>
မြို့လုံး ပတ်လည်လှည့်ပါလို့ တန်းစီတိုးစား ဓါတ်ဆီရောင်းကြစို့
မိုးမခ အထောက်တော်၊ ရန်ကုန်
ဒီဇင်ဘာ ၁၊ ၂၀၁၀
ပြန်ပေါ်လာတဲ့ ကားတန်းရှည်ကြီးတွေ
ရန်ကုန်မြို့ရဲ့ လမ်းတွေမှာ ကားတန်းရှည်ကြီးတွေ လအတန်ကြာ ပျောက်ကွယ်နေခဲ့ပြီးနောက် ယခုလဆန်းပိုင်းက စတင်ပြီး တကျော့ပြန် ပြန်မြင်တွေ့လာရပါတယ်။ ကားတန်းရှည်ကြီးတွေက ယခင်ထက် များပြားပြီး မြို့နဲ့အလှမ်းကွာတဲ့ ဆိုင်အချို့ကလွဲရင် ပုဂ္ဂလိက စက်သုံးဆီဆိုင်တိုင်းမှာ တွေ့မြင်နေရပါတယ်။
ကားအမျိုးအစားတွေအရ ကြည့်ရင် လေးဘီးကားအမျိုးအစားက အများဆုံးဖြစ်နေပါတယ်။ ကားတံခါး တခြမ်းဟနေတဲ့ကား၊ ကားဘော်ဒီတွေက မညီမညာနဲ့ လက်ဖြစ်ဆေးသုတ်ထားတဲ့ ကားလည်း ရှိပြီး ကားနောက်ခန်းမှာ ပလပ်စတစ်ဓါတ်ဆီပုံးတွေ တင်ထားတာလည်းမြင်နိုင်ပါတယ်။ လေးဘီးကားတွေ အပြင် ပါဗလေကာ၊ မာဇဒါ၊ ဆန်နီလိုပစ်ကပ်ကားငယ်တွေလည်း မြင်တွေ့ရပါတယ်။
အဲဒီကားအမျိုးအစားတိုင်းဟာ ဆီထုတ်ပြီး ပြန်ရောင်းတာ မဟုတ်ပေမယ့် ပြန်ရောင်းတဲ့ကားတွေရဲ့ နောက်ခန်းမှာ ဓါတ်ဆီပုံးတွေ့မြင်ရတာလည်း ရှိသလို၊ ကားနောက်ပိုင်းမှ ပလပ်စတစ်ပိုက် တန်းလန်းနဲ့ ပုံးတွေထဲ ဖေါက်ထုတ်နေတာကို လမ်းပေါ်မှာမြင်တွေ့နေရတာလည်း ရှိပါတယ်။
မာဇဒါ လေးဘီးလို ဖင်မလီယာလို ကားတွေသာမကပဲ အိမ်စီး ဆလွန်းကားတွေထဲက ဆန်နီဆူပါဆလွန်းလို၊ ကိုရိုလာလိုကားတွေလိုမျိုး ပိုင်ဆိုင်သူတွေအထဲမှာလည်း ဓါတ်ဆီပြန်ထုတ်ရောင်းသူတွေ ရှိပါတယ်။ သိန်း၁၀၀၊ ၁၅၀ တန်ကားကိုပိုင်ဆိုင်ထားပေမယ့် တရက်ကို ကျပ် ၆ ထောင် ၁ သောင်းကျော်ဝင်ငွေကို မလွန်ဆန်နိုင်ပါဘူး။ အချိန်ကလည်းရှိ တရက်ကို ကျပ်၁သောင်း ၀န်းကျင်ဝင်ငွေ ပမာဏကလည်း ဆွဲဆောင်မှုရှိနေတော့ ကိုယ်ပိုင်ကားစီးသူတွေထဲမှာလည်း ဆီထုတ်ရောင်းသူ ရှိနေတာပါ။
ဒါက မြန်မာပြည်ရဲ့ သီးခြားလက္ခဏာ တရပ်လိုဖြစ်နေပါတယ်။ လွန်ခဲ့တဲ့ ၂၅နှစ်က ထုတ်ခဲ့တဲ့ ကားကို ကျပ် သိန်း ၁၀၀ ကျော်နဲ့ ၀ယ်စီးပေမယ့် တရက်ကို ကျပ် ၁ သောင်းမျှသော ၀င်ငွေကိုလည်း မက်မောစွာ နဲ့ အချိန်ကုန်ခံ ၊ နေပူခံတန်းစီနေကြရသေးတာပါ။ ကားဆိုတာ အသုံးပစ္စည်း မဟုတ်ပဲ အရင်းအနှီးတစ်ခု ဖြစ်နေတာဟာ မြန်မာနိုင်ငံရဲ့ ထူးခြားချက် ဖြစ်လို့ပါပဲ။
တဖက်ပွင့်၊ တခြမ်းပိတ် မြန်မာပြည်ဈေးကွက်
အခုလဆန်းက စတင်ခဲ့တဲ့ ဓါတ်ဆီတန်းစီ ထုတ်ရောင်းတဲ့ အဖြစ်အပျက်ကို စေ့ငုကြည့်လိုက်တဲ့အခါမှာ အစိုးရက ဓါတ်ဆီကို ၂၅၀၀ ကျပ်နဲ့ပဲ ရောင်းရမယ် ဆိုတဲ့အချက်၊ နယ်မြို့တွေနဲ့ ရန်ကုန်မြို့ဝယ်ယူနိုင်တဲ့ အခွင့်အရေးမတူညီတဲ့ အချက်တွေကြောင့် ပျောက်ကွယ်လုနီးဖြစ်နေတဲ့ ပြင်ပဈေးကွက် ပြန်လည် အသက်ဝင်လာပါခဲ့တာပါ။
ရန်ကုန်မှာ ဓါတ်ဆီ ၁ ဂါလံကို ၂၅၀၀ ကျပ်နဲ့ ၀ယ်ခွင့်ရှိနေတဲ့ အချိန်မှာ နယ်မြို့မှာရှိတဲ့ ပုဂ္ဂလိကဆိုင်တွေမှာ ဂါလံ အကန့်အသတ်နဲ့ သို့မဟုတ် ရက်ခြားပြီး ရောင်းချပေးနေရတဲ့ အနေအထားဖြစ်နေပါတယ်။ နယ်မြို့ကြီးတွေမှ တဆင့်ထပ်ဆင်းကြည့်မယ် ဆိုရင် နယ်မြို့ငယ်တွေမှာ အဲဒီလို ၂၅၀၀ကျပ်နဲ့ ရောင်းချပေးတာမျိုးတောင် လုံးဝမရှိပဲ ပြင်ပဈေးကွက်ကိုသာ မှီခိုနေကြရ တာလည်းဖြစ်ပါတယ်။ အဲဒီလိုဟာနေတဲ့ နေရာတွေက ၀ယ်လိုအားကြောင့် ရန်ကုန်လိုမြို့ကနေ ဖြည့်ဆည်းပေးတဲ့ ဈေးကွက် သဘောဖြစ်ပေါ်လာတာပါ။
ထိုင်းနယ်စပ်၊ တရုတ်နိုင်ငံနယ်စပ်မြို့တွေမှာတော့ တဘက်နိုင်ငံက တင်သွင်းလာတဲ့ ဓါတ်ဆီကိုသာ မှီခိုနေကြရတာပါ။ ယခုလို အချိန်အခါလိုက် ပေါ်လာတဲ့ စီးပွားရေး လုပ်ကွက်ကို လုပ်ကိုင်နေတဲ့ ရန်ကုန်မြို့က ကားပိုင်ရှင် တယောက်ကို မေးမြန်းကြည့်တော့
“အခုလဆန်းကစပြီး ဓါတ်ဆီရောင်းပေးတာ ရန်ကုန်မှာ တဆိုင်နဲ့ တဆိုင်မတူဘူး ၊ တချို့ဆိုင်က ၆ ဂါလံအထိ ရောင်းပေးသလို တချို့ဆိုင်က ၄ ဂါလံ၊ ၃ ဂါလံ၊ ၂ ဂါလံပဲပေးတာလည်း ရှိတယ်။ ပုဇွန်တောင် ကြက်တန်းက ဆိုင်ဆို ၆ ဂါလံထိပေးတယ်။ ဘူတာကြီးရှေ့က ဆိုင်ဆို ၄ ဂါလံ၊ သိမ်ဖြူလမ်းကဆို ၃ ဂါလံ ၊ အဲလိုကွာကြတယ်။ ကျွန်တော်က မနက် စောစောကြက်တန်းက ဆိုင်ကို တကြိမ်စီလိုက်တယ်။ အဲဒီက ထွက်ရင် ဦးဝိစာရလမ်း ရေကူးကန်ရှေ့နားကဆိုင်ကို သွားတယ်။ အဲဒီနောက် ဘူတာကြီးကိုစီတယ် ၁၂ဂါလံရရင် ၁၁ ဂါလံရောင်းလိုက်ပြီး ၁ဂါလံကိုမောင်းဖို့ ထားတယ်။ အဲလိုရောင်းလိုက်ရင် အမြတ်က ၆ထောင်ကျော် ၇ ထောင်နီးပါး ကျန်တယ်”
လုိ့သူ့ရဲ့ တနေ့တာ တန်းစီရပုံကို ပြောပြပါတယ်။
ဒါကတော့ မြန်မာနိုင်ငံ ရန်ကုန်မြို့က ကားပိုင်ရှင်တွေရဲ့ ဘ၀နဲ့ စီးပွားရှာနည်း တနည်းပါ။
မူမပြောင်း လူမပြောင်း တန်းစီ တိုးစားရောင်း
အစိုးရရဲ့ မကြာခဏပြောင်းတတ်တဲ့ စီးပွားရေး မူဝါဒ၊ တသမတ်ထည်း သွားတဲ့ စည်းမျဉ်းဥပဒေ မရှိပဲ သူတို့ အကျိုးစီးပွား၊ လုပ်ငန်းရှင်ကြီးတွေရဲ့ အကျိုးစီးပွားကိုကြည့်ပြီး အမျိုးမျိုးပြောင်းတတ်တာမို့လို့ လူထုကလည်း ပြောင်းလဲတဲ့ အခြေအနေနဲ့ လိုက်ဖက်အောင် တပွဲထိုး နည်းနဲ့ စီးပွားရှာတတ်ကုန်ကြပါတယ်။
ယခုလက်ရှိ အုပ်ချုပ်နေတဲ့ နအဖ အစိုးရ၊ မကြာခင် ပုံစံပြောင်းတက်လာမယ့် ကြံ့ဖွံ့အစိုးရ လက်ထက်မှာလည်း အခုလိုပဲ လူတွေကို လမ်းပေါ်တန်းစီတိုးစားတဲ့ အဖြစ်ကလွတ်အောင် ဈေးကွက်စီးပွားရေး စနစ်ကို ပီပြင်စွာဖေါ်ဆောင်မှာလား မဖေါ်ဆောင်ဘူးလား ဆိုတာစောင့်ကြည့် ကြရဦးမှာပါ။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
