ကိုသန်းလွင် ရသဆောင်းပါးစုံ

ကိုသန်းလွင် ● ဖေ့ (စ) ဘွတ်ထူထောင်သူ၏ ကြေညာချက်

My Friend Tin Moe By Maung Swan Yi - Selection of MoeMaKa Articles

ကိုသန်းလွင် ● ဖေ့ (စ) ဘွတ်ထူထောင်သူ၏ ကြေညာချက်
(မိုးမခ) ဖေဖော်ဝါရီ ၂၇၊ ၂၀၁၇

(၁)
ဖေဖော်ဝါရီလ (၁၆) ရက်နေ့က ဖေ့ (စ) ဘွတ် ထူထောင်သူ မတ်ဇူကာဘတ် (Mark Zuckerberg) စာတမ်းတစောင်ရေးပြီး တင်ပြသည်ကို ဖတ်လိုက်ရပါသည်။ တကမ္ဘာလုံး၌ အင်တာနက် သတင်းဆက်သွယ်ဖလှယ်မှုဖြင့် ဂလိုဘယ်လိုက်ဇေးရှင်း (Globalization) ၏ပြောင်းလဲတိုးတက်မှု အရှိန်ရနေကြချိန်တွင် စိုးရိမ်စရာအဖြစ်အပျက်များ ဆက်တိုက်ပေါ်ပေါက်နေပါ ဟုဆိုလိုက်ပါသည်။ သူ၏ ဖေ့ (စ) ဘွတ်စာမျက်နှာတွင်ဖေါ်ပြထားသည့် Mission statement ဟုဆိုနိုင်သော သူ့ကြေညာ ချက်မှာ စာလုံးရေ ၅၈၀၀ ခန့်ရပြီး ဖူးစကက်စာရွက်နှင့်ဆိုသော် ဆယ်မျက်နှာခန့် ရှည်လျားပါသည်။

အခြားကုမ္ပဏီကြီးများမှ စီအီးအိုများအနေဖြင့် မိမိတို့ ပြောဆိုလိုသည်များ၊ ပေါ်လစီလုပ်ငန်းစဉ်များနှင့်ပတ်သက်၍ နှစ်စဉ် ဘတ်ဂျက်နှစ်အစတွင်ဖြစ်စေ၊ ကုမ္ပဏီ၏ အလွန်အရေးကြီးသော ဆုံးဖြတ်ချက်များ ချမှတ်စဉ်တွင်ဖြစ်စေ၊ ထုတ်ကုန်အသစ် ဖြန့်ချီလျင်ဖြစ်စေ အများသိအောင် ထုတ်ပြန်လေ့ရှိကြပါသည်။

ထိုသို့ ငွေရေးကြေးရေးဆိုင်ရာ ထူးခြားမှုဘာမှမရှိဘဲ ယခုကဲ့သို့အချိန်တွင် ထုတ်ပြန်လိုက်ခြင်းက ပို၍ထူးဆန်းနေပါသည်၊ အသက် ၃၂ နှစ်အရွယ် ကမ္ဘာ့အထင်ကရ ကုမ္ပဏီ၏စီအီးအိုဖြစ်သူက ဂလိုဘယ်လိုက်ဇေးရှင်းဟူ၍ ကမ္ဘာ့ရွာကြီးတခုတည်း ဖြစ်အောင်ကျိုးပမ်းနေကြသည်မှာ မှားနေပြီလားဟု မေးခွန်းထုတ်လိုက်ပါသည်။

ဖေ့ (စ) ဘွတ် ပရိုဂရမ်အနေဖြင့် ကမ္ဘာ့နိုင်ငံအသီးသီး လူတန်းစားအလွှာအသီးသီးကို တဦးနှင့်တဦး အွန်လိုင်းတွင် တွေ့ဆုံ ခွင့်ရစေရန်၊ ဆောင်ရွက်ပေးပါသည်၊ အချင်းချင်း မိတ်ဆွေဖြစ်ခွင့်ရစေရန်၊ တူညီသောဦးတည်ချက်တခုအတွက် အလိုတူ ပူးပေါင်းဆောင်ရွက်နိုင်စေရန် လူအများကို စုစည်းပေးခဲ့ပါသည်။

(၂)
တကမ္ဘာလုံးအစစ ပွင့်လင်းလာနေချိန်တွင် ဂလိုဘယ်လိုက်ဇေးရှင်း၏အသီးအပွင့်များကို မရရှိ မခံစားရဘဲ ကျန်ရစ်ခဲ့ကြသူ များရှိနေကြသည်ဟု သဘောပေါက်လာကြရပါသည်၊ ထိုသူတို့၏ အလိုမကျမှုများကို တွေ့မြင်နေကြရပါသည်။ အမေရိကန် သမ္မတသစ်အဖြစ် ဒေါ်နယ်ထရမ့်ကို ရွေးကောက်တင်မြောက်လိုက်ကြခြင်း၊  ဗြိတိန်နိုင်ငံသည် ဥရောပကောင်စီမှခွဲထွက်ရန် အင်္ဂလန်နိုင်ငံသားများက မဲပေးခဲ့ကြခြင်းတို့မှာ ဤအလိုမကျမှုများ၏ ရလဒ်ဖြစ်သည်ဟု သူကယူဆပါသည်။

လူ့ယဉ်ကျေးမှုသည် လူအများစုပေါင်း ဆောင်ရွက်ခြင်းဖြင့် ထူထောင်ရခြင်းဖြစ်သည်။ မိသားစုများမှတဆင့်လူအုပ်စု၊ လူ အုပ်စုမှ မြို့ရွာများ၊ မြို့ရွာများမှ နိုင်ငံတခုအဖြစ် တဆင့်စီ စုပေါင်းဖွဲ့စည်းရခြင်းဖြစ်သည်။ Social Infra structure ခေါ် ထို လူ့အဖွဲ့အစည်းများသည် လူတို့၏ဘဝသာယာစိုပြေရေး၊ ငြိမ်းချမ်းလုံခြုံစွာနေထိုင်နိုင်ရေးတို့အတွက် အရေးကြီးပါသည်။ သုံးစွဲသူ ၁.၈ ဘီလီယံမျှရှိနေပြီဖြစ်သော ဖေ့ (စ) ဘွတ်သည် ထိုလူနေမှုစနစ် ခိုင်ခန့်တည်မြဲရေးကို ဆောင်ရွက်နေပါသည်။ သောင်းကျန်းသူများ (Terroist) က လူအဖွဲ့အစည်းကို အန္တရာယ်မပြုနိုင်အောင် ကာကွယ်ရေးများမှာ သူတို့၏ဦးတည် ချက် များတွင် ပါဝင်ပါသည်။

သို့တိုင်အောင် ၂၀၁၆ ခုနှစ်အတွင်းဖြစ်ပွားခဲ့သည့် ဖေါ်ပြပါအချက်နှစ်ချက်ကြောင့် ဖေ့ (စ) ဘွတ်၏ တည်ဆောက်ပုံနှင့် ချီတက်ရာလမ်းကြောင်းမှာ အမှန်မှဟုတ်ရဲ့လား၊ ဘာတွေပြုပြင်ရန်လိုပါသနည်းဆိုသောမေးခွန်းကို မေးထားပါသည်၊ တချိန်တည်းမှာပင် Isolationism ခေါ် တကိုယ်တည်းဝါဒ၊ မိမိကောင်းကျိုးကိုသော အဓိကထားသောဝါဒကိုလည်း လူ့ယဉ် ကျေးမှုတိုးတက်ရာလမ်းကြောင်းအတွက် အနှောင့်အယှက်တခုဖြစ်ပါသည်ဟု သတိပေးလိုက်ပါသည်။ Nationalism ဟူ၍ အမျိုးကိုချစ်သောဝါဒမှာ နေရာလွဲနေလျင် အန္တရာယ်ရှိပါသည်။

သူ့အနေဖြင့် ဖေ့ (စ) ဘွတ်ကုမ္ပဏီကို စတင်တည်ထောင်စဉ်က လူအချင်းချင်းဆက်သွယ်ပေးသည့်လုပ်ငန်းမှာ မှန်ကန်သော လုပ်ရပ်သာဖြစ်ခဲ့ပါသည်။ ဘာမှသံသယရှိစရာမလိုခဲ့ပါ။ တကမ္ဘာလုံးကလည်း စိတ်ရောကိုယ်ပါ အားပေးခဲ့ကြပါသည်။
ဤကဲ့သို့ ဖေ့ (စ) ဘွတ်၏ရည်ရွယ်ချက်များ ကို ၂၀၀၄ခု ဖေ့ (စ) ဘွတ် ကုမ္ပဏီထူထောင်စဉ်ကလည်း ရေးသားခဲ့ဘူးရာ ယခု ၁၃ နှစ်ကြာမှ တကြိမ် ထွက်ပေါ်လာခြင်းကို နယူးရော့တိုင်းသတင်းစာနှင့် စင်ကာပူစထရိတ်တိုင်း သတင်းစာကြီးတို့က သတိထားမိပြီး ဖေါ်ပြပေးခဲ့ကြပါသည်။ သူက ဤစာကိုရေးရန် ယမန်နှစ် သမ္မတရွေးကောက်ပွဲအတွက် မဲဆွယ်နေကြစဉ် ကာလကတည်းက စတင်စဉ်းစားမိခဲ့ရပါသည်ဟု ဆိုသည်။ သူ့ရည်ရွယ်ချက်မှာ ဖေ့ (စ) ဘွတ်သည် လူသားတိုင်းအတွက် အကျိုးပြု အသုံးဝင်စေရမည်။ စက်မှုတိုးတက်မှုနှင့် တကမ္ဘာလုံး သတင်းဖြန့်ချိရေးက မြန်ဆန်တိုးတက်လာချိန်တွင် အကျိုး မခံစားရဘူးဟူသော လူတွေရှိနေခြင်းအတွက် ပြဿနာကိုကူညီဖြေရှင်းပေးကြပါဟု ဖိတ်ခေါ်ခဲ့ပါသည်။

သူ့စာမှာ နိုင်ငံရေးသဘောဆောင်သော်လည်း မည်သည့် တသီးတခြားနိုင်ငံကိုမှ ရွေးချယ်ဝေဖန်ခြင်းမပြုခဲ့ပါ။ ဖေ့ (စ) ဘွတ် ကို တရုတ်နိုင်ငံက မသုံးစွဲရဟု (Block) လုပ်ထားသည်။ အိန္ဒိယနိုင်ငံတွင် သုံးစွဲသူများအတွက်ပြဿနာအများကြီးရှိနေ သည်။ ဥရောပတွင်နိုင်ငံကို လိုက်၍ချမှတ်ထားသော ရှုတ်ထွေးသောစည်းကမ်းများရှိနေသည်။ မစ္စတာထရမ့် ရွေး ကောက် ခံရအောင် ဖေ့ (စ) ဘွတ်က သတင်းအမှားများကို ဖြန့်ချိပေးသည်ဟု ဆိုသူက ဆိုနေကြသည်။ ကုမ္ပဏီအနေဖြင့်မူ ပြင်ပ မှ အနှောင့်အယှက်ကင်းကင်းဖြင့် သုံးစွဲသူများလက်ဝယ်သို့ ရှင်းရှင်းလင်းလင်းရောက်ရှိစေရန် ပြုပြင်မှုအမျိုးမျိုး၊ ခုခံကာကွယ်မှု အမျိုးမျိုး ပြုလုပ်လျက်ရှိသည်။

ဖေ့ (စ) ဘွတ်၏ပေါ်လစီကို ပြန်လည်သုံးသပ်ရန် လိုအပ်လာသောကိစ္စတခု လွန်ခဲ့သောနှစ် စက်တင်ဘာလက ဖြစ်ပေါ်ခဲ့ ပါသည်။ ဗီယက်နမ်စစ်အတွင်းက မီးလောင်ဗုံးထံမှလွတ်ရန် ၉ နှစ်အရွယ် မိန်းခလေးငယ်တဦး၏ ကမ္ဘာကျော် ကိုယ်တုံးလုံး ပုံတခုကို ဖေ့ (စ) ဘွတ်က အဝတ်အစားမပါ၍ဆိုကာ ဆင်ဆာလုပ်၍ ဖယ်ရှားပစ်ခဲ့ပါသည်။ စစ်၏အနိဌာရုံ၊ စစ်၏ဆိုးရွား ခါးသီး သောအဖြစ်များကို ထင်ရှားသောပြယုဂ်ဖြစ်သောကြောင့် ဖေ့ (စ) ဘွတ်သုံးစွဲသူအများက ဆင်ဆာလုပ်ခြင်းကို ဝိုင်း ဝန်းကန့်ကွက်ခဲ့ကြသောကြောင့် ပြန်လည်ဖေါ်ပြပေးခဲ့ရပါသည်။ ထိုအချိန်ကစ၍ တကမ္ဘာလုံးသုံးစွဲကြသော လူမှုရေးဝက် ဆိုဒ်တွင် တကျောင်းတဂါထာ၊ ဒေသအလိုက် စည်းကမ်းနည်းလမ်းများရှိရမည်ဆိုသော မူဝါဒဖြစ်လာခဲ့ရပါသည်။ တကမ္ဘာ လုံး လိုက်နာကြရမည်ဟု မူသေဝါဒချမှတ်၍မရနိုင်ဟု သဘောပေါက်ခဲ့ပါသည်။

တကမ္ဘာလုံးသုံးစွဲနေကြသဖြင့် တင်လာသမျှကို စောင့်ကြည့်ရန်ခက်ခဲသဖြင့် ကွန်ပျူတာကိုသုံး၍ စက်၏အသိဉာဏ် (Artificial Intelligent) AI နည်းများဖြင့် စောင့်ကြည့်နိုင်ရန် ကြိုးစားလျက်ရှိပါသည်ဟု ဆိုသည်။

အာရပ်နွေဦးခေါ် အီဂျစ်ပြည်တွင် တော်လှန်ရေးစတင်ဖြစ်ပွားစဉ်က တီဟီရီရင်ပြင်တွင် လူစုလူဝေးစုမိအောင် ဖေ့ (စ်) ဘွတ် စာမျက်နှာများမှ ဖိတ်ခေါ်စည်းရုံးရပုံများကို ကျွန်တော်တို့မှတ်မိနေကြပါသည်။ ယခုအခါ ဖေ့ (စ) ဘွတ်မှတဆင့် မက်ဆေ့ (ချ) ပေးနိုင်သလို တယ်လီဖုံးဆက်သွယ်မှုများလည်း လုပ်နိုင်နေကြပါပြီ။

မစ္စတာဇူကာဘစ်က ဂလိုဘယ်လိုက်ဇေးရှင်းဖြစ်စဉ်တွင် ဖေ့ (စ်) ဘွတ်ကြောင့် အနှုတ်လက္ခဏာဆောင်သော ဆိုးကျိုးများ ရှိနိုင်သလားဟု စဉ်းစားနေချိန်တွင် ဖေ့ (စ်) ဘွတ်လျှောက်လှမ်းရာလမ်းကြောင်းသည် နောက်ကြောင်းပြန်ရန် မဖြစ်နိုင်တော့ ကြောင်း သူလည်း ရိပ်စားမိပါလိမ့်မည်။

တကမ္ဘာလုံးက ဝိုင်းဝန်းအသုံးပြုနေကြခြင်းကြောင့် တင်လာသမျှအရာအားလုံးကို ဆင်ဆာဖြင့် ထိန်းသိမ်းချုပ်တည်းရန် ကြိုးစားမှုမှာလည်း အောင်မြင်နိုင်စရာအကြောင်းမရှိပါ။

(၃)
ဖေ့ (စ်) ဘွတ်၏အောင်မြင်မှုများ၊ လူသိများမှုများကြောင့် “အမေရိကန်နိုင်ငံ၏ သမ္မတအဖြစ်အရွေးခံရန် ဆန္ဒမရှိဘူးလား” ဟု မေးသည်ကို ရယ်စရာတခုသဖွယ်သဘောထား၍ ငြင်းပယ်ခဲ့ပါသည်။ သူမျှော်မှန်းသည်မှာ ဖေ့ (စ်) ဘွတ်က ခိုင်ခန့်သော လူ့အဖွဲ့အစည်းတခုကို ပိုမို၍ခိုင်မြဲအောင်၊ ပိုမို၍အင်အားတောင့်တင်းအောင်လုပ်လိုသောဆန္ဒသာရှိပါသည်ဟု အင်တာဗျူး တခုတွင် ဖြေခဲ့ပါသည်။

ဖေ့ (စ) ဘွတ်မှာ လူအများဆက်သွယ်ရာတွင် အသုံးပြုနိုင်သည့်ကရိယာတခုသာဖြစ်ပါသည်။ ဖြန့်ချိသောသတင်း မှန်သည်၊ မှားသည်၊ ကောင်းသည်၊ ဆိုးသည်မှာမူ ထိုသတင်းဖြန့်ချိသူတို့အပေါ်တွင်သာ မူတည်ပါသည်။ ကောင်းကျိုး ဆိုးကျိုးတို့ကို ဖေ့ (စ) ဘွတ်ပရိုဂရမ် အားတာဝန်ပုံချလျင်လည်း ဆီလျော်မှုမရှိပါ။ လူ့ယဉ်ကျေးမှုအပေါ် ကောင်းကျိုးပေးသည်၊ မပေးသည်၊ ကို ဆုံးဖြတ်နိုင်ရန်မှာ သုံးစွဲသူတဦးချင်းစီအပေါ်၌သာ တာဝန်ကျရောက်လျက်ရှိပါသည်။

ကိုသန်းလွင်


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts