ်ကြီးခြင်း။ ဒီကြီးခြင်းနှစ်မျိုးမှာ အသက်ကြီး ခြင်းကတော့ အထူးတလည်လုပ်နေဖုို့ မလုိုတဲ့ကြီးခြင်းမျိုး။ ခုဆုိုရင်ကုိုပဲ မွေးနေ့ရှင်ကုိုယ်တုိုင်ပင်လျင် တော်တော်လေးကြီးရင့်လာပြီ။ ဒါပေမယ့် ရင်းနှီးသူတွေက အသက် ဘယ်လောက်ရှိပြီလဲလုို့မေးလေ တုိုင်း ခုမှငယ်ငယ်လေးပဲ ရှိပါသေးတယ်။ အသက်ငါးဆယ်ပြည့်ဖုို့ စက္ကန့်ပေါင်း၊ မိနစ်ပေါင်း အများကြီး လုိုပါသေးတယ်လုို့ ပြန်ပြောနေကျ။ ဟုတ်တယ်လေ။ စက္ကန့်ပေါင်း မိနစ်ပေါင်းရယ်လုို့ပြောပါမှ။ ဒီလုိုမှ မဟုတ်ပဲ နှစ်ကုိုသာပြောရမယ်ဆုိုလျင် ငါးဆယ်က ခုပဲပြည့်လုလု မဟုတ်လား။

 

ဒါပေမယ့် အသက်ဆတုိုာ စကားအရသာ လှည့်စားပြီးပြောလုို့ ရကောင်းရမယ်။ တကယ့်အရှိတရား ဆုိုတာက လှည့်စားလုို့ရကောင်းတာမျိုးမှ မဟုတ်တာ။ ခုဆုိုလျင်ကုိုပဲ ဇရာရဲ့လက္ခဏာတွေက ခန္ဓာ ကုိုယ်မှာ နေရာအနှံ့ တော်တော်ပင် ထင်ရှားလာနေပြီလေ။ စုိုက်ထားရတဲ့သွား။ ကူထားရတဲ့ မျက်မှန်။ စားနေရတဲ့ဆေးတွေက ဒီန္ဓာကုိုယ် ဆွေးမြေ့နေပြီဆုိုတာ အချက်ပြနေတဲ့ အမှတ်အသားများပဲ မဟုတ်လား။ ထိကနဲဆုို ပွန်းလွယ်ရှလွယ်၊ စိမ့်ကနဲဆုို ဖျားလွယ်နာလွယ်၊ ငယ်စဉ်ကလုို ဒီခန္ဓာကုိုယ်က ခံနုိုင်ရည်စွမ်းရည်မျိုး မရှိတော့ဘူးလေ။ အသက်အရွယ်ဆုိုတာ မွေးပြီးချိန်ကစလုို့ သူ့အလုိုလုိုသာ မှန်မှန်ပဲ ကြီးလာတဲ့အရာ။ တမင်တကာကြီးအောင် လုပ်နေဖုို့ မလုိုတဲ့အရာ။

 

ဂုဏ်ဆုိုတာကတော့ သည်းခံကြိုးစားပြီး ဖန်တီးတည်ဆောက်ကြရတာ။ ကြီးရမယ့်ဂုဏ်များနဲ့ ပတ်သက် ပြီးတော့ပြောရမယ်ဆုိုလျင်ဖြင့် ဓမ္မပဒကျမ်းစာမှာလာတဲ့ ဗုဒ္ဓမိန့်ကြားခဲ့တဲ့စကားလေးကို ဒီမှာလက် ဆောင်အနေ ပြောပြချင်ပါတယ်။ ပရိတ်သတ်တွေကုို ပြောရင်းနဲ့အတူ ကုိုယ်ကုိုယ်တုိုင်လည်း မပြတ် ဆင်ခြင်မိအောင် နှလုံးသွင်းရမယ်လုို့ နားလည်မိပါတယ်။

 

န တေန ထေရော သော ဟောတိ၊ ယေနဿ ပလိတံ သိရော။ ပရိပက္ကော ဝယော တဿ၊ ‘မောဃဇိဏ္ဏော’တိ ၀ုစ္စတိ။

ယမှိ သစ္စဉ္စ ဓမ္မော စ၊ အဟိံသာ သံယမော ဒမော။

သ ဝေ ၀န္တမလော ဓီရော၊ ‘ထေရော’ ဣတိ ပ၀ုစ္စတ-ိ တဲ့။

 

မြန်မာလုိုကတော-့ အရွယ်ကြီးရင့်ခြင်းကြောင့် ထိုရဟန်း၏ ဦးခေါင်းသည် ဖွေးဖွေးဖြူ၏။ ထိုဖြူကာမျှ ဖြင့် မထေရ် မမည်။ ထိုရဟန်း၏ အရွယ်အိုရင့်မှုကို အကျိုးမဲ့အိုရင့်မ-ှု ဟု ဆိုအပ်၏။

 

အကြင်ပုဂ္ဂိုလ်၌ သစ္စာလည်းရှိ၏။ တရားလည်းရှိ၏။ ညှဉ်းဆဲမမှု ရှိ။ သီလစောင့်ခြင်းရှိ၏။ ဣနြေ္ဒကို လည်း ဆုံးမ၏။ ကိလေသာပျို့အန်ပြီးသော ထိုသူကိုသာ မထေရ်ဟု ဆိုအပ်၏-တဲ့။

 

ရဟန်းတော်တွေကုို အကြောင်းပြုကာဟောထားလုို့ ဒီအချက်တွေနဲ့ ပြည့်စုံသူကုို ဒီမှာ မထေရ်လုို့ သုံး ပေမယ့် လူသာမန်တွေဆုိုလျင်ဖြင့် ဒီလုိုဂုဏ်ရည်တွေရှိသူကုို လူကြီးလူကောင်းလုို့ ခေါ်တယ်လုို့ ပြောရမှာပေါ့။

 

ဒီအထဲက သစ္စာရှိဖုို့ဆုိုရာမှာ သစ္စာသိဖုို့လုိုတယ်လေ။ အဋ္ဌကထာဆရာကတော့ အမြင့်ဆုံးဖြစ်တဲ့ ဒုက္ခ သမုဒယ နိရောဓနဲ့ မဂ္ဂသစ္စာလေး ပါးကုို သိရမယ်လုို့ဖွင့်ပြပါတယ်။ ဒီသစ္စာလေး ပါးကုိုသိဖုို့က အနည်းဆုံးတော့ သောတာပန်ဖြစ်ပါမှ။ ဒီအထိ မလှန်းနုိုင်သေးတဲ့ သာမန်သူတွေအဖုို့ အနည်းဆုံးတော့ လောကထဲမှာ ပြောလေ့ရှိတဲ့အတုိုင်း အချင်းချင်းတွေကြားမှာ သစ္စာရှိဖုို့တော့ လုိုအပ်ပါတယ်။ နောက်ပြီး မှန်ကန်စွာလုပ်ကုိုင်ခြင်း၊ မှန်ကန်စွာပြောဆုိုခြင်းဆုိုတဲ့ သစ္စာလည်းရှိရပါလိမ့်မယ်။ ကတိသစ္စာဆုိုတဲ့ စကားထဲကလုိုလည်း ပေးထားတဲ့ကတိကုို တည်တန့်အောင်စောင့်ထိန်းဖုို့လဲ လုိုပါတယ်။ ခြုံငုံပြောရ မယ်ဆုိုလျင်ဖြင့် လူတစ်ယောက်မှာရှိရမည့် အခြေခံ ကတိသစ္စာလေးလောက်မှ မရှိဘူးဆုိုလျင်ဖြင့် အသက်ဘယ်လောက်ပဲကြီးကြီး ဒီသူမျိုးကုို ရဟန်းဆုိုလျင် မထေရ်လုို့ မခေါ်ထုိုက်ဘူး။ သာမန်သမျူား မှာဆုိုလျင် လူကြီးလူကောင်းလုို့ မခေါ်နုိုင်ဘူးပေါ့။ အချည်းနှီးအသက်ကြီးသူ၊ အသက်ကြီးပြီး အချိန် မစီးသူလုို့ ပြောရမှာပေါ့။ ဗုဒ္ဓစကားအရ ပြောရလျင် မောဃဇိဏ္ဏ ပေါ့။

 

နောက်ပြီးလည်း တရားသိရမယ်၊ မညှင်းဆဲရဘူး၊ ကုိုယ်ကျင့်တရား လုံခြုံ၊ ဣနြေ္ဓကုို စောင့်စည်း၊ ကိလေသာတွေ ပါးစေရမယ်တဲ့။ ဒီအထဲမှာ မညှင်းဆဲရ ဆုိုတဲ့အချက်ကုိုတော့ ဒီမှာ နည်းနည်းလေး ပြောချင်ပါတယ်။ လူတွေဟာ ကုိုယ့်မှာ တန်ခုိုးအာဏာ စည်းစိမ်ပညာ အင်အားရှိလာရင် ကုိုယ့်လောက် တန်ခုိုးအာဏာ စည်းစိမ်ပညာ မရှိသူတွေအပေါ်မှာ အနုိုင်ကျင့်ချင်ကြတယ်။ ကုိုယ့်တန်ခုိုးအာဏာ စည်းစိမပ် ညာတုိုးသထက်တုိုးစေဖုို့ ကုိုယ့်အောက်နိမ့်သူတွေရဲ့ ရပုိုင်ခွင့်တွေကုို နှိမ်ချိုးဖုို့လည်း ဝန် မလေးတတ်ကြဖူး။ တကယ်ဆုို လူကြီးလူကောင်းဆုိုတာက ကုိုယ့်မှာရှိတဲ့ တန်ခုိုးအာဏာ စည်းစိမ် ပညာကုို ကုိုယ့်လောက် အခွင့်မရှိရှာကြသူတွေအတွက် အသုံးပြုကြရမှာ။ ကုိုယ့်မှာရြှိ ပီးသား အရာ တွေကုို လုိုအပ်တာထက်ပုိုအောင် ထပ်ဖြည့်ဖုို့ထက် မရှိသေးတဲ့နေရာ၊ မပြည့်သေးတဲ့နေရာတွေမှာ ဖြည့်စွက်ပေးလုိုက်ခြင်းဟာ လူ့ဂုဏ်သိက္ခာတစ်ရပ်ဖြစ်သလုို မြင့်မြတ်မှုရဲ့ လက္ခဏာတစ်ရပ်လည်းပဲ ဖြစ်တယ်။ ကုိုယ့်အလုပ် ကုိုယ့်အပြော ကုိုယ့်စိတ်ကူးအကြံအစည်တစ်ခုခုဟာ သူများတွေကုို ညှင်းဆဲ သလုိုမဖြစ်ရလေအောင် ထိန်းသိမ်းစောင့်ရှောက်ဖုို့ အလွန်ပဲအရေးကြီးပါတယ်။

 

ဒီတော့ ဦးဇင်းတုို့ဆုိုလျင် အရွယ်အရဆုို မထေရ်ခေါ်ရမည့်အရွယ်ရောက်နေပြီ။ မထေရ်ခေါ်နုိုင်လောက် တဲ့အရွယ်မှာ မထေရ်တစ်ပါး မှာရှိသင့်ရှိရမည့် ကျင့်ဝတ်တွေကုို တတ်နုိုင်သလောက် ဖြည့်ဆည်းတာ ဖြည့်ဆည်း၊ စောင့်ရှောက်သင့်တာ စောင့်ရှောက်ကာ နေဖုို့လုိုပေ လိမ့်မယ်။ အဲဒီလုိုနေပါမှလည်း အသက်ကြီးရင့်မှုအတူ ဂုဏ်သိက္ခာလည်း ကြီးမြင့်ခြင်းဖြစ်လိမ့်မယ်။ မွေးနေ့ကျင်းပခြင်းကလည်း ဂုဏ် သိက္ခာကြီးမြင့်စေဖုို့ ရည်ရွယ်လုပ်ဆောင်ခြင်းရဲ့ အစိတ်အပုိုင်းတစ်ရပသ်ာဖြစ်စေသင့်တယ်။

 

ထမနဲပွဲနဲ့မွေးနေ့ပွဲကုို လာရောက်ကြသူတွေရော၊ မွေးနေ့ရှင် ဦးဇင်းကုိုယ်တုိုင်ရော အသက်ကြီးရင့်မှုနဲ့ အတူ၊ အဲ အသက်နဲ့အတူ ဂုဏ်သိက္ခာကြီးရင့်မှုကုိုပါ တပါတည်းသယ်ဆောင်လာနုိုင်ကြတဲ့သူများဖြစ်ဖုို့ လုိုပါတယ်ဆုိုတဲ့အကြောင်းကုို မွေးနေ့ပြန်လက်ဆောငအ် ဖြစ်ပေးပါတယ်။

 

သိကြတဲ့အတုိုင်းပါပဲ။ လက်ဆောင်ဆုိုတာ ဘယေ် လာက်ပဲတန်ဖုိုးကြီးကြီး။ ပေးသူက စေတနာ မေတ္တာ ပါဖုို့လုိုသလုို ရယူသူဖက်ကလည်း မြတ်နုိုးတန်ဖုိုးထားပါမှ။ နုို့မဟုတ်လျင် ဘယ်လောက် တန်ဖုိုးကြီးတဲ့ လက်ဆောင်ဖြစ်ပစေ။ ပစ္စည်းတန်ဖုိုးအရ သဘောကျကောင်း သဘောကျလိမ့်မယ်။ သုို့ပေမယ့် မြတ်နုိုးမှုတော့ ရှိမယ်မဟတု်ပါဘူး။ အဲ ကုိုယ်ချစ်ခင်လေးစားသူဆီက၊ ကုိုယ်မျှော်လင့်ထားသူဆီက လက် ဆောင်ကဒ်လေးတစ်ခပု င် ဖြစ်စေဦးတော့။ ရခဲ့မယ်ဆုိုလျင် ဘယ်လောက်ကြည်နူးကြေနပ်ဖြစ်စေနုိုင် တယဆ်ုိုတာ တရားနာနေသူတွေက ဦးဇင်းများထကပ်ုိုပြီး ခံစားနားလည်နုိုငမ် ယ်ထင်ပါတယ်။

 

‘လက်ဆောင်အားလုံးထဲမှာ တရားလက်ဆောင်ဟာ အကောင်းဆုံးပါ’ ဆုိုတဲ့ စကားကုိုကြား ဖူးကြမယ် ထင်ပါတယ်။ ထမနဲပွဲလာသူတွေကုို အိမ်ပြန်လက်ဆောင် ထမနဲတစ်ထုပ်စီဝေပါမယ်။ ထမနဲနဲ့အတူ မွေးနေ့လက်ဆောင်ပြန်အဖြစ် အကောင်းဆုံးတရားလက်ဆောင်ကုိုလည်း ပေးပါတယ်။ ဒီတရားလက် ဆောင်ကုို ထမနဲထုပ်နဲအ့ တူ မြတ်နုိုးစွာ အိမ်ပြန်လက်ဆောင်အဖြစ် ယူဆောင်သွားနုိုင်ကြလိမ့်မယ်လုို့ မျှော်လင့်ပါတယ်။ ယူဆောင်သွားကြဖုို့ တုိုက်တွန်းရင်းပဲ အဆုံးသတ်ပါတယ်။ ။

 

 

သရုပ်ဖော်ပန်ချီအား ဤနေရာမှ ရယူပါသည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa English Site

Similar Posts