ဘီဘီစီ မြန်မာပိုင်း
ဇူလိုင် ၂၂၊ ၂၀၁၂
မြန်မာအစိုးရက ဂျပန်ကျ တပတ်ရစ် ကားတွေကို ရန်ကုန်ကို တိုက်ရိုက် တင်သွင်းခွင့် ပေးပြီးတဲ့ နောက်ပိုင်းမှာ ပျက်လုနီးပါး ဖြစ်သွားတဲ့၊ ထိုင်းနဲ့ မြန်မာ၊ မဲဆောက် မြ၀တီနယ်စပ်က ဂျပန်ကား အဟောင်း ဈေးကွက်ဟာ အခုပြန်ပြီး အရောင်းအဝယ် ဖြစ်လာပါတယ်။
ဂျပန် ကားအဟောင်း ဈေးကွက် မဲဆောက် မြဝတီ နယ်စပ်ဘက်ကို ပြန်ရောက်လာရတာဟာ၊ ၂၀၀၇ အထက် မော်ဒယ် ဂျပန်ကျ တပတ်ရစ်ကားတွေကိုပဲ ရန်ကုန်ကို တိုက်ရိုက် တင်သွင်းခွင့် ပေးတော့မယ်လို့ အစိုးရက သတ်မှတ်ပေးပြီးတဲ့ နောက်ပိုင်းမှာ အဲဒီလို ကားကောင်း ကားသန့်တွေ ကလည်း ဂျပန်မှာ ရှာရခက်လာတဲ့အတွက် ကုန်သည်တွေက ဈေးပေါတဲ့ မော်ဒယ်နိမ့် ကားတွေကို စွန့်စားပြီး ဝယ်လာရာကနေ ဈေးအင်မတန်ပေါတဲ့ ဂျပန်ကား အဟောင်းတွေ အရောင်းအဝယ် ဖြစ်လာတာပါ။
အကြွေ = ကားအစိတ်အပိုင်း
ဂျပန်က ကားအကောင်တွေ နောက် မလေးက အကြွေတွေ၊ အဲလိုမျိုး ပုံးတွေ မဲဆောက်ဘက်ပဲလာကြောင်းနဲ့ ဂျပန်က စပယ်ယာပတ် ဈေးဝင်တယ်ဆိုရင် ဝယ်ပစ်လိုက်တာ ဖြစ်တယ်လို့ နယ်စပ်ကို ရောက်လာနေတာကို ကုန်သည် တယောက်က ရှင်းပြပါတယ်။
ကားအကောင် ဆိုတာက ကားအစီးလိုက် ဝယ်လာတာကို ဆိုလိုတာ ဖြစ်ပြီးတော့ အကြွေတွေ ဆိုတာက ကားရဲ့ အစိတ်အပိုင်းတွေကို ဆိုလိုတာဖြစ်ပါတယ်။
ကားအစိတ်အပိုင်းတွေကိုလည်း မဲဆောက် နယ်စပ်က ကားအဟောင်း ဈေးကွက်မှာပဲ ပုံရောင်းကြပြီး၊ မြန်မာနိုင်ငံထဲမှာ ယာဉ်တိုက်မှု၊ မတော်တဆ ဖြစ်မှုကြောင့် ပျက်စီးသွားတဲ့ အစိတ် အပိုင်းတွေရဲ့ မူရင်းပစ္စည်းကိုပဲ ပြန်သုံးချင်တယ် ဆိုရင် ဒီဈေးကွက်မှာ ဝယ်ယူကြပါတယ်။
အဲဒီဈေးကွက်မှာက ကားရှေ့နဲ့ လေကာမှန်၊ နောက်ကြည့်မှန်၊ ဘောနတ်၊ ဘေးတံခါး၊ ထိုင်ခုံ၊ လက်ကိုင်ဘီး၊ အင်ဂျင်၊ ဖရိန်အဆုံး၊ ကားတစီးလုံးက ပစ္စည်းတွေကို ပြန်လဲလို့ ရလောက် အောင်ကို ပစ္စည်းတွေက စုံပါတယ်။
လပေါင်း အတော်ကြာအောင် အရောင်းအဝယ်တွေ ရပ်ဆိုင်းသွားလို့ ကားကုန်သည်တွေ ဘတ်ငွေ သန်းထောင်နဲ့ချီ ဆုံးရှုံးကာ ပျက်လုနီးပါး ဖြစ်သွားတဲ့ မဲဆောက် နယ်စပ်က ဂျပန်ကား အဟောင်းဈေး ကွက်ဟာ အခုတကျော့ ပြန်သက်ဝင် လှုပ်ရှားလာတာ ဖြစ်ပါတယ်။
အခုစီးပွားရေး သတင်းကို မဲဆောက်က ဘီဘီစီ သတင်းထောက် ကိုအောင်ကျော်ဦးက ပေးပို့ခဲ့တာ ဖြစ်ပါတယ်။
မူရင်း – ဘီဘီစီ www.bbc.co.uk/burmese
သင့်အကြောင်း သင့်လုပ်ငန်း ကြော်ငြာ သည်နေရာမှာ ကြော်ငြာနိုင်ပါပြီ
