သူတို့အာဘော် မောင်မောင်စိုး

မောင်မောင်စိုး ● မြောက်ပိုင်းစစ်ပွဲနှင့် စစ်ရေးအခြေအနေသုံးသပ်ချက် (နိဂုံး)

မောင်မောင်စိုး ● မြောက်ပိုင်းစစ်ပွဲနှင့် စစ်ရေးအခြေအနေသုံးသပ်ချက် (နိဂုံး)
(မိုးမခ) ဒီဇင်ဘာ ၁၉၊ ၂၀၁၆

● ကရင်ပြည်နယ်
ကရင်ပြည်နယ်တွင် ယခင်က အင်အားကြီးသည့် KNU ကရင်တိုင်းရင်းသားလက်နက်ကိုင်အဖွဲ့ရှိခဲ့သော်လည်း ယခုအခါ အဆိုပါ KNU အဖွဲသည် အဖွဲ့များစွာကွဲနေသည်။ ပင်မ KNU/DKBA နှင့် KNU/KNLA (PC) အဖွဲ့ ၃ ဖွဲသည် ယခုအခါ NCA လက်မှတ်ထိုးရာတွင်တွင်ပါဝင်ထားပြီး တပ်မတော်နှင့် အဆင်အပြေဆုံးအဖွဲ့များဖြစ်သည်ဟု ဆိုရမည်။ ထို့ပြင် စောချစ် သူဦးစီး DKBA မှ ခွဲထွက်သောအဖွဲ့သည် BGF အဖြစ် အစ်ိုးရ၏ကွပ်ကဲမှုအောက်တွင်ရောက်ရှိနေပြီဖြစ်သည်။

လက်ရှိ ကရင်ပြည်နယ် လက်နက်ကိုင်ပဋိပက္ခဖြစ်ပွားနေသောအဖွဲ့မှာစောကျော်သက်နှင့် စောဆန်းအောင်တို့ဦးစီးသည့် DKBA မှ ခွဲထွက်သည့်အဖွဲ့ဖြစ်သည်။ ပြီးခဲ့သောလပိုင်းက မဲသဝေါတဝိုက်တွင် တိုက်ပွဲများဖြစ်ပွားခဲ့သော်လည်း လော လောဆယ်တွင် တိုက်ပွဲများငြိမ်သက်နေသည်။ စောဆန်းအောင်တို့ဦးစီးသည့် DKBA အဖွဲ့သည် အင်အား ၅၀၀ ခန့်သာ ရှိနိုင်သည်ဟုခန့်မှန်းရပြီး လက်ရှိတွင် တပ်မတော်၏ဒေသခံတပ်များနှင့် စောချစ်သူ၏ BGF တပ်ဖွဲ့တို့ ပူးပေါင်း၍ ထိမ်းချုပ် ရင်ဆိုင်နိုင်ရန် ဆောင်ရွက်နေသည်ကိုတွေ့ရသည်။ ထို့ပြင် ကျန် KNU အဖွဲ့များ အပစ်ရပ်ထားစဉ်ကာလတွင် စောဆန်း အောင်တို့၏ လှုပ်ရှားနိုင်စွမ်းမှာ အကန့်အသတ်ရှိသည်ဟုသုံးသပ်ရသည်။

ပြီးခဲ့သော နိုဝင်ဘာလအတွင်းက KNU ပါတီကွန်ဂရက်ကျင်းပခဲ့သော်လည်း ခေါင်းဆောင်သစ်ရွေးချယ်မှု မပြုခဲ့ပါ။ နောက် ထပ် ၆ လခန့်ရွှေ့ဆိုင်းခဲ့သော်လည်း လာမည့်ကွန်ဂရက်တွင်လည်း ခေါင်းဆောင်သစ်ရွေးချယ်မည်ဟု ယတိပြတ်ပြောဆိုနိုင် ခြင်းမရှိပါ။ အကဲခတ်များက နောက်တကြိမ်ရွေးကောက်တင်မြှောက်ပါက လက်ရှိဥက္ကဌ စောမူတူးစေးဖေါ ပြန်လည်အရွေးခံ ရမည်မှာ မသေချာလှဟု ယူဆကြသည်။ လက်ရှိငြိမ်းချမ်းရေးလုပ်ငန်းစဉ်တွင် တပ်မတော်နှင့် အဆင်ပြေသူ စောမူတူးစေး ဖေါ  ပြန်လည်အရွေးမခံရဘဲ သဘောထားတင်းမာသူများ တက်လာပါက တပ်မတော်နှင့်တင်းမာမှုများပြန်လည်ဖြစ်ပွားမည် ကို ပူပင်ကြသည်။

သို့သော် လက်ရှိ KNU အနေနှင့် ငြိမ်းချမ်းရေးလုပ်ငန်းစဉ်တွင်ပက် DKBA နှင့် KNU/KNLA(PC) နဲ့ ပူးတွဲလုပ်ဆောင်၍ ကရင် ညီညွတ်ရေးကိုထိမ်းသိမ်းနိုင်ရန်ကြိုးစားနေသည့် အချိန်အခါဖြစ်ပေရာ KNU အတွင်း နောက်ထပ်အကွဲအပြဲတခု မဖြစ်အောင် ဦးစားပေးစဉ်းစားဘွယ်ရှိသည်။ သို့ဖြစ်ရာ ကရင်ပြည်နယ်အတွင်း KNU နှင့် တပ်မတော်ကြား နောက်ထပ် လက်နက်ပိုင်ပဋိပက္ခဖြစ်ပွားရန် အလားအလာနည်းသည်ဟု သုံးသပ်ရပါသည်။

● ကယားပြည်နယ်
ကယားပြည်နယ်အတွင်းရှိ ကလလတနှင့် ကယန်းပြည်သစ်ပါတီတို့မှာ ၂၀၀၉ နောက်ပိုင်း BGFနှင့် ပသစအဖြစ်ပြောင်းလဲ ဖွဲ့စည်းထားပြီဖြစ်သည်။ လက်ရှိ ကယားပြည်နယ်အတွင်း NCA လက်မှတ်မထိုးသေးသည့်အဖွဲ့မှာ UNFC အဖွဲ့ဝင်ဖြစ်သည့် ကရင်နီအမျိုးသားတိုးတက်ရေးပါတီ KNPPတဖွဲ့သာဖြစ်သည်။ KNPP သည် စောစောပိုင်းကာလများတွင် ပြောက်ကျား   လှုပ်ရှားမှုများသာရှိပြီး NCA လက်မှတ်မထိုးသေးသော်လည်း တပ်မတော်နှင့်လက်နက်ကိုင်ပဋိပက္ခ ကြီးကြီးမားမရှိခဲ့ပါ။ ယခုအချိန်တွင်လည်း စစ်ရေးအရ ကြီးမားသည့်လှုပ်ရှားမှုမရှိနိုင်ဟု ယူဆရပါသည်။

● မွန်ပြည်နယ်
မွန်ပြည်နယ်တွင် NCA လက်မှတ်မထိုးသေးသည့် UNFC အဖွဲ့ဝင်မွန်ပြည်သစ်ပါတီ NMSP ရှိသည်။ NCA လက်မှတ်မထိုး သေးသော်လည်းပြီးခဲ့သောနှစ်ပိုင်းများအတွင်း တပ်မတော်နှင့် လက်နက်ကိုင်ပဋိပက္ခ ကြီးကြီးမားမား မရှိခဲ့ပေ။ ယခုလဲ ဖြစ် နိုင်ချေ နည်းသည်ဟု ယူဆရပါသည်။

KNPP နှင့် NMSP တို့မှာ စစ်ရေးအရ မြောက်ပိုင်းအဖွဲ့များကဲ့သို့ စစ်အင်အားတောင့်တင်းခြင်းမရှိပေရာ လက်နက်ကိုင်ပဋိပက္ခ ဖြစ်ပါကလည်း ကြီးမားသောတိုက်ပွဲများ ဖြစ်ပွားရန် အလားအလာနည်းသည်။

● ချင်းပြည်နယ်
ချင်းပြည်နယ် လက်နက်ကိုင်အဖွဲ့အစည်းဖြစ်သော CNF ခေါ် ချင်းအမျိုးသားတပ်ဦးမှာ NCA လက်မှတ်ရေးထိုးထား ပြီးဖြစ်သည်။ ၎င်းတပ်ဖွဲ့ဝင်အချို့ ချင်းပြည်နယ်တွင်ရှိသော်လည်း လက်နက်ကိုင်ပဋိပက္ခဖြစ်ပွားရန်အလားအလာမရှိပေ။

● ရခိုင်ပြည်နယ်
ရခိုင်ပြည်နယ်တွင် လောလောဆယ် ရခိုင် လက်နက်ကိုင်အဖွဲ့ ၂ ခုရှိသည်။ တခုမှာ ALP ဖြစ်ပြီး ဘင်္ဂလားဒေ့ရ်ှနယ်စပ်တွင် အခြေပြုသည်။ ALP သည် NCA လက်မှတ်ရေးထိုးပြီးဖြစ်ပြီး တပ်မတော်နှင့် လက်နက်ကိုင်ပဋိပက္ခဖြစ်ပွားရန်အခြေအနေမရှိပါ။

နောက်ထပ် ရခိုင်လက်နက်ကိုင်အဖွဲ့မှာ ULA/AA ဖြစ်သည်။ ULA/AAသည် လက်ရှိ မြောက်ပိုင်းမဟာမိတ်အဖွဲ့ဝင်ဖြစ်ပြီး အဓိကစုဖွဲ့လေ့ကျင့်မှု ကိုတရုတ်နယ်စပ်တွင် ပြုလုပ်ကြသော်လည်း ၂၀၁၅ ခုနှစ်အတွင်းမှစ၍ ၎င်း၏အင်အားအချို့ရခိုင်ပြည်နယ်အတွင်းသို့ ပြန်လည်ထိုးဖေါက်ဝင်ရောက်ပြီး တပ်မတော်စစ်ကြောင်းများနှင့် တိုက်ပွဲများဖြစ်ပွားခဲ့သေးသည်။ သို့ သော် ယခုအချိန်တွင် တိုက်ပွဲဖြစ်ပွားသည့်သတင်းများ မတွေ့ရပေ။ ULA/AA အနေနှင့် ထိုဒေသတွင် မြောက်ပိုင်းတွင်ကဲ့သို့ ကြီးမားသည့် စစ်ရေးလှုပ်ရှားမှုပြုလုပ်ရန် အကန့်အသတ်များစွာရှိသည်ဟု သုံးသပ်ရပါသည်။

ရခိုင်ပြည်နယ်ရှိ လတ်တလေည စစ်ရေးအကြပ်အတည်းတခုမှာ ဘူးသီးတောင် မောင်းတောဒေရှိ ဘင်္ဂါလီမွတ်စလင်နှင့် ပတ်သက်သည့်ပြဿနာဖြစ်သည်။ ရခိုင်ပြည်နယ် ဘင်္ဂလီအရေးသည် နှစ်အချို့ လိပ်ခဲတင်းတင်းဖြစ်နေရာမှ ၂၀၁၆ အောက်တိုဘာ ၉ ရက်နေ့တွင် အပြောင်းအလဲတခုဖြစ်ပေါ်ခဲ့သည်။ ဘင်္ဂါလီမွတ်စလင်များသည် အဆိုပါနေ့မှစ၍ နယ်ခြား စောင့်ရဲစခန်းများကို တပြိုင်နက်တိုက်ခိုက်မှုများကိုပြုလုပ်ခဲ့သည်။ ထို့ပြင် ထိုနေ့မှစ၍ဆက်လက်၍ ရဲများအားလည်းကောင်း၊ တပ်မတော်စစ်ကြောင်းများအားလည်းကောင်း ဆက်လက်တိုက်ခိုက်ခဲ့သည်ကို တွေ့ရသည်။

ယခုအကြိမ်ထူးခြားချက်မှာ ဒေသခံရခိုင်များနှင့်ပဋိပက္ခဖြစ်ပွားသည့်ပုံစံမဟုတ်ဘဲ အစိုးရလက်နက်ကိုင်တပ်ဖွဲ့များအား ဦး တည်တိုက်ခိုက်ခြင်းဖြစ်သည်။ ထို့ပြင် တိုက်ခိုက်သည့်ပုံစံမှာလည်း လက်နက်ကိုင်တပ်ဖွဲ့တခုထူထောင်ပြီး စစ်စခန်းများ ဖွင့်လှစ်၍ တိုက်ခိုက်ခြင်းမဟုတ်ဘဲ ဘင်္ဂါလီကျေးရွာများအား အခြေပြုတိုက်ခိုက်ခြင်းဖြစ်သည်။ ထို့ပြင် ယခုအချိန်ထိ မည် သည့်အဖွဲ့အစည်း မည်သူကခေါင်းဆောင်၍ တိုက်ခိုက်သည်ဆိုသည်ကို ရှင်းလင်းစွာ သိရခြင်းမရှိပေ။ သို့ဖြစ်ရာ စစ်မျက်နှာ ဖွင့် ပြန်လည်တိုက်ခိုက်ရာတွင် ခက်ခဲမှုရှိသည်။ ဘင်္ဂါလီကျေးရွာများနှင့် စစ်ခင်းရသကဲ့သို့ဖြစ်နေပေသည်။

တဖက်ကလည်း ဘင်္ဂါလီ မွတ်စလင်တို့က နိုင်ငံတကာစာမျက်နှာတွင် ရွာများဖျက်ဆီးမှု အစုလိုက်အပြုံလိုက်အသတ်ခံရမှု မုဒိန်းမှု စသည်တို့ဖြင့် ပြန်လည်စွပ်စွဲတိုက်ခိုက်ရာ ကုလသမဂ္ဂ နိုင်ငံတကာလူ့အခွင့်အရေးမျက်နှာစာနှင့် အာဆီယံအတွင်း နိုင်ငံရေးအရ အကြပ်အတည်း တွေ့နေရသည်။

တဖက်ကလည်း စစ်ရေးအရ မဖြေရှင်း၍လည်းမရ။ သမရိုးကျ စစ်ဆင်မှုပုံစံနှင့်လည်းမရ၊ ခက်ခဲနေပေသည်။ ကြီးမားသည့် တိုက်ပွဲများဖြစ်ပွားနိုင်ချေ နည်းပါးသော်လည်း တပ်အင်အားလုံလောက်ရန် လိုအပ်နေပေသည်။ဘူးသီးတောင် မောင်းတော ဒေသတွင် ဘင်္ဂါလီမွတ်စလင် လူဦးရေသည် ၉၀ ရာခိုင်နှုန်းအထက်ဖြစ်ပေရာ ရဲနှင့်တပ်မတော်စစ်ကြောင်းများအနေနှင့် တည်ငြိမ်မှုထိမ်းသိမ်းနိုင်ရန် တပ်အင်အား အလုံလောက်ချထားရန် လိုအပ်နေပြီး တပ်အင်အားလျော့ကျသည်နှင့် ဘင်္ဂါလီ မွတ်စလင်တို့၏လှုပ်ရှားမှု ပြန်လည်မြင့်မားလာဘွယ်ရှိသည်။ သို့ဖြစ်ရာ လက်ရှိအချိန်တွင် ရခိုင်ပြည်နယ် ဘူးသီးတောင် မောင်းတောဒေသသည် တပ်မတော်အနေနှင့် စစ်အင်အားချထားရန် လိုအပ်သည့်ဒေသတခုဖြစ်၍နေပေတော့သည်။

● နာဂတောင်တန်း
နာဂတောင်တန်းတွင် အခြေပြု သည့် NSCN (K) နာဂအဖွဲ့သည်။ ဒေသဆိုင်ရာ အပစ်အခတ်ရပ်စဲရေးလက်မှတ်ထိုးထားသော်လည်း NCA လက်မှတ်ထိုးထားခြင်း မရှိသည့်အဖွဲ့ဖြစ်သည့်ပြင် ၂၁ ရာစု ပင်လုံညီလာခံပထမအကြိမ် အစည်းအဝေး သို့လည်း တက်ရောက်ခြင်းမရှိပေ။ သို့သော်နာဂအဖွဲ့၏ နိုင်ငံရေးရည်ရွယ်ချက်နှင့် အဓိကပဋိပက္ခဖြစ်နေသည်မှာ မြန်မာ အစိုးရနှင့်မဟုတ်ဘဲ အိန္ဒိယအစိုးရဖြစ်ပေရာ မြန်မာပြည် နာဂတောင်တန်း၌ နာဂအဖွဲ့နှင့်တပ်မတော်တို့ တိုက်ပွဲဖြစ်ရန် ဖြစ်နိုင်ချေ မရှိသလောက် နည်းပါးပါသည်။

● မြောက်ပိုင်းစစ်ပွဲနှင့် စစ်ရေးအလားအလာ
သို့ဖြစ်ရာ မြောက်ပိုင်းစစ်ပွဲနှင့်အတူ အပြင်းအထန် ကူးစက်နိုင်သည့်ဒေသများမှာ ရှမ်းအလယ် ရှမ်းအရှေ့နှင့် ကချင်ပြည်နယ် တို့ ဖြစ်သည်ဆိုသည် ကိုတွေ့ရပါသည်။ ရခိုင်ပြည်နယ်သည် ထူးခြားချက်အဖြစ် ထားရှိရမည့်ဒေသဖြစ်၍နေပေမည်။

လက်ရှိ တပ်မတော်စစ်အင်အားနှင့် လေကြောင်းပစ်ကူ လက်နက်ကြီးပစ်ကူတို့၏အားသာချက်အရ ဒေသတကွက်ချင်း ဖြစ် ပွားသည့်စစ်ပွဲများအားရင်ဆိုင်ရန် အင်အားလုံလောက်သည်ဟု ဆိုနိုင်ပါသည်။ သို့သော် အင်အားလုံလောက်သည်ဆို သော်လည်း တောတောင်ထူထပ်သော လမ်းပမ်းဆက်သွယ်မှု ခက်ခဲသော ဖွံ့ဖြိုးမှုခက်ခဲသောဒေသများတွင် စိတ်ကြို က် စစ်ဆင်ရန် ခက်ခဲပါသည်။ တိုင်းရင်းသားတပ်ဖွဲ့များအဖို့ ဒေသကျွမ်းကျင်မှုနှင့် ဒေသခံတိုင်းရင်းသားများအပေါ် အားကိုး အားထားပြုနိုင်မှုပေါ်မူတည်၍ လှည့်ပတ်ရှောင်တိမ်းနိုင်သည့် အခွင့်အလမ်းအပေါ် အသုံးပြုနိုင်ချေများသည်။ လက်ရှိမြောက် ပိုင်းမဟာမိတ်အဖွဲ့အဖို့ ရင်ဆိုင်တိုက်ပွဲများကို အကန့်အသတ်နှင့်သာ ဆင်နွှဲဘွယ်ရှိပြီး လှည့်လည်ရှောင်တိမ်း၍ ပြောက် ကျားစစ်ဆင်ခြင်းကိုသာ အလေးထားလုပ်ဆောင်ဖွယ်ရှိသည်။

တပ်မတော်အနေနှင့် စစ်ပွဲအတွင်း စခန်းတခု မြို့ရွာတခုအား အင်အားသုံး အချိန်သုံး၍ ရယူသိမ်းပိုက်နိုင်သော်လည်း အ ဆိုပါ တိုင်းရင်းသားတပ်ဖွဲ့များအား အမြစ်ပြတ်ချေမှုန်းနိုင်ရန် ဖြတ်လေးဖြတ်ကဲ့သို့ စစ်ဆင်ရေးများလုပ်ရန် လွယ်ကူမည်မ ဟုတ်ဟု သုံးသပ်ရပါသည်။ စစ်ပွဲသည် ကြာမြင့်သွားဘွယ်ရာသာရှိသည်ဟု ယူဆပါသည်။

ထို့ပြင် လက်နက်ကြီးပစ်ကူနှင့် စစ်အင်အား တစုံတရာရှိကာ ပြောက်ကျားစစ်ပုံစံထက် ပုံမှန်စစ်ပုံစံဘက်သို့ အလေးသာနေ သော UWSA ကဲ့သို့ တပ်ဖွဲ့မျိုးနှင့် မလွှဲမရှောင်သာစစ်ပွဲဖြစ်ပွားပါက နှစ်ဖက် အသေ အပျောက်မြင့်တက်နိုင်ပါသည်။ ထို့ပြင် လက်ရှိ တိုင်းရင်းသားလက်နက်ကိုင်များနှင့် ဖြစ်ပွားနေသည့် စစ်ပွဲအား မြန်ဆန်စွာ ထိမ်းချုပ်နိုင်ခြင်းမရှိပါက ပြင်ပနိုင်ငံများ၏ ပါဝင်စွက်ဖက်မှုရှိလာပြီး စစ်ဖြစ်ပွားနေသောနှစ်ဖက်စလုံးအား အသီးသီးအသက စစ်လက်နက်ထောက်ပံ့မှုများ ပေါ်ပေါက် လာပါက စစ်ဒဏ်နှင့်စစ်ကြောင့် ပိုမိုထိခိုက်ပျက်စီးနိုင်သည်ကို ထည့်သွင်းတွက်ချက်ကြရန်လိုပါသည်။ စစ်ရှိန်မြင့်လာပါက မုန်းကိုးမြို့ ပျက်စီးသည်ကဲ့သို့ အခြားမြို့ ရွာများလည်း ပျက်စီးလာနိုင်ပါသည်။ ထို့ပြင် စစ်မီးအား ကန့်သတ်မထား နိုင် ခဲ့ပါကလည်း စစ်ဒဏ်သည် တိုင်းပြည်အား ပြင်းထန်စွာသင့်စေပြီး နလံမထူသည့်နိုင်ငံ (Failed State) အဖြစ်သို့ လျှော ကျနိုင်ပေသည်။

ပြီးပါပြီ။
မောင်မောင်စိုး (Mg Mg Soe)

၎၊ ၁၂၊ ၂၀၁၆ နေ့က ဧရာဝတီမြန်မာပိုင်းတွင်ဖေါ်ပြပြီး ဖြစ်သည်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts