အတွေးအမြင်

Hay-la Wah-la Attitude ပျော်ပျော်ပါးပါးပေါ့ဗျာ …

ဇော်အောင်
စက်တင်ဘာ ၁၁၊ ၂၀၁၂
● နိဒါန်း

မြန်မာနိုင်ငံတွင်ကျင်းပသော မြန်မာနိုင်ငံမှ အိမ်ရှင်အဖြစ်လက်ခံကျင်းပခဲ့သည့် AFC U-22 ချန်ပီယံရှစ် ခြေစစ်ပွဲ (Group-G) ပွဲစဉ်များတွင် ပရိသတ်နှင့် မြန်မာဘော်လုံးအဖွဲ့ချုပ်တို့ဖြစ်ပျက်ပုံများ၊ အာရှဘောလုံးအဖွဲ့ချုပ်က ၅ ပွဲတွင် ၄ ပွဲ ပရိတ်သတ်မထိန်းနိုင်မှုကြောင့် မြန်မာဘော လုံး အဖွဲ့ချုပ်ကို ဒဏ်ငွေစုစေုပေါင်း ဒေါ်လာ ၂၈၀၀၀ (နှစ်သောင်းရှစ်ထောင်) ဒဏ်ရိုက်လိုက်ပါသည်။ မြန်မာနိုင်ငံဘောလုံးအဖွဲ့ချုပ်အနေ ဖြင့် AFC ၏ပြစ်ဒဏ်ချမှတ်ခံရခြင်းအပေါ် အယူခံဝင်သွားမည်မဟုတ်ပဲ ဒဏ်ငွေစုစုပေါင်း (၂၈၀၀၀) ကိုပေးဆောင်သွားမည်ဖြစ်ကြောင်း ဘောလုံးအဖွဲ့ချုပ်၏မီဒီယာဒါရိုက်တာ ဦးစိုးမိုးကျော်က မဇ္ဈိမကိုပြောသည်။ မိတ်ဆွေတစ်ယောက်က စိတ်ပျက်စွာဖြင့် မြန်မာတွေ ဒါလောက် ပစ္စလက်ခတ်နိုင်တာ ဘယ်လိုပြုပြင်ပြောင်းလဲမှာလဲဟု မေးခွန်းထုတ်သည်။

● ကိုယ်တွေ့ အတွေ့အကြုံတခု
ကျွန်တော် ဗီယက်နမ်နိုင်ငံ စက်ရုံဆောက်လုပ်ရေးလုပ်ငန်းတွင် ဗီယက်နမ်အလုပ်သမားပေါင်း ၁၀၀၀ ကျော်လုပ်ကိုင်ကြရာ၊ ကျွန်တော်တို့ စက်ပစ္စည်းတပ်ဆင်ရေးလုပ်ငန်းအတွက် အင်္ဂလိပ်စကားမပြော၊ နားမလည်သောအလုပ်သမား ၄၀၀ ခန့်ရှိသည်။ အင်္ဂလိပ်စကားနားလည် သော Broken English Vietnamese ၂၀ ဦးက အုပ်ချုပ်သည်။ ထို၂၀ ဦးကို ကျွန်တော်တို့ ကုမ္ပဏီမှ ဒိန်းမတ်၊ ဂျာမန်၊ သြစတြေးလီယံ၊ နယူးဇီလန်၊ စင်ကာပူနိုင်ငံသားများက ထပ်မံအုပ်ချုပ်သည်။ အင်္ဂလိပ်စကားကို Communication Media အဖြစ် အသုံးပြုရသည်။ ဗီယက် နမ်-စင်ကာပူ စကားပြန် ၂ ဦးရှိသည်။ ဗီယက်နမ်ဘက်မှ အင်ဂျင်နီယာအမျိုးသမီးငယ်တစ်ဦးကို လစာကောင်းကောင်းပေးပြီး ငှားထားသည်။ ကျွန်တော်တို့ GEA ကုမ္ပဏီဖက်မှလည်း အင်ဂျင်နီယာလူငယ်တစ်ဦးကို လစာကောင်းကောင်းပေးပြီး ငှားထားသည်။ လိုအပ်ပါက သူတို့ကို လှမ်းခေါ်ပြီး အကူညီတောင်းရသည်။ တက္ကစီခေါ်ခြင်းမှအစ၊ စက်ဘီး၊ ဆိုင်ကယ်ဝယ်ခြင်း၊ စက်အပိုပစ္စည်းများဝယ်ခြင်းများတွင်လည်း စ ကားပြန်များကို အားကိုးရသည်။

လုပ်ချင်ရာလုပ်သော ဗီယက်နမ်များကို အလွန်စိတ်ပျက်မိပါသည်။ Broken English Vietnam Supervisors စူပါဗိုက်စာများမှာ လုပ်ရမည့် အလုပ်များကိုပြောပြချိန် Yes, Yes ဟုပြောပြီး၊ အလုပ်သမားများကို လက်ညှိုးထိုးခိုင်းပြန်သည်။ အလုပ်သမားများက အလုပ်ခွင်တွင် ဆေးလိပ်တကားကား၊ သူတို့ စူပါဗိုက်စာမပြောနှင့်၊ ကျွန်တော်တို့ နိုင်ငံခြားသား အုပ်ချုပ်သူများလာလျှင်ပင် ခပ်တည်တည်၊ ထိုင်စကားပြော၊ ဆေးလိပ်သောက်နေကြသည့် ဟေးလားဝါးလား၊ ဘာမထီ အလုပ်သမားများဖြစ်သည်။ ၂ နာရီမျှလွှတ်ထားလိုက်ပြီး သွားကြည့်လိုက်လျှင် လုပ်ချင်ရာလုပ်ထားသောကြောင့် ပြန်ပြင်ဆင်ရပြန်သည်။ အချိန်ကုန် လူပင်ပန်းဖြစ်ရဖန်များသောကြောင့် အချိန်လုံး လှည့်ပတ်၊ သွားလာ၊ ကြည့်ရှု၏၊ ကွပ်ကဲနေရသည်။ အင်္ဂလိပ်စကားနားလည်သူ ဗီယက်နမ် စူပါဗိုက်စာများကို ကောင်းကောင်းလေ့ကျင့်သင်ကြားပေးခြင်းတွင် အဓိကအချက်မှာ နာခံမှုကို အထူးလေ့ကျင့်ပေးရသည်။ မင်းကြိုက်တာလုပ်လို့မရဘူး။ ပြန်ပြောခွင့်ရှိပေမဲ့ ငါပြောတဲ့အတိုင်းလုပ်ပါ…ဟု စိတ်ထဲမှာပဲ ပြောရသည်။ တလခန့်ကြာသောအခါ စူပါဗိုက်စာများ နာခံမှုရှိလာပြီး၊ ဟေးလာဝါးလား အလုပ်သမားများကို ကွန်ထရိုး ထိမ်း ချုပ်လာနိုင်သည်။ အိုကေတွင် စိုပြေမှု ဖြစ်လာပါသည်။

သို့သော် အလုပ်သမားအသစ်၊ စူပါဗိုက်စာအသစ်များရောက်လာတိုင်း ထိုဗီယက်နမ်များ၏ ဟေးလားဝါလားစိတ်ဓါတ် Hay-la Wah-la Attitude ကိုတွေ့ရပြန်သည်။ ပထမစူပါဗိုက်စာများလို တလကြာ လေ့ကျင့်သင်ကြားစရာမလိုတော့ပါ။ တစ်ပါတ်တော့ ကြာသည်။ ထိုတစ်ပတ် လေ့ကျင့်သင်ကြားမှုကို ဗီယက်နမ်အချင်းချင်း သင်ကြားခိုင်းလို့မရပါ။ ရာထူး တူနေပါက ဗီယက်နမ်များက မနာခံကြပါ။ နိုင်ငံခြားသားဖြစ်သော ကျွန်တော်တို့ကပဲ ပင်ပန်းစွာလေ့ကျင့်သင်ကြားပေးရပါသည်။

မြန်မာများကို လေ့ကျင့်သင်ကြားဖို့ဆိုသည်မှာ ဗီယက်နမ်များထက်ခက်ပါမည်။ ဗီယက်နမ်များက အထက်အရာရှိကိုတော့ ကြောက်ရွံရိုသေ၊ လေးစားကြသည်။ အထက်အရာရှိကို ချစ်ခင်မှု ရှိမရှိတော့ မသိသေးပါ။

● ဟေးလားဝါးလား စိတ်နေစိတ်ထား
ကျွန်ုပ်သားငယ် ၄ နှစ်သား ၁၉၉၀ အချိန်က ကျွန်ုပ်တွင် ငွေကြေးမလုံလောက်သော်လည်း မိသားစုကို စင်ကာပူခေါ်မည်ဟု ဆုံးဖြတ်ခဲ့သည်။ မိတ်ဆွေ ကိုဇော်ညွှန့် (အိမ်ထောင်၊ ရည်းစားမရှိသေးချိန်) သူက ကျွန်တော့်လစာ တလဒေါ်လာ ၁၂၀၀ သာရှိသည်ကို သိသည်။ အိုဗာတိုင် ရှိမှ ၀င်ငွေပိုရသော ကျွန်တော့်အတွက် စိုးရိမ်ပြီး၊ ရော့ ဒေါ်လာ၂၀၀၀ ..မင်းမလိုဘူးဆိုတာ ငါသိပါတယ်။ ဒါပေမဲ့ လိုလိုမယ်မယ် ယူထား လိုက်ပါ၊ ဘယ်အချိန်မှ ပြန်ပေးပေး ကိစ္စမရှိပါဘူး…ဟုပြောဆိုပြီး အိပ်ထဲအတင်းထိုးထည့်ပါသည်။ ကျွန်တော်သည် လူတိုင်းလိုလိုပင် သူ များဆီက အကြွေးမယူလိုသူဖြစ်သည်။ ကလေး ၂ ယောက်နှင့် မိသားစုကို စင်ကာပူခေါ်ပါက စရိတ်ကြီးမည်သိသော်လည်း ငွေကိုပဓာနထား သူမဟုတ်သောကြောင့် ခေါ်ဖြစ်အောင်ခေါ်လိုက်သည်။ ထိုစဉ်က မိသားစုအတွက် အိမ်တအိမ်လုံးငှားပါမှ တလ ဒေါ်လာ ၇၀၀ ပေးရသည်။ ကျွန်တော့်သူငယ်ချင်း ကိုအောင်နိုင်က တ၀က်စီဆိုပြီး သူတခန်း၊ ကျွန်တော်တို့မိသားစုတခန်း အတူနေကြသည်။ အိမ်လခက ဒေါ်လာ ၃၅၀၊ အပြင် ထမင်းတပွဲ ၁ ဒေါ်လာခွဲ၊ ခေါက်ဆွဲတပွဲ ၁ ဒေါ်လာ၊ ရထား MRT တစ်မှတ်တိုင် ၃၀ ဆင့်၊ ကလေး ၂ ယောက် မာလင်မောင်း အစိုးရမူလတန်းကျောင်းလခ တစ်ယောက် ၁၂ ဒေါ်လာ၊ အိမ်မှာပဲအလုပ်သွားလျှင် ဘတ်စကားခ အသွား၊ ၃၀ ဆင့်၊ အပြန် ၃၀ ဆင့်၊ တ ပတ်တစ်ခါ Jurong East MRT Shopping Center ဟေးလားဝါးလား လျှောက်လည်ခြင်း၊ သူငယ်ချင်းလူပျို ၃၀ နှစ်အရွယ်များတွင် ကျွန်တော် အသက် ၃၀ အရွယ် ကလေး ၂ ယောက် မိသားစုလိုက် လျှောက်လည်စားသောက်ခြင်း၊ City Hall, China Town, Orchard မြို့ ထဲသို့ ၃ လ တစ်ခေါက်သွားလည်ပတ်ခြင်း .. စင်ကာပူ ၁၉၉၀ အခြေအနေများဖြစ်သည်။ ယခုခေတ် အိမ်တစ်လုံးငှားခ ဒေါ်လာ ၂၀၀၀ ကျော်နေသောကြောင့် အရာရာ ၃ ဆမျှ ဈေးတက်သွားသော်လည်း လစာက သိပ်မတိုးလာပါ။ အလုပ်သမားများ ပိုမိုကျပ်တည်းလာသော လက်ရှိ စင်ကာပူအခြေအနေဖြစ်သည်။

ကျွန်ုပ်စိတ်နေစိတ်ထားများကို လေ့လာဆန်းစစ်ပါက၊ အသက်အရွယ်လိုက် စိတ်သဘောထားများ ပြောင်းလဲလျှက်ရှိပါသည်။ ကြီးမိုက်၊ ခလေးစိတ် စသည့် အားနည်းချက်များကို တွေ့ရသည်။ လွန်ခဲ့သော အနှစ်၂၀ က လျှောက်လည်၊ သောက်စား၊ ပျော်ပါးမှုများ အခုလည်း လုပ်ချင်နေသည်။ မလုပ်သင့်တော့ကြောင့် ..ပင်နီစူလာ စားသောက်ဆိုင်များမှာ တိုက်ဂါးဘီယာ ပုလင်းများထောင်ပြီး ဟေးလားဝါးလား စကားပြောနေသော အသက်၂၀၊ ၃၀ ကျာ် လူငယ်များကိုကြည့်ပြီး၊ ကိုယ်လည်း အရင်လိုဘ၀မျိုးကို ပြန်စဉ်းစားမိပါသည်။ အချိန်က ကျော် လွန်ခဲ့ပါပြီ။ မြန်မာပြည်မှလာသော မိတ်ဆွေများကို တနင်္ဂနွေတွင် လိုက်လံပြလေ့ရှိသည်။

● စင်ကာပူရောက် နိုင်ငံတကာအလုပ်သမားများ
စင်ကာပူတွင်လာရောက်အလုပ် လုပ်ကိုင်သူများကို မြန်မာများက နာမည်ပေးထားကြသည်။ Serangoon Road မှ အိန္ဒိယ၊ ပါကစ္စတန်၊ ဘင်္ဂလားဒေ့ခ်ျ၊ သီရိလင်္ကာများ (မြန်မာအခေါ် ကုလားဆိုသူများ)၊ China Town, Bugis စသည့်နေရာများတွင် တရုတ်ပြည်မကြီးမှ လာ ရောက် အလုပ်လုပ်သူ (မြန်မာအခေါ် ပြည်ကြီးတရုတ်)၊ Orchard Lucky Plaza တွင် ဖိလစ်ပိုင်နိုင်ငံမှ လာရောက်အလုပ်လုပ်ကိုင်ကြသော (မြန်မာအခေါ် ဖဦးထုပ်မ)၊ Goldmine Tower တွင် ထိုင်းနိုင်ငံမှလာရောက်အလုပ်လုပ်ကိုင်သူ (မြန်မာခေါ် ယိုးဒယား)၊ “မ” ဟုခေါ်သော မ လေးရှားလူမျိုးများ၊ “ဗ” ဗလချိုက်များ၊ “ဘဂုံး” ခေါ်ခံရသူ ဘင်္ဂလားလူမျိုးများ၊ “ကကြီး၊ ဂငယ်” ဟု အခေါ်ခံရသူ ကိုးရီးယား၊ ဂျပန်များ၊ မိမိကိုယ်ကို တန်ဘိုးထားပြီး “ရွှေ” ဟုခေါ်သော မြန်မာများ… ပေးထားသော အတိုကောက်အမည်များ ဖြစ်ပါသည်။ ထိုလူများ သူတို့စုရပ်များ တွင် တနင်္ဂနွေဆို အုပ်စုလိုက်ရောက်လာပြီး မတ်တပ်ရပ် (သို့မဟုတ်) မြေကြီးပေါ်အခင်းခင်းထိုင်၊ စားစရာများ စားသောက်၊ စကားပြော နေကြသည်။ အပမ်းဖြေချိန်ဖြစ်သည်။ သူတို့တတွေ မတ်တပ်ရပ်၊ စုဝေး၊ စကားပြေးနေကြသည်များကိုကြည့်ပြီး ကျွန်တော့်သမီးငယ်က မေးသည်။ အားဝါး (ကချင်လို၊ အဖေဟုခေါ်ပါသည်) .. လူတွေအများကြီး မတ်တပ်ရပ်ပြီး၊ အကြားကြီးပဲ၊ ဘာလုပ်နေကြတာလဲ ….ဟု နာမ လည်နိုင်ဖြစ်နေသည်။ သမီးရယ် … ဟေးလားဝါးလား ..လုပ်နေတာပေါ့ကွယ်…ဟု ပြုံးပြီးအဖြလိုက်သည်။ သမီးက ဟေးလားဝါးလားဆို သောစကားလုံးကို ကျွန်တော်တို့ ဇနီးမောင်နှံ ပြောနေကျ ဖြစ်သောကြောင့် သဘောပေါက်သွားပါသည်။

● အင်္ဂလိပ်လည်း ပျော်ပျော်ပါးပါးပါ
နောက်ကြုံသောအခါ ဟေးလားဝါးလား စိတ်နေစိတ်ထားများကို ရေးချင်ပါသည်။ လူငယ်၊ လူကြီးတိုင်းတွင် မိတ်ဆွေများ စုစည်းလာသောခါ ငယ်မူပြန်လာတတ်သည်။ လူငယ်များစုစည်းမိချိန် (ဥပမာ ဘောလုံးပွဲအားပေးချိန်) စိတ်ကြွလာလေ့ရှိသည်။ ကျွန်တော့်မိတ်ဆွေ စင်ကာပူ နိုင်ငံသား လုပ်ဖေါ်ကိုင်ဖက်များစွာမှာ စင်ကာပူ ဒီပလိုမာ (ပိုလီ) ရရှိပြီး၊ ဘွဲ့ရရန် အင်္ဂလန်နိုင်ငံသို့ ဒေါ်လာ၂ သောင်းအကုန်ခံပြီး ဘွဲ့သွားယူသူ များစွာရှိသည်။ သူတို့က အင်္ဂလန်မှာနေရင် စင်ကာပူ၊ မလေးရှား ကျောင်းသားများမသွားသင့်တဲ့နေရာကတော့ အင်္ဂလိပ်ဘောလုံးပွဲတွေပဲ။ သူတို့က နံစော်၊ ညစ်ပတ်ပြီး၊ အလွန်ကြမ်းတယ်။ ငါတို့ အာရှတိုက်သားတွေက ပုပုလေးတွေ..တော်ကြာ သူတို့ ဟေးလားဝါးလားလုပ်တဲ့ အထဲ ဓါးစာခံဖြစ်သွားရင် မသက်သာဘူး။ အင်္ဂလန်မှာ ပညာသင်ချိန် ဘောလုံးဝါသနာပါပေမဲ့ ဘောပွဲသွားမကြည့်ရဲဘူးလို့ ပြောပြပါသည်။ အမေရိကန်ဖွတ်ဘောဆိုသော အမေရိကန်လူငယ်များလည်း ကြမ်းတမ်းလှပါသည်။ ထိုပွဲများကို အမေရိကားရောက် မြန်မာများ သွားကြည့် လေ့မရှိပါ။ ဒီမိုကရေစီဘိုးအေ အမေရိကန်၊ အင်္ဂလိပ်များလည်း ဖွတ်ဘောပရိတ်သတ်မှာတော့ ဖွတ်ချင်းအတူတူပါပဲဟု ပြောလိုပါသည်။ အင်္ဂလိပ်ကလပ်အသင်းများကို နှစ်ပေါင်းများစွာ ကမ္ဘာ့ပြိုင်ပွဲများက ပယ်ခံခြင်း မကြာခဏဖြစ်လေ့ရှိပါသည်။ မြန်မာဗီ ယက်နမ်များသည် အင်္ဂလိပ်အမေရိကန်၊ မိတ်ဆွေများဟု ပြောလို့ရပါသည်။ ပျော်ပါး၊ကြမ်းတမ်းမှုတွင် တူပါသည်။ ကားမောင်းရာတွင်ပင် အမေရိကန်စတိုင် ဖြစ်သည်။ လက်ယာကပ်မောင်းစနစ် မြန်မာ၊ ဗီယက်နမ်နိုင်ငံတွင်သာ ရှိပြီး အခြားအရှေ့တောင်အာရှနိုင်ငံများတွင် လက်ဝဲကပ်မောင်းစနစ်ဖြစ် သည်။

အဓိကရေးချင်သော ဟေးလားဝါးလာ စိတ်ဓါတ်မှာ “လ” သုံးလုံး စိတ်ဓါတ်ဖြစ်ပါသည်။ ဘောလုံးပွဲ စည်းကမ်းမလိုက်နာမှုကို ကျွန်ုပ်မရေးလိုပါ။ ဒီမိုကရေစီ ဘိုးအေကြီး အင်္ဂလိပ်လူမျိုးများပင် ဘော်လုံးပွဲတွင် ဟေးလားဝါးလား ဖြစ်ရတော့ ဖြစ်ပါစေ။ အခြားအဓိက “လ” သုံးလုံးဖြစ်သော လိင်၊ လပ် (လက်ဆောင်) နှင့် လောင်း (လောင်းကစားခြင်း) ၃ မျိုး လွန်ကျူးသော နိုင်ငံခေါင်းဆောင်များကြောင့် တိုင်းပြည် ဖွတ်ဖွတ်ကျေခဲ့ ရသည်။

● နိဂုံး
အနာထုတ်ထိုး၊ မျက်ခြောက်ရေနှူး များများမလုပ်တော့ပါ။ ပညာတတ်၊ နားလည်လွယ်သော မြန်မာများအတွက် “လ” သုံးလုံးစိတ်နေစိတ် ထားများ၊ ဒေါသကြီးမှုများကို ပြုပြင်ပြောင်းလဲရန် ကျွန်ုပ်ဇနီးသည်၊ သားသမီးများနှင့် စတင်လေ့ကျင့်လျှက်ရှိပါကြောင်း …။

ရွှင်လန်းချမ်းမြေ့ပါစေ..။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts