အင်တာဗျူး

အောင်ငြိမ်းချမ်း (Myanmar Now) ● မြန်မာပြည်က ဟော့ပေါ့ ချက်ရမယ်


အောင်ငြိမ်းချမ်း (Myanmar Now) ● မြန်မာပြည်က ဟော့ပေါ့ ချက်ရမယ်
(မိုးမခ) စက်တင်ဘာ ၂၇၊ ၂ဝ၁၈ 

မကြာသေးခင်က ကချင်ပြည်နယ်၊ ဝိုင်းမော်မြို့နယ် ဝါရှောင်ကျောင်းတိုက်တွင် တွေ့ရသော  ဒေသတွင်း ငြိမ်းချမ်းရေး ဦးဆောင် လှုပ်ရှားသူ ဆရာတော် ဦးဝိဇယ (ဓာတ်ပုံ – ကေဇွန်နွေး/Myanmar Now)

ကချင်ပြည်နယ်၊
ဝိုင်းမော်မြို့နယ်
ဝါရှောင်ကျောင်းတိုက်မှ ဦးဝိဇယသည် သာသနာ့ဘောင် မရောက်ခင်က  ကချင်လက်နက်ကိုင်အဖွဲ့  (KIA) တွင် ခေါင်းဆောင် ဖြစ်လာမည့်သူတချို့နှင့်
ရင်းနှီးသူဖြစ်သည်။
ယခုအခါ ဆရာတော်သည်
ဒေသတွင်း ငြိမ်းချမ်းရေး လုပ်ငန်းများတွင် ဦးဆောင်လှုပ်ရှားနေပြီး KIA အပါအဝင်  အင်အားစုတချို့နှင့် တခါတရံ တွေ့ဆုံညှိနှိုင်းလျက်ရှိသည်။

ဝါရှောင်ဆရာတော်
ဦးဝိဇယ သီတင်းသုံးရာ ကချင်ပြည်နယ်တွင် ကချင်၊ ရှမ်းနီ ဒေသခံတို့သည် ဒေသတွင်း ဆယ်စုနှစ်များစွာ
ဖြစ်ပွားခဲ့သည့် တိုက်ပွဲတို့ကြောင့် မြေစာပင် ဖြစ်နေကြရပြီး အချင်းချင်း ပဋိပက္ခ မဖြစ်စေရန်လည်း
အများအပြားက ကြိုးပမ်း ထိန်းသိမ်းနေကြသည်။ ထိုအခြေအနေနှင့် ပတ်သက်ပြီး မကြာသေးခင်က
ဦးဝိဇယနှင့် တွေ့ဆုံမေးမြန်းထားသည်များထဲမှ ကောက်နုတ် ဖော်ပြလိုက်ပါသည်။

ကချင်ပြည်နယ်မှာ ကချင်နဲ့ ရှမ်းနီ လူမျိုးစုတွေကြား
ပြီးခဲ့တဲ့နှစ်တွေအတွင်း အဆင်မပြေမှု  ရှိခဲ့ပေမယ့်
ပဋိပက္ခကြီး မဖြစ်အောင် ထိန်းထားနိုင်တာ  ဘာကြောင့်လို့
ထင်ပါသလဲ။

ရှမ်းတွေက
ရိုးတယ်၊ နိုင်ငံရေးကို စိတ်လည်း မဝင်စားဘူး နားလည်း မလည်ဘူး၊ ကချင်ပြည်နယ်က ရှမ်းကို
ပြောတာနော်။ အဲဒီတော့ သူတို့က အေးအေးဆေးဆေးပဲ နေတယ်လေ။ သူတို့က “လယ်ရှိရင် ရှမ်းရှိတယ်”
ဆိုသလို လယ်လုပ်မယ်၊ ကုသိုလ်ကောင်းမှုလုပ်မယ်၊ အဲဒီလောက်ပဲ ရှိတဲ့အတွက်ကြောင့်မိုို့
ပြဿနာ ကြီးကြီးမားမား မဖြစ်ဘူးပေါ့။

ရှမ်းနီတွေလည်း လက်နက်ကိုင်လာကြတော့  KIA နဲ့  ပစ်ခတ်၊ တိုက်ခိုက်ကြတာတွေ ပိုဖြစ်လာနိုင်ပါသလား။
 
ခြုံပြီးပြောရရင်
အပစ်ရပ်မှကိုရမှာ။ မြန်မာပြည်ရဲ့ ငြိမ်းချမ်းရေးပင်မဟာ ရခိုင်ပြည် မဟုတ်ဘူး။ ကချင်ပြည်နယ်မှာ
ငြိမ်းချမ်းရေးရရင် ရခိုင် ငြိမ်းချမ်းရေးရနိုင်တယ်။ အခုပြောတဲ့ငြိမ်းချမ်းရေး ဆိုတာက
အပစ်ရပ်ရင်ကို ငြိမ်းချမ်းနေပြီ၊ ကျန်တာကတော့ နိုင်ငံရေးသဘောအရသက်သက်ပေါ့နော်။ ကချင်ပြည်နယ်မှာ
အပစ်ရပ်လိုက်တာနဲ့ ရခိုင် အရေး ကိစ္စတွေမှာ တိုင်းရင်းသားအားလုံး ပါလာမယ်လေ။ ညီညွတ်သွားမယ်။
ဒီဘက်မှာလည်း မြောက်ပိုင်း အဖွဲ့ထဲမှာ ‘ဝ’ အဖွဲ့နဲ့ KIA သွားပေါင်းတယ်ဆိုပေမဲ့လည်း
‘ဝ’ ဆိုတာကလည်း သူတို့ဘာသူတို့ သူတို့ခံယူချက်နဲ့ နေတာလေ။ မြန်မာပြည်ကြီးကို ခြုံပြီးကြည့်တဲ့
အနေအထားနဲ့ ရပ်တည်တာ မဟုတ်ဘူး။ ဘုန်းဘုန်းတို့ ကချင်ပြည်ကျတော့ KIA တို့၊ ရှမ်းနီတို့ဆိုတာက
မြန်မာပြည် တစ်ပြည်လုံးကို ခြုံလွှမ်းပြီးတော့ ခံစားပြီးတော့ လုပ်နေကြတာ၊ အဲဒါလေး ကွာတယ်။
  အပစ်ရပ်မှ
ပြဿနာ ထပ်မကြီးထွားမှာ၊ အချင်းချင်းထဲမှာလည်း ပြဿနာကို လှည့်ပတ်ပြီးရှာနေတဲ့သူတွေအတွက်
အချိန်အများကြီးရသွားမယ်။ အခုက တပ်မတော်နဲ့ KIA နဲ့မှာ တစ်ဘက်က မြင်တာ KIA လက်မှတ်
မထိုးဘူးပေါ့။ ပြည်သူတွေက မြင်တာလည်း တစ်မျိုးပေါ့၊ ဘာကြောင့် လက်မှတ်မထိုးသလဲ၊ ဟိုဘက်ကလည်း
အပစ်ရပ်ပါ ဆိုတာကို ဘာကြောင့်မို့လို့ မရပ်ပေးနိုင်တာလဲပေါ့။   

ရှမ်းနီတွေ ပြည်သူ့စစ်ဖွဲ့ပြီးလက်နက်ကိုင်လာကြတာ
နောက်ကွယ်က  ပယောဂတွေပါတယ်လို့ တချို့က ယူဆတာကိုရော  ဘယ်လို သုံးသပ်ချင်ပါသလဲ။

မြန်မာပြည်မှာ
လူတွေကို လက်နက်ပေးနိုင်တာ ဘယ်သူရှိလို့လဲ၊ ကိုယ့်ဟာကိုယ် တွေးကြည့်လို့ ရပါတယ်။ ပြည်သူ့စစ်တွေက
သေနတ်ကိုင်ရတဲ့အကြောင်းရင်းကလည်း သူတို့ကိုမှားတယ်လို့ ပြောလို့မရဘူး။ သူတို့   ရင်ကွဲမတတ်
ခံစားထားရတာ။  အသုံးချခံရတာက တစ်ကဏ္ဍ။ ခံစားချက်ရှိတဲ့သူကို
အမြတ်ထုတ်၊   အသုံးချတဲ့သူတွေက မြန်မာပြည်မှာ ပေါမှပေါပဲလေ။ သူတို့ခံစားချက်က
ဘာလဲ၊ KIA က ငါတို့ကို အခွန် ဆောင်ခိုင်းတယ်၊ (တပ်သားသစ်) စုဆောင်းတယ်၊ မတရားလုပ်တယ်၊
ဒီခံစားချက်နဲ့တစ်ခုနဲ့ တည်လိုက်တော့   နိုင်ငံရေး
အမြတ်ထုတ်တဲ့သူတွေ၊ အာဏာတပ်မက်တဲ့သူတွေ ခဏလေး တည်ပေးလိုက်တော့ ပြည်သူ့စစ်တွေ ပေါ်လာတယ်
ဆိုတာ သူတို့ပြောတာ မှန်တယ်။ အရင်တုန်းက ဒီလို လက်နက် မကိုင်တဲ့အတွက်ကြောင့် ခံလိုက်ရတယ်ပေါ့၊
နှစ်ပေါင်း လေးငါးဆယ်၊ နည်းနည်းနောနော မဟုတ်ဘူး။ သေသွား၊ ဆုံးသွားတာတွေလည်း အများကြီးရှိတာ။
ရှိတော့ လက်နက် ပံ့ပိုးပေးတယ် ဆိုတာက သူတို့ ပိုအားရှိတာပေါ့။    

ဆရာတော်နဲ့ KIA ခေါင်းဆောင်ပိုင်းတချို့တွေ့တော့
သူတို့က  ရှမ်းနီတွေရဲ့အရေးနဲ့ ပတ်သက်ပြီး ဘာတွေ
လုပ်ဆောင်ပေးမယ်လို့ ပြောပါသလဲ။

ကရင်တွေ
KNU တွေ ငြိမ်းချမ်းရေးကာလ ပြန်ဝင်လာတဲ့အခါမှာ ကရင်ပြည်သူလူထုနဲ့ တွေ့ပြီးတော့ ကျွန်တော်တို့
ပြည်သူတွေအပေါ်မှာ မှားသွားမိပါတယ်၊ အဲဒီမှားတာတွေကို ခွင့်လွှတ်ပေးပါဆိုပြီး လုပ်တယ်။
အဲဒီလိုပဲ တွန်းတိုက်မိသွားတယ်ဆိုရင် ဘာကြောင့်တိုက်မိသွားတာလဲ ဆိုတာကို ပြန်လာပြောဖို့
လိုမယ် ဆိုတော့ “ကောင်းပြီ … ဒါဆို ကျွန်တော်တို့ ဘယ်လိုလုပ်ရမလဲ” ဆိုပြီးမေးတယ်။
ပြီးတော့ ပြည်သူ့စစ်နဲ့ ပတ်သက်ပြီးလည်း သူတို့က ရှင်းပြတယ်။ သူတို့က ဒါကို သေချာကို
နားထောင်ပြီးတော့ သူတို့ထဲက ကော်မတီဝင်ကလည်း ဒါကို ပြောပါတယ်။ ကျွန်တော်တို့ ရှမ်းနဲ့
ကချင်က တကယ့်ညီအစ်ကိုလို နေလာတဲ့အကြောင်း၊  အခုမှ ဒီလိုဖြစ်တယ်၊ ကျွန်တော်တို့ လယ်လုပ်တာတောင်မှ
ရှမ်းတွေဆီက သင်ခဲ့ရတာပေါ့။ ဒါပေမဲ့ ကျွန်တော်တို့ ကချင်တွေက အရမ်းဒေါသကြီးတယ် တဲ့၊
အဲဒါကြောင့်  ရှမ်းတွေရဲ့ အကြောင်းကို များများသိဖို့
လုပ်ရဦးမယ် တဲ့။ ဒီလိုတွေ့ဆုံပေးပြီး ပြောမှလည်း အထက်က သိတာပေါ့။ အဲဒီတော့ ဘုန်းဘုန်း
သူတို့ကို ပြောခဲ့တယ်၊  ဝန်းသိုဆရာတော်ကြီးကို
သွားဦးတိုက်ဖို့ပေါ့။ တာလောကြီးကျောင်းကို ပစ်ထားတဲ့အတွက် ဆရာတော်ကြီးက သူတို့ကို
စိတ်ဆိုးနေတယ်။ သူတို့ကလည်း ပြောပါတယ်၊ အဲဒါကိုလည်း အရေးယူပြီးပြီပေါ့။ ဆရာတော်ကြီးတွေနဲ့
ပြည်သူတွေကိုလည်း တွန်းသွား၊ တိုက်သွားမိတာအတွက် မေတ္တာနဲ့ သည်းခံ ခွင့်လွှတ်ပေးဖို့ကို
ချစ်ကြည်ရေး မနောပွဲ တစ်ပွဲလုပ်ဖို့ ပြောထားတယ်၊ ဒါလည်း သူတို့ လက်ခံတယ်၊ သေချာ မှတ်ထားတယ်။
နောက်တစ်ခုကတော့ (တပ်သားသစ်) စုဆောင်းရေးနဲ့ မိုင်းထောင်တဲ့ ကိစ္စကို မလုပ်ဖို့၊ ရှမ်းတွေ
အဖမ်းခံရတဲ့အခါ ပြန်လွှတ်ပေးဖို့ ပြောပေးနေတာပဲ။ အခုဆို အယောက် ၅ဝ ဝန်းကျင်လောက်တောင်
ရှိပြီ။ ဒါပေမဲ့ သူတို့ကလည်း ဘုန်းဘုန်းကို ကြောက်လို့ လွှတ်ပေးတာ မဟုတ်ဘူး၊ သူတို့က
အရင်ကတည်းက အနုပညာနဲ့ ပတ်သက်ပြီး ခင်မင် ရင်းနှီးခဲ့တဲ့ မိတ်ဆွေတွေဖြစ်တော့   ဘုန်းဘုန်းတို့
ငြိမ်းချမ်းအောင် လုပ်လား၊ မလုပ်လား သူတို့ သိတယ်လေ။  သူတို့ကိုယ်တိုင်လည်း   ငြိမ်းချမ်းချင်တော့
သူတို့လည်း ကြိုးစားနေပါတယ်။  ရှမ်းနီတွေဘက်ကလည်း
နှစ်ပေါင်းများစွာ ခံလာခဲ့ရတယ် ဆိုတော့ ချက်ခြင်းကြီး မယုံရဲသေးတာ ဖြစ်နေတာပေါ့။

တည်ငြိမ်၊ ငြိမ်းချမ်းရေးအတွက်  နှစ်ဖက်အဖွဲ့အစည်းကို ဘာများ မိန့်ကြားချင်ပါသလဲ။

ရှမ်းတွေဘက်ကလည်း
ခံစားခဲ့ရတာတော့ မှန်တယ်။ ဒါပေမဲ့ ခံစားသူအကြိုက် သွားနေရင်တော့ မငြိမ်းချမ်းနိုင်ဘူးလေ။
 KIA ကို အမြစ်ပြတ်တိုက်လို့ရော ငြိမ်းချမ်းသွားမှာလား။
 ရှမ်းတွေကလည်း  ပြည်သူ့စစ်လိုမျိုးပေါ့ လက်နက်ကိုင်ပြီး ကာကွယ်ရေးနဲ့
ကလဲ့စားချေရေးနဲ့ မကွဲပြားပြန်ဘူးဆိုရင်လည်း ငြိမ်းချမ်းပါ့မလား။ ကချင်ဒုက္ခသည်စခန်းမှာရှိတဲ့
ကချင်ကလေး အများကြီးဟာ တချိန်ကျရင် ကချင်စစ်သားမဖြစ်ဘူးလို့ ပြောနိုင်သလား။ အဲဒီအချိန်မှာပဲ
မွေးလာတဲ့ ရှမ်းကလေးတွေ အများကြီးကလည်း ကချင်မုန်းတီးရေးအား ပိုမကြီးလာနိုင်ဘူးလား၊
အဲဒါကို စဉ်းစားရမှာ။ စည်းလုံးခြင်းသည် အင်အားဆိုရင် မစည်းလုံးခြင်းသည် ဆုံးရှုံး၊ ပျက်စီးခြင်းတရားပဲ
ဖြစ်တာပေါ့။  နှစ်ဘက် များများ တွေ့ဆုံရမယ်။
စကား များများ ပြောရမယ်။ ကချင်ပြည်နယ်ရဲ့အလှက ရှမ်းနဲ့ ကချင်တွေရဲ့လက်ထဲမှာပဲရှိတယ်။
ညီညွတ်ကြမယ်ဆိုရင်တော့ ကချင်ပြည်နယ် ငြိမ်းချမ်းလိမ့်မယ်။

ဖြည့်စွက် မိန့်ကြားချင်တာများရှိပါသေးလား။

မြန်မာပြည်ကြီးက ပေါက်ကွဲတော့မယ့် ဗုံးတစ်လုံး ဖြစ်နေတယ်။  စစ်တပ်ကလည်း စစ်တပ်အတွက်ပဲ မကြည့်ပါနဲ့၊
တိုင်းပြည်နဲ့ပြည်သူကိုကြည့်သော စစ်တပ် ဖြစ်ရမယ်။
 အစိုးရကလည်း အစိုးရအတွက်ပဲ မကြည့်ပါနဲ့၊
ပြည်သူနှင့်အတူ ဆိုတာမျိုး မဟုတ်ဘဲ ပြည်သူ့နဲ့ အတူ ဝင်စားပေးမှ ရမယ်။ ငြိမ်းချမ်းရေးစကားဝိုင်းတွေကို
ပခုက္ကူမှာ လုပ်တယ်၊ ကချင်မှာလည်း လုပ်လို့ရတယ်။ အဲ့ဒါတွေက လုံးဝ ကောင်းမယ်၊ လုံးဝ အဖြေပေါ်လိမ့်မယ်။
တိုင်းရင်းသား လက်နက်ကိုင်တွေကလည်း တိုင်းရင်းသား တစ်ခုတည်းအတွက် မကြည့်ပါနဲ့၊ သူများကို
လူမျိုးကြီးဝါဒလို့ ပြောရင် တိုင်းရင်းသားတွေကလည်း လူမျိုးစွဲဝါဒ မရှိဖို့ လိုမယ်။
ဘာသာရေးခေါင်းဆောင်တွေကလည်း ဘာသာရေး အတွက်ပဲ မကြည့်ပါနဲ့၊ ဘာသာရေးဆိုတာ နူးညံ့ သိမ်မွေ့နေရမယ့်ကိစ္စဖြစ်တယ်၊
အရိုင်းစိတ်တွေကို ဘာသာရေး မျက်နှာဖုံး မစွပ်ပါနဲ့၊ ငါ့လူမျိုး ငါ့ဘာသာ ဆိုပြီး သွားမယ်
ဆိုရင်လည်း မဖြစ်နိုင်ဘူး။ ပြည်သူတွေကလည်း ပြည်သူအတွက်ပဲ မကြည့်ပါနဲ့၊ အစိုးရ ဘာလိုနေလဲ၊
ပြည်သူတွေက ဝိုင်းဝန်းပြီး ကူညီပေးမှ ရမှာ။ အဲ့ဒီတော့ မြန်မာပြည်က ဟော့ပေါ့ ချက်ရမယ်။
ဟော့ပေါ့ ဘာကြောင့် ကောင်းတာလဲ၊ အစုံပါတယ်လေ။ ဟော့ပေါ့ မချက်ခင် ပိန်းဥ၊ မုံညှင်း၊
ကြက်သားဆိုပြီး ရှိမယ်။ အဲ့ဒါကို ပိန်းဥကလည်း ပိန်းဥမာန၊ မုန်ညှင်းကလည်း
မုန်ညှင်းမာန ကြက်သားကလည်း မင်းတို့ကတောင် ဒီလောက် မာနကြီးသေးရင်ကွာ ငါကလည်း
မာနကြီးတယ်ကွာ ဖြစ်နေတာ မဟုတ်လား။   ကောင်းတာတွေ၊ မှန်တာတွေ လုပ်တဲ့နေရာမှာ
ကိုယ့်ဘက်ကပဲ မှန်နေကောင်းနေရုံနဲ့ အားလုံးကောင်းနိုင်၊ မှန်နိုင်မှာ မဟုတ်ပါဘူး။ မကောင်းနိုင်တဲ့
ကိုယ့်ပတ်ဝန်းကျင်ကလူတွေကိုလည်း သည်းခံပြီး လက်တွဲနိုင်ရမယ်။ အခုက
ကိုယ့်အတ္တနာတာရှည်ရောဂါ စွဲကပ်နေတာ။ ဟော့ပေါ့ ချက်ဖို့လိုပါမယ်။ ။

 


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
Advertise on MoeMaKa

Similar Posts