ကဗျာ ဆောင်းယွန်းလ

ဆောင်းယွန်းလ ● လူ့ဖြစ်ခြင်းကို သီချင်းလုပ်ဆိုမိတယ်

ဆောင်းယွန်းလ ● လူ့ဖြစ်ခြင်းကို သီချင်းလုပ်ဆိုမိတယ်
(မိုးမခ) မတ်လ ၅၊ ၂၀၁၉

သရဲမြင်းကြီးစီးပြီး
ငရဲမင်းကြီးချီတက်လာတာကို စောင့်ရတာမောပြီ
သရဲကမှကိုယ့်ကိုမခြောက်ရင်
ကိုယ်က သရဲကိုပြန်ခြောက်ရမယ့်အပေါက်ဘဲ
ငရဲမင်းကမှ ကိုယ့်ဆီတက်မလာရင်
ကိုယ်က ငရဲတွင်းထဲဆင်းသွားရမယ့်အချိုးဘဲ

ဒီမိုးဒီရေမှာ ဒီလေအတိုင်း
ငြိမ့်ငြိမ့်လေးတိုက်တိုက် သိမ့်သိမ့်ဘဲတုန်တုန်
တောင်လေအတိုက်မှာ အမှိုက်တွေရင်ခုန်ရစမြဲမို့လား

အရှိုက်ထဲရှူသွင်းထားလိုက်မိတဲ့ အမြိုက်တွေက
တောမီးလိုလောင်ကျွမ်းလို့ 
ဒီမြို့ပေါ်မှာ အသိအကျွမ်းကိုကမ္ဘာပတ်ရှာရင်း
သီချင်းပျက်သွားတဲ့ သံစဉ်တွေ ကျိုးတိုးကြောင်တောင်နဲ့
မိုးကြီးလည်းမှောင်ခဲ့

တိမ်စိုင်တွေဖြစ်ဖြစ် မြူတွေဖြစ်ဖြစ်
ကောင်းကင်ကြီးကိုချစ်တတ်ဖို့ အရေးက အရေးကြီးပြီး
ကျောက်ခဲတွေဖြစ်ဖြစ် သလဲတွေဖြစ်ဖြစ်
မြေကြီးကိုတန်ဖိုးထားတတ်ဖို့ အကြောင်းက သေကောင်ပေါင်းလဲလိုအပ်လို့ 
မဟာပထဝီမြေကြီးပေါ်မှာ သမိုင်းကြောင်းတွေကိုလေ့လာရင်း
ကယ်တင်ခြင်းသတင်းတွေနားထောင်နေရတာ ကပ်ဆိုက်တာဘဲ
ငြိမ်းချမ်းရေးစကားဝိုင်းတွေကိုကြည့်နေရတာ စစ်ကြီးမပြီးသေးလို့ဘဲ

ရာသီဥတုက ကိုယ့်ဖက်ပါမလာတဲ့နေ့တွေထဲမှာ
သားရဲတွင်းထဲခုန်ဆင်းဖို့ အတွက်
ဖိနပ်ပျောက်ကိုရှာရင်း ထီးကျိုးစည်ပေါက်ခဲ့ရတဲ့ဖြစ်ရပ်များနဲ့
လူ့ဖြစ်ခြင်းကို သီချင်းလုပ်ဆိုမိသော သံစဉ်တွေ။

ဆောင်းယွန်းလ


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
My Friend Tin Moe By Maung Swan Yi - Selection of MoeMaKa Articles

Similar Posts