ကဗျာ

(၈၈) လက်သီးဆုပ်များရဲ့ ရာဇဝင်မြောက် အမိန့်  (Kyaw Home)


(၈၈) လက်သီးဆုပ်များရဲ့ ရာဇဝင်မြောက် အမိန့် 

ကျော်ဟုန်း၊ သြဂုတ် ၇၊ ၂၀၁၂

ပြောကြရမယ်ဆိုရင်

ဒီလက်သီးဆုပ်တွေက

ပုဆိုးခြုံ ထမီခြုံထဲက ပြခဲ့တာမဟုတ်ဘူး၊

အာဏာရှင်သေနတ်ပြောင်းထွက်တဲ့ ကျည်ကြား

ပြခဲ့တဲ့ ရဲရင့် လက်သီးဆုပ်တွေ။

ရှစ်လေးလုံးဆိုတဲ့ ၈-ရက်၊ ၈-လ၊ ၈၈ ဟာ

နုနယ်တဲ့ လက်သီးဆုပ်တွေ လေထဲမြှောက်ရင်း

ဟစ်ကြွေးခဲ့တဲ့ ကျောင်းသား၊ ပြည်သူတွေရဲ့ အသံဟုန်

ဧရာဝတီမြစ်ဝှမ်းကနေ မေခ-မေလိခ အထက်ဆန်

တနှင်္တရိုး ဖြိုးမောက်သွားခဲ့တယ်။

ရန်ကုန်မြစ်မှ ပင်လယ်ဆီ လှိုင်းထန်

ပင်လယ်မှ သမုဒ္ဒရာများစီး မုန်တိုင်းဖြစ်

တံတိုင်းခတ်ထားမရ ကြားစေခဲ့တဲ့ (ဒို့ အရေး)

ဒီမိုကရေစီ ရရှိရေး (ဒို့ အရေး-ဒို့ အရေး)။

ရှေ့ နောက်တောင်မြောက် အရပ်ရပ်ကမ္ဘာက

ပေါင်မုံ့ စားသူတွေ၊ အာလူးစားသူတွေ

ခေါက်ဆွဲစားသူတွေ၊ ဂျုံပြားစားသူတွေ

ဆူရှီစားသူတွေ၊ ဆန်ထမင်းစားသူတွေ

အားလုံး အာရုံစိုက်ခဲ့ရတဲ့ အဖြစ်။

ရှစ်လေးလုံးဟာ

ဓမ္မနဲ့ အဓမ္မ သရုပ်ခွဲပြတယ်၊

အပ်တိုတချောင်းမရှိဘဲ

မိုးပေါ်ထောင်မပစ်တဲ့ ကျည်ရှေ့ ရင်ဖွင့်ပြတယ်၊

အာဏာရှင်ရဲ့ထိုင်ခုံ မိုးကြိုးပစ်ပါရောလား။

အာဏာရှင်ဆိုတာကလဲ ဇ-နဲ့ ၊ ခေသူမဟုတ်

တစစီကွဲသွားတဲ့ ထိုင်ခုံကို ကော်နဲ့ ပြန်ဆက်-ထိုင်တယ်၊

အာဏာရှင်နံရံကို ထိုးတဲ့လက်သီးများ သွေးစီးဆဲ

စီးသွေးတွေ သွေးစည်းနေတော့ အာဏာရှင်နဲ့ ထိပ်တိုက်တွေ့ 

အဲ့သလိုနဲ့ ပွဲကြမ်းလာလိုက်တာ ကျောင်းသားတွေ၊ ဒီမိုတွေဟာ

စကြဝဠာထဲက ပဲ့ကြွေလာတဲ့ ဥက္ကာပျံတွေလို

ကမ္ဘာထဲ လွှင့်စင်ဝဲလိမ့်သွားခဲ့ပေါ့ (၂၄)နှစ်၊

တချို့ က- တောထဲတောင်ထဲ သေနတ်ဆွဲ

တချို့ က- ရုံးထဲ ဂတ်ထဲ ထောင်ထဲ

တချို့ က- ဟန်မပျက် ငြိမ်သက် ပြာဖုံးမီးခဲ

၈၈ ရဲ့အခန်းဆက်များ

ဒီမိုးက ရေစီးသွားတဲ့အခါ ( …… ) ။

ဒီမိုကို ရန်သူကတောင် ယောင်ရမ်းပြီး

စည်းကမ်းရှိတဲ့ ဒီမိုကရေစီလို့ 

သံယောင်သံဝါ လိုက်နေကြရတဲ့ (၂၄)နှစ်။

ငါတို့ က ဒီနေ့ တွေကို တရွက်ချင်းလှန်ဖတ်ရင်း

မဆုံးသေးတဲ့အိပ်မက်ထဲ လျှောက်နေဆဲသူတွေ၊

သူတို့ ကလဲ မနေ့ ကတွေကို ရွှေထီးဆောင်းဖို့ 

ထီးကျိုးကို မွမ်းမံချင်နေတဲ့သူတွေ၊

မင်နဲ့ ရေးတဲ့ သမိုင်းလိမ်တွေကို

သွေးနဲ့ ရေးခဲ့ သမိုင်းစစ်က ဖော်ထုတ်တတ်မြဲမို့ 

၈ရက်၊ ၈လ၊ ၈၈ခုနှစ်ကို ဘယ်တော့မှ မမေ့။

သဘာဝအရ….

စစ်ဦးကျိုးခဲ့သူတွေ ရှိမယ်

စစ်မျက်နှာအသစ် ဖွင့်နိုင်သူတွေ ရှိမယ်

စစ်ပမ်းလို့ နွမ်းနယ်သူတွေ ရှိမယ်

စစ်တမ်းတော့ အဲ့ဒီလူတွေရင်ထဲ မပြတ်ရှိတယ်။

ဒါကြောင့် …ရဲဘော်တို့ ရေ…

ဗမာနိုင်ငံ့သမိုင်းကို တဆန်းဖွင့်လှစ်

ရှစ်လေးလုံးအရေးတော်ပုံနေ့ သစ်ကို

ဗမာပြည်မှာ ဘယ်အစိုးရတက်တက်

သမိုင်းဝင်နေ့ အဖြစ် သတ်မှတ်ဂုဏ်ပြု

ဂေဇက်ဝင်ဟောလီဒေး အဖြစ် တောင်းဆိုကြရမယ်။

ဘဝကြေ၊ ဘဝတေ၊ ဘဝစွေတွေနဲ့ ရင်းထား

နှောင်းနောင်ကောင်းကျိုးပွားများဖို့ လုပ်ခဲ့တဲ့ ရှစ်လေးလုံး

လူထုခေါင်းဆောင်ဖော်ထုတ် ပခုံးထမ်းတင်နိုင်ခဲ့တဲ့ရှစ်လေးလုံးမို့ 

ဘယ်အခြေအနေ၊ ဘယ်နှစ်ခုနှစ်ရောက်ရောက်

(ဗမာပြည်ဖွားတိုင်း ဦးညွတ်အလေးပြုစေ)

ကမ္ဘာအရပ်ရပ် နိုင်ငံအသီးသီးက တို့ ရဲဘော်တွေ

ကျဆုံးသွားတဲ့ ဒီမိုသူရဲကောင်းအပေါင်းကို ဦးညွတ်

ဗမာပြည်ဘက်ကို မျက်နှာမူ

( ၈ လ၊ ၈ ရက်၊ ၈ နာရီ၊ ၈ မိနစ်မှာ

အားလုံး ….

အလေး…ပြု )။                ။

 ( ဒီမိုတိုက်ပွဲဝင် သစ္စာဖြင့်  ….. )


သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ

Similar Posts