ဆန်ဖရန်ဘေးဧရိယာမြန်မာမိသားစုတို့၏ ရခိုင်ပြည်သူများကူညီရေး ရန်ပုံငွေပွဲ အောင်မြင်
မိုးမခအထောက်တော် ၀၀၂၊ ဇူလိုင် ၉၊ ၂၀၁၂
ယမန်နေ့က ကျင်းပသည့် ဆန်ဖရန်စစ္စကိုဘေးဧရိယာ မြန်မာကွန်မြူနီတီ စုပေါင်းကျင်းပသည့် မီးဘေးသင့်ရခိုင်ပြည်သူများ အားပေးကူညီရေး ရန်ပုံငွေ ဈေးရောင်းအလှူပွဲကို နယူးအခ်ပါဗီလျံ ကွန်မြူနီတီရိပ်သာ ရင်ပြင်မှာ ကျင်းပခဲ့သည်။ အလှူရှင် မုန့်ဈေးဆိုင်ပေါင်း ၃၀ ခန့်နှင့် စေတနာရှင် ဧည့်သည်တော်များ ရပ်နီး ရပ်ဝေးမှ ပရိသတ် ၈၀၀ ခန့် လာရောက် အားပေးကြသည်ကို တွေ့ရသည်။ အလှူငွေများအားလုံးကို နာရေးကူညီမှုအသင်း (ရန်ကုန်) မှတဆင့် ရခိုင်ပြည်သူများသို့ လှူဒါန်းမည် ဖြစ်သည်။
စားသောက်ဖွယ်ရာမျိုးစုံသည့်အပြင် စေတနာရှင်မုန့်အလှူရှင်များက ဖွယ်ဖွယ်ရာရာ ပြင်ဆင်ရောင်းချသဖြင့် ဧည့်ပရိသတ်မှာ တထိုင်တည်း စားသောက်ကြသည့်အပြင် အိမ်ပြန်လက်ဆောင်အဖြစ် အစားအစာများကို ထုပ်ပိုးဝယ်ယူသွားကြသည်ကို တွေ့ရသည်။ ဒေသခံ လုပ်အားပေး လူငယ် မောင်မယ်တို့က ဧည့်ပရိသတ်တို့နှင့် အလှူရှင်တို့အတွက် လိုအပ်သည်များကို တက်ကြွစွာ ၀ိုင်းဝန်းကူညီကြသည်ဟု ဆိုသည်။ မနက် ၁၀ နာရီခန့်က စတင်ခဲ့ရာ နေ့ခင်း ၂ နာရီခန့်တွင် စားသောက်ဖွယ်ရာများ အကုန်နီးပါး ရောင်းချနိုင်ခဲ့ပြီး စုစုပေါင်း ရန်ပုံငွေ ကောက်ခံရရှိမှု အမေရိကန် ဒေါ်လာ ၁ သောင်း ၀န်းကျင်ရရှိသည်ဟု သိရှိရသည်။ အများပြည်သူကောင်းမှုအဖြစ် အလှူငွေစာရင်းကို ထုတ်ပြန်ပြီး လှူဒါန်းသွားမည်ဟု ဆိုသည်။
ဈေးရောင်းချသူများအနက် အချို့ မုန့်ဈေးဆိုင်အလှူရှင်အချို့က မြန်မာပြည်အရေးကူညီရန် စိတ်ထက်သန်လွန်း၍သာ ဈေးရောင်းခြင်း ဖြစ်ကြောင်း၊ အများစားသောက်ရန် ချက်နည်း ပြုတ်နည်း အတွေ့အကြုံ မရှိကြောင်း၊ တတ်နိုင်သလောက် ၀ိုင်းဝန်း ချက်ပြုတ်ရောင်းချကြပြီး စေတနာရှင်များက အားပေးကြသဖြင့် ၀မ်းသာအားရဖြစ်မိကြောင်း ပြောကြားသည်။
“ကျနော်တို့မိသားစုက ယူကျ (youtube) ပေါ်ကနေပြီး မြန်မာစာချက်နည်းပြုတ်နည်းကို လေ့လာလိုက်တယ်။ အဲသည်အတိုင်း ပြင်ဆင်ပြီး လာရောင်းကြတာ။ စေတနာအကျိုးပေးတော့ နှစ်သက်ကြတယ်” ဟု အလှူရှင်တဦးက ပြောကြားသည်။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
