ဇင်လင်း ရသဆောင်းပါးစုံ

ဇင်လင်း ● ရှစ်လေးလုံးအရေးတော်ပုံ (သို့မဟုတ်) မြန်မာ့သမိုင်းဝင် နိုင်ငံရေးအချိုးအကွေ့

ဇင်လင်း ● ရှစ်လေးလုံးအရေးတော်ပုံ (သို့မဟုတ်) မြန်မာ့သမိုင်းဝင် နိုင်ငံရေးအချိုးအကွေ့

(မိုးမခ) သြဂတ်စ် ၇၊ ၂၀၁၈


ရှစ်လေးလုံးအရေးတော်ပုံကြီး ဖြစ်ပွားခဲ့သည်မှာ မကြာလှသေးဟု ထင်ရသော်လည်း ယခု ၂၀၁၈ ခုနှစ်တွင် နှစ်ပေါင်း ၃ဝ ပြည့်ခဲ့ပေပြီ။ ဆယ်စုနှစ် သုံးစုမျှသော အချိန်ကာလ အတောအတွင်း ရှစ်လေးလုံးအရေးတော်ပုံတွင် ပြည်သူလူထု လိုလား တောင်းဆိုခဲ့ကြသော လွတ်လပ်ရေး၊ တရားမျှတရေး၊ တန်းတူအခွင့်အရေးရရှိရေး၊ ကိုယ်ပိုင်ပြဋ္ဌာန်းခွင့်ရရှိရေး အစရှိသည့် နိုင်ငံရေးဆိုင်ရာ ရပိုင်ခွင့်များကို လက်တွေ့ခံစားနိုင်ရန် ဆက်လက်ကြိုးပမ်းနေကြရဆဲရှိသည်။ ရှစ်လေးလုံးပြည်သူ့ ဒီမိုကရေစီ အရေးတော်ပုံတွင် ပြည်သူလူထု၏ တောင်းဆိုချက်သည် နိုင်ငံရေး ပြုပြင်ပြောင်းလဲမှု (Political System Change) ဖြစ်ပါသည်။ လွတ်လပ်ရေး၊ တရားမျှတရေးနှင့် တန်းတူရေးဆိုသည့် ဒီမိုကရေစီ ရပိုင်ခွင့်ကို တောင်းဆိုခြင်း ဖြစ်သည်။ ‘တန်းတူရေး’ ဟု ဆိုရာတွင် လူမျိုး၊ လူတန်းစား၊ နိုင်ငံရေးယုံကြည်ချက်၊ ကိုးကွယ်သည့်ဘာသာ မျှမက၊ ‘လိင်’ ခွဲခြားဆက်ဆံမှု မပြုလုပ်ရေး လည်း ပါဝင်သည်။

ဒီမိုကရေစီကျင့်စဉ်၏ အနှစ်သာရသည်  လူ့အခွင့်အရေး ဆိုင်ရာ ဥပဒေသများကို အခြေခံထားသဖြင့်၊ ဖွဲ့စည်းအုပ်ချုပ်ပုံ အခြေခံဥပဒေသည်လည်း အမျိုးသမီးများကို အမျိုးသားများနှင့် တန်းတူအခွင့်အရေးပေးရမည်သာမက၊ တန်းတူ အကာ အကွယ်လည်း ပေးရမည် ဖြစ်သည်။ ဤ အရေးတော်ပုံကြီးအတွင်း နိုင်ငံသာတို့၏ အခြေခံ အခွင့်အရေးကို အလေးမထား သည့် မဆလ တပါတီ အာဏာရှင်စနစ်ကို ဖြိုလှဲနိုင်ခဲ့သည်။  လွတ်လပ်ရေး၊ တရားမျှတရေးနှင့် တန်းတူရေးဆိုသည့် ဒီမိုက ရေစီနှင့် လူ့အခွင့်အရေးအသိအမြင်များကို အရေးတော်ပုံက ရှင်သန်လာစေခဲ့သည်။ အာဏာရှင်စနစ်ကို စိန်ခေါ် အန်တုနိုင် စွမ်းရှိသည့် လူထုခေါင်းဆောင်တယောက်ကို အရေးတော်ပုံက မွေးဖွားပေးခဲ့သည်။ တဆက်တစပ်တည်းတွင် အမျိုးသား ဒီမိုကရေစီအဖွဲ့ချုပ်ကဲ့သို့သော လူထုကိုယ်စားပြုပါတီတရပ်ကို ပေါ်ထွန်းစေခဲ့သည်။ ၁၉၉၀ ရွေးကောက်ပွဲရလဒ်နှင့် တကွ သမိုင်းအတွေ့အကြုံကောင်းများကို ပေးခဲ့သောကြောင့် ရှစ်လေး လုံးအရေးတော်ပုံသည် မြန်မာ့နိုင်ငံရေးသမိုင်းတွင် အလွန် အရေးကြီးသည့်  သမိုင်းအချိုးအကွေ့ကြီးဖြစ်လာခဲ့သည်။

သြဂတ်စ်လ ၂၆ ရက်နေ့က မြင်တွေ့ရသည့် ၈၈၈၈ လူထုလှုပ်ရှားမှုအရေးတော်ပုံ
photo ; AFP

ရှစ်လေးလုံးအရေးတော်ပုံ ဖြစ်ပွားခဲ့သည်မှာ နှစ်ပေါင်း ၃ဝ ပြည့်ခဲ့သော်လည်း၊ ယနေ့မြန်မာနိုင်ငံတွင် ဒီမိုကရေစီ နိုင်ငံရေး အရွေ့တစ်ခုဖြစ်ပေါ်ရေး ကိစ္စသည် နောက်မဆုတ်သည့်တိုင် ရှေ့သို့တိုးရန်လည်း ခက်ခဲသော အခြေအနေ၌သာ ရှိနေဆဲ ဖြစ်သည်။ အဓိကကျသည့် ကိစ္စမှာ ဒီမိုကရေစီ နိုင်ငံရေးပြုပြင်ပြောင်းလဲမှုကို “ယုံကြည်သလား၊ မယုံကြည်ဘူးလား” ဆိုသည့် အပေါ်တည်နေသည်။ အစိုးရတစ်ရပ်ကို ဒီိကရေစီ အရပ်သားအစိုးရဟု ပြောဖို့ဆိုလျှင် လွှတ်တော်အသီးသီးရှိ လွှတ်တော် ကိုယ်စားလှယ်များသည် ဒီမိုကရေစီနည်းအရ ပါတီစုံအထွေထွေရွေးကောက်ပွဲစည်းမျဉ်းဥပဒေများနှင့်အညီ လူထုက ရွေးကောက် တင်မြှောက်သူများ ဖြစ်ရမည်။ အစိုးရ ကက်ဘိနက်ကို ဖွဲ့စည်းရာတွင် ရွေးကောက်ပွဲ အနိုင်ရ နိုင်ငံရေးပါတီက ဦးဆောင်ဖွဲ့စည်း ရမည်။ လက်ရှိကက်ဘိနက်တွင် ရွေးကောက်ပွဲ အနိုင်ရပါတီက ခန့်အပ်နိုင်ခွင့် မရှိ သော ၀န်ကြီးသုံးပါး ပါဝင်နေသဖြင့် လက်ရှိ ဒီမိုကရေစီကို Pseudo Democracy ဟု နိုင်ငံရေးဆန်းစစ်လေ့လာသူတို့က ဖွင့်ဆိုကြသည်။

ထို့ကြောင့် ယနေ့မြန်မာ့နိုင်ငံရေးအရွေ့သည်  ဒီမိုကရေစီ နိုင်ငံရေးဖြစ်စဉ်ကို “ယုံကြည်သလား မယုံကြည်ဘူးလား” ဆို သည့် စေတနာအပေါ် တည်နေသည်။ စစ်မှန်သော ဒီမိုကရေစီဖြစ်ဖို့ဆိုလျှင် ပြည်သူလူထုထံမှ တိုက်ရိုက်အာဏာ စီးဆင်း ရမည်။ တနည်းအားဖြင့် စစ်မှန်သော အချုပ်အခြာအာဏာကျင့်သုံးခွင့် ရှိရမည်။ ဆိုလိုသည်မှာ ကက်ဘိနက်တစ်ဖွဲ့လုံးကို ရွေးကောက်ပွဲ အနိုင်ရပါတီက တာဝန်ခံ ခန့်အပ်ရမည်။ လက်နက်ကိုင်အဖွဲ့အစည်းအားလုံးသည် သက်ဆိုင်ရာ ကက်ဘိ နက် အဖွဲ့ဝင် ၀န်ကြီး၏ စီမံခန့်ခွဲမှုအောက်တွင် ရှိရမည်။ တိုင်းရင်းသားပြည်လူထု အများစုလိုလားသည့် ပြည်ထောင်စု (Democratic Federal Union) စနစ်ကို ကျင့်သုံးရမည်ဖြစ်သည်။ ယခု လက်တွေ့ အခြေအနေတွင် ဒီမိုကရေစီလမ်း ကြောင်း အတိုင်း မသွားလိုသည့် အင်အားစုများ (Anti-Democracy Elements) နှင့် ဒီမိုကရေစီ လမ်းကြောင်းအတိုင်း သွားလိုသည့် နိုင်ငံရေးအင်အားစု (Pro-democracy Groups) တို့အကြား အားပြိုင်လွန်ဆွဲနေကြဆဲဖြစ်သည်။ ၎င်း နှစ်ဖွဲ့ အကြား အပေးအယူ အလျှော့အတင်း လုပ်ဖို့လိုနေသေးသည်။ နိုင်ငံရေး ညှိနှိုင်းသဘောတူညီမှု(Political Contract)  မရရှိနိုင်သော အခြေအနေ ဖြစ်သည်။

ဖြစ်သင့်သည်မှာ သမားရိုးကျမဟုတ်သော စေ့စပ်ညှိနှိုင်းမှုများ (Series of Unconventional Negotiations) လုပ်သင့် ကြောင်း ဝေဖန်မှုများလည်း ရှိသည်။ တနည်းအားဖြင့် အတိတ်ကို သင်ပုန်းချေရေး၊ လက်စားမချေရေး၊ ဓနဥစ္စာပိုင်ဆိုင်ခွင့် အာမခံချက်ပေးရေး၊ စသည်တို့ကို ပြည်သူကရွေးကောက်တင်မြှောက်လိုက်သော အစိုးရက အာမခံချက် (Guarantee) ပေးရမည်ဖြစ်ပြီး၊ အခြားတစ်ဖက်ကလည်း ဒီမိုကရေစီစနစ် ဖေါ်ဆောင်ရေး (Democratization) ကို ပူးပေါင်းလက်တွဲ ဆောင်ရွက်ဖို့ ကတိပေးရမည်။ ဆိုလိုသည်မှာ ကာကွယ်ရေးရာ ကိစ္စအ၀၀ကို အရပ်ဖက် ကက်ဘိနက်အဖွဲ့၏ စီမံခန့်ခွဲမှု အောက်သို့ လွှဲအပ်ပေး ရမည်ဖြစ်သည်။ တပ်မတော်သည် မိမိ၏ ဂုဏ်သိက္ခာ အဆင့်အတန်းနှင့် ဆီလျော်စွာ နိုင်ငံ၏ ကာကွယ်ရေးတာဝန်ကို သီးသန့်တာဝန်ခံရန် ဖြစ်သည်။ ဒီမိုကရေစီစနစ်ကျင့်သုံးသည့် နိုင်ငံတိုင်းတွင် ကာကွယ်ရေး တပ်ဖွဲ့အင်အားစုကြီးသည် ပြည်သူ့ဘဏ္ဍာနှင့် ရိက္ခာကို စားသုံးသူများဖြစ်သည့်အလျောက် အုပ်ချုပ်ရေး၊ ဥပဒေပြုရေးနှင့် တရားစီရင်ရေးကဏ္ဍများတွင် ပါဝင်ပတ်သက်ခြင်း မရှိကြပေ။

၈၈၈၈ လူထုအရေးတော်ပုံကြီးသို့ မြန်မာပြည်တလွှား တနံတလျားမှ ရဟန်း ရှင်လူ ပြည်သူများ ပူးပေါင်းပါဝင်ခဲ့သည်။

ထို့ကြောင့် ယနေ့မြန်မာနိုင်ငံ မတည်မငြိမ်ဖြစ်နေရခြင်း၏ ဇစ်မြစ်မှာ ဒီမိုကရေစီကို ယုံကြည်သလား/မယုံကြည်ဘူးလား ဆိုသည့် အပေါ်တည်နေသည်ဟု ဆိုရခြင်းဖြစ်သည်။ ငြိမ်းချမ်းရေးအခြေအနေ သောင်မတင် ရေမကျ ရှိနေရခြင်းမှာလည်း  Pseudo Democracy မျှဖြင့် ဟန်ဆောင်နေကြ၍ ဖြစ်သည်။ အမှန်ဆိုလျှင် ပုဂ္ဂလိက လုံခြုံရေး၊ မိသားစု လုံခြုံရေး၊ အဖွဲ့ အစည်း လုံခြုံရေး၊ ဥစ္စာဓန လုံခြုံရေးစသည်ဖြင့် အပြန်အလှန် တာဝန်ယူမှု/တာဝန်ခံမှုကို ညှိနှိုင်းသဘောတူနိုင်ပါက၊ Pseudo Democracy မှ Genuine Democracy သို့ ပြောင်းနိုင်မည် ဖြစ်သည်။ စစ်မှန်သော ဒီမိုကရေစီ လမ်းကြောင်း အတိုင်း လျှောက်လှမ်းလိုစိတ် အမှန်တကယ်ရှိဖို့ အထူးလိုပါသည်။ လက်ရှိအခြေအနေတွင် အမျိုးသားဒီမိုကရေစီ အဖွဲ့ ချုပ် က ဒီမိုကရေစီနည်းနာနှင့်အညီ နိုင်ငံ၏ ရုပ်လုံးကို ဖေါ်ဆောင် လိုသော်လည်း ဖေါ်၍ မရ။ အတိုက်အခံ (Anti-Democracy Elements) များက NLD နှင့် မဟာမိတ်များအား အကန့်အသတ်များကို စနစ်တကျ ဖန်တီးထား၍ ဖြစ်သည်။ ထို့ကြောင့် NLD နှင့် သူ၏အတိုက်အခံတို့ကြား နိုင်ငံရေး သဘောတူညီမှု (Political Pact) ရရှိရန် ညှိနှိုင်းမရသမျှ လက်ငင်း နိုင်ငံရေးအခြေအနေသည် သောင်မတင် ရေမကျဖြစ်နေဖွယ်ရှိသည်။

၂၀၁၇ ခုနှစ် ဇူလိုင် ၂၇ ရက်နေ့ညက နေပြည်တော်ရှိ “အမျိုးသား ပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန” ၌  နိုင်ငံတော်အတိုင်ပင်ခံရုံး ၀န်ကြီးဌာန နှစ်ပတ်လည်နေ့ အခမ်းအနားကျင်းပခဲ့သည်။ ၎င်းအခမ်းအနားတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “ကျမတို့ ရွေးကောက်ပွဲဝင်တဲ့ အခါတုန်းက ပြောင်းလဲချိန်တန်ပြီဆိုပြီး တော့ ၀င်ခဲ့ပါတယ်။ အဲဒီလို ဆောင်ပုဒ်နဲ့ ၀င်ခဲ့တော့ ပြောင်းလဲချိန်တန်ပြီ ဆိုသည်မှာ ပြောင်းလဲဖို့အဓိက က စိတ်ဓာတ် ပြောင်းလဲဖို့ ဖြစ်ပါတယ်။ ကျမတို့ဟာ ဒီမိုကရေစီ လှုပ်ရှားမှုကို စတင်ကတည်းက တချို့က ဒီမိုကရေစီ တော်လှန်ရေးလို့ ပြောကြတယ်။ ကျမတို့ တော်လှန်ရေးဟာ အကြမ်းဖက်တဲ့ တော်လှန်ရေးမျိုး မဟုတ်ပါဘူး။ အဓိက ကတော့ စိတ်ဓာတ် ပြောင်းလဲရေးပဲဖြစ်တယ်။ စိတ်ဓာတ်ကို မပြောင်းလဲဘဲနဲ့တော့ ဘာကိုမှ တကယ် ထိထိရောက်ရောက် ပြောင်းလဲနိုင်မှာ မဟုတ်ဘူး။ ကျမတို့ စိတ်ဓာတ် ပြောင်းလဲဖို့ဆိုတာက ပြည်သူ ပြည်သားတွေ၊ နိုင်ငံသူ နိုင်ငံသားတွေ စိတ်ဓာတ်ပြောင်းလဲ စေချင်တယ်ဆိုရင် ပထမဦးဆုံး အစိုးရဘက်ကနေပြီးစပြီး ပြောင်းလဲဖို့လိုပါတယ်” ဟု ပြောကြားခဲ့သည်ကို သတိပြုမိသည်။

“ပြည်သူ့အစိုးရဆိုတာ  သုံးသပ်ဝေဖန်မှုကို မှန်မှန်ကန်ကန် သတ္တိရှိရှိနဲ့  ရင်ဆိုင်ရမယ်၊ ပြည်သူတွေရဲ့ အထင်အမြင်၊ အယူ အဆတွေကို  လေးစားရမယ်၊ ပြည်သူတွေထံက မဲဆွယ်အမျိုးမျိုး စည်းရုံးခဲ့ပြီး အစိုးရဖြစ်တဲ့အခါ ပြည်သူ့ဆန္ဒကို လျစ်လျူရှု တာဟာ အစိုးရကောင်းတွေရဲ့ အလုပ်မဟုတ်ဘူး။” ဟု လည်း နိုင်ငံတော်၏ အတိုင်ပင်ခံပုဂ္ဂိုလ်က ပြောခဲ့သည်။

“အတိုင်ပင်ခံရုံးဝန်ကြီးဌာနဟာ ပြည်သူ ပြည်သားတွေနဲ့ အစိုးရကြားမှာ ယုံကြည်မှုရှိအောင် တည်ဆောက်တဲ့နေရာမှာ အဓိကကျတဲ့ ၀န်ကြီးဌာနဖြစ်တယ်၊  ဒီဝန်ကြီးဌာန ထူထောင်ရတဲ့ အကြောင်းရင်းမှာ ရွေးကောက်ပွဲမတိုင်မီ ပြည်သူတွေ ထံ တင်ပြခဲ့တဲ့ မူဝါဒတွေကို အကောင်အထည်ဖော်ဖို့ဖြစ်တယ်၊ ငြိမ်းချမ်းရေးရအောင် လုပ်ဖို့ဆိုတာ အတိုင်ပင်ခံရုံးရဲ့ အဓိက ရည်ရွယ်ချက်ပဲဖြစ်တယ်။” ဟု လည်း ဒေါ်အောင်ဆန်းစုကြည်က ပြောကြားခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ပြောစကားကို လေးလေးနက်နက် စူးစိုက် သုံးသပ်ကြည့်ပါက ရွေးကောက်ပွဲ ကတိက၀တ်များကို ဒီမိုကရေစီအစိုးရ ခေါင်းဆောင်တစ်ဦးအနေဖြင့် မမေ့ကြောင်း လူထုအား အသိပေး နှိုး ဆော်ထားသည်ကို မြင်ရသည်။ အတိုင်ပင်ခံရုံး၏ အဓိက ရည်ရွယ်ချက်သည် ငြိမ်းချမ်းရေး ရရှိရေးဟု အတိအလင်း ဆို ထားသည်။ ထိုပြောဆိုချက်ကို ထောက်ရှုပါက တပ်မတော်နှင့် တိုင်းရင်းသားလက်နက်ကိုင်တို့အကြား ကွာဟနေသော နိုင်ငံရေး သဘောကွဲလွဲမှုများကို ညှိနှိုင်းကာ နိုင်ငံရေးသဘောတူညီမှု (Political Treaty) တစ်ခု ရရှိရေးဆီသို့ နိုင်ငံတော် ၏ အတိုင်ပင်ခံ ပုဂ္ဂိုလ် ဦးတည်နေသည်ကို မြင်ရသည်။

သမားရိုးကျ မဟုတ်သော စေ့စပ်ညှိနှိုင်းမှုများလည်း ရှိနေသည် ဟူသော သတင်းများကို ရံဖန်ရံခါ ကြားနေရသည်။ ဒေါ်အောင်ဆန်းစုကြည်၏ မူလ နိုင်ငံရေးသန္နိဋ္ဌာန်ကိုလည်း ပြည်သူ လူထုက မမေ့ဖို့လိုသည်။ မြန်မာနိုင်ငံတွင် အာဏာရှင် စနစ်ကိုဖယ်ရှား၍ ဒီမိုကရေစီစနစ်ကို အာမခံမည့် အစဉ်အလာ ကောင်း တစ်ခုချမှတ်ရေးသည် ဒေါ်အောင်ဆန်းစုကြည်၏ မူလ နိုင်ငံရေးတာဝန် ဖြစ်သည်။ ထို နိုင်ငံရေး တာဝန်ကို အကောင်အထည်ဖေါ်ဆောင်ပေးရန် ရှစ်လေးလုံး ဒီမိုကရေစီ အရေးတော်ပုံတွင် ပြည်သူလူထုက ဒေါ်အောင်ဆန်းစုကြည်အား ယုံကြည်စွာ တာဝန်အပ်နှင်းခဲ့ခြင်းဖြစ်သည်။ ယင်း နိုင်ငံ ရေးတာဝန်နှင့်အညီ ဒီမိုကရေစီ နည်းကျသည့် ဖွဲ့စည်းပုံ အခြေခံဥပဒေ ပေါ်ပေါက်ရေးကိစ္စကိုလည်း လူထုခေါင်းဆောင် က  မမေ့မလျော့ရှိနေသည်။ သို့သော် ၎င်း ဖွဲ့စည်းပုံ ပြင်ဆင်ရေးကိစ္စ အကောင်အထည်ဖေါ်ရာတွင် ပြည်သူလူထုက လည်း ပြိုင်တူ ၀ိုင်းတွန်းကြရန် လိုပါသည်။

၈၈၈၈ အရေးတော်ပုံအတွင်း ကျဆုံးခဲ့ရသည့် ကျောင်းသူလေး မဝင်းမော်ဦး

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ၂၀၁၆ ခုနှစ် မြန်မာနှစ်သစ်ကူးချိန်ကာလတွင် အမျိုးသား ဒီမိုကရေစီအဖွဲ့ချုပ် အစိုးရသစ် စတင်တာဝန်ယူခဲ့စဉ် နှစ်သစ်ကူး မိန့်ခွန်း ပြောကြားခဲ့ဖူးသည်။ ၎င်းမိန့်ခွန်း၌ ‘အမျိုးသား ဒီမိုကရေစီအဖွဲ့ချုပ် အစိုးရ’ ဆိုသည့် အသုံးအနှုန်းကြောင့် ပါတီက အုပ်ချုပ်ပိုင်ခွင့်အာဏာကို ရယူထားသည့် သဘော အဓိပ္ပာယ် မဟုတ်ကြောင်း၊ အမျိုးသားဒီမိုကရေစီအဖွဲ့ချုပ်က လူထုကို တင်ပြထားခဲ့သည့် ပါတီ၏ မူဝါဒများအပေါ် အခြေခံ ကာ အုပ်ချုပ်မည့် စနစ်မျိုး ဖြစ်၍ ‘တာဝန်ယူမှု တာဝန်ခံမှုရှိသည့် သဘောအဓိပ္ပာယ်ဖြစ်ကြောင်း’ ရှင်းလင်းပြောဆိုခဲ့သည်။

အမျိုးသားဒီမိုကရေစီ အဖွဲ့ချုပ်၏ အခြေခံမူများမှာ ‘အမျိုးသားရင်ကြားစေ့ရေး’၊ ‘ပြည်တွင်းငြိမ်းချမ်းရေး’၊ ‘တရားဥပဒေ စိုးမိုးရေး’၊ ‘ဖွဲ့စည်းပုံ အခြေခံဥပဒေ ပြုပြင်ပြောင်းလဲရေး’၊ ‘ဒီမိုကရေစီစနစ် ရှင်သန်အမြစ်တွယ်အောင် လုပ်ဆောင်ရေး’ များဖြစ်ကြောင်း ရွေးကောက်ပွဲ မတိုင်မီကပင် တင်ပြထားသည်ဟု ဆိုခဲ့သည်။ ဒေါ်အောင်ဆန်းစုကြည်က သူ့မိန့်ခွန်း တွင် အဖွဲ့ချုပ်က သတ်မှတ်ထားသော အခြေခံမူများနှင့်အညီ တာဝန်ယူမည်ဟု ပြောကြားခဲ့သည်။ ဒေါ်အောင်ဆန်းစုကြည် အထူးပြုပြောကြားခဲ့သည့် အချက်မှာ National Reconciliation ဖြစ်သည်။

“အရေးအကြီးဆုံးကတော့ အမျိုးသားရင်ကြားစေ့ရေးပါပဲ။ နိုင်ငံတစ်နိုင်ငံဟာ တိုးတက်ဖို့ ချမ်းသာဖို့ဆိုလို့ရှိရင် ညီညွတ်မှု ဟာ အင်မတန်မှအရေးကြီးပါတယ်။ ကျမတို့ ဒါကြောင့်မို့လို့ ဒီအစိုးရဟာ အမျိုးသားရင်ကြားစေ့ရေးကို ဦးတည်တဲ့အစိုးရ လို့ ပြောတဲ့အခါမှာ ကျမတို့ပါတီကို ထောက်ခံမဲ ပေးခဲ့တဲ့ ပြည်သူလူထုအတွက်တင်မဟုတ်ဘူး၊ ကျမတို့ကို မဲ မပေး မထောက်ခံခဲ့တဲ့ ပြည်သူတွေအတွက်လည်း ဒီအစိုးရဟာ တာဝန်ယူမှာပါလို့ ကျမက ရှင်းရှင်းလင်းလင်း ပြောချင်ပါတယ်။” ဟု ဒေါ်အောင်ဆန်းစုကြည်က ပြောခဲ့ဖူးသည်။

ထို့ပြင် စစ်မှန်သော ဖက်ဒရယ် ဒီမိုကရေစီ ပြည်ထောင်စုတစ်ခု ထူထောင်ရေးအတွက် ဖွဲ့စည်းပုံ အခြေခံဥပဒေ ပြင်ဆင် ရေး လုပ်ဆောင်ရာတွင် ပြည်သူလူထုကို မထိခိုက်စေမည့် နည်းလမ်းကိုသုံးမည်ဟုလည်း ဒေါ်အောင်ဆန်းစုကြည်က ထို နှစ်သစ်ကူးမိန့်ခွန်းတွင် တည်ကြည်ပွင့်လင်းစွာ ထည့်သွင်းပြောကြားခဲ့သည်။ ဒေါ်အောင်ဆန်းစုကြည်က  “ဖွဲ့စည်းပုံ အခြေခံဥပဒေ ပြင်ဆင်ဖို့ လုပ်တဲ့နေရာမှာ ကျမတို့ဟာ ပြည်သူလူထုကို မထိခိုက်တဲ့နည်းတွေပဲ ကျမတို့ သုံးမှာပါ။ ကျမတို့ နိုင်ငံရဲ့ အေးချမ်းမှုကို ထိခိုက်တဲ့နည်းတွေနဲ့ ကျမတို့ လုပ်ဆောင်သွားမှာ မဟုတ်ပါဘူး။ ဒါဟာ အမျိုးသားဒီမိုကရေစီ အဖွဲ့ချုပ် အမြဲပဲ ကိုင်စွဲခဲ့တဲ့မူပါ။ ပြည်သူ မနာစေရ ပါဘူး။ လုပ်စရာရှိရင် ကျွန်မတို့ ရှေ့ကနေ ခံစရာရှိရင်ခံပါမယ်။ အနောက် ကနေ ကာစရာ ရှိရင်ကာပါမယ်။ ပြည်သူလူထုကို မထိခိုက်တဲ့ နည်းတွေသာ သုံးစွဲပြီးတော့ ကျမတို့ရဲ့ နိုင်ငံကို မှန်ကန်တဲ့ လမ်းပေါ်ကို ပို့ဖို့ ဆိုတာဟာ ကျမတို့အခု အစိုးရသစ်ရဲ့ အင်မတန်မှခိုင်မာတဲ့ အခြေခံမူ တခုဖြစ်ပါတယ်လို့ ပြောပါရစေ။” ဟု ရှင်းပြခဲ့သည်။

နှစ်ပေါင်း ၃၀ ကြာမြင့်ခဲ့ပြီဖြစ်သော်လည်း မြန်မာ့သမိုင်းဝင် နိုင်ငံရေးအချိုးအကွေ့ဟု ဆိုရမည့် ရှစ်လေးလုံး ပြည်သူ့ ဒီမိုကရေစီအရေးတော်ပုံ၏ နိုင်ငံရေးအရှိန်အဟုန်သည် ကုန်ဆုံးခြင်း မရှိသေးပေ။ အရေးတော်ပုံ၏ မူလ ကတိက၀တ်များ ကို အကောင်အထည်ဖေါ်ရန် လူထုခေါင်းဆောင်နှင့် လူထုပါတီတစ်ရပ်ကို ဖေါ်ဆောင်ပေးခဲ့ပြီး ဖြစ်သည်။ ထို့နောက် တန်းတူရေးနှင့် ကိုယ်ပိုင်ပြဋ္ဌာန်းခွင့်ကို အာမခံမည့် ဒီမိုကရေစီ ဖက်ဒရယ်ပြည်ထောင်စုပန်းတိုင်ဆီသို့ရောက်သည့်တိုင် ရှစ်လေးလုံးအရေးတော်ပုံကြီးက ဆက်လက် တွန်းဆော်နေလိမ့်ဦးမည်ဟု သုံးသပ်မိပါသည်။

 သြဂုတ်လ ၆ ရက်၊ ၂၀၁၈၊ တနင်္လာနေ့ထုတ် ‘ဒီလှိုင်း’ စာစောင်၌ ဖေါ်ပြသည့်ဆောင်းပါး။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts