ကိုအောင်မှိုင်း ● စီးပွားရေးစစ်တမ်း

December 18, 2018

ကိုအောင်မှိုင်း ● စီးပွားရေးစစ်တမ်း
(မိုးမခ) ဒီဇင်ဘာ ၁၈၊ ၂၀၁၈

တကယ်တော့
အမုန်းတရားဆိုတာ
စီးပွားရေးလုပ်ငန်းတခုမဟုတ်လား။

တကယ်တော့
ပြည်တွင်းငြိမ်းချမ်းရေးဆိုတာကလဲ
စီးပွားရေးလုပ်ငန်းစစ်စစ်ပါဘဲ။

တကယ်တော့
ငြိမ်းချမ်းရေးရမှ နိုင်ငံရေးကထွက်မယ်ဆိုတာကြတော့ရော
စီးပွားရေးလုပ်ငန်းအကြီးကြီးလုပ်နေကြတာလေ။

တကယ်တော့
၂၀၀၈ ပြင်မယ်ဆိုတာကလဲ
စီးပွားရေးဖက်ရှင်တခုထက်မပိုပါဘူး။

တကယ်တော့
ဆရာဦးကိုနီ အသတ်ခံရတာက
စီးပွားရေးကို နိုင်ငံရေးလို့ထင်မှတ်မှားခဲ့လို့တဲ့။

တကယ်တော့
မေမေနိုင်မှဖြစ်မယ်ဆိုတာလဲ
စီးပွားရေးဓာတ်ပြား စစ်စစ်ကြီးဖြစ်သွားပြီလေ။

ပေါင်းစားတဲ့ကောင်တွေ ရောင်းစားတဲ့ကောင်တွေ
ရိုက်စားတဲ့ကောင်တွေ နိုက်စားတဲ့ကောင်တွေကို
ငါတို့အလေးပြုနေကြရဦးမှာလား။

ပါးစပ်ကထ္မင်းလုပ် ပုတ်ထုတ်တဲ့လက်ကို
လျှာနဲ့ရက်ရလောက်အောင်
မိုက်တွင်းနက်တုန်းဘဲလား။

နှစ် ၇၀ အိပ်မက်  လိမ်ယူခဲ့သူတွေကို
အိမ်ဦးတင်ထားရတာ ဝမ်းနည်းစရာအဖြစ်ပါဘဲ။

သတ္တိကလဲမရှိ  အဖြစ်ကလဲမရှိ
ဘ၀င်နဲ့အကြောက်ဘဲရှိလေတော့
ဟောက်စား  ခြောက်စားတွေရှေ့ မှာ
မှောက်စားနေတာများ ပြားပြားဝတ်ပါဘဲ။

ဘုန်းကြီးအတု စစ်ဗိုလ်အတု
ဒီမိုကရေစီအတု ငွေစက္ကူအတု
စာရေးဆရာအတု မီဒီယာအတု
အမတ်အတု ဇရပ်အတု
အတုတွေများလွန်းတဲ့ ဗမာပြည်မှာ
အစစ်တွေတော့ လမ်းပေါ်ရောက်ကြရဦးတော့မယ်။

စစ်ဗိုလ်လိုလို ပွဲစားလိုလို
နိုင်ငံရေးသမားလိုလို ကုန်သည်လိုလို
လိုလိုတွေများလွန်းတဲ့နိုင်ငံ
လူလိမ်တွေများလွန်းတဲ့နိုင်ငံမှာ
အစစ်တွေလမ်းပေါ်ရောက်တာ ဘာဆန်းလို့လဲ။

နာတာရှည်ဖြစ်နေတဲ့ ပြည်ထောင်စုကြီးကို
လေယဉ်တွေ ဒုံးတွေဗုံးတွေနဲ့တော့
ကယ်တင်နိုင်လိမ့်မယ်မထင်။

အရေးသုံးပါးကို
နောက်ထပ်နှစ်ခုတိုးလိုက်တယ်
တခုထဲသောတပ်မတော်နဲ့ ခွဲမထွက်ရ
အရေးငါးပါးဖြစ်သွားရပြီပေါ့
မြေးလေးအတွက် ပိုက်ဆံစုဘို့အချိန်လိုတယ်လေ။

ရထားကြီးကတော့
ဘူတာရောက်တဲ့အထိ
မပျက်မကွက် ဆက်လက်ထွက်ခွာဦးနေမှာပါ
အနာဂါတ်ဆိုတာတွေအတွက်
စီးပွားရေးစစ်တမ်းတွေရေးရင်း
ရှေ့ ဆက်လျှောက်ကြဦးစို့ရဲ့။

ကိုအောင်မှိုင်း  (၁၆ ရက် ဒီဇင်ဘာလ ၂၀၁၈ ခုနှစ်)


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Tags: ,

အလားတူ စိတ်ဝင်စားဖွယ်ရာ စာများ၊ ဆောင်းပါးများ ...:ကဗျာ

Comments are closed.

Archives