ရသဆောင်းပါးစုံ

၂၀၀၈ ခုနှစ်ဖွဲ့စည်းပုံအခြေခံဥပဒေထဲက တပ်မတော်


ဦးမျိုး (ဥပဒေ)
ဇွန် ၁၃၊ ၂၀၁၂
၁၉၄၇ ခုနှစ် ဖွဲ့စည်းအုပ်ချုပ်ပုံ အခြေခံဥပဒေတွင်လည်းကောင်း၊ ၁၉၇၄ ခုနှစ် ဖွဲ့စည်းအုပ်ချုပ်ပုံအခြေခံဥပဒေတွင်လည်းကောင်း တပ်မ တော်ဟူ၍ အခန်း သီးသန့်ဖော်ပြခဲ့သည်ကို လုံးဝမတွေ့ရပါ။ ယခု ၂၀၀၈ ခုနှစ် ဖွဲ့စည်းပုံအခြေခံဥပဒေတွင်မူ တပ်မတော်အခန်းကို သီးသန့် ပြဋ္ဌာန်းထားသည်သာမက တပ်မတော်ကာကွယ်ရေးဦးစီးချုပ်ပါဝင်သည့် ပုဒ်မပေါင်း အမြောက်အများကိုပါ တခြားအခန်းများတွင် ပြဋ္ဌာန်း ထားသည်ကိုလည်း တွေ့ရှိရပါသည်။ ကာကွယ်ရေးဦးစီးချုပ်ဆိုင်ရာ ပုဒ်မများကို တပ်မတော်အခန်း တွင်သာ ပြဋ္ဌာန်းသင့်ပါသည်။ ဥပဒေပါ အနှစ်သာရများကို ရောထွေးယှက်တင်မဖြစ်စေရန် အခန်းခွဲထားခြင်းမရှိဘဲ အခန်းတိုင်းပါဝင်နေမှုမှာ တမိုးလုံးဖျောက်ဆိပ်ဆိုသလိုပင် စစ် အာဏာရှင်စနစ်၏ ဖော်ပြချက်များကို တွေ့မြင်နေရပါသည်။ ဖွဲ့စည်းပုံအခြေခံဥပဒေစာအုပ်မှာ စစ်တပ်လက်စွဲကျမ်းတစောင်ပမာ ဖြစ်နေ ပါသည်။ နိုင်ငံတကာ ဥပဒေပညာရှင်များက ၂၀၀၈ ဖွဲ့စည်းပုံအခြေခံဥပဒေကို တခွန်းတည်းပြောပါသည် “အမှိုက်ပုံး” တဲ့ခင်ဗျာ။ ကောင်းကြ သေးရဲ့လား။ နိုင်ငံတနိုင်ငံ၏ ဖွဲ့စည်းပုံအခြေခံဥပဒေကို ရှုမြင်သုံးသပ်၍ နိုင်ငံ့ဂုဏ်သိက္ခာကို ယုတ်လျော့သွားစေသည့်ပြဋ္ဌာန်းချက်မျိုး နောက်နောင်မျိုးဆက်များလက်ထက်တွင် မပေါ်ပေါက်အောင် ယခုမျိုးဆက်တွင်ပင် ရှင်းထုတ်ပစ်ခဲ့ရန် လိုအပ်ပါသည်။

မြန်မာနိုင်ငံ အသွင်ကူးပြောင်းရေးနှင့် ဖွံ့ဖြိုးတိုးတက်ရေးအတွက် အချိန်ယူရမည်ဖြစ်ပြီး သင့်တော်သောအချိန်တခုသို့ရောက်ပါက ၂၀၀၈ ခုနှစ် ဖွဲ့စည်းပုံအခြေခံဥပဒေအရ လွှတ်တော်ထဲသို့ရောက်နေသော တပ်မတော်သား ကိုယ်စားလှယ် ၂၅ ရာခိုင်နှုန်း အရေအတွက်ကို လျှော့ချနိုင်ချေရှိသည်ဟု ကာကွယ်ရေးဝန်ကြီး ဒုတိယဗိုလ်ချုပ်ကြီးလှမင်းက အာရှလုံခြုံရေးဆိုင်ရာ ရှန်ဂရီလာ ဆွေးနွေးပွဲတွင် ပြောကြားခဲ့ သည်။ (news-eleven.com/04 June 2012, 02:15)

ဤကတိက၀တ်သည် သင့်တော်သောအချိန်တခုသို့ရောက်မှ ၂၅ ရာခိုင်နှုန်းကို လျှော့ချနိုင်ချေရှိသည်ဟု ဖွင့်ဟပြသည့်အဆင့်မျှသာ ဖြစ်ပါ သည်။ စစ်တပ်က ၂၅ ရာခိုင်နှုန်းကို လုံးဝပယ်ဖျက်လိုသည့် သဘောထားမရှိသည်ကတော့ သေချာသည်။ ထို့ကြောင့် လျှော့ချနိုင်ချေ ရှိ သည်ဟု အစပျိုးပြောဆိုရုံမျှပြောဆိုနေသည့် အဆင့်ဟုသာမှတ်ယူရဦးမည်ဖြစ်သည်။ အတည်ပြုရန်မှာ မည်သည့်အချိန် မည်သည့်ကာလ အထိဟူ၍ အချိန်အကန့်အသတ်ဖြင့်ဖော်ပြရန် ပွင့်လင်းမြင်သာမှုရှိရန် လိုအပ်လာပါသည်။ ဤသို့ မရေမရာ ပြောဆိုချက်မျှဆိုလျှင် ဒီမိုကရေ စီမူနှင့် ကိုက်ညီပါမည်လော။လုံးဝမကိုက်ညီသေးပါ။ ၂၅ ရာခုိုင်နှုန်းအားလုံးကို ပယ်ဖျက်ပါမှ ဒီမိုကရေစီမူနှင့် အံဝင်ဂွင်ကျဖြစ်ပါမည်။ မည် သည့်ပုဂ္ဂိုလ် တဦးတယောက်နှင့်မျှ ဆိုင်သောကိစ္စ မဟုတ်ပါ။ တိကျပြတ်သားသည့် ဒီမိုကရေစီမူအပေါ် ပြတ်ပြတ်သားသား ရပ်တည်ရပါမည်။

– အခန်း (၄) ပုဒ်မ (၇၄)၊ (၁၀၉)၊ (၁၄၁)၊(၁၆၁) တို့အရ တပ်မတော်သား ၂၅ ရာခိုင်နှုန်း ပါဝင်နေခြင်း။
– ပုဒ်မ ၆၀ (ခ) (၃)အရသမ္မတရွေးချယ်ရာတွင်တပ်မတော်သားအစုအဖွဲ့အနေဖြင့် ပါဝင်နေခြင်း။
– ပုဒ်မ ၁၆၁ (ဃ) အရ တိုင်းနှင့်ပြည်နယ်လွှတ်တော်များတွင် တပ်မတော်သားများမှာ လွှတ်တော်ကိုယ်စားလှယ်ဦးရေ၏ သုံးပုံတစ်ပုံ ပါဝင် နေခြင်း။
– ပုဒ်မ ၁၂၁ (ည) အရ တပ်မတော်သားများအား နိုင်ငံရေးတွင် ပါဝင်ခွင့်အထူးအခွင့်အရေးများပေးထားခြင်း။

စသည့် ပုဒ်မများအားလုံးကို ဖျက်သိမ်းပစ်ရပါမည်။ ဤသို့ပယ်ဖျက်ပစ်နိုင်ရန်ဆိုလျှင် ၂၀၀၈ ခုနှစ် ဖွဲ့စည်းပုံအခြေခံဥပဒေ ပြင်ဆင်ခြင်း အ ခန်းပါ ပုဒ်မ ၄၃၆ တစုံလုံးကို ပြင်ဆင်ပြီးဖြစ်ရန်လိုပါသည်။ ကာကွယ်ရေးဝန်ကြီး ဒုတိယဗိုလ်ချုပ်ကြီးလှမင်း၏ဖွင့်ဟချက်အရ မည်သို့ဆက် လက်ဆောင်ရွက်သင့်သည်၊ ပြင်ဆင်ဖြည့်စွက်သင့်သည်ကို လွှတ်တော်ကိုယ်စားလှယ်တော်ကြီးများကိုယ်တိုင်က ဒီမိုကရေစီလွှတ်တော် တွင်းတိုက်ပွဲကို ပြတ်ပြတ်သားသား ဆင်နွှဲနိုင်ရပါမည်။

ဒီမိုကရေစီနိုင်ငံတိုင်းတွင် အရပ်သားအစိုးရဖြစ်လျှင် ကာကွယ်ရေးဦးစီးချုပ်သည် ကာကွယ်ရေးဝန်ကြီး၏ ၀န်ကြီးဌာန၏အောက်တွင်သာ ရှိပါသည်။ ပြည်ထောင်စုအစိုးရ၏အဖွဲ့ဝင်သည် ကာကွယ်ရေးဝန်ကြီးသာဖြစ်ပါသည် ။ကာကွယ်ရေးဦးစီးချုပ် မဟုတ်ပါ။

သို့ပါ၍ စစ်အစိုးရ ဖြစ်နေကြောင်း ကြေညာထားသည့် ပုဒ်မများကို တခုမကျန် ပယ်ဖျက်ပစ်သင့်ပါသည်။

ဥပမာ – ပုဒ်မ ၃၄၂ တွင် “နိုင်ငံတော်သမ္မတသည် အမျိုးသားကာကွယ်ရေးနှင့် လုံခြုံရေးကောင်စီ၏ အဆိုပြုထောက်ခံချက်ဖြင့် တပ်မတော် ကာကွယ်ရေးဦးစီးချုပ်ကို ခန့်အပ်တာဝန်ပေးရမည်” ဟု ဖော်ပြထားသော်လည်း တပ်မတော်ကာကွယ်ရေးဦးစီးချုပ်က သမ္မတကို ခန့်အပ် ထားကြောင်းကို ပုဒ်မ ၆၀ (က) တွင် “နိုင်ငံတော်သမ္မတကို သမ္မတရွေးချယ်တင်မြှောက်ရေးအဖွဲ့ဖြင့် ရွေးချယ်တင်မြှောက်ရမည်” ဟု လည်းကောင်း၊ ပုဒ်မ ၆၀ (ခ) (၃) တွင် “ဖော်ပြပါလွှတ်တော်နှစ်ရပ်အတွက် တပ်မတော်ကာကွယ်ရေးဦးစီးချုပ်က အမည်စာရင်းတင် သွင်း သည့် တပ်မတော်သား လွှတ်တော်ကိုယ်စားလှယ်များ အစုအဖွဲ့” ဟုလည်းကောင်း ဖော်ပြထားသည်ကိုကြည့်ခြင်းအားဖြင့် သမ္မတကိုယ်၌ က ကာကွယ်ရေးဦးစီးချုပ်က ခန့်အပ်ထားကြောင်းကို တွေ့ရှိရပါသည်။ ဤပုဒ်မနှစ်ခု၏ ဖော်ပြချက်များသည် ပုဒ်မတခုကို နောက်ပုဒ်မ တခု ကချေဖျက်ထားခြင်းဖြစ်နေပါသဖြင့် အဓိပ္ပါယ်မှာ ကာကွယ်ရေးဦးစီးချုပ်လက်ထဲတွင် သမ္မတအာဏာရှိနေသည်ဟု မီးမောင်းထိုးပြလိုက် သလို ထင်ရှားနေပါသည်။

ကာကွယ်ရေးဦးစီးချုပ်သည် ပုဒ်မ ၁၆ တွင် “နိုင်ငံတော်အကြီးအကဲနှင့် နိုင်ငံတော်အုပ်ချုပ်ရေးအကြီးအကဲသည် နိုင်ငံတော်သမ္မတ ဖြစ် သည်” ဟုဖော်ပြထားသည့်အတွက် အာဏာကို လက်တွေ့ဖော်ပြချက်တွင်ပင် ရယူထားသည်ကိုတွေ့ရပေသည်။ အဘယ်မှာ အရပ်သား အစိုးရ။ ပြည်သူလူထုက ရွေးကောက်တင်မြှောက်သည့်အစိုးရတရပ်ကို ၂၀၀၈ ဖွဲ့စည်းပုံဥပဒေအရ အကောင်အထည်ဖော်ဆောင် နိုင်ပါ မည်နည်း။ စစ်အစိုးရဘဲ ဖြစ်မြဲဖြစ်နေသည်ကို အဆိုပါပုဒ်မများက သက်သေပြနေသလို ဖြစ်နေပါသည်။ ဤ ဖွဲ့စည်းပုံအခြေခံဥပဒေအရသာဆိုလျှင် ပြည်သူ့အစိုးရတရပ် အစိုးရကောင်းတရပ်ကို မည်သည့်နည်းနှင့်မျှ ဖော်ဆောင်နိုင်မည်မဟုတ်ကြောင်းကို တွေ့ရှိနေရပါသည်။

နိုင်ငံတော်သမ္မတသည် ကာကွယ်ရေးဦးစီးချုပ်လောက်မျှ အာဏာမရှိကြောင်းကို လွတ်ငြိမ်းချမ်းသာခွင့်ပေးပိုင်ခွင့်ကိုကြည့်ခြင်းအားဖြင့် လည်း တွေ့မြင်နိုင်ပါသည်။ ပုဒ်မ ၂၀၄ တွင် ”နိုင်ငံတော် သမ္မတသည်-

(က) ပြစ်ဒဏ်လွတ်ငြိမ်းခွင့် ပေးပိုင်ခွင့်ရှိသည်။

(ခ) “အမျိုးသားကာကွယ်ရေးနှင့် လုံခြုံရေးကောင်စီ၏ထောက်ခံချက်နှင့်အညီ လွတ်ငြိမ်းချမ်းသာခွင့်ပေးပိုင်ခွင့်ရှိသည်” ဟုဖော်ပြထားသည် ကိုသာ ကြည့်ပါ။ ၁၉၄၇ ခုနှစ် ဖွဲ့စည်းပုံအခြေခံဥပဒေ ပုဒ်မ ၆၀ တွင် “ပြစ်ဒဏ် လွတ်ငြိမ်းချမ်းသာခွင့်ပေးနိုင်သောအခွင့်အရေးသည် နိုင်ငံတော်သမ္မတ၌ တည်ရှိရမည်” ဟု ဖော်ပြထားသည်နှင့် နှိုင်းယှဉ်ကြည့်လျှင် တခြားစီဖြစ်နေသည်ကို တွေ့မြင်ရပါသည်။

၁၉၈၀ ခုနှစ်ကထုတ်ပြန်ခဲ့သော ၂/၈၀ ကဲ့သို့ အထွေထွေလွတ်ငြိမ်းချမ်းသာခွင့်ကို သမ္မတ ဦးနေ၀င်း (ဗိုလ်ချုပ်ကြီး နေ၀င်း) ကိုယ်တိုင် ထုတ်ပြန်ခဲ့သည်ကိုလည်း သင်ခန်းစာယူသင့်ပါသည်။ သမ္မတ ဦးသိန်းစိန် (ဗိုလ်ချုပ်ကြီး သိန်းစိန်) အနေဖြင့် အမျိုးသားကာကွယ်ရေးနှင့်လုခြုံရေးကောင်စီ၏ ထောက်ခံချက်မရ၍ အထွေထွေလွတ်ငြိမ်းသာခွင့် ထုတ်ပြန်နိုင်ခြင်းမရှိသည်ကို လက်တွေ့ တွေ့မြင်နေရပါသည်။

ပုဒ်မ ၃၃၇ တွင် “တပ်မတော်သည် နိုင်ငံတော်ကာကွယ်ရေးအတွက် အဓိကအကျဆုံးသော လက်နက်ကိုင်တပ်ဖွဲ့ ဖြစ်သည်” နှင့် ပုဒ်မ ၃၃၉ တွင် “နိုင်ငံတော်အား ပြည်တွင်းပြည်ပ အန္တရာယ်များမှ ကာကွယ်ရေးအတွက် တပ်မတော်က ဦးဆောင်ရမည်” ဟု ဖော်ပြချက်နှစ်ခု၏ အဓိ ပ္ပါယ်မှာ တဆက်တည်းဖြစ်နေပါသဖြင့် ပုဒ်မတခုတည်းဖြင့်ဖော်ပြလျှင် ပြည့်စုံနိုင်ပါသည်။

ထို့ပြင် ပုဒ်မ ၃၄၁ တွင် “နိုင်ငံတော်တွင် နိုင်ငံတော်နှင့်နိုင်ငံသားများအတွက် ဘေးအန္တရာယ်များကျရောက်လာလျှင် တပ်မတော်က ကူညီ ဆောင်ရွက်ရမည်” ဟု အထူးဖော်ပြစရာမလိုအပ်ပါ။ မလိုအပ်သည့် အလိုလိုနားလည်ရမည့် လက်နက်ကိုင်တပ်ဖွဲ့ဖြစ်သည်ဟုလည်း ကောင်း၊ ကာကွယ်ရေးအတွက် တပ်မတော်က ဦးဆောင်ရမည်ဟုလည်းကောင်း ဖော်ပြချက်မျိုးမှာ အပိုဖြစ်နေပါသဖြင့် ရှိပြီးသားအဓိပ္ပါယ် ကိုဖောင်းပွကာ လေးနက်မှုယုတ်လျော့သွားစေပါသည်။

ဥပမာ – ပုဒ်မ ၂၀ တွင်ဖော်ပြထားသော တပ်မတော်ဆိုင်ရာဖော်ပြချက်မျိုးကို တပ်မတော်အခန်းမျိုးတွင်သာ ဖော်ပြသင့်ပါသည်။ အပို အ လွတ်သဘောဖြစ်နေသည့်ပုဒ်မများကို လျော့ပစ်ရန်လိုအပ်ပါသည်။ အသစ်ပြုပြင် ပြဋ္ဌာန်းရန် လိုအပ်ပါသည်။

ပုဒ်မ ၃၄၃ တွင်” စစ်ဘက်တရားစီရင်ရာတွင် …
(က) တပ်မတော်သားများအတွက် အဖွဲ့ဖြင့်ဖြစ်စေ၊ တစ်ဦးတည်းဖြစ်စေ ဥပဒေနှင့်အညီ စီရင်နိုင်သည်။

(ခ) “တပ်မတော်ကာကွယ်ရေးဦးစီးချုပ်၏ အဆုံးအဖြတ်သည် အပြီးအပြတ်ဖြစ်သည်” ဟု ဖော်ပြထားပါသဖြင့် တပ်မတော်သားများအနေ ဖြင့် သာမာန်ပြည်သူများ ရရှိခံစားနိုင်သည့် အရပ်ဖက်တရားစီရင်ရေး၏ စီရင်ဆုံးဖြတ်မှုကို ခံယူရရှိနိုင်သည့် အခွင့်အရေးနှင့် ပြည်ထောင်စု တရားလွှတ်တော်ချုပ်တည်းဟူသော နိုင်ငံ၏အမြင့်ဆုံး တရားရုံးသို့ အယူခံတက်ရောက်ပိုင်ခွင့် မရရှိနိုင်တော့ပေ။ တပ်တွင်း ဒီမိုကရေစီဆို သည်မှာ မူး၍ပင်ရှူစရာမရှိ။ ဒီမိုကရေစီဆိတ်သုဉ်းကင်းမဲ့လှပေသည်။ စည်းကမ်းပြည့်ဝသည့် ဒီမိုကရေစီဆိုသည်ကို အနက်ဖွင့်ရန် ခက်ခဲ လွန်းလှပါသည်။ တပ်မတော်သားများသည် ပြည်သူလူထု၏ သားသမီးများဖြစ်သည့်အလျောက် မိဘနှင့်တူသောပြည်သူများ ဒီမိုကရေစီ အပြည့်ရဖို့လိုအပ်သကဲ့သို့ ထိုရရှိသော အခွင့်အရေးများကို ပြည်သူ၏ သားသမီးများဖြစ်သည့် တပ်မတော်သားများအနေဖြင့် ရရှိခံစားထိုက် ပေသည်။

တပ်မတော်သည် ပြည်သူ့အတွက်ဟု ဖခင်ဗိုလ်ချုပ်အောင်ဆန်းပြောကြားခဲ့သည့်မူနှင့် ဖြောင့်ဖြောင့်ကြီးဆန့်ကျင်ကာ ပြည်သူသည် တပ် မတော်အတွက်ဖြစ်နေရသည့် ၂၀၀၈ ဖွဲ့စည်းပုံအခြေခံဥပဒေရှိ အခြားအခန်းများတွင်ပါရှိသော ကာကွယ်ရေးဦးစီးချုပ် ဝေါဟာရပါ ပုဒ်မအား လုံးကို တပုဒ်မကျန် ဖျက်သိမ်းပစ်ရပါလိမ့်မည်။

သို့မှသာ တပ်မတော်သည် ပြည်သူ့တပ်မတော် ဖြစ်လာပေလိမ့်မည်။ ယခု လက်ရှိတပ်မတော်ကို ပြည်သူကို ကာကွယ်စောင့်ရှောက်သည့် ပြည်သူ့တပ်မတော်အဖြစ် အသစ်ပြန်လည်ဖွဲ့စည်းတည်ထောင်ရန် လိုအပ်ပါသည်။ ထိုသို့ဆောင်ရွက်နိုင်ရန်အတွက် ဤတပ်မတော် အ ခန်းပါပုဒ်မများကို ပြုပြင်ပြဋ္ဌာန်းရန် အထူးလိုအပ်လျှက်ရှိပါသည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts