ရသဆောင်းပါးစုံ

ခိုင်ကြည်သစ် – အသက်ရာကျော်ရှည်စေကြောင်းရယ်နဲ့


ခိုင်ကြည်သစ် – အသက်ရာကျော်ရှည်စေကြောင်းရယ်နဲ့
(မိုးမခ) ဇွန် ၂၁၊ ၂၀၁၆

(၁)

ကယ်လီဖိုးနီးယားတက္ကသိုလ်၊ ဦးနှောက်နဲ့အာရုံကြောဗေဒ၊ ခန္ဓာဗေဒနဲ့ ဦးနှောက်အာရုံကြော ဆိုင်ရာ ဇီဝဗေဒသုတေသနပညာရှင် Mark Fisher နဲ့ အပေါင်းအပါတွေက အသက်အရွယ် ကြီးရင့် လာတဲ့သူတွေမှာ နိုင်ငံရေးဦးဆောင်မှုအပေါ် ခန္ဓာဗေဒအပြောင်းအလဲက ဘယ်လိုလွှမ်းမိုးသလဲ ဆို တာကို သုတေသနပြု လေ့လာခဲ့ကြပါတယ်။

ဆုံးဖြတ်ချက်ချမှတ်ခြင်း (Decision Making)ဟာ နိုင်ငံရေးဦးဆောင်မှုမှာ အရေးအကြီးဆုံး ကိစ္စရပ်ဖြစ်သလို executive function လို့ခေါ်တဲ့ ထိုးထွင်းသိမြင်သုံးသပ်ဆုံးဖြတ်နိုင်မှုရဲ့အစိတ် အပိုင်းတရပ် ဖြစ်ပါတယ်။ ဦးနှောက်နဲ့အာရုံကြောဆိုင်ရာ ခန္ဓာဗေဒလေ့လာမှုတွေအရ အဲဒီ executive function ကို ဦးနှောက်ရဲ့အရှေ့ပိုင်းမှာရှိတဲ့ Prefrontal cortex က လုပ်ဆောင်တယ်လို့ ဆိုပါတယ်။ လေ့လာတွေ့ရှိချက်တွေအရ အသက် ၆၀ ကျော်လာတဲ့အခါ prefrontal cortex ဟာ တဖြည်းဖြည်း ကျုံ့လာပြီး executive function လျော့ကျလာတယ်လို့ဆိုပါတယ်။ ဒီလိုပြဿနာမျိုးကြုံတွေ့ရတဲ့ ထင်ရှားတဲ့ နိုင်ငံရေးခေါင်းဆောင်တဦးကတော့ အစ္စရေးလ်နိုင်ငံဝန်ကြီးချုပ်ဟောင်း အေရီရယ်ရှရွန် (Ariel Sharon) ဖြစ်တယ်လို့ ဆိုပါတယ်။ Mark Fisher တို့ သုတေသနအဖွဲ့ကတော့ အသက် ၆၅ နှစ် အထက်နိုင်ငံရေးခေါင်းဆောင်တွေထဲမှာ executive function လျော့ပါးပျက်စီးလာတဲ့သူတွေ အတိုင်း အတာတခုအထိ ရှိနိုင်တယ်လို့ ကောက်ချက်ဆွဲပါတယ်။

(၂)

တရုတ်ပြည်သူ့သမ္မတနိုင်ငံကိုတည်ထောင်ခဲ့တဲ့ ကွန်မြူနစ်ခေါင်းဆောင် မော်စီတုန်း (Mao Zedong) ဟာ ကူမင်တန်တွေ၊ ဂျပန်တွေကိုတိုက်ခိုက်ချေမှုန်းပြီး နိုင်ငံထူထောင်တဲ့ကာလမှာ ကိစ္စ ရပ်တွေကို ဆုံးဖြတ်ချက်မှန်မှန်ကန်ကန်နဲ့ဆောင်ရွက်နိုင်ခဲ့တာမို့ အောင်ပွဲတွေအလီလီရပြီး တရုတ် ပြည်သူ့သမ္မတနိုင်ငံကို တည်ထောင်နိုင်ခဲ့ပါတယ်။ ဒါပေမဲ့ သူအသက်ကြီးလာတဲ့အခါ ကွန်မြူနစ်ပါတီ ဥက္ကဋ္ဌကြီးအဖြစ် နိုင်ငံကိုဦးဆောင်ချိန်မှာ ခေါင်းဆောင်မှုမှားယွင်းတာ၊ ဆုံးဖြတ်ချက်မှားယွင်းတာတွေ ဖြစ်ပေါ်ခဲ့ပါတယ်။ ယဉ်ကျေးမှုတော်လှန်ရေးဟာ မော်စီတုန်းရဲ့မှားယွင်းမှုတွေထဲက ကြီးမားတဲ့ မှား ယွင်းမှုသက်သေတခုပါ။

ဒီလိုဘာကြောင့် အမှားတွေကျူးလွန်ခဲ့သလဲဆိုတာကို လေ့လာစမ်းစစ်မှုတွေ အများအပြားရှိခဲ့ ပါတယ်။ အဲဒီထဲ က စိတ်ဝင်စားဖို့ကောင်းတာက တရုတ်ပြည်ကွန်မြူနစ်ပါတီ ဗဟိုကော်မတီက သုံးသပ်တဲ့အခါ နိုင်ငံရေးအခြေအနေတွေ၊ ခံယူချက်၊ အယူအဆတွေ၊ သြဇာအာဏာတွေ စတဲ့ အမှား ကိုကျူးလွန်စေတဲ့ အချက်တွေအပြင် ခန္ဓာဗေဒပြောင်းလဲမှုကိုလည်း ထည့်သွင်းစဉ်းစားခဲ့တယ်လို့ ဆို ပါတယ်။ မော်စီတုန်းဟာ အသက်အရွယ်ကြီးရင့်လာချိန်မှာ လူကလည်း ဝ လာတဲ့ အနေအထား ဖြစ်ပါ တယ်။ ဝ တဲ့သူဟာ သွေးတိုးရောဂါတို့လိုမျိုး စိတ်ဆိုး၊ စိတ်တိုလွယ်တဲ့ ရောဂါမျိုးတွေ ကျရောက်စေ ပါတယ်။ တချိန်တည်းမှာ အသက်အရွယ်ကြီးရင့်လာတာနဲ့အမျှ သွေးကြောနံရံတွေဟာ မာကြော လာ ပြီး သွေးပေါင်ချိန်ကို မြင့်တက်စေပါတယ်။ ဒီလိုမျိုး ခန္ဓာဗေဒပြောင်းလဲလာမှုကလည်း မော်စီတုန်းရဲ့ နိုင်ငံရေးဆုံးဖြတ်ချက်တွေ၊ နိုင်ငံရေးဦးဆောင်မှုတွေအပေါ် လွှမ်းမိုးမှုရှိနိုင်တယ်လို့သုံးသပ်ခဲ့ကြောင်း မှတ်သားခဲ့ဖူးပါတယ်။ ရုပ်တရားရဲ့ပြောင်းလဲခြင်းကို မေ့လျော့ခဲ့တဲ့ ရုပ်ဝါဒီတွေအတွက် ကြီးမားတဲ့ သင်ခန်းစာတခုလည်း ဖြစ်ခဲ့ပါတယ်။

(၃)

ကမ္ဘာ့နိုင်ငံအသီးသီးက ခေါင်းဆောင်တွေကို ပြန်လည်လေ့လာကြည့်တဲ့အခါ မော်စီတုန်းလိုမျိုး အသက်ကြီးမှ နိုင်ငံရေးဦးဆောင်မှု၊ နိုင်ငံရေးဆုံးဖြတ်ချက်တွေ မှားယွင်းခဲ့တဲ့သူတွေရှိသလို အသက် အရွယ်ကြီးရင့်ချိန်အထိ မှန်မှန်ကန်ကန်ဆုံးဖြတ်ပြီး တိုင်းပြည်ကောင်းကျိုးအတွက် ဆောင်ရွက်သွားတဲ့ ဗီယက်နမ်ခေါင်းဆောင် ဟိုချီမင်းတို့လို၊ စင်ကာပူခေါင်းဆောင် လီကွမ်ယူတို့လို၊ တရုတ်ခေါင်းဆောင် တိန်ရှောင့်ဖိန်တို့လို ပုဂ္ဂိုလ်တွေလည်း ဒုနဲ့ဒေးပါ။

ဒါပေမဲ့ လူရယ်လို့ဖြစ်လာရင် ဇရာ၊ မရဏ ဆိုတဲ့ တရားတွေနဲ့ကတော့ မဖြစ်မနေတွေ့ကြုံကြ ရမှာ ဓမ္မတာပါပဲ။ အသက်ကြီးချိန်အထိ အလုပ်တွေအများကြီးလုပ်နိုင်တယ်။ ဆုံးဖြတ်ချက်တွေ မှန်မှန် ကန်ကန်ချမှတ်နိုင်တယ်ဆိုစေဦးတော့ ဇရာဆိုတဲ့ တရားသဘောကို ရှောင်လွှဲလို့မရတာကြောင့် ဇရာနဲ့ အတူကပ်ပြီးပါလာတဲ့ ခန္ဓာဗေဒ၊ ဇီဝကမ္မဗေဒပြောင်းလဲခြင်းတွေကိုလည်း ရှောင်လွှဲလို့မရနိုင်ပါဘူး။ ထိုနည်းတူစွာပဲ အဲဒီပြောင်းလဲခြင်းတွေရဲ့အကျိုးဆက်ဖြစ်တဲ့ နိုင်ငံရေးဆုံးဖြတ်ချက်တွေ၊ ဦးဆောင်မှု တွေကလည်း လိုက်ပါပြောင်းလဲလာနိုင်တယ်ဆိုတာကိုတော့ သတိချပ်သင့်လှပါတယ်။

(၄)

ဇွန်လ ၁၉ ရက်မှာကျရောက်မယ့် နိုင်ငံတော်အတိုင်ပင်ခံပုဂ္ဂိုလ် လူထုခေါင်းဆောင် ဒေါ် အောင်ဆန်းစုကြည်ရဲ့ ၇၁ နှစ်မြောက်မွေးနေ့ကို နိုင်ငံတဝှမ်းလို့က ပြည်သူတွေက ဆုတောင်းစကားတွေ ဆိုခဲ့ကြပါတယ်။ ဒေါ်အောင်ဆန်းစုကြည် သက်တော်ရာကျော်ရှည်စေကြောင်း ဆုတောင်းမေတ္တာပို့သတာတွေကိုလည်း လူမှုကွန်ယက်စာမျက်နှာပေါ်မှာ တွေ့နေရပါတယ်။

မြန်မာနိုင်ငံအတွက် ဒေါ်အောင်ဆန်းစုကြည်ဟာ အဖိုးမဖြတ်နိုင်တဲ့ ရတနာတပါးလို့ ဆိုလို့ရ ပါတယ်။ စစ်အာဏာရှင်ရဲ့ဖိနှိပ်ချုပ်ချယ်မှုအောက်မှာ နှစ်ပေါင်းများစွာ သေဝပ်ခဲ့ကြရတဲ့ ပြည်သူ လူထု အတွက် ကြောက်ရွံ့မှုကကင်းဝေးအောင် စွမ်းစွမ်းတမံ ဆောင်ရွက်ခဲ့သူဖြစ်ပါတယ်။ နှစ်ပေါင်းများစွာ အကျဉ်းကျခံ၊ အတိုက်ခိုက်ခံပြီး တိုက်ပွဲဝင်ခဲ့တဲ့အပြင် အသက်အရွယ်ကြီးရင့်လာတဲ့အချိန်အထိ နိုင်ငံ တော်သစ်တည်ဆောက်ရေးအတွက် ဆုံးဖြတ်ချက်မှန်မှန်နဲ့ ခြေလှမ်းသွက်သွက်နဲ့ ဦးစီးဆောင်ရွက်ပေး နေတဲ့ ဒေါ်အောင်ဆန်းစုကြည်ဟာ ပြည်သူတွေအတွက် ဆုလာဘ်တပါးပဲ ဖြစ်ပါတယ်။

ပြည်သူလူထုအနေနဲ့ ဒီလိုခေါင်းဆောင်မျိုးကို ယုံကြည်အားကိုးတာဟာ ဖြစ်သင့်ဖြစ်ထိုက်တဲ့ကိစ္စ ဖြစ် ပါတယ်။ ဒီလိုခေါင်းဆောင်မျိုးကို သက်တော်ရာကျော်ရှည်စေလိုတာဟာ သိပ်ကိုသဘာဝကျပါတယ်။ သိပ်ကို လှပပါတယ်။

(၅)

ဒါပေမဲ့ မိမိတို့ခေါင်းဆောင်ကို ဘယ်လောက်ချစ်ခင်မြတ်နိုးတန်ဖိုးထားသလဲ ဆိုတာကို သက် သေပြဖို့လိုပါတယ်။ အဲဒီလို သက်သေပြရာမှာ သက်တော်ရာကျော်ရှည်ပါစေဆိုတဲ့ ဆုတောင်းမျိုးနဲ့ တင် မပြည့်စုံနိုင်ပါဘူး။ မိမိတို့ခေါင်းဆောင်အပေါ် အမှန်တကယ် လေးစားမြတ်နိုးတယ်ဆိုရင် သူမ ချမှတ်ပေးထားတဲ့ နိုင်ငံသစ်တည်ဆောက်ရေးလမ်းကြောင်းပေါ် ကိုယ်တိုင်ကိုယ်ကျ ပါဝင်ချီတက်ကြဖို့ လိုပါတယ်။ သူမရဲ့လမ်းညွှန်မှုတွေ၊ သင်ကြားမှုတွေကို လေးစားလိုက်နာသင့်ပါတယ်။

တချိန်တည်းမှာ ခေါင်းဆောင်ကောင်းကို မှီခိုချင်စိတ်တွေကိုလျှော့ချပြီး မိမိတို့ကိုယ်တိုင် နိုင်ငံ သစ်ကို ဦးဆောင်မောင်းနှင်သူတွေဖြစ်လာဖို့ ကြိုးစားသင့်ပါတယ်။ ၇၁ နှစ်ဆိုတဲ့ အသက်အရွယ်မှာ တိုင်းပြည်ရဲ့ကြီးလေးတဲ့ တာဝန်တွေကို ထမ်းဆောင်နေရတဲ့ သူမအတွက် နောက်လိုက်ကောင်းဖြစ် နေရုံနဲ့ မလုံလောက်ပဲ သူမရဲ့တာဝန်တွေကို ပခုံးပြောင်း ထမ်းဆောင်နိုင်မယ့်သူတွေ ဖြစ်လာအောင် မိမိတို့ကိုယ်ကို မိမိတို့တည်ဆောက်ကြဖို့ လိုပါတယ်။ ဇရာဆိုတဲ့ တရားသဘောကိုလည်း နှလုံးသွင်း ကြဖို့ လိုအပ်လှပါတယ်။

ဒီဆောင်းပါးကိုရေးသားရာမှာ စာရေးသူဟာ လူထုခေါင်းဆောင်ရဲ့ဦးဆောင်မှုကို သံသယ မြူ တမှုန်မျှမရှိသလို စာဖတ်သူတွေအနေနဲ့ သံသယဝင်ပါစေဆိုတဲ့စေတနာလည်း လုံးဝ (လုံးဝ) မပါဝင် ပါဘူး။ မိမိတို့အနေနဲ့ ဒေါ်အောင်ဆန်းစုကြည်လိုမျိုး ခေါင်းဆောင်တဦးရဲ့ နောက်မှာရပ်တည်ခွင့် ရရှိခြင်းဆိုတာ ကံကော င်းထောက်မခြင်းဖြစ်သလို ရခဲတဲ့အခြေအနေတရပ်ဖြစ်တယ်ဆိုတာကို သိမြင် နိုင်ဖို့၊ ဇရာဆိုတဲ့ တရားသဘောကို သတိချပ်မိပြီး မိမိတို့ကိုယ်ကို တည်ဆောက်ပြင်ဆင်ထားစေလို တဲ့ စေတနာအရင်းခံနဲ့ တင်ပြခြင်းသာ ဖြစ်ပါတယ်။

လူထုခေါင်းဆောင် ဒေါ်အောင်ဆန်းစုကြည်ရဲ့ ၇၁ နှစ်မြောက် မွေးနေ့မှသည် သက်တော်ရာ ကျော်ရှည်ပြီး တိုင်းပြည်ကိုဆက်လက်ဦးဆောင်သွားနိုင်ပါစေကြောင်း ဆုတောင်းမေတ္တာပို့သအပ်ပါ တယ်။ လူထုခေါင်းဆောင်ချမှတ်တဲ့ ဒီမိုကရေစီနိုင်ငံတော်သစ်ဆီချီတက်မယ့် လမ်းကြောင်းမှာ ပခုံး ပြောင်း တာဝန်ယူမယ့်ခေါင်းဆောင်များလည်း အမြောက်အမြား ပေါ်ထွက်လာပါစေ၊ ခေါင်းဆောင်ကို ပဲ အားကိုးမနေပဲ မိမိကိုယ်ကိုတာဝန်ယူနိုင်တဲ့ နိုင်ငံသားကောင်းများလည်း ပိုမိုများပြားလာနိုင်ပါစေလို့ ဆုတောင်းလိုက်ရပါတယ်။


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts