>
ဟဲဗီးဝိတ်ကဗျာဆရာ သို့
ကြည်မောင်သန်း
ဧပြီ ၄၊ ၂၀၀၉
ကဗျာဆရာ …
ကဗျာဆရာနဲ့ ကျွန်တော်က လူချင်းမရင်းနှီးပါဘူး
ကဗျာ အချင်းချင်းကတော့
ပုလင်းတူ ဗူးဆို့တွေပါပဲ။
ကဗျာဆရာ …
ကဗျာဆရာနဲ့ ကျွန်တော်က တလှေထဲစီးတွေပါ
ဒါပေမဲ့ ကျွန်တော်တို့ခရီးက မီးပင်လယ်။
ကဗျာဆရာ …
ကဗျာဆရာရဲ့ ကဗျာတွေ ဖတ်ပြီး
ကျွန်တော်တို့ကြီးပြင်းခဲ့ရ။
ဒုဌ၀တီမှ ဧရာဝတီ
ကျွန်တော်တို့ကဗျာ ဒီဂရီတွေမြင့်ခဲ့ရ …
ခြင်္သေ့စောင့်တဲ့ မြို့တစ်မြို့
ကျွန်တော်တို့ ရင်ထဲဆို့ခဲ့ရ …
မနက်ဖြန်ရဲ့ အတ္ထုပ္ပတ္တိ
ကျွန်တော်တို့ စိတ်ထဲငြိခဲ့ရ …
ကဗျာဆရာရဲ့ `လမင်းတရာ´
ငြိမ်းချမ်းရေး စာဆိုကြီးကို ဂုဏ်ပြုထုတ်ဝေခဲ့တာ
ကဗျာဆရာရဲ့ ဒုဋ္ဌ၀တီမှ ဧရာဝတီ
ပြည်သူ့စာရေးဆရာကြီးကို ဂုဏ်ပြုထုတ်ဝေခဲ့တာ
အခုတော့ သမိုင်းဝင် ကဗျာစာအုပ်လေးတွေအဖြစ်
ကျန်ရစ်ခဲ့ပြီ။
ကဗျာဆရာရဲ့ `မြင်း´
ကဗျာဆရာရဲ့ `ငန်းရိုင်းတစ်ကောင်´
ကဗျာဆရာရဲ့ ငှက်ငယ်နှစ်ကောင်ရဲ့ အသက်အသစ်တည်ဆောက်မှု
ကဗျာဆရာရဲ့ `ညထဲက သတို့သမီး´
“သားသည်အမေ
မိုင်ရှည်တာဝေး
အပြေးသမား
သားသမီးချစ်
သက်လုံဖြစ်အောင်
ပြောင်းပစ်သလား…” ဆိုတဲ့
ကဗျာဆရာရဲ့ `မိခင်မာရသွန်´ ကဗျာ
ကျွန်တော်ရဲ့မှတ်ဥာဏ်ထဲမှာ စွဲထင်ဆဲပါ။
ပန်းချီဆရာတယောက်ရဲ့ မင်္ဂလာဆောင်မှာ
ကဗျာဆရာ ကျွန်တော့်ကို ပြောခဲ့တဲ့စကား
“တို့ တနေ့ အေးအေးဆေးဆေးတွေ့ကြရအောင်
မင်းရယ် ငါရယ် ငါ့သူငယ်ချင်း ကဗျာဆရာရယ်…”
ခုတော့ ကဗျာဆရာရဲ့ သူငယ်ချင်းကဗျာဆရာလဲ ကွယ်လွန်ခဲ့ပြီ …
ကဗျာဆရာနဲ့ ကျွန်တော်လည်း
ကဗျာဆရာ ကွယ်လွန်သည်ထိ
တခါမှ ပြန်မတွေ့ဖြစ်ကြဘူး။
ကဗျာဆရာ …
ဒုဋ္ဌ၀တီမှ ဧရာဝတီထိ
ကျွန်တော်တို့စီးဆင်းခဲ့ပါပြီ။
လမင်းတရာ
ဘယ်တော့များမှ သာမှာလဲ။
မျိုးစေ့မသေ မြေဆီမခန်း
ကျွန်တော် တသက်လုံး လွမ်းနေရတော့မှာပါ ကဗျာဆရာ။
ကဗျာဆရာ
အင်္ဂလိပ်ကဗျာဆရာကြီး စတီဖင် စပင်ဒါ ကွယ်လွန်တော့
အင်္ဂလန်က သတင်းစာတွေမှာ
ဟဲဗီးဝိတ် ကဗျာဆရာဆိုပြီး ဂုဏ်ပြုခဲ့ကြတယ်
ကဗျာဆရာလည်း
ကျွန်တော်တို့ တိုင်းပြည်အတွက်
ဟဲဗီးဝိတ် ကဗျာဆရာကြီးပါပဲဗျာ။
(27-28-3-2009)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
