>
လူထုနဲ့ ဒေါ်အောင်ဆန်းစုကြည် အမေးအဖြေကဏ္ဍ
မတ်လ ၄၊ ၂၀၁၁ RFA အစီအစဉ်
မေးသူများ – ကိုဘိုကြီး၊ ကိုတင်ဦး၊ ကိုဖိုးခွား၊ ဦးညွန့်လှ၊ ကိုကျော်ကျော်စိုး၊ ကျော်ညွန့်
မေးသူ။ ။ ကိုဘိုကြီး
မေးခွန်း။ ။ ဒေါ်အောင်ဆန်းစုကြည်ခင်ဗျား၊ ကျွန်တော့်နာမည် ကိုဘိုကြီးလို့ခေါ်ပါတယ်။ တောင်ငူခရိုင်ဖြူးမြို့နယ်၊ ဇေယျဝတီမြို့ကပါ။ ၈၈၊၈၉၊၉၀ ခုနှစ်လောက်တုန်းကတော့ အဲဒီဒေသမှာ ဗိုလ်ကြီးစောလှဖြူလို့လူသိများကြပါတယ်။ အခုတော့ အမေရိကန်နိုင်ငံ၊ တက်(စ)ဆပ်ပြည်နယ်။ ဟိုစတွန်မြို့မှာနေပါတယ်။ ရောက်တဲ့နေရာတိုင်းမှာ ဒေါ်အောင်ဆန်းစုကြည် NLD အဖွဲ့ကဆို တာနဲ့ တွေ့ကြသူတိုင်းရဲ့ စာနာမှုရလို့ အဖွဲ့ချုပ်နဲ့ ဒေါ်အောင်ဆန်းစုကြည်ကိုရိုသေလေးစားစွာ ဦးညွတ်လျက်ပါ။ ကျွန်တော်တို့ ဒီဘက်မှာ အဖွဲ့အစည်းတွေတော်တော်များများရှိပါတယ်။ ဒေါ်အောင်ဆန်းစုကြည်ပြောတဲ့ဒီမိုကရေစီရေးအတွက် ကျွန်မတဦးတယောက်တည်း လုပ်လို့မရဘူး။ အားလုံးပါဝင်ရမယ်ဆိုတာ ကြားရသိနေရပါလျက် အောက်ခြေအဖွဲ့ဝင်တွေ တော်တော်များများ ပါဝင်ပတ်သတ်ခွင့် မရသလို ဖြစ်နေကြပါတယ်။ ဒီအခြေအနေတွေကို ကျော်လွှားနိုင်ဖို့အတွက် နည်းလမ်းများ အကြံဥာဏ်များ ပေးပါရန် တောင်းခံအပ်ပါတယ် ခင်ဗျား။ အဖွဲ့ချုပ်နဲ့ ဒေါ်အောင်ဆန်းစုကြည်ကို အဝေးကနေပဲ ဦးညွတ်လိုက်ပါတယ်။
ဖြေ။ ။ ကိုဘိုကြီးက အမျိုးသားဒီမိုကရေစီအဖွဲ့ချုပ်ဝင်ဖြစ်လို့ စာနာမှုတွေရခဲ့တယ်ဆိုတာ သိရလို့ ၀မ်းသာပါတယ်။ အဖွဲ့ချုပ်
ကိုပြည်တွင်းပြည်ပမြန်မာပြည်သားများထောက်ခံအားပေးနေမှုကြောင့် ကျွန်မတို့ (၁၀) စုနှစ်နဲ့ချီပြီး အခက်အခဲအမျိုး မျိုးကို ကျော်လွှားနိုင်ခဲ့တာပါ။ အောက်ခြေအဖွဲ့ဝင်တွေ တော်တော်များများ ပါဝင်ပတ်သတ်ခွင့်မရဘူး ဆိုတာ နဲနဲတော့ မရှင်းသလို ဖြစ်နေပါတယ်။ အဖွဲ့ချုပ်လုပ်ငန်းတွေမှာ ဘယ်သူမဆို ပါဝင်လို့ရပါတယ်။ လူအင်အား၊ အလုပ်အင်အားတွေလည်း အမြဲပဲလိုနေပါတယ်။
မေးသူ။ ။ ကိုတင်ဦး။
မေးခွန်း။ ။ ဒေါ်အောင်ဆန်းစုကြည်ခင်ဗျာ။ ကျန်းကျန်းမာမာနဲ့ အသက်ရာကျော်ရှည်ပါစေလို့ ဆုတောင်းပေးလျက်ပါ။ ကျွန်တော် တင်ဦးပါ။ အမျိုးသားဒီမိုကရေစီအဖွဲ့ချုပ် ယခင်မင်္ဂလာဒုံက ဖြစ်ပါတယ်။ ပြည်ထောင်စုမြန်မာနိုင်ငံအမျိုးသားကောင်စီ၊ NCUB မှ လူတစုဟာ ၂၀၀၉ ခုနှစ်၊ နှစ်သစ်ကူး အထူးထုတ်ပြန်ချက်ဆိုတဲ့ ထုတ်ပြန်ချက်နဲ့၊ အမျိုးသားညီညွတ်ရေး ညီညွတ်ရေးအစိုးရ NUG ကိုဖွဲ့စည်းကြောင်း ကြေငြာခဲ့ပါတယ်။ ၀ိုင်းဝန်းပြစ်တင်ဝေဖန်ကြလို့ ပျက်စီးသွားခဲ့ပါတယ်။ အခုတခါ ဖက်ဒရယ်ပြည်ထောင်စု၊ ပြည်သူ့လွှတ်တော်ကို ဖွဲ့စည်းလိုက်ကြောင်း ကြေငြာခဲ့ပြန်ပါတယ်။ ဒီတခါဖွဲ့စည်းခြင်းကို ဒေါ်အောင်ဆန်းစုကြည်ကိုယ်တိုင် ထောက်ခံထားပါတယ်လို့ NCUB မှ လူတစု ပြောနေကြပါတယ်။ ကျွန်တော် မေးပါရစေခင်ဗျား။ ဒေါ်အောင်ဆန်းစုကြည် ထောက်ခံခြင်း၊ မထောက်ခံခြင်းကို ကျွန်တော်နဲ့အတူ အဝေးမှာရောက်နေကြတဲ့သူ တော်တော်များများက သိချင်နေကြပါတယ်။ ဖြေကြားပေးပါခင်ဗျား။
ဖြေ။ ။ ဖက်ဒရယ်ပြည်ထောင်စု ပြည်သူ့လွှတ်တော် ဖွဲ့စည်းတယ်ဆိုတာကို ကျွန်မရေဒီယိုသတင်းတွေ မှတဆင့်သာ ကြားခဲ့ရတာပါ။ အရေးကြီးတာက ဘယ်သူထောက်ခံတယ်။ ဘယ်သူထောက်မခံဘူး ထက် အချင်းချင်းကြားမှာ ညီညွတ်မှုပို မို ခိုင်မာစေမယ့် လုပ်ငန်းတွေကိုသာ အကောင်အထည်ဖေါ်ဖို့ ဖြစ်ပါတယ်။ ပြည်ပရောက်မြန်မာ့ဒီမိုကရေစီအုပ်စုတွေအကြား၊ အတွေး အခေါ်အမျိုးမျိုးအဖုံဖုံရှိတာ မထူးဆန်းပေမယ့်၊ စိတ်ဝမ်းကွဲမှုတွေမဖြစ်အောင် အားလုံးကြေကြေလည်လည် ဆွေးနွေးပြီး ညီညီညွတ်ညွတ် လုပ်ကြမယ်ဆိုရင်တော့ အကောင်းဆုံးပါပဲ။
မေးသူ။ ။ ကိုဖိုးခွား
မေးခွန်း။။ ။ အမေစုရေ ကျွန်တော်ကတော့၊ အမေရိကန်နိုင်ငံ ဆန်ဖရန်စစ္စကိုမြို့က၊ တက္ကစီသမားလေး ကိုဖိုးခွားဖြစ်ပါတယ်။ လူငယ်တွေကွန်ယက်ဆိုတာကို နားမလည်ဘူးဆိုတော့၊ အဲဒါကို ပြန်တွေးကြည့်တာ ကွန်ယက်ဆိုတာကို ၀ါသနာပါရာတစ်ခု ရဲ့ လွတ်လပ်ခွင့် တီထွင်ခွင့်၊ လွတ်လပ်ခွင့်တွေကို ဆန္ဒတူရာအဖွဲ့တွေနဲ့ ဖွဲ့ပြီးတော့ တရားမျှတတဲ့ ဥပဒေဘောင်ထဲက တောင်းဆိုလှုပ်ရှား ရုန်းကန်နေတာကိုခေါ်တယ်လို့ အဓိပ္ပာယ် ဖွင့်ချင်တယ်။ အမေစုဘယ်လိုသဘောရလဲ။ အမေစုနဲ့ သဘောတူရင် ထပ်ပြောချင်တယ်။ အာဏာရှင်တိုင်းပြည် မပြောနဲ့ အခြားဒီမိုကရေစီထိပ်ခေါင် အမေရိကန်မှာတောင်မှ ဥပဒေပြုတဲ့အခါမှာ ဗျူရိုကရက်ဆန်ဆန်၊ အာဏာရှင်ဆန်ဆန် လုပ်သွားတာတွေရှိတယ်။ အဲဒီအတွက်ကြောင့် ကိုယ့်အခွင့်အရေးအတွက်ကြောင့် ကိုယ့်အခွင့်အရေးအတွက်ကို၊ ကိုယ်ကိုယ်တိုင် စတင် ရုန်းကန်ဖို့ အရေးကြီးတယ်ဆိုတာကို ကျွန်တော်နားလည်ထားတယ်။ ဒါ့ကြောင့်မို့ ဖြည့်စွက်ချင်တဲ့ အမြင် ထပ်ဖြည့်ပြောပါအုံး အမေစု ရေ။
ဖြေ။ ။ သားရဲ့ကွန်ယက်အပေါ်မှာ အမြင်ကို အမေသိပ်သဘောကျပါတယ်။ သားပြောတာ နှစ်ခုစလုံးက ဆက်သွယ်မှုလည်း ရှိနေပါတယ်။ ခိုင်မာတဲ့ပြည်သူ့ကွန်ယက်တွေရှိမှ အာဏာပါဝါသုံးပြီး ပြည်သူလူထုရဲ့အခွင့်အရေးတွေကို ထိပါးစေမယ့်အလုပ်တွေကို လုပ်တာမျိုး မဖြစ်အောင်ကာကွယ်နိုင်မှာပါ။ ဒီမိုကရေစီဆိုတာရရုံနဲ့ ပြီးတဲ့ ကိစ္စမဟုတ်ပါဘူး။ ဆက်လက်ပြီးမှန်မှန်ကန် ကန်ရှင်သန်ဖို့ အမြဲထိန်းသိမ်းထားဖို့ လိုပါတယ်။ ဒါ့ကြောင့် ပြည်သူတွေအစုအဖွဲ့အင်အားနဲ့ အစိုးရလုပ်သူတွေကို ထိန်းထားဖို့လိုတဲ့အခါ ထိန်းနိုင်ဖို့ အရေးကြီးပါတယ်။
မေးသူ။ ။ ဦးညွန့်လှ
မေးခွန်း။ ။ မင်္ဂလာပါ ဒေါ်အောင်ဆန်းစုကြည်ခင်ဗျာ။ ကျွန်တော်က ကနေဒါနိုင်ငံက ဖြစ်ပါတယ်။ မေးခွန်းကတော့ ကုလသမဂ္ဂအနေနဲ့ မြန်မာ့အရေးကိစ္စတွေကို ဆွေးနွေးဆုံးဖြတ်ချက်ချတဲ့အရာတိုင်းမှာ အသက်မ၀င်သလိုနဲ့၊ အင်အားချိနှဲ့ ပြီးတော့ စည်းနှောင် အားလည်းမရှိ ဖြစ်နေတာကို တွေ့မြင်ကြားသိနေရပါတယ်။ နှစ်ပေါင်းများစွာရှိနေပါပြီ။ ဒီကိစ္စက။ ဒီမကြာခင် ရက်ပိုင်းအတွင်းကပဲ ကုလသမဂ္ဂအတွင်းရေးမှူးချုပ် ဘန်ကီမွန်းရဲ့ မြန်မာနိုင်ငံ အစိုးရသစ်အပေါ် အကောင်းမြင်ဝါဒကို သုံးသပ်သွားတဲ့ သဘောထားအမြင်က မြန်မာပြည်သူအားလုံးအတွက် ဒဏ်ရာဒဏ်ချက်တွေဖြစ်စေပါတယ်။ ဒါကြောင့်မို့လို့ ဒီကုလသမဂ္ဂနဲ့ပတ်သတ်တဲ့ ဆုံးဖြတ်ချက်တွေ ချမှတ်နိုင်ဖို့ အကောင်အထည်ဖေါ်ဆောင်တဲ့နေရာမှာ မည်သို့မည်ပုံ ဆောင်ရွက် လုပ်ကိုင်သင့်ပါသလဲ ဆိုတာကို သိလိုပါတယ်။ တဆက်တည်းမှာပဲ မေးလိုတာက ခုနိုင်ငံတကာက မြန်မာနိုင်ငံအရေးကို သတိကြီးစွာနဲ့ စောင့်ကြည့်နေပါတယ်။ အထူးသတိထား နေပါတယ် ဆိုတဲ့ နိုင်ငံတကာခေါင်းဆောင်ကြီးတွေရဲ့ စကားရပ်တွေကို ဒေါ်အောင်ဆန်းစုကြည်အနေနဲ့ မည်ကဲ့သို့ပြန်လည်ပြောကြားရန် ရှိပါသလဲခင်ဗျား။ ကျေးဇူးတင်ပါတယ်။
ဖြေ။ ။ ကမ္ဘာ့ကုလသမဂ္ဂဆိုတာ နိုင်ငံတကာပေါင်းမြောက်များစွာနဲ့ ဖွဲ့ထားတာမို့ စည်းစည်းလုံးလုံးဖြစ်နိုင်မှုတွေ ရှိသင့်သ လောက်မရှိတာကတော့ အမှန်ပါပဲ။ ကျွန်မတို့မြန်မာနိုင်ငံအရေးနဲ့ပတ်သတ်လို့ အထွေထွေညီလာခံကဆုံးဖြတ်ချက်တွေ ချခဲ့ပေမယ့် ဒီဆုံးဖြတ်ချက်တွေ လက်တွေ့အကောင်အထည်ဖေါ်နိုင်ဖို့ ထိထိရောက်ရောက် မလုပ်နိုင်တာလည်း မကျေနပ်စရာပါပဲ။ မြန်မာနိုင်ငံကိစ္စတွေကို သေသေချာချာ လေးလေးနက်နက် လေ့လာသုံးသပ်တာဝန်ယူမယ့် ပုဂ္ဂိုလ်တဦး အချိန်ပြည့်ခန့်ထားမယ်ဆိုရင် အတွင်းရေးမှူးချုပ်လည်း မြန်မာနိုင်ငံအခြေအနေတွေကို တိတိကျကျသိနိုင်လိမ့်မယ်လို့ ထင်ပါတယ်။ ဒါ့ကြောင့် ဒီလိုတာဝန်တွေ အချိန်ပြည့် ထမ်းဆောင်နိုင်မယ့် လူတစ်ယောက်ခန့်နိုင်ဖို့ အမြန်ဆုံးမျှော်လင့်ပါတယ်။ မြန်မာနိုင်ငံအရေးကို နိုင်ငံတကာက သတိကြီးစွာနဲ့ စောင့်ကြည့် နေတာ ကောင်းပါတယ်။ ဒါပေမယ့်ကြည့်ရုံတင် မဟုတ်ဘဲ လုပ်သင့်လုပ်ထိုက်တာတွေကို လုပ်ဖို့လည်း လိုပါတယ်။
မေးသူ။ ။ ကိုကျော်ကျော်စိုး
မေးခွန်း။ ။ ဒေါ်အောင်ဆန်းစုကြည်ခင်ဗျား။ ကျွန်တော် ကျော်ကျော်စိုးပါ။ ဂျပန်မှာနေတဲ့ တစ်ယောက်ဖြစ်ပါတယ်။ ကျွန်တော် မေးချင်တဲ့မေးခွန်းက၊ တူနီးရှားကအစအရှေ့အလယ်၊ အခုလစ်ဗျားနိုင်ငံအထိ ရောက်ရှိနေပြီဖြစ်တဲ့၊ အာရပ်ကမ္ဘာရဲ့ အာဏာရှင်တွေကို တော်လှန်လှုပ်ရှားတဲ့ပြောင်းလဲမှုကြီးက ဖြစ်ပွားနေပါတယ်။ အဲဒီတော့ ဒီပြောင်းလဲမှုအပေါ် ဒေါ်အောင်ဆန်းစုကြည်အနေနဲ့ ဘယ်လိုမြင်ပါသလဲ။ နောက် သူ့ရဲ့ရိုက်ခတ်မှုဟာ ကမ္ဘာ့ဘယ်တနံတလျားအထိများ ရောက်နိုင်မလဲ ဆိုတာ ကျွန်တော်သိချင်ပါတယ် ခင်ဗျား။ ကျေးဇူး တင်ပါတယ်။
ဖြေ။ ။ အရှေ့အလယ်ပိုင်းမှာ မကြာမီကာလအတွင်းက ဖြစ်ပျက်တဲ့ကိစ္စတွေ၊ ဖြစ်ဆဲကိစ္စတွေဟာ လူသားတွေဟာ မိမိတို့သဘာဝအရကို အာဏာကိုင်ပြီး ဖိနှိပ်ချုပ်ခြယ်တဲ့စနစ်မျိုးကို မနှစ်သက်ဘူးဆိုတာ ထင်ရှားစေပါတယ်။ အရှေ့အလယ်ပိုင်းက အဖြစ်အပျက်တွေက ကမ္ဘာ့ဒေသတွေကို ဘယ်လောက်အထိ ကူးစက်သွားမယ်ဆိုတာ မသိနိုင်ပေမယ့်၊ လွတ်လပ်ချင်စိတ်၊ တရားမျှတမှုကို လိုလားစိတ်တွေကတော့ ကမ္ဘာတ၀ှမ်းမှာပျံ့နှံ့နေတယ်လို့ပဲ ယူဆနိုင်ပါတယ်။
မေးသူ။ ။ ကျော်ညွန့်
ကျွန်တော့နာမည်ကျော်ညွန့်ပါ။ ကျွန်တော်စင်္ကာပူမှာအလုပ်လုပ်ကိုင်နေသူပါ။ ကျွန်တော်သိချင်တာတခုက ဒီမြန်မာနိုင်ငံမှာ မြန်မာဘာသာနဲ့ကွန်ပျူတာအသုံးပြုဖို့ Myanmar Window System မရှိသေးတဲ့အချက်ပါပဲ။ စီးပွားရေး ပိတ်ဆို့မှုကြောင့်၊ sanction ကြောင့်အမေရိကန်နိုင်ငံဟာ မြန်မာနိုင်ငံကိုလုံးဝပိတ်ဆို့ထားတဲ့ အရေးယူတဲ့ အရေးယူမှုမျိုးမှာ ဒီတခုဟာ အပါအ၀င်ဖြစ်ပါတယ်။ ဒီ Myanmar System နဲ့ ကွန်ပျူတာစနစ်မရှိတဲ့အတွက်ကြောင့်မို့လို့ မြန်မာနိုင်ငံပြည်သူအများစုဟာ ဒီကမ္ဘာပေါ်မှာဖြစ်ပေါ်နေတဲ့ ဒီအင်တာနက်နည်းပညာတော်လှန်ရေးကြီးထဲမှာ မြန်မာနိုင်ငံဟာ နောက်ကျပြီး ကျန်နေခဲ့ပါတယ်။ ဒေါ်စုကို မေတ္တာရပ်ခံချင်တာက ဒီကိစ္စနဲ့ပတ်သတ်ပြီး ဖြေရှင်းပေးဖို့အချိန်ရယ်။ ဒုတိယတချက်အနေနဲ့ကတော့ ကျွန်တော်တို့နိုင်ငံက ထွက်တဲ့ရေနံသဘာဝဓာတ်ငွေ့တွေကို ကုန်ကြမ်းအဖြစ်နဲ့ပဲ ရောင်းနိုင်ပြီးတော့ ကုန်ချောအဖြစ်နဲ့ မရောင်းချနိုင်ဘူး။ သိုလှောင်နိုင်သောအနေအထားကို ကျွန်တော်တို့ မထိန်းသိမ်းနိုင်ဘူး။ ဒီလိုနည်းပညာမျိုးတွေဟာ အမေရိကန်နိုင်ငံမှာပဲတည်ရှိပြီး၊ အမေရိကန်နိုင်ငံရဲ့ပိတ်ဆို့မှုကြောင့် ကျွန်တော်တို့ဟာ ကိုယ့်ရဲ့ တန်ဖိုးရှိတဲ့သယံဇာတတွေကို ကုန်ချောပစ္စည်း မလုပ်နိုင်ဘူး။ မလုပ်နိုင်တဲ့ အတွက်ကြောင့် ကျွန်တော်တို့နိုင်ငံမှာရှိနေတဲ့ လူငယ်တွေဟာ အလုပ်အကိုင် အခွင့်အလမ်းတွေဆုံးရှုံးနစ်နာနေပါတယ်။ ဒီကိစ္စတွေအားလုံးကိုစဉ်းစားသုံးသပ်ပေးစေလိုပါတယ်။
ဖြေ။ ။ ဦးကျော်ညွန့်သုံးသပ်ချက်တွေက မပြည့်စုံဘူးလို့ထင်ပါတယ်။ မြန်မာပြည်သူတွေ အင်တာနက်နည်းပညာတော်လှန်ရေးမှာ နောက်ကျကျန်ခဲ့ရတဲ့အကြောင်းက မြန်မာဘာသာနဲ့ ကွန်ပျူတာစနစ်မရှိတာကြောင့်လား၊ ပြည်တွင်းက အာဏာပိုင်တွေရဲ့ ပိတ်ဆို့ကန့်သတ်မှုတွေကြောင့်လား ဆိုတာ စဉ်းစားစရာပါ။ ရေနံနဲ့သဘာဝဓာတ်ငွေ့နဲ့ ပတ်သတ်လို့ ဆိုရင်လည်း၊ အမေရိကန်ပိတ်ဆို့မှုကြောင့် နည်းပညာတွေမရလို့ အခွင့်အလမ်းတွေရှုံးတယ်ဆိုတဲ့ဘက် ကိုပဲကြည့်ပြီး လက်ရှိ ရရှိနေတဲ့ ရေနံနဲ့ဓာတ်ငွေ့မှ အင်မတန်များတဲ့ ၀င်ငွေတွေကို ပြည်သူတွေအကျိုးအတွက် ဘယ်လောက်သုံးလဲ ဆိုတာကိုလည်း မကြည့်လို့ကတော့ မဖြစ်ပါဘူး။
(ABMA ၀ိုင်းတော်သားများက စာဖိုင်ဖြည်ပါသည်)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
