Han Thit Naing News

ပန်းတနော်မြို့တောင်သူတို့၏မြေကို ကြံ့ခိုင်ရေးပါတီ အမတ်မင်း လုပ်ပိုင်ခွင့်ရ

ဟန်သစ်နိုင်
ဒီဇင်ဘာ ၁၉၊ ၂၀၁၃


ဧရာဝတီတိုင်းဒေသကြီး၊  ပန်းတနော်မြို့နယ်၊ ကျုံတိုင်းကြီးအုပ်စု သဲကုန်းကျေးရွာမှ တောင်သူများ၏ လယ်မြေဧက အများအပြားကို ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ လွှတ်တော်ကိုယ်စားလှယ်၊ အင်းသူကြီး ဦးငြိမ်းမြိုင်က အသုံးပြုခွင့် ရသွားသည်ဟု ဒေသခံတို့က ပြောသည်။

အောက်တိုဘာ ၁၉ ရက်နေ့တွင် မြို့နယ်မြေစာရင်းဌာနမှ ဦးကျော်ကျော်မိုးနှင့် ကျုံတိုင်းကြီးအုပ်စုမှ ဥက္ကဌ ဦးလှဝင်းတို့က ထိုရွာမှ လယ်သမားများကို ခေါ်ယူပြီး   ၃၄ ဧကကို  အသုံးပြုခွင့် ချပေးလိုက်ကြောင်း အသိပေး   ပြောကြားခဲ့သည်ဟု ဆိုသည်။

ထိုသို့ ပြုလုပ်ခြင်းနှင့် ပတ်သက်ပြီး    သက်ဆိုင်ရာဌာနများသို့ အကူညီတောင်း တိုင်ကြားထားသည်ဟု ဒေသခံများကပြောသည်။

    ၄င်းကျေးရွာမှ တောင်သူဒေါ်အုန်းသန်း က “ကျမတို့မရှိဆင်းရဲသားတွေပိုင်ဆိုင်တဲ့ တစ်ယောက်မှာ ၁ဧက ၊ ၂ဧကကို မတရားအနိုင်ကျင့်တာ ၊ ဒီလောက်သိန်းပေါင်းများစွာချမ်းသာတဲ့ သူက မရှိတဲ့လူတွေဆီက ထမင်းထုပ်ကို လာလုစားတာ၊ ဒါလေးရှိတာ ဒါလေးယူသွားတော့ ဘာနဲ့လုပ်ကိုင်စားသောက်ကြတော့မလဲ၊ တိရိစ္ဆာန်တွေလည်း သွားစရာလာစရာ မရှိတော့ဘူးပေါ့” ဟု ဝမ်းနည်းစွာပြောသည်။


    ၄င်းကျေးရွာမှ ကိုစံဝင်းကလည်း “ ကျွန်တော်တို့အခု လုပ်ကိုင်စားသောက်နေတဲ့ ၁၀၂ဧကကို ဦးငြိမ်းမြိုင်က အတင်းအဓမ ကန်ဝင်တူးဖို့လုပ်နေတယ်၊ ရွာမှာ တစ်ယောက်ကို ၁ဧက၊ ၂ဧက၊ ၃ဧက အများဆုံးလောက်ပဲပိုင်ဆိုင်ကြတယ်၊ သူဝင်တူးတဲ့အခါကျရင် ကျွန်တော်တို့ရွာသားတွေ စားဝတ်နေရေးအားလုံး ဆင်းရဲဒုက္ခရောက်ကုန်မှာ၊ ကျွန်တော်တို့ကို ပိုက်ဆံပေးရင်တောင် မယူနိုင်ဘူး၊ ကိုယ့်မြေပဲ ကိုယ်ပြန်လုပ်ချင်တယ်၊ ဒါနဲ့ပဲ လုပ်ကိုင်စားသောက်တတ်တယ်” ဟု ပြောသည်။

    ကိုပေါ်ဆန်းကလည်း “မဖြစ်မနေကန်ဝင်တူးရင်တော့ လုံးဝ လက်ခံမှာမဟုတ်ဘူး၊ ဘာဖြစ်လို့လဲဆိုတော့ ကျွန်တော်မှာ သားသမီးအငယ်လေးတွေ ၅ ယောက်ရှိတယ်၊ လုပ်စားတာမှ ၁ဧကခွဲလေးပဲ ရှိတာ၊ တူးခဲ့ရင်တော့ ကိုယ့်နည်းကိုယ်ဟန်နဲ့တော့ ကာကွယ်သွားမယ်” ဟု ပြောသည်။

    မြို့နယ်မြေစာရင်းမှ ဦးကျော်ကျော်မိုးနှင့် ကျုံတိုင်းကြီးအုပ်စုမှ ဥက္ကဌ ဦးလှဝင်းကို မေးမြန်းကြည့်ရာတွင် တိုင်းအဆင့် ဌာနဆိုင်ရာက လန ၃၉  ချပေးထားပြီး တရားဝင်စာထုတ်ပေးထားကြောင်း၊ လုပ်ပိုင်ခွင့်ပေးထားကြောင်း ပြောပြသည်။

ဥပဒေ ပုဒ်မ  လန ၃၉ ဟူသည်မှာ လယ်ယာမြေ အခြားနည်း အသုံးပြုခွင့်ကို ဆိုလိုသည်။


    လယ်ယာမြေအခွင့်အရေးနှင့် ကာကွယ်စောင့်ရှောက်မှုကော်မတီမှ ဦးသိန်းလွင်ဦးကိုမေးကြည့်ရာတွင် “လန ၃၉ လျှောက်ချင်ရင် သီးနှံစိုက်ပျိုးလို့မရတဲ့နေရာတွေကို သမ္မတဆီအထိ အဆင့်ဆင့်စာတင်ရတယ်၊ သမ္မတကခွင့်ပြုရင် အဆောက်အဦးဆောက်ချင်ရင်ဆောက်၊ ကန်တူးချင်တူး၊ စိုက်ပျိုးလို့ရတဲ့နေရာတွေဆိုရင်တော့ ဥပဒေအရလျှောက်လို့မရဘူး” ဟု ပြောသည်။     


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts