“ ပြင် နဲ့ သစ် ” ကြားက “တွေဝေဒီချုပ်”
တူမောင်ညို (၂၀၁၃ ခုနှစ်၊ စက်တင်ဘာ ၃၀ )
လူထု၏ သဘောထားဆန္ဒ၊ လက်တွေ့လိုအပ်ချက်များကို စူးစမ်းလေ့လာပြီး၊ လူထုလိုအပ်ချက်နဲ့အညီ လူထုကိုရှေ့ဆောင် တိုက်ပွဲဝင်ခြင်းသည် နိုင်ငံရေးပါတီတစ်ရပ် သို့မဟုတ် နိုင်ငံရေးခေါင်းဆောင်တို့ မလွဲမသွေလုပ်ဆောင်ကြရမည့် တာဝန်ပင်ဖြစ်သည်။
“ပြင်ဖို့နဲ့ အသစ်ရေးဆွဲဖို့မှာ ကျွန်မက ဘက်မလိုက်ဘူး။ NLD လည်း ဘက်မလိုက်ဘူး”
ဆိုသည်မှာ တာဝန်မဲ့ ပြောဆိုမှုပင် ဖြစ် သည်။ ပြည်သူများ၊ မဟာမိတ်များကို ဓါးစားခံလုပ်ခိုင်းခြင်း တမျိုးပင်ဖြစ်သည်။ ပြည်သူများကို ထွေပြား၊ ဝေဝါးအောင်လုပ်ခြင်းဖြစ်သည်။
“ပြင်” နဲ့ “သစ်” ကြား တွေဝေနေမှုက ထိုပါတီ၊ ထိုခေါင်းဆောင်မှု၏ ပြဿနာဖြစ်သည်။ ထိုပြဿနာကို ပြည်သူများ ခေါင်းပေါ် ပုံချလိုက်ခြင်းသည် လုံးဝမသင့်လျော်။ အကြောင်းနှင့်အကျိုး၊ အားသာချက်နှင့် အားနည်းချက် အဖက်ဖက်က စိစစ်တွက်ချက်ပြီး ဘယ် လမ်းကို ဘယ်နည်းလမ်းဖြင့် လျှောက်လှမ်းကြမည်ကို နိုင်ငံရေးပါတီနှင့် နိုင်ငံရေးခေါင်းဆောင်ဆိုသူများက ပြည်သူများထံ ပြတ်ပြတ် သားသား တင်ပြရဲရမည်။ မဟာမိတ်များထံတင်ပြရဲရမည်။ မိမိယုံကြည်သည့် နည်းလမ်းသို့ ပြည်သူများပါဝင်လျှောက်လှမ်းလာစေရန် စည်းရုံးညွန်ပြခေါင်းဆောင်မှုပေးကြရမည်သာဖြစ်သည်။
ပြည်သူများက ဒီချုပ်၏ ဦးဆောင်မှုကို မျှော်လင့်နေကြတာ ဖြစ်သည်။ မဟာမိတ်တိုင်းရင်းသား ပါတီများကလည်း ဒီချုပ်၏ ခြေလှမ်းကိုစောင့်ကြည့် အကဲခပ်နေကြတာဖြစ်သည်။ ယခုလုပ်ရပ်က လမ်းဆုံလမ်းခွ ရောက်ခါမှ ပြည်သူများကို ကိုယ့်လမ်းကိုယ်ရွေးကြ / ကိုယ်ဖြစ်ကိုယ်ခံကြလို့ ပြောနေသည်နှင့်တူနေသည်။
ခေါင်းဆောင်မှု ဆိုသည်မှာ “ဗဗျားပင်” (ပန်းပြား) လို ယိမ်းနွဲ့မြောက်တောင်လုပ်နေ၍မဖြစ်ပါ။ ဝေ့နေလို့မဖြစ်။
“အသစ်ရေးဆွဲခြင်းမှာ တပ်မတော်ကို ဖိတ်ခေါ် ဆွဲသွင်းရာရောက်ပါသည်” ဟူ၍ အကြောင်းပြနေလို့မဖြစ်ပါ။ စစ်တပ်ပါလာမှာကို ကြောက်နေ၍မဖြစ်ပါ။ “၂၀၀၈ အခြေခံဥပဒေ” ဆိုသည်မှ စစ်တပ် (စစ်အုပ်စု) က နိုင်ငံရေးတွင် ထာဝစဉ် အုပ်စီးထားနိုင်ရေးအတွက် အကွက်ချရေးသားထားသည့် အခြေခံဥပဒေဖြစ်ပါသည်။
“ပြင်ရေး” ဖြစ်စေ၊ “အသစ်ရေး” ခြင်းဖြစ်စေ စစ်တပ် မုချပါလာမည်သာဖြစ်သည်။
“ပြင်ရေး” သက်သက်ဆိုလျှင် စစ်တပ်မပါဝင်ဟု မည်သူပြောနိုင်သနည်း၊ “ပရောဖက်ရှင်နယ် စစ်တပ်” ဖြစ်ဖို့ အတွက် ရှေးဦး လိုအပ်ချက်မှာ စစ်တပ်သည် အခြေခံဥပဒေကို တသွေမတိမ်း နာခံဖို့ဖြစ် သည်။ စစ်တပ်သည် အခြေခံဥပဒေ၏ အောက်ကဖြစ်ရမည်။ “၂၀၀၈ အခြေခံဥပဒေ”တွင်မူ စစ်တပ်သည် အခြေခံဥပဒေ၏ အထက်က ဖြစ်နေသည်မဟုတ်ပါလော။
“ဒီမိုကရေစီစံနှုန်းများဖြင့် ညီညွတ်ခြင်းမရှိသော ပြဋ္ဌာန်းချက်များ” ထဲတွင် စစ်တပ်နဲ့ပတ်သက်သော အချက်များ အဓိက ပါဝင်နေ သည်ကို အားလုံးသိပြီးဖြစ်သည်။ ယနေ့အခြေအနေမှာ ကျားမြှီးဆွဲရုံလောက်ဖြင့် မရပါ၊ ကျားကိုဂုတ်ခွစီးဝံ့ရမည်။ “၂၀၀၈ အခြေခံ ဥပဒေ” ကိစ္စကိုင်တွယ်သည်ဆိုခြင်းမှာ ကျားကို ဂုတ်ခွစီးခြင်းမျိုးဖြစ်သည်။
ဒီချုပ်နှင့်ဒီချုပ်ခေါင်းဆောင်မှုသည် “ပြင် နဲ့ သစ်”ကြား တွေဝေနေသည်။ ပြတ်သားမှုမရှိ။
ယင်းအချက်သည် ဒီချုပ်၏ “ဖွဲ့စည်းပုံအခြေခံ ဥပဒေပြင်ဆင်ရေးကော်မတီ” က ထုတ်ပြန်သည့် ကြေညာချက် (၀၂/၀၉/၂၀၁၃) တွင် ပေါ်လွင်ထင်ရှားနေပါသည်။
နိုင်ငံရေးပါတီနှင့်နိုင်ငံရေးခေါင်းဆောင်၏ ခေါင်းဆောင်မှုဆိုသည်မှာ အဘယ်နည်း။
မှန်ကန်၍ပြတ်သားသောလမ်းကို ညွန်ပြရှေ့ဆောင်နိုင်ရမည်။ ပြည်သူ့ဆန္ဒနှင့် ရင်ဆိုင်နေရသည့် လက်တွေ့အကြားတွင် မိမိ ဆုံးဖြတ် ချက်(ဝါ) ခေါင်းဆောင်မှု (မူ၊ ပေါ်လစီ၊ လုပ်ငန်းစဉ်) ကို တံတားအဖြစ်ထိုးပေးဝံ့သောရဲရင့်မှုရှိရမည်။ ဟိုဘက် ဒီဘက်“ခွ” နေ၍မရ၊ “ခွ”နေလျှင် “ဂွ” ကျသွားလိမ့်မည်။
“၂၀၀၈ အခြေခံဥပဒေ” နှင့်ပတ်သက်၍ ဒီချုပ် ဖွဲ့စည်းပုံအခြေခံဥပဒေပြင်ဆင်ရေးကော်မတီ ကြေညာချက် အချက်အမှတ်(၂) တွင်ရေးသားဖော်ပြထားသည့် (“က”မှ “ဆ” အထိ) အချက်များသည် မည်သူမျှအငြင်းမပွားနိုင်လောက်အောင် မှန်ကန်နေသည့် သုံးသပ် ချက်များဖြစ်ပါသည်။
ထိုအချက်များကို ဗိုလ်ရွှေမန်း၏ “လေ့လာသုံးသပ်ရေးကော်မတီ” ကပင် ထည့်သွင်း လေ့လာသုံးသပ်ပါမည်လော။ ထိုအချက် များကိုမည်သို့ပြင်ဆင်မည်လဲ။ ယင်းနည်းလမ်းများကို ဒီချုပ်သည် ပြည်သူများ၊ မဟာမိတ်များထံတင်ပြရမည်။ လွှတ်တော်တွင်း ပြင်ဆင်ရေးနည်းလမ်းဖြင့် ခရီးပေါက်နိုင်ပါမည်လော။
“ကျော်ဝင်း၏ အညံ့ခံရေး” ဆောင်းပါး အစတွင် ကျနော်သည် ဤသို့ရေးသားဖော်ပြသတိပေးခဲ့ပါသည်။
“ဒီမိုကရေစီ အနှစ်သာရ ထည့်သွင်းပေးနိုင်ခြင်းမရှိသော “ပြုပြင်ရေး”သည် “အတုအယောင်ပြုပြင်ရေး” သာဖြစ်မည်။ ၂၀၀၈ အခြေခံဥပဒေကို “အရောင်တင် အလှခြယ်ပေးခြင်း” မျှသာဖြစ်လိမ့်မည်။
ဒီချုပ်ဖွဲ့စည်းပုံအခြေခံဥပဒေပြင်ဆင်ရေးကော်မတီ ကြေညာချက် တွင်ရေးသားဖော်ပြထားသည့် (“က”မှ “ဆ” အထိ) အချက် များကို “လွှတ်တော်တွင်းပြင်ဆင်ရေးနည်းလမ်း” ဖြင့် ပြင်ဆင်နိုင်လိမ့်မည် မဟုတ်ဘဲ။ (လွှတ်တော်ပြင်ပတွင်) ပြည်သူ့စွမ်းအားဖြင့်သာ အကောင်အထည်ဖော်နိုင်မည့် အချက်များဖြစ်ပါသည်။
(Photo Credit to – D-Waves, Facebook Page)
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
