>
ကိုဇာဂနာဖတ်ဖို့ ဟာသ
သင်္ကြန်စာ
ပျော်တော်ဆက်သာဂိ
ဧပြီ ၁၅၊ ၂၀၁၀
ကိုဇာဂနာရေ …
သတိရစွာနဲ့ စာရေးလိုက်တယ်။ သင်္ကြန်တွင်းမှ ရေးတော့ သင်္ကြန်စာပေါ့ဗျာ။ ထူးထူးခြားခြား လာမည့်နှစ်မှာ အတာဘာစားမည်၊ ညာစားမည်၊ သကြားမင်းကြီး ဘာစီး ညာစီးလာမည်။ ဟိုဟာတွေ ဒီဟာတွေ မြူးလို့ ဘယ်ဟာတွေ ဟိုဥစ္စာတွေ ပေါများမည်တို့ ရေးမှာ မဟုတ်ပါဘူး။ အကျဉ်းကျနေသူ မိတ်ဆွေတွေ၊ မိသားစုတွေဟာ သင်္ကြန်မှာ ဘယ်လိုမျိုး ပျော်ကြရမှာလဲ။ မြန်မာပြည်ကို ဆင်းတယ်ဆိုတဲ့ သကြားမင်းကလည်း ခါးမှာ ဗြောက်ထိုးထားတဲ့ စစ်အာဏာရှင်သင်္ကြန်မှာ ခပ်ကုပ်ကုပ်နဲ့ ခွေးသားရေပိုဒ်တောင် မထုတ်ရဲ၊ အမြီးတော့ မလှုပ်ရဲနဲ့ ကျီးကြည့် ကြောင်ကြည့်နဲ့ ဖြစ်နေမှာပါ။ ဟိုးတုန်းက မြန်မာပြည်သင်္ကြန်မင်းသားတွေဖြစ်တဲ့ ကိုဇာဂနာတို့၊ ကိုမင်းကိုနိုင်တို့ကို သံချပ်စင်တွေမှာ လိုက်ရှာနေမှာလားလို့တော့ မထင်ပေါင်။
၂၀၀၆ သင်္ကြန်ကတည်းကပေါ့နော် ခင်ဗျားရဲ့ စစ်အာဏာရှင်သင်္ကြန်ကို ခပ်စပ်စပ်ဝေဖန်ချက်ကြောင့် ခင်ဗျားရဲ့ အနုပညာတွေကို ပိတ်ပစ်လိုက်ကြတယ်။ ခင်ဗျားရဲ့ လှုပ်ရှားမှုတွေကို လူထုကြားထဲမှာ ပိတ်ဆို့လို့မရခဲ့ဘူး။ ၂၀၀၇ ရွှေဝါရောင်မှလည်း ခင်ဗျားကို ပိတ်ဆို့ဖမ်းဆီးခဲ့တာပဲ။ ၂၀၀၈ နာဂစ်ကျတော့ ခင်ဗျားရဲ့ မြန်မာပြည်ကြီးရဲ့ ဒုက္ခသည်တွေကို ကယ်တင်တဲ့ စောင့်ရှောက်တဲ့ လှုပ်ရှားမှုတွေကို ဇာတ်သိမ်းပစ်ဖို့ လုပ်ကြတယ်။ ခင်ဗျားကို ထောင် ၃၅ နှစ် ချထားလိုက်ပြီ။ ဒါပေမယ့် ပြည်သူလူထုဟာ ဇာဂနာရဲ့ သတ္တိနဲ့ ပြောရဲ ဆိုရဲ လုပ်ရဲ ကိုင်ရဲတဲ့ အပြုအမူကို အတုယူကြလို့ ခင်ဗျားဟာ စံပြပုဂ္ဂိုလ်တဦးပဲဆိုတာ လွှမ်းပတ်ကမ္ဘာတည်စေသော်ဝ်ပေါ့ဗျာ။
၂၀၁၀ မှာ အမေရိကန်ရောက် မြန်မာတွေက ပြည်သူ့ဂုဏ်ရည်ဆိုတဲ့ ဂုဏ်ပြုအစီအစဉ်တခု စတင်လုပ်ကိုင်ကြတယ်ဗျ။ သူတို့တတွေ ရွေးချယ်တဲ့ လူမှုလုပ်ငန်း စေတနာ့ဝန်ထမ်း စွမ်းဆောင်သူတွေ ၂၄ ဦးထဲမှာ ခင်ဗျားအမည် ပါလာတယ်။ ပြီးတော့ ၅ ဦး ဆန်ကာတင်ရွေးကြတော့ ခင်ဗျားအမည်လည်း ကျန်ရစ်တယ်။ နောက် ခင်ဗျားနဲ့အတူ ဆန်ကာတင်ကြသူတွေကလည်း ခင်ဗျားချစ်ခင် လေးစား ကြည်ညိုတဲ့ မိတ်ဆွေတွေ၊ ပုဂ္ဂိုလ်တွေပဲ ဖြစ်နေပြန်တယ်။ ဆရာတော်ကြီး ဦးဉာဏိသရ (သီတဂူဆရာတော်)၊ ကိုကျော်သူ၊ မဖြူဖြူသင်း၊ ဦးအေးမြင့် စသည် … ၀မ်းသာစရာပါဗျာ။ သာဓုခေါ်လိုက်ပါရဲ့။
မြန်မာပြည်က တပ်မတော်အစိုးရကြီးခင်ဗျာ ၂၀၁၀ မှာ လုပ်ပေးမယ် ပြောထားတဲ့ ရွေးကောက်ပွဲကြီးအတွက် လူမိုက်တွေ၊ လူညံ့တွေ၊ လူပေါတွေ ရွေးလို့မှ မပြီးသေးဘူး၊ အင်န်အယ်ဒီပါတီကတော့ နင်တို့တွေနဲ့ပေါင်းပြီး မိုက်တွင်းနက်မနေနိုင်ဘူးလို့ ဆုံးဖြတ်ချက်ချလိုက်တော့ မင်းတြားကြီး ဗိုလ်သန်းရွှေတို့မှာ အတော် အကြပ်ရိုက်နေတယ် ကြားတယ်ဗျ။
သူတို့ဘက်က လူတွေ (လူတွေတော့ မဟုတ်ဘူးဗျ၊ ဗိုလ်တွေ ဗိုလ်တွေ … လူတွေအပေါ်က ဗိုလ်လုပ်မယ့်သူတွေကို လွှတ်တော်ထဲ လွှတ်မှာဗျာ …) မှာက အဆင်သင့်ဖြစ်နေပြီ။ သူတို့ အပင်းသွင်းပြီး ပယောဂနဲ့ ပြုစားထားတဲ့ ဘိုလိုတော့ ဇွမ်ဘီ ပေါ့ဗျာ … ဖုတ်ကောင်ကြီးတွေခင်ဗျာ အင်န်အယ်ဒီနဲ့ ပုခုံးချင်းတိုက်ပြီး လွှတ်တော်ထဲ ဖျာဝင်ခင်းမယ်လို့ ပြင်ထားတာ သူတို့လည်း တန်းလန်းကြီး ဖြစ်နေကြတယ် ပြောတယ်။
နေပြည်တော်က ငလျင်ကြောတည့်တည့်မှာ ဆောက်ထားတဲ့ လွှတ်တော်သစ်ကြီးကို ဗိုလ်သန်းရွှေက အပြီးဆောက်နေချိန်မှာ ဖက်ဆစ်အလိုတော်ရိ လွှတ်တော်ရူးသူ ဖုတ်ကောင်တွေကလည်း လွှတ်တော်မပြီးလည်း ကိစ္စမရှိဘူး တဲ့ … ခင်းထားတဲ့ဖျာ ခေါင်းပေါ်တင်ပြီး အမိုးလုပ်လို့ နေပါ့မယ်လို့ မျက်ရည်ခံ ထိုးနေကြတယ် ကြားတယ်ဗျာ။ သင်္ကြန်မှာတောင် မဲဆွယ်တဲ့အနေနဲ့ မဏ္ဍပ်တွေမှာ ဖုတ်ကောင်အက သွားကပြီး စည်းရုံးရေးဆင်းမယ်လို့ သူတို့တွေ ပြင်ဆင်ကြသေးတယ်လေ။ သင်္ကြန်တွင်းမှာ ရွေးကောက်ပွဲ နိုင်အောင် ယတြာချေတဲ့အနေနဲ့ နေပြည်တော်က လွှတ်တော်ကြီးမှာ အုတ်စီ သဲသယ် လုပ်အားသွားပေးနေကြတယ် ပြောတယ်ဗျ။ သနားစရာပါဗျာ …
ကျနော်ကတော့ ခင်ဗျားပေးခဲ့တဲ့ မြပုဏ္ဏမာ အဖွဲ့သားများရဲ့ ၁၉၉၀ သင်္ကြန် သံချပ်များ ရုပ်သံဗီစီဒီလေးနဲ့ ခင်ဗျားကို အလွမ်းဖြေပြီး ကြည့်နေမိတော့တယ်။ စစ်အာဏာရှင်တွေလက်ထက်မှာ သံချပ်တွေ မရှိတော့တဲ့နောက် ရွေးကောက်ပွဲကြီး ပြီးသွားရင်လည်း သံချပ်တွေ ပြန်လည် ပွင့်လင်းလာမယ် မထင်ပါဘူးဗျာ။ ဒီမိုကရေစီဆိုတာ စစ်အာဏာရှင်ရဲ့ ဘောင်းဘီအိတ်ကပ်ထဲမှာ ရှိတယ်လို့ ဘယ်ပညာရှိတွေက အရူးချီးပန်း ပြောလိုက်လေသလဲ မသိဘူး။ ယုံတဲ့သူတွေက ယုံပြီးတော့ စစ်ဗိုလ်တွေရဲ့ ဘောင်းဘီအိတ်ထဲ ၀င်နှိုက်ဖို့ ကြံစည်နေကြောင်း လူသိရှင်ကြား ထုတ်ဖော်ပြောဆိုနေကြတဲ့ ဖုတ်ကောင်တွေကိုတော့ ဂရုဏာသက်မိပါရဲ့။ ဒီမိုကရေစီ ဆိုတာကို စစ်အာဏာရှင်ရဲ့ ဘောင်းဘီအိတ်ထဲမှာ မတွေ့ဘဲ ကာလနာတွေ တိုက်ကုန်ကြမယ် ထင်ပါရဲ့။
ကြံဖန်ပြီး ၀မ်းသာစရာပြောရရင်တော့ ဒီဖုတ်ကောင်ကြီးတွေနဲ့ အပေါင်းအပါတွေ၊ တတိယအုပ်စုတို့၊ ဘဲဥ ကြက်ဥ ငုံးဥ အစုအဖွဲ့တို့ဆိုတာတွေဟာ လွှတ်တော်ကြီးထဲမှာ စစ်အာဏာရှင်တွေအလိုကျ ငိုရ ရယ်ရ အသုံးတော်ခံဖို့ ပြင်ဆင်ကြရတော့မှာ ဆိုတော့ ကိုကျော်သူရဲ့ အခုလုပ်ပေးနေတဲ့ လိမ္မာယဉ်ကျေးစေတဲ့ သရုပ်ဆောင်သင်တန်းကိုတော့ မတက်မဖြစ် သွားတော့ တက်ကြရမှာပဲဗျ။
ပြီးတော့လည်း စစ်အာဏာရှင်တွေရဲ့ မတရားကျင့်မှုကို ခံရတဲ့နောက် ရောဂါဘယတွေ စွဲကပ်လာတဲ့အခါမှာ နာတာရှည်လူနာတွေကို ကုသစောင့်ရှောက်ပေးနေတဲ့ ဖြူဖြူသင်းတို့ဆီကိုလည်း အပူလာကပ်ကြရလိမ့်မယ် ထင်တယ်။
မတရာအလုပ်ခံရပြီဆိုတာ သိတဲ့ လွှတ်တော်ထဲက ဖုတ်ကောင်ကြီးတွေဟာ အမြင်မှန် အသိမှန်ရပြီးတော့ စစ်အာဏာရှင်တွေကို ပြန်လည် အရေးယူဖို့ ကြံစည်တဲ့နေရာမယ် အားနည်းသူတွေကို ကူညီနေတဲ့ ဦးအေးမြင့်တို့လို ရှေ့နေ ရှေ့ရပ်တွေဆီမှာ မျက်ရည်လေး တစမ်းစမ်းနဲ့ ရောက်လာကြဦးမှာပေါ့ဗျာ။
နောက် ဒါ့အပြင် သူတို့တတွေရဲ့ ဘ၀တွေဟာ စစ်အာဏာရှင်ရဲ့ ကပ်ဆိုးကြီးအောက်မှာ အဖတ်ဆယ်မရအောင် ဆုံးရှုံးသွားရပြီဆိုတာ အားလုံးထက် နောက်ကျပြီးမှ သိရှိ နောင်တရချိန်မှာလည်း ဘ၀ကူးလေး ဘာလေး ကောင်းအောင် ဆရာတော်ကြီးတွေဆီက ပရိတ်ရည်လေး ဘာလေး တောင်းသောက်ကြလိမ့်မယ် ထင်ပါရဲ့။
ဘ၀တွေ မပျက်ဘဲနဲ့ အသိမှန် အမြန်ရကြလို့ လွှတ်တော်ထဲက မျိုးချစ်ဖုတ်ကောင်ကြီးတွေက စစ်အာဏာရှင်တွေကို နင်ပဲ ငဆ ပြန်လှန်ပြောဆိုမိလို့ မတော်မတည့် နိုင်ငံတော်ရဲ့ အကျဉ်းထောင်တွေထဲ ထောင်ဒဏ် ကမ္ဘာ ၁ သိန်းနဲ့ ထောင်ချခံရရင်လည်း ထောင်ထဲမှာ ရောက်နှင့်နေပြီဖြစ်တဲ့ မိတ်ဆွေကြီး ကိုဇာဂနာရဲ့ အရိပ်အောက်မှာ ခြေသုတ်ပုဆိုး မြွေစွယ်ကျိုးမျှ လာရောက် ဦးညွှတ်ခိုလှုံကြရမှာပေါ့လေ။
အဲသလိုမျိုးလေး သူတို့ကို အားမငယ်ကြဖို့ အားပေးလိုက်ချင်တာပါပဲလေ။ စစ်အာဏာရှင်တွေရဲ့ ရွေးကောက်ပွဲကြီးကိုဝင်၊ ဖက်ဆစ်လက်ပါးစေ လွှတ်တော်ကြီးပေါ်ကို တက်ပြီး နောင်တနေ့မှာ ခွေးကျ ၀က်ကျ ကျဆုံးကြရင်တောင်မှ ကျနော်တို့ဖက်ကတော့ အားနည်းသူတွေ၊ မတရားအလုပ်ခံရသူတွေကို ကူနေ၊ ကယ်နေ၊ စောင့်ရှောက်နေကြဖြစ်တော့ သူတို့တတွေ ခွက်လက်စွဲကာ တောင်းစားပါ၍ ခွေးဆွဲ၊ ၀ဲစွဲ၊ လဒဆွဲပြီးတော့ သေနာကျကုန်ရင်တောင်မှ ကိုကျော်သူ၊ မရွှေဇီးကွက်နဲ့ သန်းမြင့်အောင်တို့ရဲ့ နာရေးကူညီမှုအသင်းကြီးက သူတို့တတွေကို အသေဖြောင့်အောင် စေတနာဝန်ထမ်းပေးမှာ ဖြစ်ကြောင်း သတင်းကောင်းလေးတော့ ပေးလိုက်ချင်ပါရဲ့။ (အဟိ)
အေးဗျာ … ရေးတာကတော့ သင်္ကြန်စာပါပဲ။ သင်္ကြန်စာက ချောတောငေါ့ပြီး မေတ္တာစာ ဖြစ်သွားတယ် ထင်ပါ့။ စစ်အာဏာရှင်ရဲ့ နေ၀င်ချိန်ကတော့ ဘယ်သူမှ အချိန်မီ သိလိုက်မှာ မဟုတ်ဘူး ကိုဇာဂနာ။ သူတို့နေ၀င်ချိန်မှာ မြန်မာပြည်ကြီးက မီးပျက်နေတော့ သူတို့ကို ကူဖို့၊ ကယ်ဖို့အရေး မျက်စိမှောက်ကုန်ကြတယ် လို့ ဆိုတာပဲ။
ကိုဇာဂနာနဲ့ နိုင်ငံရေးအကျဉ်းသားများ နှစ်သစ်မှာ ကျန်းမာ ချမ်းသာကြပါစေ။
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
