သတင်းပဒေသာ

ရန်ကုန်သူဌေးရပ်ကွက်မှ ရွှေချောင်းများအမှု ပဟေဠိဖြစ်နေ

ရန်ကုန်သူဌေးရပ်ကွက်မှ ရွှေချောင်းများအမှု ပဟေဠိဖြစ်နေ

ရွှေချောင်းများ တူးဖော် တွေ့ရှိခဲ့သည်ဟူသော ဖြစ်ရပ်ကို ကိုင်တွယ် စုံစမ်းခဲ့ကြောင်း CID က ပြောသည်။

ခင်နှင်းဝေ/Myanmar Now

(မိုးမခ) အောက်တိုဘာ ၁၂၊ ၂၀၁၈


တူးဖော်တွေ့ရှိခဲ့သည်ဆိုသည့် ရွှေချောင်း မှတ်တမ်း ဓာတ်ပုံကို သတင်းစာရှင်းလင်းပွဲတွင် ပြသခဲ့သည် (ဓာတ်ပုံ – ခင်နှင်းဝေ/Myanmar Now)

ရန်ကုန်၊ ကမာရွတ်မြို့ နယ် ချင်းတွင်းလမ်းရှိ ခြံဝန်းတစ်ခုအတွင်း ပြီးခဲ့သည့်နှစ်အတွင်းက ရွှေချောင်း အများအပြား တူးဖော်တွေ့ရှိခဲ့သည်ဟု အလုပ်သမားတစ်ဦးက ယနေ့ ပြောလိုက်ပြီး ထိုရွှေချောင်းများ ပိုင်ဆိုင်ခွင့်ကို စုံစမ်း ဖော်ထုတ်ပေးရန် တောင်းဆိုလိုက်သည်။

မြေတူးစဉ် ထိုသို့ တွေ့ရှိခဲ့သည်ဟု ဆိုသော ဦးအေးဝင်းက ပြီးခဲ့သည့်နှစ် နိုဝင်ဘာလအတွင်း ရွှေချောင်း ၂ဝ မှ ၃ဝ အကြား ရရှိခဲ့သည့် နေရာမှာ ချင်းတွင်းလမ်းရှိ ရှေးဟောင်း အဆောက်အအုံတစ်ခုအနီး ဆောက်လုပ်ရေး လုပ်ငန်းခွင်တစ်ခုဖြစ်သည်ဟု ဆိုသည်။

အလျား ၄ လက်မ၊ အနံ ၁ လက်မ နှင့် ထုတစ်မတ်အထူရှိပြီး အင်္ဂလိပ်ဂဏန်း 999.9 နှင့် တရုတ်စာလုံး ရေးထိုးထားသည့် အဆိုပါရွှေချောင်းများကို သူ၏ အလုပ်ရှင်ထံ ပြသ အပ်နှံခဲ့ကြောင်း၊ သတင်းသုံးပတ်ခန့် အကြာတွင် အဆိုပါရွှေချောင်းများအကြောင်း မေးမြန်းရာ တန်ဘိုးကြီးရွှေချောင်းများ ဖြစ်သဖြင့် သက်ဆိုင်ရာသို့ အပ်နှံမည်ဟု ပြောပြီး ငွေ တစ်သိန်းပေးခဲ့ကြောင်း ဦးအေးဝင်းက ရှင်းပြသည်။

“ကျွန်တော် ဒီပစ္စည်းတွေက်ို သူတို့လက်ထဲမှာ အဆုံးရှုံးမခံနိုင်ဘူး။ နိုင်ငံတော်ကိုအပ်ပြီး နိုင်ငံတော်က ချီးမြင့် ငွေကိုပဲ ကျွန်တော်လိုချင်တယ်။ နိုင်ငံတော်ကိုအပ်မယ်ဆိုလို့ပေးလိုက်တာ၊ ခုထိရက်တွေ ကြာပြီ၊ မအပ်ဘူး” ဟု ရန်ကုန်တွင် ယနေ့ပြုလုပ်သည့် သတင်းစာရှင်းလင်းပွဲတွင် ၄င်းကပြောသည်။

သူဌေးရပ်ကွက်အတွင်း ရွှေချောင်းများကို စတင် တွေ့ရှိစဉ် သူနှင့်အတူ အခြားအလုပ်သမားနှစ်ဦးလည်း ရှိနေခဲ့ကြောင်း ဦးအေးဝင်းက ပြောသည်။

အလုပ်သမားတစ်ဦးမှာ မကြာသေးခင်က သေဆုံးသွားပြီ ဖြစ်ပြီး ယနေ့ သတင်းစာရှင်းလင်းပွဲသို့ သူ၏ ဇနီးလည်း လာရောက်ခဲ့သည်။ ရွှေချောင်း တူးဖော်ရရှိကြောင်း သူ့ခင်ပွန်းက ပြောပြခဲ့သည်ဟု ထိုအမျိုးသမီးက ဆိုသည်။

ရဲတပ်ဖွဲ့ စစ်ဆေးချက်
ရွှေချောင်းများအကြောင်းကို မှုခင်းရဲတပ်ဖွဲ့ CID က ဧပြီလအတွင်း လာရောက် မေးမြန်းသော်လည်း ယခုအချိန်အထိ အစအန ပျောက်နေဆဲဖြစ်ကြောင်းလည်း ဦးအေးဝင်းက ပြောသည်။

CID အဖွဲ့ကလည်း အဆိုပါ အငြင်းပွားမှုကို စစ်ဆေးခဲ့ကြောင်း ယနေ့ အတည်ပြုခဲ့သည်။ သို့သော်လည်း
ရွှေချောင်းများ အမှန်တကယ် တွေ့ခဲ့ခြင်း ရှိမရှိ အတည်မပြုနိုင်သေးဟု CID မှ ရဲအုပ် အောင်နိုင်စိုးက Myanmar Now ကို ပြောသည်။

“ကျွန်တော်တို့ သွားရောက် စစ်ဆေးတဲ့အခါ အလုပ်ရှင်နဲ့ မြေပိုင်ရှင်ဘက်က ဒီဖြစ်စဉ် မဟုတ်ပါဘူးလို့ ငြင်းဆန် ထွက်ဆိုတယ်။ နောက် တွေ့တဲ့သုံးယောက်မှာလည်း တစ်ယောက်က အိမ်ရှင်သွားခေါ်နေလို့ မမြင်လိုက်ဘူး၊ တစ်ယောက်က မြေသယ်နေလို့ မမြင်လိုက်ဘူး ပြောတယ်။ ဒါ့ကြောင့် တွေ့ရှိကြောင်း ခိုင်ခိုင် လုံလုံ တင်ပြနိုင်ဖို့ လိုတယ်လို့ သုံးသပ်ပေးလိုက်တာပါ” ဟု ရဲအရာရှိက ပြောသည်။

အလုပ်သမား၏ စွပ်စွဲချက်နှင့် ပတ်သက်ပြီး သဘောထား မေးမြန်းရန် အလုပ်ရှင်၊ မြေပိုင်ရှင်တို့ကို ဆက်သွယ်၍ မရသေးပေ။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa Old Archives

Similar Posts