တူမောင်ညို – “ကာချုပ်” ကို ဘယ်သူခန့်သလဲ

Cartoon Saw Ngo (2010)

တူမောင်ညို – “ကာချုပ်” ကို ဘယ်သူခန့်သလဲ

မိုးမခ၊ (၂၀၁၆ ဖေဖေါ်ဝါရီ ၁၆ )

“ကာချုပ်” ကို ကာချုပ်ကပဲ ခန့်တယ်။ ဘယ်သူမှခန့်လို့ မရဘူး။ လက်ရှိ ကာချုပ် ဗိုလ်မင်းအောင်လှိုင်ကို ကာချုပ်ဗိုလ်သန်းရွှေ က ခန့်ခဲ့တာပဲ။ ၁၉၈၈ စက်တင်ဘာ ၁၈ အာဏာသိမ်း (နဝတ) ဥက္ကဋ္ဌ ကာချုပ်ဗိုလ်စောမောင်ကို ကာချုပ်ဗိုလ်နေဝင်းကခန့်တာပဲ။ ဗိုလ်စောမောင်ကို ကာချုပ်အရာကထုတ်ပယ်ပြီး ဗိုလ်သန်းရွှေကို ကာချုပ်တင်တော့လည်း ဗိုလ်နေဝင်းကပဲ ခန့်ခဲ့တာပါ။ ဒီအကြောင်း (ဗိုလ်စောမောင်ကို ဖယ်ရှားပြီး ဗိုလ်သန်းရွှေ ကာချုပ်ဖြစ်လာပုံ) ကို ဗိုလ်ခင်ညွန့် ရဲ့ “မှော်ဝန်းသား” စာအုပ်မှာဖတ်ကြည့်နိုင်ပါတယ်။

၂၀၀၈ အခြေခံဥပဒေအရလည်း “ကာချုပ်”ကို သမ္မတက ခန့်လို့မရဘူး။ ကာချုပ် ကသာ “ဒုတိယသမ္မတ” တစ်ယောက် စိတ် ကြိုက်တင်နိုင်ခွင့်ရှိတယ် မဟုတ်လား။ [၂၀၀၈ အခြေခံဥပဒေ၊ ပုဒ်မ ၆၀၊ ပုဒ်မခွဲ (ခ) ပုဒ်မခွဲငယ် (၃) ကိုကြည့်ပါ] ဒီပုဒ်မက “ကာချုပ်” ကို ဒုသမ္မတလောင်းစိတ်ကြိုက်ခန့်နိုင်တဲ့ အခွင့်အာဏာ ပေးထားခြင်းဖြစ်တယ်။

၂၀၀၈ အခြေခံဥပဒေ၊ ပုဒ်မ ၃၄၂ အရ ကာချုပ်ကို(ကာလုံ)ရဲ့အဆိုပြုထောက်ခံချက်နဲ့ခန့်အပ်နိုင်တယ်လို့ ဘယ်လိုပဲ ရေးထား ပါစေ၊ ကာချုပ်သစ်ကိုလက်ရှိကာချုပ်ကသာခန့်အပ်မှာဖြစ်ပါတယ်။ တကယ်တော့(ကာလုံ)ဟာ ကာချုပ်ရဲ့အဆိုပြုချက်ကို ထောက်ခံတဲ့ တံဆိပ်တုံးထုပေးဖို့သာဖြစ်တယ်။ ဘာလို့လဲဆိုတော့ (ကာလုံ) ထဲမှာ ကာချုပ်အပါအဝင်နဲ့ ကာချုပ်က ခန့်ထားသူချည်း ၆ ယောက်ပါနေ တယ်မဟုတ်လား။ ၂၀၀၈အခြေခံဥပဒေ ပုဒ်မ ၂၀ (ခ) နဲ့ (ဂ) ဖတ်ကြည့်ရင် စစ်တပ်နဲ့ပတ်သက်သမျှ သွန်လိုသွန်မှောက်လို လုပ်နိုင်တဲ့ အာဏာကုန် “ကာချုပ်” လက်ထဲအပ်ထားတယ်ဆိုတာ သိပ်ကိုထင်ရှားပါတယ်။

(၁၀ ဖေဖေါ်ဝါရီ) ဘီဘီစီသတင်းမှာ “ကာချုပ်နဲ့ ဒုကာချုပ် ပင်စင်သက်တမ်း ၆၅ နှစ်အထိတိုးမြှင့်” ဖို့ ၄ လပတ် အစည်း အဝေးမှာ ဆုံးဖြတ်တဲ့အကြောင်းသိရတယ်။ ဒါ့အပြင် ၂၀၁၅ ခုနှစ်က မီဒီယာကောင်စီနဲ့ ကာချုပ်တွေ့ဆုံတော့ မီဒီယာကောင်စီဝင် တစ်ဦး က ၂၀၁၆ မှာ ကာချုပ်အငြိမ်းစားယူမှာလား မေးတာကို ဘေးမှာရှိတဲ့ စစ်ဥပဒေချုပ်က ဝင်ဖြေတာက “ ကာချုပ်အနေနဲ့ စစ်ဥပဒေ အရ ဆက်ပြီး တာဝန်ဆက်ယူလို့ရတယ်” လို့ဖြေကြောင်းသိရတယ်။ ဒီတော့ ဒီလို တိုးတာ ဘာမှမဆန်းဘူး။ စစ်ဥပဒေရဲ့အထက်မှာ ကာချုပ် ထာဝစဉ်ရှိနေပြီး၊ ၂၀၀၈ အခြေခံဥပဒေရဲ့အထက်မှာလည်း “ကာချုပ်” ရှိနေပါတယ်။

သမိုင်းကိုပြန်ကြည့်ပါ။

၁၉၆၂ အာဏာသိမ်းပြီးနောက် (၁၉၇၂ ကနေ ၂၀၁၁အထိ) ကာချုပ် ၅ ယောက်ရှိပါတယ်။ အဲဒီ ကာချုပ် ၅ ယောက် စလုံးကို ဗိုလ်နေဝင်း စိတ်ကြိုက်ခန့်ခဲ့တာပါ။ ဒီအထဲမှာ ကာချုပ်ရာထူးက ဖယ်ရှားခံရတဲ့ ကာချုပ် ၂ ယောက်ရှိပါတယ်။ ကာချုပ် ဗိုလ်တင်ဦး ( ဒီချုပ် နာယကကြီး ဦးတင်ဦး ) နဲ့ ကာချုပ် ဗိုလ်စောမောင်တို့ပဲဖြစ်တယ်။

နေပြည်တော်က “စစ်သမိုင်းပြတိုက်သစ်ဖွင့်ပြီ”ဆိုတဲ့ ကြော်ငြာတွေ့ရတယ်။ အဲဒီမှာသွားကြည့်တဲ့အခါ အစဉ်အဆက် ကာချုပ် ဓါတ်ပုံတွေထဲမှာ ဗိုလ်တင်ဦးနဲ့ ဗိုလ်စောမောင်ပုံ ချိတ်ထားသလား ကြည့်ခဲ့ကြစမ်းပါ။ ဗိုလ်နေဝင်းပုံတော့ ချိတ်ဆွဲထားမှာ သေချာပါတယ်။

လက်ရှိကာချုပ် ဗိုလ်မင်းအောင်လှိုင်ကို သမ္မတရဲ့ “ဘောလုံးပုံစွမ်းဆောင်ရည်ဆု” နှစ်ထပ်ကွမ်းရစေချင်လို့ထင်ပါရဲ့ (VOA) သတင်းဌာနက သုံးသပ်သူ စည်သူအောင်မြင့်က “ တပ်မတော်ကို Standard Army ပီသစွာ တပ်ချုပ်တစ်ယောက်ကနေ နောက်တစ် ယောက်ကို စနစ်တကျ တာဝန်လွှဲပေးသွားခဲ့” ဖို့ ရွှေနားတော်သွင်းနေပါတယ်။ ဒီလိုလုပ်နိုင်ခဲ့ရင် သမ္မတနေရာတောင်မျှော်မှန်းနိုင်မယ်လို့ အတိတ်ကောင်း၊ နိမိတ်ကောင်းတွေတောင်စေတနာဗလပွနဲ့ ကြိုတင်ဆက်သွင်းဖတ်ကြားပေးနေပါတယ်။

“အမေရိကံအသံ” (VOA) ဆိုတော့ ဒီလိုအသံမြည်ပေးတာ အကြောင်းမဲ့တော့ဟုတ်ဟန်မတူပါဘူး။ အရင်စစ်အစိုးရ အာဘော် ဖြစ်တဲ့ “(VOA) လိမ်နေသည်/ညာနေသည်”လို့ ပြောရမှာမဟုတ်တော့ဘဲ၊ ပြောင်းလဲလာတဲ့ခေတ်စနစ်နဲ့အညီ “(VOA) လှော်နေသည်/ ဖားနေသည်/ နှပ်ကြောင်းပေးနေသည်/ အလံရှူးလုပ်နေသည်” လို့ ပြောမှ ဖြစ်ရပ်နဲ့ကိုက်ညီလိမ့်မယ်ထင်ပါတယ်။

“အာဏာရှင်စနစ် ပြန်လည် ထွန်းကားမလာရေးအတွက် အရေးကြီးတဲ့ တပ်မတော်ကာကွယ်ရေး ဦးစီးချုပ်တွေဟာ အချိန် တန်ရင် အနားယူရမယ်” တဲ့ ( အနားမယူချင်လို့ ပင်စင်သက်ကို ၆၀ ကနေ ၆၅ ပြောင်းပါတယ်ဆိုမှ) စည်သူအောင်မြင့် မြှောက်ပင့် ပေးတဲ့အတိုင်းသာဆိုရင်တော့ သွားလေသူ စစ်အာဏာရှင်ဗိုလ်နေဝင်းကို အမှတ်ပေးရတော့မှာပါပဲ၊ ဗိုလ်နေဝင်းဟာ (၁၉၄၉ ဖေဖေါ်ဝါရီ လ ၁ ရက်မှ ၁၉၇၂ ဧပြီလ ၂၀ ရက်ထိ)ကာချုပ်လုပ်ခဲ့ပြီး ၁၉၇၂ ခု၊ ဧပြီလ ၂၀ အသက် ၆၁ နှစ် မှာ ကာချုပ်ကနေအနားယူပါတယ်။ ဗိုလ်စန်း ယု ကနေ ဗိုလ်သန်းရွှေအထိ သူ့စိတ်ကြိုက် “ကာချုပ်” တွေ တစ်ယောက်ပြီးတစ်ယောက်တင်ခဲ့ပါတယ်။ ဗိုလ်နေဝင်းကိုယ်တိုင် ၁၉၇၄ အခြေခံဥပဒေအရ သမ္မတကြီးလည်း ဖြစ်ခဲ့တာပဲလေ။ ကာချုပ် ဗိုလ်စန်းယုလည်း နိုင်ငံတော်သမ္မတကြီးဖြစ်ခဲ့တာပဲလေ။

၂၀၀၈ အခြေခံဥပဒေအရ

“ကာချုပ်သစ်”ကို လက်ရှိကာချုပ်က စိတ်ကြိုက်ခန့်နိုင်ပါတယ်။

---

သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ