>
ဒီဇင်ဘာ ၁၇၊ ၂၀၁၁
ဒီအကြောင်းတွေ
ပြန်ပြောရပေမယ်လို့
ကျနော်မထင်ခဲ့ဘူး။
အခုတော့လည်း
ဆီနာနာစိမ်ထားတဲ့ လ္ဘက်ကို
စားရသလိုပါပဲလားလေ။
“ကိုဘုန်းရေ”
“မဒေ၀ီရဲ့ ကောက်ကြောင်း
တစေ့တစောင်းကြည့်ရုံနဲ့
ငါ့မှာ
မောပမ်းရ ကြောချမ်းရ” လို့
ခင်ဗျား တမ်းတခဲ့သူ။
“ကိုဘုန်း
မကျဆုံးစေနဲ့အုန်း … ”ဆိုတဲ့
မဒေ၀ီရဲ့ ရှေ့မှာ
ဒူးချင်းရိုက်ပြီး
ခင်ဗျား
မူးမူးနဲ့ ခေါင်းငိုက် ဦးခိုက်ခဲ့တာ။
လှေကားထစ် များပေါ်က
တထစ်ချင်း နောက်ပြန်ဆင်းသူတွေအဖြစ်
အလှသေရည်ကိုလည်း ချစ်
ခင်ဗျားနဲ့ ကျနော်လည်း ချစ်ခဲ့ကြတယ်နော်၊
“အတ်ဖေါ်နိုးဆိတ်”
ဖျောက်ဆိပ်ဖျောက်ဆိပ်အသံ
တကယ်တော့
ဖက်ဆစ်တွေရဲ့ လက်သည်းဆိတ်တဲ့အသံဆိုပြီး
ဘုံအလင်္ကာ ဒေါသ
ပေါက်ကွဲခဲ့ကြ အဲဒီည
ခင်ဗျား
မထတမ်း မူးခဲ့ဖူးပြီ။
ကျနော်က လ္ဘက်ရည်ကြိုက်သူ
ကဗျာတပိုဒ် လ္ဘက်ရည်တကျိုက်
ခင်ဗျားက တပင်ရွှေထီးလက်သစ်
ထန်းရည်ကိုလည်း ချစ်သူ
ထန်းရည်တကျိုက်
ကဗျာကျတော့ လက်ကုန်နှိုက်တတ်သူ။
ဒါဟာ
ဗမာပြည်ရဲ့ `ဆိုဗွန်း´ရပ်ကွက်ဗျ
ကဗျာဆရာလည်း ရှိ
ပန်းချီဆရာလည်း ရှိ
သဘာဝတ္ထဆရာကြီးတွေလည်း ရှိ
ဖက်ဆစ်ရဲ့ အက်စစ်မျက်နှာတွေလည်း ရှိ
ဟိုဟာတွေလည်း ရှိ
ကေတုမတီရဲ့ ယဉ်ကျေးမှုသစ် နန်းတော်လို့ပဲ ခေါ်ခေါ်
ကျနော်နဲ့ ခင်ဗျား
အဲဒီရပ်ကွက်ထဲမှာ လမ်းသလားခဲ့ကြ။
`ဒါဒါဝါဒီ´တွေ ဟောစာတန်းထဲက
`ဘောဂဗလ ဆန့်ကျင်ရေး
ပုဂ္ဂလလိင် ဆန့်ကျင်ရေး
လူတွေလုပ်တဲ့ ဥပဒေဆန့်ကျင်ရေး´
ခင်ဗျားနဲ့ ကျနော်
တွေးတွေးဆဆ ဖွဖွဆွတ်ချူ
ယူသင့်တာယူ ဘယ်သူတွေ ဘာပြောပြောပေါ့ဗျာ။
မျိုးဆက် သစ် မသစ်
လမ်းကြောင်း ဟောင်း မဟောင်း
ကျေးကျွန်သစ် ဖြစ် မဖြစ်
တော်လှန်ရေးစစ် စစ် မစစ်
လှေကားထစ်များပေါ် တထစ်ပြီးတထစ်
ရန်သူ့အပေါ် ထုံးတို့ထားဘို့လည်း သတိမလစ်
ကျစ်လစ်ခြင်းသုံးမျိုး
လေ့လားရေးမိုးကို
ကျနော်ခင်ဗျား
အတူတကွ ရေချိုးခဲ့ကြ။
`ဧကရာဇ်ကို အံတု
ဗဟုရာဇ်ကို စံပြု ´
လူထုတိုက်ပွဲ
ပန်းပေါက်ပေါက်ကြဲ သဲခင်းခဲ့ကြ ၀င်းခင်းကြ။
ယုံကြည်တယ်လေ
အနောက်လေဟာ အရှေ့လေကို
ဖိတိုက်နေပြီပဲ။
အစ်ဇင်တွေက
ဘယ်လိုပဲ ပြဌာန်း မပြဌာန်း
မူတွေက
ဘယ်လိုပဲ လမ်းခင်း မခင်း
သူငယ်ချင်းရေ
ပြည်သူတွေ ရွေးတဲ့သမိုင်း
ပြည်သူတွေ လျှောက်တဲ့ မိုးကုတ်စက်ဝိုင်း
မုန်တိုင်းတွေ ဘယ်လိုပဲ ထန်မထန်
လမ်းမှန်ပဲတဲ့။
“မောင်လေးအောင်”က
“ကျနော် ပျော်တယ်ဗျာ
ကဗျာကို ချစ်ရတဲ့အတွက်” တဲ့။
သံလွင်မြစ်ကမ်း တောင်တန်းကြီးတွေကြားမှာ
ကဗျာတွေ ကဗျာတွေ ကဗျာတွေ
ရေးဖွဲ့လို့ မကုန်နိုင်ပေဘူး
ကျနော် ရူးလောက်အောင် ပျော်နေပြီ ကိုဘုန်း။
မယ်တုက္ခီစမ်းချောင်းလေး
အကြိမ်ပေါင်းများစွာ ဖြတ်သန်းရလို့
စိတ်ညစ်နေတဲ့ကြားက
သူ့ကိုလည်း ချစ်ရတဲ့အတွက်ပေါ့။
`အလင်းနှစ်ထက်မြန်တဲ့ အလျင်မျိုးနဲ့
ဟောဒီ အချိုးအကွေ့ကြီးတခု´ မှာ
ကျနော် ပါလာနေပြီ
ကျနော် ပါလာနေပြီ
ကြည်အေးရဲ့ ကဗျာတွေလိုပါပဲလားဗျာ။
ကျနော့်မှာ
ဆည်းဆာများကိုလည်း ချစ်
ကျောင်းသားတပ်မတော်က
တပ်မှူးကလေးကိုလည်း ချစ်
သူရဲကောင်းတို့ ရင်ခွင်ထဲ
ထာဝရလဲလျောင်းသွားကြတဲ့
ခွပ်ဒေါင်းကလေးများကိုလည်း ချစ်
တော်လှန်ရေးကိုလည်း ချစ်
ခင်ဗျားကိုလည်း ချစ်
ပြီးတော့ (ခင်ဗျားသိပါတယ်)
မဒေ၀ီကိုလည်း ချစ်
ဟောဒီလို ခေတ်ကြီးထဲမှာမှ
ကဗျာကို ချစ်ခွင့်ကြုံ
ကမ်းကုန်အောင် ပျော်တယ်ဗျာ။
ကျနော့် ကဗျာ
ကျနော့် ဝေဒနာ
ကျနော့် ဒေသနာ
နှစ်ရှည်ကြာ ရာထောင်တည်စေသောဝ်။ ။
(ဒီကဗျာကတော့ ချစ်သူငယ်ချင်းကဗျာဆရာ `ကေတုဘုန်းမော်´ မသေဆုံးခင် တော်လှန်ရေးဌာနချုပ် မာနယ်ပလောမှာ ရောက်ရှိနေ စဉ်က ရေးခဲ့တာပါ။ ဒီကဗျာရေးပြီး ၂ နှစ်အကြာမှာ ကေတုဘုန်းမော် ဆုံးပါးခဲ့ရပါတယ်။ အခုဆိုရင် ဒီကဗျာရဲ့သက်တမ်း ၁၂ နှစ်ပြည့်ပြီ။ ကိုဘုန်းမော်ဆုံးတာ ၁၀နှစ်ပြည့်ပါပြီ။)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
