ငြိမ်းချမ်းအေး – ပြဿနာရှာခဲ့သူကြီးသုို့ နောက်ဆုံးဦးညွှတ်ခြင်း

ဒီနေ့ ကမ္ဘာကြီးဟာ ကြီးမြတ်တဲ့ လူသား တယောက်ကို ဆုံးရှုံးလိုက်ရတယ်။  နယ်လ်ဆင် မန်ဒဲလား  ကွယ်လွန်ခြင်း ဆိုတဲ့ သတင်း ဟာ ကမ္ဘာ့ ပထဝီဝင် ကာလ၊ ဒေသ အနှံ့ လူအားလုံး ကို သက်ရောက်ခဲ့တယ်။  အသက် ၉၅ နှစ် အရွယ် အိုမင်းမစွမ်း နာမကျန်းဖြစ်နေတဲ့ အဘိုးအိုကြီး တယောက် ကွယ်လွန်တာကို အခုလို ကမ္ဘာ က လူအများ အရေးတယူ လုပ်ရခြင်းက သူ ဟာ ကမ္ဘာ ဖြစ်နေလို့ ပါပဲ။

နယ်လ်ဆင် မန်ဒဲလား ဆိုတဲ့ အမည် နာမ ဟာ ကမ္ဘာ့ လူသား အားလုံး နဲ့ ထပ်တူ ကျနေတယ်။

အများနဲ့ သက်ဆိုင်တဲ့ အလုပ်တွေ ကို မလုပ်နိုင်စွမ်းတော့တဲ့ ထင်ရှားတဲ့ နိုင်ငံရေး ခေါင်းဆောင်ဟောင်း အရွယ်လွန် လူအိုကြီး တယောက် အသက် ရှင် တည်ရှိနေခြင်း ဟာ သွေးသားရင်းချာ နဲ့ ပုဂ္ဂလိက ဆက်နွယ်မှု ရှိသူ မိသားစု၊ မိတ်ဆွေ အပေါင်းအသင်းတွေ၊ သူ ခေါင်းဆောင် ခဲ့တဲ့ တိုင်းပြည်၊ သူ လွတ်မြောက်စေခဲ့တဲ့ ပြည်သူပြည်သားများ အတွက် တန်ဖိုးရှိ၊ အရေးပါတာ မဆန်းလှပါဘူး။  ဒါပေမယ့် မန်ဒဲလား လို ပုဂ္ဂိုလ်ကြီး တယောက် အသက်ရှင် နေမှုက ဒီထက်ပို သက်ရောက်ပါတယ်။  သူ ရဲ့ ဘဝတလျှောက် စွမ်းဆောင်လာခဲ့တဲ့ လုပ်ရပ်အစုစု ဟာ လူသားဖြစ်တည်မှု ရဲ့ ပြယုဂ် ဖြစ်နေခြင်းကြောင့် သူ တည်ရှိနေမှု ဟာ ကမ္ဘာ့လူသား အားလုံးနဲ့ သက်ဆိုင်၊ လူသား အားလုံး အတွက် အရေးပါနေရတယ်။  ဒါကြောင့် အခု ကမ္ဘာ က ပူဆွေးသောက ရောက်နေရတာပါပဲ။

အခုတော့ သူ ကမ္ဘာမြေကနေ ထွက်ခွာသွားခဲ့ပါပြီ။  သူ ထားပေးခဲ့တဲ့ အတွေးအခေါ်တွေ၊ တန်ဖိုးတွေ ကို ဆက်လက်ကျင့်ကြံ ဖို့၊ မပျောက်ပျက်စေဖို့ အတွက် ကမ္ဘာ့ လူသားအားလုံး မှာ တာဝန်ရှိတယ်။

မန်ဒဲလား ကို လွတ်မြောက်ရေးအတွက် တိုက်ပွဲဝင်သူ၊ အသားအရောင် ခွဲခြားမှု စနစ်ကို တိုက်ဖျက်သူ၊ လူ့အခွင့်အရေး၊ နိုင်ငံသား အခွင့်အရေး၊ ဒီမိုကရေစီ အရေးကို စွမ်းဆောင်သူ၊ နိုင်ငံရေး သမား၊ တောင်အာဖရိက နိုင်ငံရေး ခေါင်းဆောင်၊ လူထု ခေါင်းဆောင် စသဖြင့် အားလုံး သိကြပတယ်။

ဒါပေမယ့် ကျနော် နားလည်ခဲ့တဲ့ မန်ဒဲလား က တော့ ရိုးရှင်းပါတယ်။  မန်ဒဲလား ဟာ လူသား ဖြစ်တည်မှု ပြဿနာ ကို ရှာခဲ့သူ၊ မေးခွန်းထုတ်ခဲ့သူ၊ နောက်ဆုံး နောက်ဆုံး အောင်မြင်ပြီးမောက်တဲ့ အဖြေတခုကိုပါ  ပေးသွားခဲ့သူ ဖြစ်တယ်။

လူတယောက် မွေးလာ၊ ဖြစ်တည်လာချိန်မှာ တပြိုင်တည်း တည်ရှိတဲ့ မွေးရာပါ အခွင့်အရေး (တနည်း သဘာဝ အခွင့်အရေး)၊ နေထိုင်ရာ လူ့မှုအသိုင်းအဝန်း မှာ ရှိရမယ့် လူမှုအခွင့်အရေး (တနည်း နိုင်ငံသား အခွင့်အရေး (ဝါ) ပြည်သူ့အခွင့်အရေး)၊ နေထိုင်ရာ စနစ်အဖွဲ့အစည်း မှာ ကျင့်သုံးခွင့်ရှိရမယ့်  အခွင့်အရေး (တနည်း နိုင်ငံရေး အခွင့်အရေး) ဒီလို လူသားဖြစ်တည်မှု ရဲ့ ပကတိ တန်ဖိုး ဖြစ်တဲ့ အခွင့်အရေး မဲ့ နေခြင်း ပြဿနာ ကို သူ ဟာ ဖော်ထုတ်ထောက်ပြခဲ့တယ်၊ မေးခွန်းထုတ်ခဲ့တယ်၊ ဒီ ပြဿနာ ရဲ့ ဇစ်မြစ် စနစ်အဖွဲ့အစည်း ကို ဆန့်ကျင်တော်လှန်ခဲ့တယ်၊ အဖြေရှာပေးခဲ့တယ်။  ဒါဟာ သူ့ ဘဝ အလုပ် အနှစ်ချုပ် ပဲ ဖြစ်တယ်။  ဒါဟာ ပထဝီ ဒေသ တခု ရဲ့ စနစ်တခု ရဲ့ ပြဿနာ တခု ဆိုတဲ့ အဝန်းအဝိုင်း အထက် အများကြီးပိုတယ်။

မန်ဒဲလား ရင်ဆိုင်ခဲ့ရတဲ့ လူဖြူကြီးစိုးမှု၊ လူဖြူ-လူမည်း ခွဲခြားမှု၊ အသားအရောင်ခွဲခြား မှု စနစ် “အပါထိုက်” ဆိုတာ က လူဖြစ်တည်မှု ကို အသိအမှတ်မပြု ဆန့်ကျင်တဲ့ အတွေးအခေါ်၊ အမြင်၊ တနည်း ပြဿနာကြီး ရဲ့ အစိတ်အပိုင်းတခုသာ  ဖြစ်တယ်။  ဒါပေမယ့် မန်ဒဲလား တော်လှန်ခဲ့ပုံ စနစ် နဲ့ အတွေးအခေါ် ကတော့ ကျယ်ပြန့်တဲ့ လူသားဖြစ်တည်မှု အပေါ် တနည်း ပြဿနာကြီး တခုလုံး အပေါ် အခြေခံ မေးခွန်းထုတ် ဖြေရှင်းခဲ့တယ်။ 

ဒါကြောင့် မန်ဒဲလား ဟာ သူ့ ဘဝတခုလုံး ကို အာဖရိကန်တွေ ရဲ့ လွတ်မြောက်ရေး အတွက် အသုံးချခဲ့တယ်။  လူဖြူများ အခွင့်ထူးခံရ ကြီးစိုးနေမှု စနစ်ကို တိုက်ဖျက်ခဲ့တယ်။  တပြိုက်တည်းမှာပဲ လူမည်း ကြီးစိုးမှု ကို ဆန့်ကျင်ခဲ့တယ်။  လူမည်း ကြီးစိုးဖို့ရာ အတွက် လူဖြူ ကို ဖိနှိပ်ရမယ် ဆိုတဲ့ သဘော မရှိခဲ့ဘူး။  သူ့ ရဲ့ လုပ်ရပ်၊ ခံယူချက်၊ ရပ်တည်ချက်၊ ဆန့်ကျင်မှု၊ တော်လှန်မှု၊ ထောက်ခံမှု မှာ လူဖြူ၊ လူမည်း ဆိုတဲ့ အသွေးအရောင် ပေါ် မမူတည်ခဲ့ဘူး။  အာဖရိက အနွယ်၊ ဥရောပ အနွယ် ဆိုတဲ့ လူမျိုး ခွဲခြားမှု မရှိခဲ့ဘူး။  

မတရား ဖိနှိပ်သူ နဲ့ တရားမဲ့ အဖိနှိပ်ခံနေရသူ ဆိုတဲ့ ဘက်နှစ်ဖက် ကိုသာ အခြေခံခဲ့တယ်။ လူသား ဖြစ်တည်မှု ကို ဆန့်ကျင်သူ (သို့) စနစ် အဖွဲ့အစည်း (သို့) ဓလေ့ (သို့) အတွေးအခေါ် အားလုံးကို တော်လှန်တယ်၊ လူသားဖြစ်တည်မှု ကို အသိအမှတ်ပြုပြီး လူသားအားလုံး ခွင့်တူ၊ ညီမျှ ငြိမ်းချမ်းစွာ အတူယှဉ်တွဲ နေထိုင်နိုင်တဲ့ လွတ်လပ်တရားမျှတတဲ့ ဒီမိုကရေစီ လူ့ အဖွဲ့အစည်း တခု ကို ရည်သန် ဖော်ဆောင်တယ်။  ဒီ အတွက် နေခဲ့တယ်၊ ဒီ အတွက် တိုက်ခဲ့တယ်၊ ဒီ ခံယူချက် အမြင် နဲ့ပဲ အခု သေသွားခဲ့ခြင်းဖြစ်တယ်။

ဒါကြောင့် သူ့ လုပ်ရပ် နဲ့ အတွေးအခေါ် ဟာ ကမ္ဘာ့ နေရာ အနှံ့ အပြား က စနစ်အဖွဲ့အစည်းတိုင်း မှာ တည်ရှိနေတဲ့ လူသားဖြစ်တည်မှု ကို ဆန့်ကျင်ဖိနှိပ်နေမှု ဖြစ်စဉ် ပြဿနာ တိုင်း အတွက် အဖြေဖြစ်တယ်၊ နမူနာ လမ်းပြမှု ဖြစ်တယ်၊ စိတ်ဓာတ်ပိုင်းဆိုင်ရာ ခွန်အား ဖြစ်တယ်။

အပါထိုက် မရှိပါဘူး ဆိုတဲ့ ခေတ်သစ် ကမ္ဘာ့ စနစ်အဖွဲ့အစည်းမျိုးစုံမှာ လူမျိုးရေး ခွဲခြားမှု၊ ဘာသာရေး အရ နှိပ်ကွပ်မှု၊ လူများစု က လူနည်းစု ကို ဖိနှိပ်မှု၊ လူနည်းစု က လူများစု အပေါ် လက်နက်အားကိုး နဲ့ ချုပ်ကိုင်မှု၊ ကျား-မ လိင်ပိုင်းဆိုင်ရာ ခွဲခြားမှု၊ လူမှု တရားမျှတမှု ကင်းမဲ့မှု၊ ဓန အင်အား အရ အဖိနှိပ်ခံရမှု၊ သွေးစုပ်ခံရမှု စတဲ့ လူသားဖြစ်တည်မှု ကို ဆန့်ကျင်တဲ့ အတွေးအခေါ်၊ လုပ်ရပ်၊ စနစ်တွေ အနည်း၊ အများ ရှင်သန်ခဲ့၊ ရှင်သန်နေတာပါပဲ။  ဒါကြောင့် ကမ္ဘာ က မန်ဒဲလား ကို လိုအပ်ခဲ့တယ်။  ဒါကြောင့် ကမ္ဘာ ဟာ မန်ဒဲလား အတွေးအခေါ်၊ လုပ်ရပ် ကို အနာဂတ်မှာလည်း ကျင့်ကြံဖို့ လိုအပ်နေဦးမှာ ဖြစ်တယ်။

မန်ဒဲလား မွေးဖွားချိန်မှာ ဖခင်ဖြစ်သူ ပေးခဲ့တဲ့ နာမည် Rolihlahla ဟာ တိုင်းရင်းဘာသာ အရပ်သုံး စကား အရ “ပြဿနာရှာသူ (Troublemaker)” ပါတဲ့..။  သူ့ ရဲ့ ရှည်လျားခက်ထန်လှတဲ့ တော်လှန်ရေး ခရီးကြမ်းလမ်းတလျှောက်မှာလည်း ဖိနှိပ်သူများက မန်ဒဲလား ဟာ သူတို့ ရဲ့ တရားမဲ့ ဖိနှိပ်မှု စနစ်ကို ဆန့်ကျင်တော်လှန်နေသူဖြစ်တာကြောင့် “ပြဿနာရှာသူ” လို့ပဲ ခေါ်တွင် သတ်မှတ်ခဲ့ကြတယ်။  အကျဉ်းစံ ဘဝ ထောင်ထဲမှာ ဒီလို “ပြဿနာရှာသူ” သတ်မှတ်ချက် ကြောင့် အနိမ့်ဆုံး အဆင့်အတန်း၊ အကြမ်းတမ်း ဆုံး ဆက်ဆံမှု ကို ကြုံတွေ့ခဲ့ရတယ်။

လူသား ရဲ့ သဘာဝ-လူမှု-စီးပွား-နိုင်ငံရေး အခွင့်အရေး၊ တနည်းအားဖြင့် လူသား ဖြစ်တည်မှု အခွင့်အရေး အတွက် မေးခွန်းထုတ် ပြဿနာ ရှာခဲ့သူ၊ ဘဝတလျှောက်လုံး လုပ်ရပ်၊ အတွေးအခေါ်  နှစ်ခုလုံး နဲ့ လူသား ပြဿနာ အဖြေ အတွက် တိုက်ပွဲဝင်ခဲ့သူ မန်ဒဲလားကို ကျနော် ကလည်း “ပြဿနာရှာသူ” လို့ပဲ ကင်ပွန်းတပ်ချင်၊ သတ်မှတ်ချင်တယ်။

သူ ဟာ လူသားဖြစ်တည်မှု အခွင့်အရေး ကို ဖိနှပ် ဆန့်ကျင် ခြင်းဆိုတဲ့ ပြဿနာကြီးကို တော်လှန် မေးခွန်းထုတ်ကာ ဦးဆောင် လမ်းညွှန် ဖြေရှင်း ရှာဖွေခဲ့သူ လူသား ဖြစ်တည်မှု “ဗြဟ္မစိုရ်ဝါဒ (Humanitarianism)” ဘက်တော်သား၊ လူသား အားလုံး အတွက် ဖြစ်တည်မှု လူသား အခွင့်အရေး ပြဿနာ ကို “ရှာဖွေထောက်ပြ အမှားပြင်ဆင်၊ အမှန်ကို လမ်းပြပေးခဲ့သူ (Troubleshooter)”၊ တနည်း “ပြဿနာရှာခဲ့သူကြီး” တယောက်ပဲ ဖြစ်တယ်။  သူ့ ရဲ့ ပြဿနာ ရှာဖွေ ဖြေရှင်းခဲ့တဲ့ နည်း ကတော့ လူသား ဖြစ်တည်မှု ကို အသိအမှတ်ပြုခြင်း၊ လူသား ဖြစ်တည်မှု အတွက် ဖိနှိပ်သူကို တော်လှန်ခဲ့ခြင်း၊ လူတိုင်းအတွက် လူသားဖြစ်တည်မှု လူမှု-စီးပွား-ပညာ-နိုင်ငံရေး အခွင့်အရေး တပြေးညီ ရရှိ ခံစားစေခြင်းပဲ ဖြစ်တယ်။

ဒီ စာစုလေး နဲ့ ကျနော့် ရဲ့ ပြဿနာရှာခဲ့သူကြီး၊ လူသားအားလုံး အတွက် ပြဿနာရှာခဲ့သူကြီး ကို ဦးညွတ်နှုတ်ဆက် နောက်ဆုံး ဂါရဝ ပြုလိုက်တယ်။

လူသားဖြစ်တည်မှု အခွင့်အရေး ကို ဖိနှိပ်၊ ဆန့်ကျင်သူများ ကျဆုံးပါစေ။