ကဗျာ

မင်းထက်မောင် – ရှင့်ကို ကျမ ပြောပြချင်ပါတယ်

Art – Than Htay Maung

မင်းထက်မောင် – ရှင့်ကို ကျမ ပြောပြချင်ပါတယ်
(မိုးမခ) ဇန်န၀ါရီ ၁၂၊ ၂၀၁၈

ရှင့်ကို ကျမ ပြောပြချင်ပါတယ်
အဲဒီစက်ရုံကြီးထဲမှာ
တနေကုန် တနေခန်း  ပင်ပင်ပန်းပန်း လုပ်ရပေမယ့်
ကျမရတဲ့လုပ်ခ၀င်ငွေက အလွန်နည်းလှ
ကျမမိသားစုတွေ ၀မ်းဝခါးလှဖို့ မဆိုထားနဲ့
ကျမတကိုယ်စာတောင် မလောက်တဲ့အကြောင်း။

ရှင့်ကို ကျမ ပြောပြချင်ပါတယ်
ပုံမှန်နေ့တွက်ရတာနဲ့ မကိုက်လို့
အချိန်ပိုတွေ ဆင်းပြီး အလုပ်တွေ ပိုလုပ်ခဲ့ပေမယ့်
အအိပ်ပျက် အစားပျက်နဲ့
ခြေထောက်တွေလက်တွေကိုက် ခေါင်းတွေလည်းကိုက်လို့
ကျမ ကျန်းမာရေးပဲ ထိခိုက်လာတဲ့အကြောင်း။

ရှင့်ကို ကျမ ပြောပြချင်ပါတယ်
သက်ရှိလူသားမဆန်ဘဲ
စက်ရုပ်တွေလို လုပ်ရတဲ့ ဒီလုပ်ငန်းခွင်ထဲမှာ
ကျမလို အမျိုးသမီးတွေ အများကြီးဆိုပေမယ့်
ကျမတို့ အသက်တွေအတွက် အာမခံချက် မရှိသလို
ကျမတို့ အရှက်တွေအတွက်လည်း
လုံခြုံတဲ့ ကာကွယ်မှု မရှိတဲ့အကြောင်း။

ရှင့်ကို ကျမ ပြောပြချင်ပါတယ်
ကျမတို့ အလုပ်သမားအခွင့်အရေးတွေ
ကျမတို့ လူမှုဖူလုံရေး အကျိုးခံစားခွင့်တွေ
ဒီလိုဆုံးရှုံးနစ်နာနေရတာတွေ မခံရပ်နိုင်လွန်းလို့
ကျမတို့ ဆန္ဒပြတောင်းဆိုခဲ့ကြပေမယ့်
အလုပ်ထုတ်ခံရသူခံရ အဖမ်းခံရသူခံရနဲ့
နောက်ဆုံးတော့ ကျမတို့ပဲ
ဒုက္ခမျက်ရည် ပင်လယ်ဝေခဲ့ရတဲ့အကြောင်း။

ရှင့်ကို ကျမ ပြောပြချင်ပါတယ်
ကျမက လူကလည်းဆင်းရဲ
အတန်းပညာကလည်း ခပ်နည်းနည်းဆိုပေမယ့်
ကျမရဲ့ အနာဂတ်ကို သန့်စင်လိုတာကြောင့်
အလွယ်တကူ ဟိုဟာလုပ်စားရတဲ့ဘ၀ကို စွန့်လွှတ်ပြီး
ခက်ခဲပင်ပန်းကြီးစွာ ရုန်းကန်ရတဲ့ ဒီအလုပ်ထဲ
ကျမ တမင်ဝင်ရောက်လုပ်ကိုင်ခဲ့တာ ဆိုတဲ့အကြောင်း။

ကဲ … အခုတော့
ရှင့်ကို ကျမ ဘာတွေ ထပ်ပြီး ပြောပြရဦးမလဲ
ကျမ အလုပ်လည်း ပြုတ်ခဲ့ပြီ
ကျမ အကြွေးတွေလည်း ၀ိုင်းနေပြီ
ကျမ မိသားစုလည်း ငတ်နေပြီ
ကျမ ဘယ်လိုမှ မတတ်နိုင်တော့ဘူး
ကျမ အရင်လို လမ်းဘေးမှာ လာရပ်နေရပြီ
ကျမ မသိတဲ့ ရှင့်ဘေးမှာ လာအိပ်နေရပြီ
ကျမ မျှော်လင့်ချက်တွေလည်း ကြေပျက်လို့ နေပြီလေ။

(၂၂ သြဂုတ် ၂၀၁၇)


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
MoeMaKa Old Archives

Similar Posts