ခေတ်ပြိုင်အတွေ့အကြုံ

သွန်းခ – ဂုံမင်းက ရေဘေးသင့်ပြည်သူတွေနဲ့ ထမင်းတနပ်

 

 

သွန်းခ –  ဂုံမင်းက ရေဘေးသင့်ပြည်သူတွေနဲ့ ထမင်းတနပ်

(မိုးမခ) သြဂုတ် ၃၁၊ ၂၀၁၅

 

“ ဟေ့လူ၊ မနက်ဖြန်မနက် ၇နာရီ လွယ်ဟိန်းရုံး ကိုလာခဲ့”

 

         အောင်မလေး၊အမိန့်ပေးသံပြင်းချက်။ အမိန့်တွေပေးမှာ မကျေနပ်လို့ ကျန်းမာရေး ဝန်ထမ်းဘဝနဲ့ အလိုလိုကမှ တင်းနေရတဲ့အထဲ။ ဘာပဲဖြစ်ဖြစ်လေ၊ ရုံးပိတ်ရက်မှန်းသိလို့ သူခေါ်တိုက်…. အဲလေ… သူခေါ်တွေ့တာနေမှာပါ ၊ရေးစရာတော့ရမှာပဲ လို့တွေးပြီး လွယ်ဟိန်းရုံးရှေ့ရောက်သွားခဲ့တာ ပြီးခဲ့တဲ့၂၉ရက်၊  သြဂုတ်လထဲကပေါ့။

 

 

        လားလား။ ကိုယ့်လူခေါ်တာကုသိုလ်ရဖို့အရေးပါလား။ရေဘေးသင့်ပြည်သူတွေဆီ သွားရမယ့်နေ့ချင်းပြန်ခရီးတို။ ကုသိုလ်လည်းရမယ် ၊ရေးစရာလည်းရမယ့် ကျေးဇူးနည်းမှတ်လို့။ ဘာတဲ့၊ OSOTSPA-LOI HEIN Flood Relief Center  ရေဘေးသင့်ပြည်သူတွေအတွက် ALPINE နဲ့ OSOTSPA_LOI HEIN တို့ပေါင်းပြီးအလှူခံနေကြတယ်။ အဲဒီအလှူငွေတွေ ထဲကမှလှူဖို့ ပစ္စည်းတွေဝယ်စုတယ်၊ လူငယ်အဖွဲ့က သွားလှူပေးတယ်၊ ဘယ်နေရာတွေမှာ လိုအပ်ချက် တွေရှိနေသလဲ၊ လူငယ်တွေကပဲ စုံစမ်းထားခဲ့တယ်။ ကယ်ဆယ်ရေး မရောက်တဲ့နေရာ၊အရောက်နည်းတဲ့ နေရာဖြစ်ရမယ် ၊နေ့ချင်းပြန်ဖြစ်ရမယ်။ အဲဒီအချက်အလက်နဲ့ အဆက်အသွယ်တွေကို ရှာနိူင်ခဲ့တာ အသက်မှ ၂၂ နှစ်ပဲရှိသေးတဲ့ ကရင်တိုင်းရင်းသူ နော်ဆာကပြူမူး ခင်ဗျ။ (ဘုရား၊ဘုရား။ အဲဒီလိုတော်တဲ့ ပရဟိတ စိတ်ရှိတဲ့လူငယ်တွေ နိုင်ငံခြား ထွက်မသွားကြပါစေနဲ့၊လမဟုတ်တရုတ်လူကြီးတွေ စကားနားမယောင်မိပါစေနဲ့)

 

        OSOTSPA-LOI HEIN က National Promotion and Advertising Manager ဦးဇော်တင် က အဲဒီခရီးကို ဦးဆောင်ခဲ့သဗျ။ သိထားကြအောင်ပြောလိုက်ဦးမယ်။ OSOTSPA က M-150 အားဖြည့်အချိုရည်ထုတ်နေတဲ့ ထိုင်းက ကုမဏီ ခင်ဗျ။ LOI HEIN နဲ့ပေါင်းပြီး လုပ်ငန်းတွေ လုပ်နေတာပေါ့ဗျာ။ ထားပါ၊ ထားပါ၊ သိအောင်ရေးရတာပါ။ကိုယ်သွားမယ့် ခရီးဘယ်သူစီစဉ်တာလဲ ဆိုတာ့သိထားရမှာပေါ့လေ။ လူငယ်တွေကရော ကရင်လူငယ်တွေချည်းများတယ်ခင်ဗျ။ ကရင်လူငယ်များ အဖွဲ့တဲ့လေ။ ငယ်ငယ်လေး တွေများပါတယ်။ လူငယ်တွေဆိုမှတော့လည်း တကယ့်လူငယ်တွေပဲပေါ့။ လူကြီးဖြစ်နေပြီ၊ လူကြီးမဟုတ်သေးဘူးလို့ အတင်း တင်းခံနေကြတဲ့ ဟာကြီးတွေမှ မဟုတ်တာကိုး။ (အသက်ကပြည့်နေပြီ၊ပင်စင်မယူပဲ နေချင်ကြတဲ့သူတွေ ၊ကြံဖန်ပြီး အကြံပေးနေကြတဲ့သူတွေကိုပြောပါတယ်)

        မြစ်ဝကျွန်းပေါ်ခရီးကတော့ ခါတိုင်းနဲ့ကိုမတူပါဘူးဗျာ။ အပျော်ခရီးမဟုတ်တာလည်း ပါတယ်လေ။ ဒုက္ခရောက်နေတဲ့ သူတွေဆီသွားရမှာ ဘယ့်နှယ်လို့ ပျော်စရာခရီးဖြစ်ပါလိမ့်မလဲ။ လမ်းမှာတွေ့ရတာ နွားတင်းကုပ်တွေဗျာ ၊ဖြစ်သလိုထိုးထားတဲ့ တဲတွေဗျာ။ရေဘေးသင့်ပြည်သူ စစ်စစ်တွေပေပေါ့။ ပုသိမ် ရောက်ခါနီး ၂၆ မိုင်အလိုမှာ ဂုန်မင်းကျေးရွာ အုပ်စုကိုရောက်သဗျ။ အဲဒီမှာ ရေးထားတာတော့ ဂုန်မင်းပဲ။ ရွာထဲရောက်တော့ ဂုံမင်း ဘူတာတဲ့၊ ဂုံမင်း ဘုန်းတော်ကြီးကျောင်းတဲ့။စာကရေးချင်တဲ့လူဆိုတော့ ဘယ်ဟာအမှန်လဲ သိချင်ခဲ့ပေမယ့် အလုပ်ရှုပ်နေကြတဲ့ အချိန် မမေးဖြစ်တော့ပါဘူး။ အရေးများတာ တွေ့ရတဲ့  ဂုံမင်း ပဲသုံးလိုက်ပါတော့မယ်။ ရောက်ပြီဆိုတာ “ဂုန်မင်း၊ လှိုက်လှဲစွာကြိုဆိုပါ၏ ” ဆိုတဲ့ ဆိုင်းဘုတ်အောက်ပဲ ရောက်သေးတာ။

 

 

ဂုံမင်းကျေးရွာအုပ်စုဆိုတာ ရွာပေါင်း ၃ ရွာကိုပေါင်းခေါ်တာ။ ဧရာဝတီတိုင်း သာပေါင်းမြို့နယ်အုပ်စု (၇ဝ)  ထဲမှာ အစွန်ဆုံးကျတဲ့ ကုန်းလမ်းလည်းမဟုတ် ရေကြောင်းချည်းလည်း အားကိုးလို့မရ၊ရထားလမ်းဆိုတာကလည်း တကယ့်တကယ်နေရာမကျပြန်တဲ့ အိမ်ထောင်စု ၆၃၈စု၊ လူဦးရေ ၂၈၈၄ ယောက်နေကြတဲ့ ဂုံမင်း ကျေးရွာအုပ်စု။ 

 

 

အုပ်ချုပ်ရေးမှုးကေ တော်တယ်ဗျ။ တကယ်ကို စနစ်ကျကျ၊လှူတဲ့ပစ္စည်းတွေကို အလှူ့ရှင်တွေလည်း ကုသိုလ်ရ၊ရေဘေးသင့်ပြည်သူတွေလည်း သာဓုခေါ်နိုင်အောင် စီစဉ်ထားတာ။ ပစ္စည်းတွေကို အိမ်တိုင်ရာရောက်ကို လိုက်ပို့ပေးတော့တာပါပဲ။ ကားတွေပေါ်ကနေ ပစ္စည်းတွေကို ရွာခံတွေ၊ ကရင်လူငယ်အဖွဲ့တွေပေါင်းတဲ့ လုပ်အားနဲ့ ရွာဦးကျောင်းတော်ကိုရွေ့ကြတယ်ဗျာ။ သယ်တဲ့သူတွေအားလုံးချွေးတွေကိုရွဲလို့။ မှတ်တမ်းဓါတ်ပုံရိုက်ရတာ နဲ့တောင် ချွေးဒီးဒီးကျပါတယ်ဆို။ ဓါတ်ပုံကောင်းရချင်တော့ ဇောလည်း ပါတာပေါ့ဗျာ။

စပ်စပ်စုစုနဲ့ အဲဒီအလှူကျောပိုးအိတ်ထဲ ဘာတွေထည့်ထားမိလဲ မေးမိလို့ ကိုယ့်ဆရာက အလွတ်တောင် ရွတ်ပြနေသေးတာပါလား။  Seeing is believing တဲ့။ရွာဦးကျောင်းထိုင်ဆရာတော် ဦးခေမာစာရ သီလပေး၊ အမျှဝေ၊ သာဓုခေါ်နေတုန်း ကျောပိုးအိတ်ပေါင်း ၅ဝဝ ထဲက တစ်အိတ်ကိုဖွင့်၊ပစ္စည်းတွေထုတ်၊ ဓါတ်ပုံပါ ရိုက်ပစ်လိုက်ရော။ ငါးသေတ္တာ၂ဘူး ၊ခေါက်ဆွဲခြောက်၂ထုပ်၊အာဟာရဘူးပျော့ ၄ဘူးတွဲ၊ M-150 ၂ပုလင်း၊ SHARK ၂ဘူး၊ Babi Mild ဆပ်ပြာ ၄ တုံးတွဲ၊ဖယောင်းတိုင်တစ်ထုပ်၊ မီးခြစ်တစ်လုံး ၊ခြင်ထောင်၁လုံး၊  အကျီ်၁ထည်၊ ဆရာခိုနဲ့ ဂဠုန်ရာဇာ ၁ပုလင်းစီ၊ ပါရာစီတမော ၁ဝလုံး ၁ကဒ်၊ ဓါတ်ဆားထုပ်၂ထုပ်၊ ဆား ၁ ထုပ် ၊ကျောက်ချဉ်အထုပ်သေး ၂ ထုပ်နဲ့ အမျိုးသမီး လစဉ်သုံး ပစ္စည်းက ၁ ထုပ်စီပါတာကိုးဗျ။ ALPINE သောက်ရေသန့်၆ ဘူးတွဲ ကဒ်ပေါင်း ၅ဝဝနဲ့ ဆန် ၂ကီလိုစီ ထုပ်ထားတဲ့အထုပ်တွေလည်း ပါသဗျ။ အဲဒါတွေ ကဝန်ကျယ်တော့ သတ်သတ်ထားတာတွေ။

 

 

        ကျောင်းတော်ပေါ်မှာပဲ ထမင်းကျွေးလိုက်ကြသေးတဲ့ ရွာခံတွေကို စားခဲ့ပြီးကြပြီ ပြောလည်း နည်းနည်းဖြစ်ဖြစ် စားသွားကြပါဆိုတာ … ဒုက္ခသည်တွေရဲ့ တစ်ပြန်ဒါနပေပဲပေါ့။တတ်နိူင်ရင်ဝန်ထုပ်ဝန်ပိုးမဖြစ်အောသ် ဘာမှ မစီစဉ်ထားကြပါနဲ့ လို့ ကြိုကြိုတင်တင်မှာထား ကောင်းမှာနော်။ မှာလည်းကျွေးဖြစ်အောင် ကျွေးကြမယ့် ဧရာသားတွေပါဗျာ။ ချက်ထားလိုက်တာများ လူအယောက် ၁ဝဝ စာပါတဲ့။

 

         ဘုန်းကြီးကျောင်းကနေ တခါ လှေဆိပ်ကို ပစ္စည်းတွေရွေ့၊ စက်လှေတွေပေါ်ခွဲတင်၊ အဲဒါလည်း  ရွာခံတွေနဲ့ ကရင်လူငယ်အဖွဲ့ ပါပဲခင်ဗျ။ လက်ဆင့်ကမ်းသယ်ကြရ တော်တော်တော့ ပင်ပန်းသား။  ဂုံမင်းအုပ်စု ၃ ရွာထဲက သဲဗွက်ရွာကို စက်လှေတွေမောင်းသွား၊ ဆယ်အိမ်မှုးတွေခေါ်၊နီးတဲ့ အိမ်တွေတစ် တခါတည်းဝေ၊ ပယ်အိမ် ဝေအိမ်စာရင်းက အုပ်ချုပ်ရေးမှုးဆီမှာရှိပြီးသား။ တချို့ပြည့်ပြည့်စုံစုံရှိကြတဲ့ အိမ်တွေက လိုအပ်နေသူတွေကိုဝေပါလို့ ပြောထားထားတော့ ပယ်အိမ်အဖြ စ် သတ်မှတ်ထားတာပါ။ အလှူပစ္စည်းတွေနဲ့ လိုနေသေးတဲ့မိသားစုတွေ မလောက်ငှပါဘူး။ အုပ်ချုပ်ရေးမှုးက သူကိုယ်တိုင် မေတ္တာရပ်ခံနေတာ စက်လှေတစ်စီးတည်း ဆိုတော့ သိနေတာပေါ့ဗျာ။နောက်ထပ်ရောက်လာမယ့် အလှူ့ရှင်တွေကျရင် အလှည့်ပေးပါ့မယ်တဲ့ခင်ဗျ။ ရန်ကုန်က သယ်သွားသမျှ ပစ္စည်းတွေအကုန်အစင်၊ အပြောင်၊ ညီတူမျှတူဝေပေး လိုက်တာ မျက်မြင်ပါပဲလို့။ သဲဗွက် ကအပြန်ခပ်လှမ်းလှမ်းမှာမြင်နေရတဲ့ ကျောင်းကုန်း၊ လက်ပံချောင်အုပ်စုကိုလည်း မေတ္တာရပ်ခံထားရပါသတဲ့။ နောက်အလှူရှင်မျှော်ကြဦးစို့ ဆိုသလို ပါပဲလား။

 

 

       ဒါနဲ့မနေနိူင်၊ မထိုင်နိူင်ရှိတတ်တဲ့ သွန်းခက နိုင်ငံရေးပါတီတွေကရော လာမလှူဘူးလား ဆိုတော့ အမျိုးသားဒီမိုကရေစီအဖွဲ့ချုပ်က ဆန် ၁၆ အိတ်လာလှူသွားပါတယ်တဲ့ ။နိုင်ငံတော်ကရော ခင်ဗျာဆိုတော့ မြို့နယ်က ရေဘေးသင့်ကာလတစ်လျှောက်လုံးမှာ ၁၃ အိတ် ၂ ကြိမ်ခွဲပြီးလာလှူပါသတဲ့။ ရွာက  ၃ရွာ၊ အိမ်ထောင်စုပေါင်း ၆၃၈ စု၊ လူဦးေ ရပေါင်း ၂၈၈၄ ယောက်အတွက် ဆန် ၁၆ အိတ်နဲ့  ၂၆အိတ် ပေါင်း ၄၂အိတ်။ အင်း… … …ကြိုကြိုတင်တင်ပြောထားခဲ့တဲ့ ထမင်းတစ်နပ်လျှော့စားဆိုတာ အဲဒါကြောင့်များလား။                                                                                                                                         

 

 

 

 

 

 

                                                        


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts