>
‘ရွှေပြည်စိုး’ နဲ့ ‘ဟေ၀န်နန်း’
မာမာအေး
ဇန်န၀ါရီ ၂၅၊ ၂၀၀၉
သောတရှင်တို့ရေ၊ ရှေ့တပတ်မှာတုန်းက မျိုးချစ်စာဆိုတွေထဲမှာ တဦး အပါအ၀င် ဖြစ်တဲ့ ပြဇာတ်ဝိဇ္ဇာ ဒါရိုက်တာကြီး ဒဂုန်ဆရာတင် ရေးခဲ့တဲ့ ‘ဓနရှင်’ နဲ့ ‘အာဏာရှင်’ သီချင်း နှစ်ပုဒ်ဟာ အသံတူ စာကွဲ သီချင်းတွေ ဖြစ်တဲ့အကြောင်း ပြောရင်း မသိမသာ ယဉ်ကျေးမှု လွှမ်းမိုး ထိုးဖောက် နယ်ချဲ့တာမျိုး ခံစားမိနေလို့ သတိပေးတာမျိုးလည်း ပြောခဲ့မိပါတယ်ရှင်။
မာအေး ပြောပြလာခဲ့တဲ့ အစီအစဉ်တွေထဲမှာ ဂီတစာဆိုကိစ္စနဲ့ ပတ်သက်ပြီး ပြောခဲ့တဲ့ ‘အာယားမ’ သီချင်း အကြောင်းက နန်းတော်ရှေ့ဆရာတင်လား၊ မြန်မာညွန့်ဆရာတင်လား မကွဲပြားတဲ့ ကိစ္စပါရှင်။ ‘စုံတောမြိုင်’သီချင်း ရေးတဲ့ ဆရာကိစ္စမှာလည်း နန်းတော်ရှေ့ဆရာတင်လား၊ ရွှေတိုင်ညွန့်လားပေါ့ရှင်။ တလောကတော့ အီလီနွိုက် မြန်မာ့အရေး စာတမ်းများဖတ်တဲ့ဆီက အပြန်မှာ အကိုတော် ဒါရိုက်တာ ၀င်းဖေ နဲ့ ‘လက်ရေတပြင်တည်း’ အတူဆိုခဲ့ရပုံကို သတိရပြီး၊ ဒီသီချင်းမှာ မူကွဲလို့ ပြောရမယ့် သီချင်းလေးတပုဒ် ရှိသေးပါလား လို့ အဲဒီ ‘လက်ရေတပြင်တည်း’ နဲ့ ‘ဇာတိနွယ်’ အထက်အညာက လေဘာတီမြရင်နဲ့ အောက်မြေ အကြေက မကြည်အောင်တို့ သီချင်းနှစ်ပုဒ်အကြောင်း ပြောခဲ့တာပါပဲ။ ဒီအထဲမှာ မာအေးရဲ့ ရည်ရွယ်ရင်း ကိစ္စ ဂီတ မှတ်တမ်းမှတ်ရာတွေ လုပ်ဖို့ ဖောင်ဒေးရှင်းတခု ထူထောင်ပြီး အများအားနဲ့ လုပ်မှ ဆိုတာမျိုးလည်း ပြောမိတာကိုး။
ဒါကြောင့်မို့ ထင်ပါရဲ့ တချို့ကလည်း ဖုန်းဆက်ကြတယ်။ စာတချို့လည်း ရောက်ပါတယ်။ Email နဲ့လည်း ပို့တာမျိုး ရှိပါတယ်။ ဒါတွေထဲကEmail နဲ့ ပို့ထားတဲ့ စာတစောင်မှာကတော့ အကြောင်းတိုက်ဆိုင်ရင် BBC မှာ ထည့်ပြောပေးပါ လို့ ဖတ်ရပါတယ်ရှင်။ တောင်ကိုရီးယားက ပို့လိုက်တာ တဲ့။ Email စာရှင်က “ကိုဝင်းပေါ်မောင်” ဖြစ်ပါတယ်။ မြန်မာသီချင်းတွေကို ကြေကြေညက်ညက် နားဆင်တတ်တဲ့ ဂီတ၀ါသနာရှင်၊ ဂီတနဲ့ ပတ်သက်တာတွေ အပေါ်မှာလည်း သေချာ သိမြင် ကြားချင် နားလည်ချင်တတ်တဲ့ စာပေနယ်သားတဦး ဖြစ်တဲ့ အကြောင်းကိုလည်း သူရေးလိုက်တဲ့ စာအရ သိရတာပေါ့။
အတော်ပါပဲ မာအေးကလည်း ကိုယ့်ဆီရောက်လာတဲ့ Email တွေကို ကွန်ပျူတာမှာ ဖွင့်ဖတ်တာလောက် စာလေး တလုံးစ နှစ်လုံးစ ရိုက်တာ ပြင်တာလောက်သာ လုပ်နိုင်တာလေ။ အတိတ်က ဖြတ်သန်းခဲ့ရတဲ့ ဖြစ်ရပ်တွေကို မမေ့ပျောက်သေးတဲ့ ‘ခေါင်းတလုံးနဲ့ ညာလက်ရုံးတဖက်’ လောကဓံကို အံတုဖို့အတွက် အကောင်းကျန်သေးတာ အနန္တောအနန္တငါးပါး ဂုဏ်ကျေးဇူးကြောင့်လို့ ဆိုရမှာ သောတရှင်တို့ရဲ့။
အခု သူက BBC မှာ ထည့်ပြောပါလို့ ရေးလိုက်တော့ အံကိုက်ပဲ။ ပြီးတော့ သောတရှင်တို့လိုပဲ သူလည်း BBC ပရိသတ် တဲ့။ မာအေးတို့ အစီအစဉ်တွေကို နားထောင်တယ်၊ စာလည်း ဖတ်တယ် တဲ့။ ဖောင်ဒေးရှင်းဖွဲ့တာကို ၀မ်းသာကြောင်းနဲ့ ကူလို့ရတာရှိရင် ကူချင်တယ် တဲ့။ အင်တာနက်ပေါ်ကနေပြီး အရုပ်တွေ အသံတွေ စာတွေ သင်္ကေတတွေနဲ့ ဂီတသင်တန်း ပေးလို့ရှိရင် ရနိုင်ပါတယ်၊ နည်းပညာ ကျွမ်းကျင်တဲ့ ပညာရှင်တွေ ရှိတာပဲ လို့ အကြံပေးပါသေးတယ်။
BBCက မာအေးတို့ အစီအစဉ်တွေအပေါ် စိတ်ဝင်စားတယ် ဆိုလို့ ကျေးဇူးတင်ပါတယ်။ ကူညီချင်တာကိုလည်း ကြိုဆိုပါတယ်။ အကြောင်းပေါ်တော့ ပြောမှာပေါ့နော်။ အင်တာနက်နဲ့ သင်တန်းပေးရင် ဖြစ်နိုင်မယ်မှန်းတော့ သိပါရဲ့။ ကိုယ်က ချမ်းသာတာမှ မဟုတ်တော့ အထောက်အကူပြုစက်တွေ၊ ဆော့(ဖ်)၀ဲလ်တွေ စုရ ဆောင်းရဖို့ အချိန်လိုဦးမယ်လေ။ နည်းပညာရှင်၊ အတတ်ပညာရှင်တွေကိုလည်း သူတို့ပေးရမယ့် အချိန်တွေ ပညာတွေအတွက် ထိုက်သင့်သလောက် မပံ့ပိုးနိုင်ရင် ဘယ် သင့်တော်ပါ့မလဲ။ ဖြည်းဖြည်းတော့ ဖြစ်လာအောင် ကြိုးစားရမှာပေါ့ရှင်။
နောက် သူမေးထားတာကတော့ ‘ရွှေပြည်စိုး’ သီချင်းနဲ့ ‘ဟေ၀န်နန်း’ သီချင်းတို့ဟာ အတော်ကို ထပ်တူဖြစ်နေပါတယ် တဲ့။ ‘ရွှေပြည်စိုး’ က နန်းတော်ရှေ့ဆရာတင် ရေးတာ၊ ‘ဟေ၀န်နန်း’ က ရွှေတိုင်ညွန့် ရေးတာပါ။ သီချင်းရေးဆရာ တဦးစီ ဖြစ်နေတော့ အဲဒါဟာ အသံတူ ပွားယူကြတာလား၊ မတော်တဆ တိုက်ဆိုင်တာလား၊ ဘယ်သူက အရင်ရေးတာပါလဲ မရှင်းမလင်း ဖြစ်နေလို့ တဲ့။ ဆရာနန်းတော်ရှေ့ကြီးကတော့ မူကွဲတွေ ရေးလေ့ရှိလို့ ‘ရွှေပြည်စိုး’ နောက်တပုဒ်ရေးပြီး ကိုယ်တိုင် ဆိုသွားတဲ့အကြောင်း ဖတ်ဖူးတယ် လို့လည်း ရေးထားပါသေးတယ်။ အဲဒီ ရွှေပြည်စိုး နောက်တပုဒ်ရှိတယ် ဆိုတာကို မာအေးတော့ မကြားဖူးခဲ့ပါဘူးရှင်။ ဖတ်ဖူးတယ်လို့ ဆိုတော့ ကိုဝင်းပေါ်မောင်ဆီက စာကို ပေးဖတ်ပါဦးလို့ ပြောရတော့မှာပဲရှင့်။ ‘ဟေ၀န်နန်း’ သီချင်း ဆိုတဲ့သူ မသိဘူး ဆိုတာ ဖတ်ရတော့ မာအေး အံ့သြသွားတယ်။ သူက စာအစုံ ဖတ်တဲ့သူပဲ မဟုတ်လား။ ခေတ်ဟောင်းက နာမည်ကျော် အဆိုတော်ကြီး ဘိလပ်ပြန်သန်း ဆိုခဲ့တာကို မသိဘူး ဆိုလို့ပါရှင်။ ‘ရွှေပြည်စိုး’ နဲ့ ‘ဟေ၀န်နန်း’ သီချင်းနှစ်ပုဒ်မှာ အစအဆုံး ထပ်တူ မူကွဲ မဖြစ်နေပါဘူး။ ခြေဆင်းပိုဒ် အပြီးမှာ စည်းဝါးနဲ့ စပြီး ဆိုရတဲ့ ပထမပိုဒ်နဲ့ သီချင်းတပိုဒ်စီရဲ့ အဆုံး သီချင်းအချတွေမှာသာ အလိုက်တူ ဖြစ်နေတာပါ။ ပိုပြီး သဘောပေါက်ရအောင် လက်တွေ့ ဆိုပြလိုက်မှ ထင်ပါရဲ့နော်။ ‘ရွှေပြည်စိုး’သီချင်းရဲ့ အပိုဒ်ဆုံးတိုင်းမှာ “xxx ရွှေပြည်စိုး၊ ရွှေပြည်စိုး၊ ရွှေပြည်စိုး လွမ်းပိုဖွယ်ရာ xxx” လို့ ဆိုရပါတယ်။ ‘ဟေ၀န်နန်း’ သီချင်းမှာကျတော့ “xxx ဟေ၀န်နန်း၊ ရေတံခွန်စမ်း၊ ဟေ၀န်နန်း၊ လွမ်းဖွယ်စုံညီxxx” တဲ့။
အဲဒီလို သီချင်းအချတွေမှာ အလိုက်တူ ဖြစ်နေတာကို ပြောတာပါ။ သီချင်းတပုဒ်လုံးမှာ ခြေဆင်းအပြီး စည်းနဲ့ဝါးနဲ့ ၀င်ဆို ၀င်တီးရတဲ့ ပထမအပိုဒ်ကတော့ အလိုက်တူတယ် လို့ ပြောထားပြီလေ။ ‘ရွှေပြည်စိုး’ထဲက ‘မြနဲ့မောင်နဲ့ ခုမှတွေ့တာ’ အဲဒီအပိုဒ်နဲ့ ‘ဟေ၀န်နန်း’ထဲက ‘မြိုင်တန်းမှောင်ဝေ ဘွေမဟီ’ အဲဒီအပိုဒ်က တူကြတာပါ။ ရွှေပြည်စိုးတော့ မကြာခဏ ကြားဖူးမှာမို့ ဟေ၀န်နန်းက အဲဒီ တူတဲ့တပိုဒ်ကို နားထောင်ကြည့်ပေါ့နော်။
“xxx မြိုင်တန်းမှောင်ဝေ ဘွေမဟီ၊ ဂနိုင်တောတန်းက နားစွဲလို့ အလွန်သာယာသည်၊ ဟေမ၀ါ သေလာထဲမှာ ၀ဲကာပျံပြီ၊ ဖော်မစုံ သိုက်မြုံနန်းမှာ လွမ်းကာနေမည်၊ မာဂဓာ ဘာသာကြွေးလို့ မေး၍ နေရှာပြီ၊ တကယ့်ကို သနားလောက်ဖွယ် မနားမနေ ရှာသည်၊ တောနဲ့တောင်မဟီ (တကောင်တည်း ဖော်ကွဲခဲ့လို့ လွမ်းပြန်သည်)၂၊ ငှက်ကလေးကို မျှော်တွေးလို့သာ ကျုပ်လည်း ဆွေးပါသည်၊ ဂနိုင်ဆီးတဲ့ မြိုင်ကြီးထဲက မျှော်မှန်းလို့သာရည်၊ လွမ်းပိုတဲ့ ရာသီ (မှိုင်းမှုံပြာငယ်ရီ)၂၊ မြိုင်နန်းဘုံသာဦးဝယ်၊ ခိုင်ပန်းစုံစွာဖူးတယ်၊ တကယ်ပင် လွန်ကြည်နူးဖွယ်၊ ထူးတဲ့ သေလာမဟီ၊ ဟေ၀န်နန်း၊ ရေတံခွန်စမ်း၊ ဟေ၀န်နန်း လွမ်းဖွယ်စုံညီ xxx” (ဟေ၀န်နန်း – ပပိုဒ်)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
