သတင်းဆောင်းပါး ဇော်အောင် (မုံရွာ)

ဇော်အောင် (မုံရွာ) – မြန်မာ့ပညာရေးစနစ်ကို ကယ်တင်နေသူများ

ဇော်အောင် (မုံရွာ) – မြန်မာ့ပညာရေးစနစ်ကို ကယ်တင်နေသူများ
(မိုးမခ) နိုဝင်ဘာ ၂၉၊ ၂၀၁၅

ပုဂ္ဂလိကကျောင်းစနစ်ကို ၂၀၁၁ အစိုးရသစ်လက်ထက်မှာ စတင်ခဲ့ပါတယ်။ အကြောင်းရင်းကတော့ ခြစားယိုယွင်းနေတဲ့ မြန်မာ့ပညာရေးစနစ်ကို အပြိုင်ဆိုင်လုပ်ကိုင်စေဖို့ ..ပညာရေးဈေးကွက်သစ်တစ်ခု စတင်ပေးလိုက်ခြင်းဖြစ်ပါတယ်။ အခြေ ခံပညာရေးနဲ့ အထက်တန်းပညာရေး (၂) မျိုး ခွဲခြားလေ့လာလိုပါတယ်။

● အခြေခံပညာရေး
၂၀၁၅ ခုနှစ် ကျောင်းသားသပိတ်က အလွန်အရေးပါတဲ့ အပြောင်းလဲတစ်ခုကို စတင်စေခဲ့တာ ငြင်းလို့မရပါ။ အဲဒီ ကျောင်း သားသပိတ် မတိုင်မီက ကျောင်းဆရာ၊ ဆရာမများအတွက် ဝင်ငွေဆိုတာ .. ကျောင်းသားများထံမှာ ကျူရှင်ကြေးတောင်းခံခြင်း၊ မိဘများထံမှာ ဟိုကြေးသည်ကြေးများ တောင်းခံခြင်းနဲ့ပဲ ..အစိုးရကျောင်းများ ရပ်တည်ရပါတယ်။ ပိုပြီး ဆိုးဝါးစွာ ရေးရမယ် ဆိုရင် ..အတန်းပိုင်ဆရာမနဲ့ ကျောင်းအုပ်တွေကို လက်ဆောင်ပေးနိုင်မှာ ကိုယ့်ရဲ့ကလေး ကျောင်းမှာ အဆင်ပြေနိုင်မယ် လို့တောင် ပြောလို့ရတဲ့ အစိုးရပညာရေးစနစ်ဖြစ်ပါတယ်။

စာမေးပွဲစနစ်ကိုတော့ မေးခွန်းပေါက်ကြားမှုနဲ့ စာခိုးချမှုများကို သမ္မတဦးသိန်းစိန် စတင်ခဲ့တဲ့နောက်ပိုင်း အဂတိတော်တော် ကင်းရှင်းသွားခြင်းက ဝမ်းမြောက်ဖွယ် ဖြစ်ပါတယ်။

သို့သော်လည်း ကျောင်းသားများ စာတကယ်တတ်ဖို့ဆိုတာ အစိုးရကျောင်းများမှာ အင်မတန်အားနည်းလာတဲ့အတွက် သမ္မတဦးသိန်းစိန်လက်ထက်မှာ အမေရိကန်ပညာရေးစနစ်လို ပုဂ္ဂလိကကျောင်းများ ပေါ်ပေါက်လာစေပါတယ်။ ဝမ်းနည်း စရာကောင်းခြင်းကတော့ အမေရိကန်နိုင်ငံ၊ စင်ကာပူ၊ ဂျပန် .. စတဲ့ ကမ္ဘာ့ထိပ်တန်း ပညာရေးစနစ်များမှာ အခြေခံပညာရေးကို ပုဂ္ဂလိကကျောင်းများ အရေးမပါလှပါဘူး။ မြန်မာနိုင်ငံမှာတော့ စာမေးပွဲအောင်ရေး၊ ဂုဏ်ထူးများစွာရရှိရေးတို့မှာ ပုဂ္ဂလိက ကျောင်းများ အရေးပါလာတာကို တွေ့ရပါတယ်။ ၂၀၁၅ အခြေခံပညာရေးအထက်တန်း မြန်မာတနိုင်ငံလုံး အမှတ်အများဆုံး ထိပ်တန်းကျောင်းသားများစာရင်းမှာ  ပုဂ္ဂလိကကျောင်းသားများပါဝင်လာခြင်းကို တွေ့ရတဲ့အတွက်  ကောက်နုတ်ခက်ချရ ရင်.. မဖြစ်သင့်ပါဘူး။ အစိုးရကျောင်းများကသာ အတော်ဆုံး ကျောင်းသားများ မွေးထုတ်သင့်ပါတယ်။

ပိုက်ဆံတတ်နိုင်တဲ့မိဘများက သူတို့ကလေးများကို ပုဂ္ဂလိကကျောင်းများမှာ တစ်လကို ဒေါ်လာ ၃၀၀ နဲ့အထက် အကုန် ကျခံပြီး ထားပါတယ်။ အင်္ဂလိပ်စာကို ကောင်းမွန်စွာသင်ကြားပေးတဲ့အတွက် ကျောင်းသားများရဲ့ အင်္ဂလိပ်စာ အရည်အချင်း က မြင့်မားလာပါတယ်။ ၁၀တန်းအဆင့်မှာ မြန်မာအစိုးရစာမေးပွဲ (သို့မဟုတ်) GCE ‘O’ LEVEL စာမေးပွဲကို ဝင်ရောက်ဖြေ ဆိုအောင်မြင်တာနဲ့ အထက်တန်းပညာရေး နိုင်ငံခြားတက္ကသိုလ်များကို ပို့လွှတ်ပညာသင်နိုင်မှာဖြစ်ပါတယ်။

ကျောင်းဖွင့်စားတဲ့ စီးပွားရေးလုပ်ငန်း.. ရန်ကုန်မြို့ထဲမှာပဲ ပုဂ္ဂလိကကျောင်းများစွာ ပေါ်ပေါက်လာပါတယ်။ ထူးချွန်တဲ့ ဆရာ များကလည်း လစာငွေ ၅ သိန်း၊ ၁၀ သိန်းပေးတဲ့ ပုဂ္ဂလိကကျောင်းများမှာ အလုပ်ပြောင်းသွားကြပါတယ်။ တကယ်တမ်း ပြောရရင် ကျောင်းဖွင့်စားခြင်း ဖြစ်ပါတယ်။ ကျောင်းဖွင့်စားခြင်းအားဖြင့် ယာယီကျောင်းသားများအတွက် သာမန်ခြစားနေတဲ့ အစိုးရကျောင်းများက လွတ်ငြိမ်းသွားစေပါတယ်။

အခု မြန်မာအစိုးရကျောင်းများမှာလည်း နာမည်ကြီးကျောင်းများက ကျောင်းလခလိုပဲ လစဉ် သိန်းနဲ့ချီပြီး ပေးနေရပါတယ်။ အစိုးရက ကျူရှင်ခွင့်ဖွင့် ဆရာများကို မပေးသော်လည်း ဒီတနည်းလမ်းပဲ ဆရာများအတွက် ဝင်ငွေဖြစ်နေဆဲပါ။

၂၀၁၅ ကျောင်းပညာသင်နှစ်မှာ ပညာရေးဘတ်ဂျတ်ကို အထူးမြှင့်တင်ပေးလိုက်တော့ ..
၁။ ကျောင်းဆရာမ အသစ် ခန့်အပ်ခြင်း အနည်းဆုံ လစာ ကျပ်တစ်သိန်း ၂ သောင်းခန့်ပေးလိုက်ပြီး၊ ကျောင်းဝတ်စုံများပါ ပံ့ပိုးပါတယ်။ ကျောင်းသားကလေးများကို ကျောင်းဝတ်စုံ၊ စာအုပ်၊ ခဲတန်များ ပံ့ပိုးပေးခြင်း စတင်ပါတယ်။ လက်ရှိကျောင်း ဆရာမများ လစာငွေ မြင့်မားလာသော်လည်း … ကျောင်းအုပ်ဆရာမကြီး ခေါင်းဆောင်ပြီး ကျူရှင်ပေးတဲ့အတွင်း ကျူရှင် များက မတက်မနေရ ပေးနေရတဲ့ ဝန်ထုတ်ကြီး မိဘများအပေါ် သက်ရောက်နေဆဲ ဖြစ်ပါတယ်။ အစိုးရကျောင်းတော်တော်များများမှာတော့ ..အဂတိလိုက်စားမှု (မိဘများထံမှ လက်ဆောင်ရယူခြင်း) နည်းပါးလာတာလည်း ဝမ်းမြောက်စရာပါ။

● အထက်တန်းပညာရေး (တက္ကသိုလ်ပညာရေး)

ပုဂ္ဂလိကကျောင်း ၁၀တန်းအောင်ပြီး နိုင်ငံခြားတက္ကသိုလ်များကို ငွေကြေးတတ်နိုင်တဲ့ မိဘများက စေလွှတ်ကြပါတယ်။ မြန်မာနိုင်ငံမှာ ဘွဲ့ရရင် လစာငွေ ကျပ်တစ်သိန်း (ကန်ဒေါ်လာ ၁၀၀) လောက်ပဲ ရပြီး၊ စင်ကာပူ၊ ထိုင်း၊ မလေးရှားက ဘွဲ့ ဆိုရင် ကန်ဒေါ်လာ ၅၀၀ အထိ ဈေးရလာတဲ့ မြန်မာ့ကုမ္ပဏီများ ဈေးကွက်စီးပွားရေးကြောင့် … မိဘများ နိုင်ငံခြားတက္က သိုလ်များကို ကျောင်းတက်ဖို့ အရမ်းစိတ်ဝင်တစား ကြိုးစားလာကြပါတယ်။

မြန်မာပြည်တွင်း ဘွဲ့ရသူများ၊ အဝေးသင်ဘွဲ့ရသူများလည်း နိုင်ငံခြားဘွဲ့၊ ဒီပလိုမာ အမြှီးတပ်နိုင်ဖို့ စင်ကာပူက ဘာမဟုတ် တဲ့ ပုဂ္ဂလိကကျောင်း BCA PSB စတဲ့ ကျောင်းများမှာ တစ်နှစ် ဒီပလိုမာအတွက် ကန်ဒေါ်လာ ၂သောင်းနီးပါးအထိ အကုန် ကျခံ ကျောင်းတက်ကြတယ်။ တက်ပြီးမှ မြန်မာနိုင်ငံပြန် ဟန်ပန်တကျ လစာကောင်းကောင်း ရရှိနေတဲ့ ခေတ်ကာလ ဖြစ် ပါတယ်။

နိုင်ငံခြားတက္ကသိုလ်များရဲ့ ပညာသင်ဆု Grant များရရှိဖို့ IELTS TOFEL စတဲ့ အင်္ဂလိပ်ကျောင်းများ စာမေးပွဲဖြေကြပါတယ်။ တချို့ တော်တဲ့ ကျောင်းသားများလည်း စကောလားရှစ် ပညာချွန်ဆုများ ရရှိကြပါတယ်။

အများစု မြန်မာကျောင်းသားများကတော့ မိဘ ပိုက်ဆံအကုန်ခံပြီး စင်ကာပူ၊ မလေးရှား၊ ထိုင်း ပဂ္ဂလိကကျောင်းများကို သွားတက်ကြပါတယ်။ ပိုပြီး ပေါက်ရောက်တဲ့ကျောင်းသားများကတော့ သြစတြေးလျား၊ အင်္ဂလန်၊ အမေရိကန်၊ ဂျပန် တက္က သိုလ်များကို တက်နိုင်ခွင့် ရရှိကြပါတယ်။

ပြည်တွင်းတက္ကသိုလ်များကတော့ ပုဂ္ဂလိကအဆင့် အလွန်နည်းပါးပါသေးတယ်။ ILBC တက္ကသိုလ်ကတော့ အမေရိကန် တက္ကသိုလ်နဲ့ပေါင်းပြီး အမေရိကန်အဆင့် သင်ကြားပေး၊ ဘွဲ့သင်တန်း ၂၀၁၄ ကတည်းက စတင်နေတယ်လို့ ဆိုပါတယ်။ နည်းပညာတက္ကသိုလ်ပေါင်း ၃၀ ကျော်ရှိတဲ့အထဲမှာ ရန်ကုန် ကြို့ကုန်းနည်းပညာတက္ကသိုလ်ကတော့ .. တစ်နှစ်ကို ကျောင်း သား ၂၅၀ လက်ခံပြီး အထူးရွေးကောက်သင်ကြားပေးနေတာ တတိယနှစ်ရှိသွားပါပြီ။ ပုဂ္ဂလိကတက္ကသိုလ်အဖြစ် ပြောင်းလဲ ပစ်ဖို့လည်း စီမံအုပ်ချုပ်သူများက လေ့လာလျက်ရှိပါတယ်။ အစိုးရတက္ကသိုလ်ကို ပုဂ္ဂလိကတက္ကသိုလ်အဖြစ် ပြောင်းလဲ ခြင်းမှာ အဂတိလိုက်စားမှုတွေ ဖြစ်လာနိုင်တဲ့အတွက်၊ အစိုးရ ပညာရေးဝန်ကြီးဌာနအနေနဲ့ အထူးဂရုစိုက် လုပ်ကိုင်နေ ရပါတယ်။

လက်ရှိ မြန်မာပြည် ၁၀ တန်းအောင်အမှတ် အများဆုံးသူများအတွက် ရန်ကုန်နည်းပညာတက္ကသိုလ်၊ ဆေးတက္ကသိုလ်၊ ကွန်ပြူတာတက္ကသိုလ်များက ထိပ်တန်းဝင်ခွင့်ပေးနေကြပါတယ်။ သာမန်နည်းပညာတက္ကသိုလ်များနဲ့ စီးပွားရေးတက္ကသိုလ် များ၊ သက်မွေးတက္ကသိုလ်များကလည်း လူကြိုက်များပေမဲ့ .. အများစုကတော့ …မြန်မာတက္ကသိုလ်ပညာရေးကို စိတ်ပျက် ပြီး အဝေးသင်တက္ကသိုလ်တက်ရင်း လုပ်ငန်းခွင်ဝင်နေတဲ့ ခေတ်ကာလ ဖြစ်ပါတယ်။

● နိဂုံး
အကြမ်းဖျင်း တင်ပြချက်ဖြစ်ပါတယ်။ စင်ကာပူ အထက်တန်းပညာရေးမှာ ကျောင်းဆရာအဖြစ် တာဝန်ထမ်းနေတဲ့ ရန်ကုန် နည်းပညာတက္ကသိုလ် ဆရာဟောင်းတစ်ဦးရဲ့ပြောဆိုချက်ကတော့ .. အင်း ..မြန်မာပြည်အထက်တန်းပညာရေး မပြောနဲ့ နည်းပညာတက္ကသိုလ်တွေ အခု ၃၀ လောက်မှာ ကျောင်းဆရာ၊ ဆရာမများစွာ၊ ဝန်ထမ်းများစွာ၊ ကျောင်းသားများစွာနဲ့ ဒီအုပ်စုကြီးကို ဘယ်လိုကိုင်တွယ်မလဲဆိုတာ စိတ်တောင် မကူးဝံ့ဘူး…လို့ ပြောရှာပါတယ်။
.
ခက်ခဲတာတော့ အမှန်ဖြစ်ပါတယ်။ သို့သော်လည်း ဒီ (၅) နှစ်ကာလ သမ္မတဦးသိန်းစိန် အစိုးရလက်ထက်မှာ လမ်းတံတားများ ကောင်းမွန်လာခြင်း၊ ရန်ကုန် ကုန်းကျော်တံတားများနဲ့ ကားကြပ်မှုကို မြန်မာနည်းနဲ့ အကုန်ကျ အလွန်ကြီးမားစွာ ဖြေရှင်းနေ တာကို တွေ့ရပါတယ်။ အလားတူပဲ ပညာရေးပြုပြင်ပြောင်းလဲမှုမှာလည်း အထူးသဖြင့် ဆရာများ အရည်အသွေးနှင့်လစာမြှင့် တင်ရေး၊ ကျောင်းသားများ အရည်အသွေးမြှင့်တင်ရေး .. (၂) ရပ်ကို အစိုးရ ပညာရေးဝန်ကြီးဌာနကပဲ လုပ်ဆောင်မှရမှာ ဖြစ်ပါတယ်။ မြန်မာအစိုးရသစ် ၂၀၁၆ မှာတက်လာရင် ပညာတကယ်ထူးချွန်ကြိုးစားတဲ့ ကျောင်းဆရာများ၊ ကျောင်းသားများ ကို မွေးထုတ်မယ့်ပညာရေးစနစ် ဖြစ်လာမယ်လို့ မျှော်လင့်နေမိပါတယ်။

ဇော်အောင် (မုံရွာ)


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts